Read Lengua Sur Isaías 8 Bible Online

Isaías 8 - Lengua Sur bible

Isaías 8

¹Aptáhak axta seyáneya Wesse' egegkok se'e: “Ema sa' xama yántéseksek ekpayhe ekyawe nentáxéssamól'a, keñe sa' etaxaksek negmowána nak ólyetsetek ektáxama ektéma nak se'e: ‘Maher-salal-hasbaz’.

²Etnéssesek sa' apweteykegkoho aqsok apkelane meyke apkelyexamakpoho m'a apkelmaxnéssesso Dios énxet'ák apagkok Uríaz tén han ma'a Zacarías, Jeberequías apketche nak.”

³Tén axta natámen sekyepetcha'a etáwa', ekteme axta Dios appeywa eklegasso, lósók axta entáhak, wet'ak axta xama étche apkenna'. Tén axta aptáha seyáneya Wesse' egegkok se'e: “Etnésses sa' apwesey Maher-salal-hasbaz.

⁴Hakte peyk sa' agkok yepwának apteme appeywa sakcha'a s'e ‘Táta’, ‘méme’, kalmaxchek sa' aqsok ekxámokma ekhéyak nak ma'a Damasco tén han ma'a Samaria, kólsakxések sa' ekyókxoho aqsok apagkok élmomnáwa nak énxet'ák ma'a wesse' apwányam Asiria.”

⁵Axta aptamhákxak makham seyáneya Wesse' egegkok se'e:

⁶“Apkelwanyeyha énxet'ák se'e yegmen Siloé, ektaqmelchessamo nak aqsa ényé, eñama apkelaye m'a wesse' apwányam Resín tén han ma'a Remalías apketche nak,

⁷yáhakkasek sa' yegmen ekyawe ekyennaqte ényé wátsam Éufrates ma'a Wesse' egegkok, (wesse' apwányam Asiria m'a yetlo m'a ektémakxa nak apyennaqte). Kallanagkok sa' ekyókxoho m'a yegmen atamnek apagkok nak, kalántépok sa' ma'a neyáwa',

⁸kawakxohok sa' ma'a Judá, káhapwók sa' ma'a, kayeykhak sa' yegmen ekyawe m'a, apyespa'ák sa' kaxnagwak yegmen ma'a énxet'ák. Máxa náta élpeykessól'a axempenák sa' etnehek yápok Emanuel ma'a ekyókxoho xapop apagkok nak”.

⁹Kólaqnekxa sa', énxet'ák kélheykha nak apkelókxa, kólyegwáwho kélagkók sa' nahan; kóleyxho s'e, kélyókxoho kélheykha nak apkelókxa makhawo': kólmekxak sa' eykhe chá'a kélmeykha kólmáwhok kólempakha' kólyegweyk sa' aqsa chá'a; naqso', kólmekxak sa' eykhe chá'a kélmeykha kólmáwhok kólempakha' kólyegwék sa' aqsa chá'a.

¹⁰Kéllánekxeyk sa' agkok chá'a yaqwánxa kóltéhek, kamassegwók sa' aqsa chá'a, kélxénchek sa' aqsok chá'a aqsok kélmámenyého, megkalanaxcheyk sa' chá'a, hakte apheyk negyeseksa negko'o m'a Dios.

¹¹Apmágkek axta émek ekyennaqte agko' ma'a Wesse' egegkok, enókáseykha axta meltamho eytlók ámay apagkok nak xa énxet'ák nak. Aptáhak axta seyáneya s'e:

¹²“Nágkóltemésses aqsa kéxegke ekwesey negaqneykekxa negmáheyo anteméssessamhoxma ekmaso egmók, apteméssessama nak chá'a ekwesey negaqneykekxa negmáheyo anteméssessamhoxma ekmaso egmók apyókxoho xa énxet'ák nak. Nágkalyegwakkas aqsa ekyókxoho aqsok élyegwakkassama nak chá'a m'a, nágkole nahan.

¹³Eyke tásek chá'a kólteméssesek aptaqmalma m'a Wesse' ekha nak apyennaqte; eyke payhawok chá'a kóláwhok ma'a; kóláwhok chá'a nápaqto'.

¹⁴Sa' etnehek apho kelhanma kélagkok kéxegke m'a; sa' etnehek meteymog yaqwayam kalpelápagkasek ma'a, cham'a yaqwayam sa' kalyaqnegkesagkok ma'a ánet apchókxa ekhéyak nak ma'a kañe' Israel; etnehek sa' ektémól'a xama kelhanma, yaqwayam sa' kalmok ma'a énxet'ák apheykha nak Jerusalén.

¹⁵Apxámok sa' énxet elpelapmok, elyaqnenagkok sa', keñe sa' eletsapok; apxámok sa' kalmok ma'a kelhanma, keñe sa' elmakpok.”

¹⁶Kóltaqmelchesho sa' kélpekkenma s'e amya'a nak; kólpósha sa' chá'a s'e segánamakxa nak, keso nélxekmowásamáxche ahagkok nak ko'o.

¹⁷Massegkek eykhe apkelányo Dios ma'a Jacob énxet'ák apagkok, aleyxek sa' eyke aqsa ko'o. Hakte seyásenneykekxa ko'o ektemék ma'a.

¹⁸Negko'o nenteme aqsok magkenatchesso sempelakkasso nak agwetak apagkok ma'a énxet'ák Israel, ko'o tén han ma'a étchek sélmésso axta m'a Wesse' egegkok, senteméssesso axta m'a Wesse' ekha nak apyennaqte apha nak ma'a egkexe Sión.

¹⁹Megkatnehek sa' metne elának kéxegke énxet'ák se'e: “Kólpaqhetchesaxkoho m'a apkelhagák axta énxet'ák apkeletsapma tén han apkelyohóxma apkelyexchásamákpoho nak chá'a elpaqmétek, melyennaqtésso nak chá'a apkelpeywa. ¡Apyókxoho énxet chá'a elpaqhetchesakpohok ma'a aqsok apcháyókxa tén han elmaxnéssesek chá'a eyeyméxchexa etnahagkok énxet'ák apkeletsapma m'a énxet'ák meletsapma nak

²⁰yaqwayam enxoho elxawagkok chá'a apkeláneyákpexa etnahagkok, essenhan xama amya'a!” Megkatnehek sa' metne apkelpeywa xa, amya'a ekyeyháxma eyke xa aptamheykegkaxa nak apkelpeywa.

²¹Máxa sa' elmahagkok ma'a énxet'ák, yetlo élyaqhápeykha apkelwáxok tén han meyk élnapma, Kallókashok agko' sa' ma'a meyk élnapma. Elyemnaha sa' ma'a wesse' apwányam apagkok tén han ma'a aqsok apkeláyókxa nak chá'a. Elsekhekxohok sa' néten,

²²keñe sa' elanok makham náxop, elwetak sa' katnehek ekmaso apheykha tén han ekyaqtéssóxma, ekyaqtéssóxma tén han élyaqhápeykha apkelwáxok. Kápok sa' ekyaqtéssóxma ekyókxoho aqsok.