Read Lengua Sur Isaías 66 Bible Online

Isaías 66 - Lengua Sur bible

Isaías 66

¹ Aptáhak Wesse' egegkok se'e: “Néten ekteme sekhamakxa ko'o keñe xapop sélteyeykemxa. ¿Háxko kélwanchek héllanaksek ko'o xama tegma? ¿Háxko sa' kélwanchek héllanaksek ko'o séllókassamakxa sekyampe?

²¡Ko'o ahagko' sélane ekyókxoho xa aqsok nak, axta keñamak élánteyapma! Ko'o sekxeyenma xa, sektáha nak Wesse'. “Énxet sekpasmomo nak chá'a ko'o, cham'a énxet apmopyósa nak ekyentaxnamo nak chá'a apwáxok apcháyo nak chá'a m'a sekpeywa.

³Yetneyk eyke nahan ma'a apkelnapma nak chá'a weyke kelennay'a, tén han ma'a apkelnapma nak chá'a énxet; apyaqténchesso nak chá'a apyespok ma'a nepkések tén han apwápakhe nak chá'a m'a semheg; tén han apkelmésso nak chá'a aqsok aktek kélcheneykekxa tén han yátapomap éma apagkok; tén han apkelwatno nak chá'a aqsok ekmátsa nak ekpaqneyam éten agkok, apkelpeykessamo nak chá'a m'a kéleykmássesso. Apmenyeyk elanagkok ekyókxoho apkelyéseykha nak chá'a xa ektéma nak élánamáxche aqsok ekmaso agko'.

⁴Alyéssesha sa' eyke ko'o xa apkellegeykegkoho yaqwayam almések ma'a, wáphássesek sa' ma'a aqsok apkeláyo apagko' nak chá'a. Hakte élwóneykha axta eykhe, keñe méko seyátegmoweykegko, élpaqhetchessegkek axta eykhe keñe méko xama seháxenmo; apkeláneykegkek axta aqsa m'a aqsok mamámenyého nak ko'o, apkelyéseykha axta m'a megkaleklamakxa nak ko'o ewáxok.”

⁵Kóleyxho Wesse' egegkok appeywa, kéxegke kélyeheykekxoho nak chá'a appeywa: “Aptáhak apkelpaqmeta pók xam'a kélókxa xamo' apkeltaqnagkama nak chá'a kéxegke s'e, apkeltaqnaweykencha'a nak chá'a eñama kélxeyenma m'a sekwesey: ‘Wesse' egegkok sa' exekmósek apcheymákpoho; egmenyeyk negko'o agwetak kalpayhekxak apkelwáxok.’ Elmegqágwakxohok sa' eyke apteme nak apkelpeywa xa ektáha nak.

⁶Wesse' egegkok apkextegyawasso xa ektepa nak éxtegyawà m'a tegma apwányam tén han ekyennamáxma ektepa nak ma'a tegma appagkanamap, yaqwayam eyaqmagkásekxak apkeltémakxa m'a apkelenmexma nak.

⁷“Ekmanyehe agko' táhak naqláwa m'a Sión megkanyegkohok ekmáske awáxok ekmáheyo katnehek naqláwa.

⁸¿Yaqsa eklegaya kaxének ekhémo xa ektéma nak aqsok? ¿Yaqsa ekweteya ekhawo xa ektéma nak? ¿Katyaphoya chá'a xama ekhem agko' ma'a xama apchókxa? ¿Elántéphoya chá'a énxet ekmanyehe agko'? Xama axta ekmako kañegkohok ekmáske m'a Sión yetlókok axta ekteme naqláwa ekwet'a étchek.

⁹Mowanchek ko'o amássesagkok yaqwayam kótak étchek hakte ko'o sekmésso yaqwayam katnehek naqláwa.” Dios Wesse' agkok apxeyenma xa.

¹⁰“Kalpayhekxa kélwáxok xamók Jerusalén, kólátsaha agko' xamók ma'a, kélyókxoho ektáha nak kélásekhayo; kólwahánho ekpayheykekxa awáxok kélyókxoho, kéllekxagweykha nak chá'a kóllano';

¹¹hakte máxa xama egken ma'a, kalagkok sa' ma'a aqsok ekpeykeseykexoho nak egwáxok ekwokmoho kélyaqkanakmo.

¹²Hakte ektáhak ko'o sekpeywa s'e sektáha nak Wesse': Wának sa' ko'o káhapwak meyke ektáhakxa egwáxok ma'a ektémól'a kaxegmak ma'a yegmen ényé, tén han ma'a aqsok ekxámokma apagkok nak ma'a pók aptémakxa énxet'ák ektémól'a m'a yegmen ekyawél'a, ekteyapmal'a m'a neyáwa'. Sa' kalagkok kéltéyak kéxegke m'a, kalqeynmakha sa' nahan, kaláhapmakha sa' kaxnésha awáxok.

¹³Sa' atnéssesek ko'o kéxegke alpeykessásekxak kélwáxok ma'a ektémól'a xama egken kapeykessásekxak apwáxok ma'a étche, kólwetágwók sa' ekpayhegwayam kélwáxok ma'a Jerusalén.”

¹⁴Kélwet'ak sa' agkok kéxegke xa, kalpayhekxak sa' kélwáxok; kayaqmagkasek sa' mók ektémakxa kélyempe'ék ektémól'a m'a pa'at. Exekmósek sa' apmopwána Wesse' egegkok nepyeseksa m'a apkeláneykha, keñe sa' aplo m'a nepyeseksa nak apkelenmexma.

¹⁵Hakte ewaták sa' Wesse' egegkok neyseksa táxa, hawók samaxche m'a yátnáxeg apyenyawasso apagkok nak; eyenyenták sa' aplo tén han ma'a táxa eyáléwe apagkok senlegassáseykegkoho nak.

¹⁶Yetlo táxa sa' etnehek Wesse' egegkok elyekpelkohok énxet keso náxop, elyekpelkohok sa' apyókxoho énxet yetlo sókwenaqte apagkok, apxámok sa' etnehek apkelnapma.

¹⁷Aptáhak Wesse' egegkok se'e: “Énxet ektáhakxa enxoho appagkanchásamap apcháxñáseykekxa chá'a apyempehek yaqwayam elpeykeshok kéleykmássesso m'a namyep éltaqmalma nak apyetlo nak chá'a pók apmahéyak ma'a neyseksa nak, aptéyak nak chá'a yátapomap aphápetek, tén han ma'a pomo'o, tén han ma'a mók aqsok nawha'ák élmanyása nak, kólmasséssók sa' ekmanyehe agko', hakte ekya'ásegkók ko'o m'a aqsok apkelánéyak nak tén han ma'a élchetamso nak chá'a apkelwáxok. “Ko'o ahagko' sa' nahan eyxyamok wánchásekxak apyókxoho m'a énxet'ák tén han ma'a pók aptémakxa nak chá'a énxet'ák, elchexyamok sa', elwetak sa' ma'a seyeymáxkoho.

¹⁹Agkések sa' ko'o xama aqsok magkenatchesso. Wohok sa' elxeganmok nápakha keñe sa' aláphaksek ma'a apheykegkaxa nak chá'a pók aptémakxa énxet'ák: cham'a Tarsis, Libia tén han ma'a Lidia, apkelókxa, apmopwancha'a nak elmaha m'a yágke, tén han ma'a Tubal, Grecia tén han ma'a apkelókxa makhawók agko' nak, neyáwa nak ma'a wátsam ekwányam, cham'a, mellegaya nak ko'o makham axénaxche', melweteya nak makham ma'a seyeymáxkoho; Sa' ellegaksek nepyeseksa pók aptémakxa énxet'ák seyeymáxkoho m'a.

²⁰Wának sa' ko'o elchexyók apyókxoho kélókxa xamo' nak kéxegke, apkelenyeykta m'a ekyókxoho apkelókxa apkelchánte m'a yátnáxeg, yátnáxeg apkelyenyawasso, tén han ma'a yántéseksek kélpatmeykegkól'a énxet, élyeheykok tén han ma'a yányátnáxeg. “Etnehek sa' xama aqsok sélmésso naqsa ko'o m'a kañe' Jerusalén, egkexe ekpagkanamaxchexa ahagkok nak, ektémól'a m'a aqsok sélmésso naqsa apkelseykental'a chá'a israelitas egheykok élmópeyo m'a tegma appagkanamap ahagkok. Ko'o sekxeyenma xa, sektáha nak Wesse'.

²¹“Alyésha sa' ko'o pók xam'a m'a yaqwayam sa' etnahagkok apkelmaxnéssesso énxet'ák ahagkok tén han etnahagkok Levitas. Ko'o sekxeyenma xa, sektáha nak Wesse'.”

²²Aptáhak axta nahan Wesse' egegkok se'e: “Sa' kaxhok nahan ekwenaqte apheykha kéltawán'ák kélnentámen nak kéxegke tén han kélwesey m'a ekwánxa nak ekwenaqte ekyetno m'a néten axnagkok tén han xapop axnagkok sekmako nak ko'o alána'.

²³Elmeyenták sa' chá'a eltekxekwaták aptapnák emonye' ko'o apyókxoho énxet'ák yókxoho pelten, ekwákxo enxoho chá'a pelten aphaxnagkok, tén han yókxoho sábado. Ko'o sekxeyenma xa, sektáha nak Wesse'.

²⁴“Elchexyók sa', elwetágwaták sa' énxet aphopák ektáha axta ko'o sénmexeykekxa. Meletsepek sa' ma'a yápa apketkók ektáha nak apto, megkaspónhek sa' nahan ma'a táxa ektáha nak élwatno. ¡Yetsek sa' elanok ma'a apyókxoho énxet'ák!”