Read Lengua Sur Isaías 63 Bible Online

Isaías 63 - Lengua Sur bible

Isaías 63

¹—¿Yaqsa xa ekxegakmo nak eñama Bosrá, apyawakxa nak tegma agkok ma'a Edom, apkelyexwase nak apkelnaqta, apxegakmo nak apkeltaqmalma apagko' apkelnaqta, apyennaqtésakmo apagko' nak apyempehek apxegakmo? Ko'o xa, sekxeyenmo nak chá'a negmallanma, émeyhek han ko'o yaqwayam alwagkasek teyp.

²—¿Yaqsa ektéma apkelyexwásama nak apkelnaqta? máxa m'a apkelteyáyekmo enxoho anmen yámet ekyexna.

³—Élteyáyekmek ko'o exakkók anmen yámet ekyexna, méko sepasmoma; élteyáyekmek ko'o yetlo seklómo ahagko' ma'a sélenmexma, élteyammeykha yetlo seklo, keñe éma apagkok ekpálwaya m'a sélántaxno, kelyexwáseseykha apyókxoho m'a sélnaqta.

⁴Xeyenmeyk axta ko'o ewáxok xama ekhem axnéshok mók apkeltémakxa m'a sélenmexma; wokmek kaxwók ekhem yaqwánxa alwagkasek teyp ma'a énxet'ák ahagkok.

⁵Eksawheykha axta ko'o exma, méko axta xama énxet enxoho sepasmo; etlakkassek axta sekwet'a méko sewéhenayo. Sekmowána axta ewagkásak teyp seklo axta ewasqakkásak.

⁶Élteyammeyha axta ko'o yetlo seklómo ahagko' ma'a pók aptémakxa nak chá'a énxet'ák, ekmasséssekmek axta yetlo seklo, ekyegkenchessek axta éma apagkok náxop.

⁷Peyk ko'o axének Wesse' egegkok segásekhayo, peyk alpeykeshok eñama m'a ekyókxoho sekteméssessamakxa axta negko'o, eñama apkelásekhayo ekwányam agko' ma'a énxet'ák Israel, eñama m'a apteméssessamakxa axta chá'a ektaqmeleykencha'a apwáxok apkelányo tén han apkelásekhayo ekwányam agko'.

⁸Aptáhak axta s'e: “Ko'o énxet'ák ahagkok xa, étchek yaqwayam sa' mehelyexanchesha chá'a.” Axta nahan apkelwagkasso teyp

⁹ekyókxoho apkellegeykegkoho ekyentaxnamo apkelwáxok ma'a. Háwe apkelwagkasso teyp xama m'a apkelápháseykha nak xép; Wesse' egegkok apagko' axta. Axta apkelwagkasso teyp ma'a eñama apkelásekhayo tén han apkelmopyóseka apkelányo, apkelchampásekxeyk axta néten keñe apkelqeynákxo. Cháxa apteméssessamakxa chá'a yókxoho ekhem xa ektáha nak.

¹⁰Apkenmexeykekxeyk axta eyke Wesse' egegkok xa énxet'ák nak, apkelapwagkassegkek axta m'a espíritu aptaqmalma apagkok; axta keñamak aptamheykekxo apkelenmexma m'a énxet'ák nak, apkempakhayak axta nahan.

¹¹Xénwákxók axta apkelwáxok nanók agko' axta m'a, cham'a Moisés apkelwagkassama axta teyp ma'a énxet'ák apagkok, aptáhak axta chá'a apkelmaxneyáncha'a pók se'e: “¿Háxko aphakxa m'a Dios, apwagkassama axta teyp neyseksa wátsam Nilo m'a Moisés, apkeláneseykha axta chá'a m'a nepkések apnaqtósso? ¿Háxko aphakxa m'a apméssama axta espíritu aptaqmalma apagkok ma'a Moisés,

¹²apkeltémo axta keytlawha apmopwána eyeymáxkoho m'a Moisés, apmeykáséykekxo axta neyseksa wátsam ekwányam apmonye'e m'a énxet'ák apagkok yaqwayam enxoho kólya'asagkohok chá'a ekyókxoho yókxexma, meyke néxa,

¹³apkelyeykháseykekxo axta kañók agko' wátsam ekwányam meyke apkeltáxñeykha m'a énxet'ák apagkok, aptémól'a yátnáxeg elxog ma'a yókxexma ekyamáyekxa nak xapop,

¹⁴ektémól'a weyke kalchexyók kalmeyenták ma'a ekpayhegweyktamxa nak xapop?” Wesse' egegkok espíritu apagkok axta naqleykha m'a. Cháxa aptémakxa axta apnaqleykencha'a m'a énxet'ák apagkok tén han aptéma kélya'áseykegkoho ekyókxoho yókxexma, tén han apcheymákpoho.

¹⁵Wesse', yenmexentámho aphamakxa nak néten, cham'a aphamakxa ekpagkanamaxchexa eyeymáxkoho nak. ¿Háxko ekmahágkaxa m'a segásekhayo ekyawe axta tén han apyennaqte? ¿Háxko ekmahágkaxa m'a ekyetnakhassamo nak apwáxok negko'o? ¿Masseya nélmayóseka senlano negko'o?

¹⁶¡Xép apteme negko'o egyáp! Mehẽlya'ásegkok eykhe m'a Abraham, megkaxénwakxók nahan negko'o apwáxok ma'a Israel, Wesse', xép apteme negko'o egyáp; nanók xép apteme sẽlwagkasso teyp.

¹⁷Wesse', ¿yaqsa ektéma apkeltémo nak ólyetnakhágwók nélyetlo m'a ámay apagkok? ¿Yaqsa ektéma sẽlyennaqtéssessama nak egwáxok yaqwayam enxoho magakyehek xép? Hẽgyo'óta makham, eñama apkelásekhayo m'a apkeláneykha nak tén han ma'a pók aptémakxa nak chá'a énxet'ák ektáha nak xép apagkok.

¹⁸¡Yaqwatakxoho agko' aptemék apagkok apchókxa m'a énxet'ák apagkok apkelpagkanamap nak! Apkelteyammeykha tegma appagkanamap apagkok ma'a sẽlenmexma nak negko'o.

¹⁹Máxa entemék metnama enxoho exchep Wesse' egegkok, máxa entemék mantéma enxoho énxet'ák apagkok.