Read Lengua Sur Isaías 7 Bible Online

Isaías 7 - Lengua Sur bible

Isaías 7

¹Apketámegkek axta Jerusalén ma'a wesse' apwányam Siria apwesey axta Resín, tén han ma'a wesse' apwányam Israel apwesey axta Pécah, apketche axta m'a Remalías, apmakók axta eykhe emok, mopwanchek axta eyke. Cháxa ektémakxa axta xa, aptémakxa axta wesse' apwányam Judá m'a Ahaz, cham'a Jotam axta apketche, aptáwen axta m'a Ozías.

²Kéllegássekxeyk axta wesse' apwányam Ahaz xa amya'a nak tén han ma'a ekheykha nak apxagkok: “Appasmeykxeyk énxet'ák Siria m'a Efraín énxet'ák apagkok.” Yetlókok axta nahan apkelpexyennama m'a wesse' apwányam tén han ma'a énxet'ák, máxa axta aptamhágkok ma'a ektémól'a yámet kalpexyennegkesek éxchahayam ma'a yókxexma.

³Keñe axta Wesse' egegkok aptáha apcháneya Isaías se'e: “Eyentem sa' apketche Sear-iasub elanyexagkok wesse' apwányam Ahaz ma'a néxa nak yegmen atamnek, kélyátamakxa nak yegmen ekyetno néten, cham'a ámay ekmahéyak nak yókxexma éltamhomaxchexa nak Kélyexwásessamakxa Apáwa,

⁴etne sa' yának se'e: “Elanagkoho sa', eyke ná égwe' aqsa; nágye aqsa, nágyoho nahan kayélaqtéssesek apwáxok se'e ánet átex élpánma nak, cham'a Resín yetlo m'a énxet'ák apagkok sirios, tén han ma'a Remalías apketche, cham'a apkellawa apagko' nak.

⁵Apkelánekxeyk apkelpaqmeyesma apmako etnéssessamhoxma ekmaso m'a sirios tén han ma'a énxet'ák Israel yetlo m'a wesse' apwányam apagkok Remalías apketche. Aptáhak apkelpeywa s'e:

⁶Agketamagkok sa' Judá, ólyegwakkasek sa' énxet'ák, agmok sa', anteméssesek sa' wesse' apwányam ma'a Tabeel apketche.

⁷Keñe Wesse' egegkok aptáha s'e: ¡Megkatnehek sa' xa!

⁸Damasco apyawakxa tegma agkok ma'a Siria, Resín akke wesse' apwányam ma'a Damasco; Samaria eyke tegma apwányam agkok ma'a Israel apchókxa, Remalías apketche eyke wesse' apwányam ma'a Samaria; kamaskok sa' eyke katnehek apchókxa Israel ma'a ekwokmo sa' sesenta y cinco apyeyam, méko sa' agkok nahan kéxegke ekyennaqte megkólya'ásseyam, megkólweynchamha sa' chá'a.’”

¹⁰Aptáhak axta nahan apcháneya Wesse' egegkok Ahaz se'e:

¹¹“Yána etekkessesek xama aqsok sempelakkasso nak agwetak ma'a Dios Wesse' apagkok, yaqwayam sa' etnehek metnatchesso, kóneg xapop sa' eykhe kañék, cham'a kañók agko' nak, essenhan ma'a eñama nak néten, cham'a netnók agko' nak.”

¹²Aptáhak axta apchátegmowagkokxo Ahaz se'e: “Ma', malmaxneyhek sa' ko'o Wesse' egegkok ma'a xama aqsok magkenatchesso nak agweta', hakte maltamhók ko'o eypkeynek ma'a.”

¹³Tén axta aptáha Isaías se'e: “Kóleyxho kéxegke s'e, wesse' apwányam David aptawán'ák neptámen. ¿Kélanagkamcheya kexyókók kólya'aksek exma énxet, kélmako nak han kólya'aksek exma m'a Dios ahagkok?

¹⁴Wesse' egegkok apagko' sa' egkések kéxegke xama aqsok yaqwayam megkólchenatchese': Lósók entáhak kelán'a étkok kótak sa' étche apkenna', kólteméssesek sa' apwesey Emanuel.

¹⁵Katawaxchek sa' weyke nagkeygmenek ekyenneykekxa tén han yányawhéna' apyegmenek aptáha sa' wokma'ák ma'a sakcha'a, apya'ásegwokmo sa' apkelyéseykha aqsok ektaqmela tén han aptaqnagko m'a aqsok ekmaso.

¹⁶Keñe sa' amonye' apya'ásegwayam apmeykha élchetámeykha apwáxok ma'a sakcha'a nak, kataqmopagkok sa' ma'a apchókxa nak apqánet kelwesse'e, apcháya apagko' nak chá'a exchep.

¹⁷“Yának sa' káhapwak xép Wesse' egegkok ma'a ekhem ekmaso megkawaya axta m'a sekxók axta éxpánchesamaxko Israel apchókxa m'a Judá, ekweykekxoho m'a énxet'ák apagkok tén han ma'a wesse' apwányam apxagkok nak.” (Wesse' apwányam Asiria xa.)

¹⁸Elmóhaksek sa' Wesse' egegkok yának elxegmak énxet'ák apheykha nak makhawók wátsam Egipto xa ekhem nak, máxa sempéhe sa' etnahagkok, máxa yányawhéna' apyapmók sa' etnéssesek yának elxegmak ma'a énxet'ák apheykha nak Asiria.

¹⁹Apyókxoho sa' elxegmak ma'a, elánegwak sa' apheykegkaxa m'a élyapwate élmattawóneg nak tén han ma'a meteymog áxwa'ák nak, tén han ma'a ekyókxoho nak élaqneykegkaxa m'a yenta'a ekha nak am'ák tén han ma'a ekyeneykegkaxa nak chá'a yegmen ma'a aqsok kélnaqtósso.

²⁰Yásenneykxak sa' Wesse' egegkok wesse' apwányam Asiria xa ekhem nak, máxa sa' etnéssesek ma'a ektémól'a sawo kélmeykha naqsal'a eñama m'a teyp wátsam Éufrates, elmópésseshok sa' apqatkok elyésésagkok ma'a israelitas, tén han ma'a áwa' apatña'ák nak ekweykekxoho m'a áwa' apexchakkok.

²¹Énxet ekhakxa enxoho aptósso xama weyke tén han apqánet nepkések xa ekhem nak

²²kaxek sa' ekyawe agko' ma'a weyke nagkeygmenek apagkok yaqwayam sa' etwok ma'a weyke nagkeygmenek ekyenneykekxa nak. Etawagkok sa' nahan weyke nagkeygmenek ekyenneykekxa tén han yányawhéna' apyegmenek ma'a apyókxoho, apkeleymomap nak meletsapma m'a apchókxa.

²³Cháxa ekhem nak, katnekxak sa' émhakxa yenta'a ekha nak am'ák tén han ekmompánaqma m'a émhakxa axta chá'a ekxámokma agko' ma'a anmen yámet, ekteyapmo axta chá'a ekyánmaga mil sawók selyaqye sawo ekmope élmomnáwa nak.

²⁴Yetlo yágke sa' aqsa kélwanchek kóltaxnegwók yaqwayam kólnempaqwók ma'a, hakte émhakxa yenta'a ekha am'ák sa' katnekxak ekyókxoho m'a apchókxa tén han ekmompánaqma.

²⁵Xámók sa' katnehek yámet ekha nak am'ák ma'a egkexe kélcheneykekxexa axta chá'a aqsok yetlo kélmeykha m'a sówaxpehek. Kampagqeykxak sa', méko sa' kamhagkok ma'a. Weyke ekteykegkaxa pa'at sa' aqsa katnehek ma'a tén han nepkések.