Read Lengua Sur Isaías 9 Bible Online

Isaías 9 - Lengua Sur bible

Isaías 9

¹Mopwanchek sa' elxeganmok ma'a apkellegeykegkoho nak ekyentaxno apheykha. Kónegók axta aptemessáseykekxak Dios Galilea m'a sekxók eyeynókxa axta, cham'a Zabulón xapop apagkok nak tén han ma'a Neftalí, nekha apheykegkaxa nak ma'a énxet'ák melya'áseyak nak Dios, eyeynamo nak neyp wátsam Jordán, ekweykekxoho m'a neyáwa wátsam ekwányam nak; tén axta natámen apmeyásekxo makham ekyawe agko' kéláyo.

²Apkelwet'ak ekyawe agko' élseyéxma m'a énxet'ák apkelweynchámeykencha'a nak ekyáqtésakxaxma; xama élseyéxma élsássessóxma m'a énxet'ák apheykencha'a nak ekyaqtéssamakxa agko' exma.

³Wesse', apsókmek xép ekyawe agko' ekpayheykekxa egwáxok; awanhók agko' ma'a ekpayheykekxa nak egwáxok. Kelpayhekxeyk apkelwáxok apyókxoho énxet nápaqtók xép, máxa aptamhágkok ma'a ektémól'a kanakxaxchek aqsok ekyexna kélcheneykekxa. Máxa aptamhágkok ma'a aptémól'a énxet kalpayhekxak apkelwáxok emlassakpok ma'a aqsok ekxámokma apkelméyak ma'a neyseksa kempakhakma.

⁴Hakte apmasséssekmek xép ma'a ektémakxa nak sẽlásenneykha naqsa apkelhamakpo nak ma'a énxet'ák, tén han ma'a kélnaqtawáseykegkoho élyaqhakkáseykencha'a nak apkelwáxok, tén han ma'a apkemha apmonye' apkelhaya nak chá'a. Máxa entáhak ma'a ektáhakxa axta apmasséssekmo m'a Madián.

⁵Kólwatnekxak sa' ma'a kélatchesso kélmagkok nenlegayo axta chá'a elpáwaksek yenyahagkok ma'a sẽlpextétamo tén han ma'a apáwa apkeltexnémap nak éma. Táxa sa' kasawhoho'.

⁶Hakte apteyekmek xama sakcha'a negyeseksa, Dios segmésso xama apketche, cham'a peya sa' exkak apmopwána yaqwayam etnehek aptaqmelchesso apchókxa. Sa' nahan kólteméssesek apwesey s'e: Eyaqheykha kélwáxok aqsok apkelane, Dios apyennaqte, Egyáp Memassegwayam, Wesse' meyke ektáhakxa negha.

⁷Exek sa' ma'a néten nak David aptaháno ekyawe ektaqmalma; kasawhekxohok sa' apteme Wesse' apwányam ekyókxoho yókxexma, megkamassegwomek sa' ma'a meyke ektáhakxa nak negha; tásek sa' katnehek ekyetno m'a aptémakxa nak Wesse' apwányam, sa' katnehek ekyennaqtésso m'a aptaqmelchessáseykekxa nak chá'a apheykha énxet'ák tén han ma'a ekpayhawo nak chá'a elána', keso kaxwo' nak tén han megkatnégwayam néxa. Elának sa' Dios ekha nak apyennaqte xa, eñama ekyawe agko' segásekhayo.

⁸Apcháphássessek axta appeywa Wesse' egegkok ma'a énxet'ák Israel cham'a Jacob énxet'ák apagkok nak;

⁹apkelya'ásegkók axta nahan apyókxoho m'a Efraín énxet'ák apagkok nak, apheykha axta m'a Samaria. Aptáhak axta apkelpaqmeta yetlo éleymáxkoho apkelwáxok se'e:

¹⁰“Appallakmek yátapheymekcha'ák, anlánekxak sa' eyke makham, meteymog sa' antemekxa'. Kélyaqténchek ma'a yámet éltegyésso élánamáxche nak yámet sicómoro, yámet cedro sa' eyke agyaqmagkasek.”

¹¹Wesse' egegkok apnaqláyam ma'a apkelenmexma apkello apagko' nak; apkeltémo apagko' nahan ektamagkok ma'a.

¹²Énxet'ák Siria m'a ekpayho nak teyapmakxa ekhem, keñe filisteos ma'a ekpayho nak taxnegwánxa ekhem. Xama apketáméyak apsawhawo m'a énxet'ák Israel. Makke kamassak makham aplo m'a Wesse' egegkok; xénchek makham apwáxok ellegássesagkoho'.

¹³Makke elye'eykekták Dios ma'a énxet'ák, ektáha axta apkellegassáseykegkoho; melchetamsók ma'a Wesse' ekha nak apyennaqte.

¹⁴Keñe Wesse' egegkok apteméssessama Israel apchókxa m'a ektémól'a xama aqsok kéltósso kólyaqténchesek épakyek tén han apqátek, ektémól'a kólyaqnegkesagkok ma'a áxa tén han ekho' meyke ekyeykhamaxche mók. ¡Xama ekhem agko' ekteme ekyókxoho xa!

¹⁵(Apqátek ekyetchesamaxkoho m'a apkelámha apmonye'e nak tén han ma'a kelwesse'e apkelwányam nak, keñe épakyek ekyetchesamaxkoho m'a apkellegasso nak chá'a amya'a, apkelxekmósso nak chá'a apnámakkok apmopwancha'a amya'a.)

¹⁶Apkelyetnakhásseykmek énxet'ák se'e apkelámha apmonye'e nak, keñe m'a aptegyéyak nak chá'a ekpékessáseyak apkelxegáneykmo chá'a.

¹⁷Cháxa keñamak melásekhákxoho nak Wesse' egegkok ma'a wokma'ák nak, tén han megkaleyósa nak elanok ma'a élyeheykha nak tén han ma'a xentampe'e nak. Hakte apyókxoho énxet apteme apkelya'ásseyam tén han élmasagcha'a apkeltémakxa, asagkók nahan chá'a katnehek apkelpeywa apkelxeyenma aqsok ma'a apyókxoho nak. Megkamassak makham aplo m'a Wesse' egegkok; xénchek makham apwáxok ellegássesagkoho'.

¹⁸Tawáseyha aqsok ma'a nentémakxa ekmaso, máxa táhak ma'a ektémól'a táxa eyáléwe kalwatnek ma'a yámet ekha nak am'ák tén han ma'a ekmompánaqma nak, ekweykmohol'a élwatno m'a yenta'a élaqnéyak nak naxma, keñe kay'aksek néten ma'a éten nak.

¹⁹Metchek apchókxa eñama aplo m'a Wesse' ekha nak apyennaqte, masséssekmek táxa m'a énxet'ák; aptókagkokxék chá'a aphápetek ma'a apketchek apancha'awo nak, megkalepyósak nahan chá'a apkelano m'a apnámakkok. Apheyk xama ekmanyehe nak enaqsapok apto s'e, megkeyxek eyke kaqhek aqsa chá'a meyk, kaxek chá'a mók aptawakxa á, meyaqkanmek eyke.

²¹Apmasséssekmek Manasés ma'a Efraín, keñe Efraín apmasséssekmo m'a Manasés, cháxa apketámeykegko nak Judá xa apqánet nak. Makke kamassak makham aplo m'a Wesse' egegkok; xénchek makham apwáxok ellegássesagkohok xa énxet'ák nak.