Read Lengua Sur Levítico 10 Bible Online

Levítico 10 - Lengua Sur bible

Levítico 10

¹Apkelmákxeyk axta apxata axta chá'a aqsok appánchesso m'a Nadab tén han Abihú, apketchek nak Aarón, apxatmeyk axta átex kañe' awáxok, tén han aqsok ánek ekmátsa nak ekpaqneyam éten agkok, keñe axta apkelsákxo nápaqtók Wesse' egegkok ma'a táxa megkatnaha nak ekpagkanamaxche', meltémo axta chá'a kólsakxések ma'a.

²Keñe axta ektepa táxa m'a aphakxa nak Wesse' egegkok, apsawhékpók axta nahan apkelmeta m'a. Cháxa ektáhakxa axta apkeletsapa nápaqto' Wesse' egegkok.

³Keñe axta Moisés aptáha apcháneya Aarón se'e: —Cháxa apmáheyo axta exének Wesse' egegkok aptéma axta appeywa s'e: ‘Énxet sépetchegwayo enxoho ko'o, axekmósek sa' sekteme sekpagkanamaxche ahagko', hélteméssesek sa' ko'o seyeymáxkoho nápaqta'awók apyókxoho israelitas.’ Apwanmakkek axta eyke aqsa Aarón.

⁴Keñe axta Moisés apkelwóneyncha'a m'a Misael tén han Elsafán, Uziel axta apketchek, apyakka' nak Aarón. Aptáhak axta apkeláneya s'e: —Kólántekkesseta kéxegke kélnámakkok se'e kélpakxanma appagkanamap nak, kólnegkenwakxa m'a teyp nak apkelpakxeneykegkaxa énxet'ák.

⁵Apkelyo'ókmek axta m'a, yetlo apkelántaxno apkelwenaqte kélpextete axta han apkelántekkásak apkelsawa m'a teyp nak apkelpakxeneykegkaxa énxet'ák, ekhawo m'a apkeltamhókxa axta etnahagkok Moisés.

⁶Keñe axta natámen Moisés aptáha apcháneya Aarón, yetlo apketchek, cham'a Eleazar, tén han Itamar: —Nágkólho aqsa kalmakheykha kélwa', nágkólyápet nahan kélántaxno magkenatchesso éllapwámegko, kóletsapok katnehek kéxegke, keñe Dios eyenyenták aplo m'a nepyeseksa énxet'ák. Eyke payhawók ellekxagwaha m'a kélpeywomo xamo' nak, cham'a apyókxoho nak israelitas, eñama aptekkessesso táxa m'a Wesse' egegkok.

⁷Nágkóltaqheykha han sekxók ma'a nentaxnamakxa nak kélpakxanma apchaqneykekxexa nak chá'a énxet'ák, yaqwayam enxoho megkóletsepe', hakte kélpagkanchásexcheyk axta kéxegke Wesse' egegkok kélyegkenchesa kélpátek ma'a pexmok égmenek apagkok nak. Aptamhágkek axta m'a apkeltamhókxa axta etnahagkok ma'a Moisés.

⁸Appaqhetchessek axta nahan Wesse' egegkok ma'a Aarón, aptáhak axta apcháneya s'e:

⁹“Peyk sa' agkok chá'a exchep etaxnegwakxak ma'a kélpakxanma apchaqneykekxexa nak chá'a énxet'ák, tén han ma'a apketchek nak, kéméxcheyk megkólyenagkehek chá'a m'a vino, tén han ma'a mók anmen segaqhamo nak, kóletsapok katnehek. Cháxa segánamakxa meyke néxa xa, yaqwayam sa' kawakxohok ma'a apyapmeyk, tén han kélketchek,

¹⁰yaqwayam sa' kólewának kéxegke kólteméssesek megkaxnémo mók ma'a ekpagkanamaxche nak, tén han ma'a megkatnaha nak ekpagkanamaxche', tén han ma'a aqsok eyáxñeyo nak, tén han ma'a ekmanyása nak,

¹¹yaqwayam sa' han kólewának kólxekmósek israelitas ekyókxoho xa segánamakxa nak, apmésso axta Wesse' egegkok, eñama apchásenneykekxa m'a Moisés.”

¹²Keñe axta natámen Moisés aptáha apcháneya Aarón, tén han Eleazar, tén han ma'a Itamar, cham'a apqánet apketchek apkeleymomap nak Aarón: —Kólma kélmésso naqsa nak aqsok aktek éleymomáxche axta kélwatno kélmésso naqsa m'a Wesse' egegkok, kóltow sa' meyke kempáseyak ma'a nekha nak ekwatnamáxchexa aqsok, hakte aqsok ekpagkanamaxche agko' xa.

¹³Kóltawák ma'a ekpagkanamaxchexa, hakte cháxa apxaweykekxa exchep xa, tén han ma'a apketchek, aqsok kélmésso naqsa kélwatnésso nak Wesse' egegkok. Cháxa seyáneyáxchexa axta ko'o atnehek xa.

¹⁴Keñe m'a agkenyek nak, ekteme nak aqsok kélmésso naqsa ektaqmela, tén han eywok, ekteme nak kélxawe kéxegke, kóltawagkok sa' ma'a eyáxñexa nak, xép, tén han apketchek apkelennay'a, tén han kelwán'ák nak, hakte cháxa kélxaweykekxa nak kéxegke aqsok ektekyawa segwetassamo nak nélásekhamaxchekxoho, apagkok ma'a israelitas.

¹⁵Kólsakxak sa' nápaqtók Wesse' egegkok ma'a eywok ekteme nak kélxaweykekxa, tén han agkenyek ekteme nak aqsok kélmésso naqsa ektaqmalma, tén han kélseykekxa nak chá'a aqsok kélmésso naqsa ektaqmela, yetlo m'a pexmok kélmésso nak yaqwayam kalwatnaxche'. Xép sa' chá'a etnehek apagkok xa, tén han apketchek nak, ekhawo apkeltémókxa axta katnehek ma'a Wesse' egegkok.

¹⁶Keñe axta natámen Moisés aptegyáncha'a amya'a m'a yát'ay apkennawo' kélaqhamól'a chá'a ekyánmaga magya'assáxma, apleg'ak axta amya'a apwatneykpo. Keñe axta aptaqnawaya m'a Eleazar, tén han Itamar, apqánet apketchek apkeleymomap axta m'a Aarón. Aptáhak axta apkeláneya s'e:

¹⁷—¿Yaqsa ektáha megkóltawa nak kéltósso kélaqhe ekyánmaga nak magya'assáxma m'a ekpagkanamaxchexa nak? Aqsok ekpagkanamaxche agko' ma'a, Wesse' egegkok axta apmésso kéxegke yaqwayam kólmasséssesek apkelsexnánémap ma'a énxet'ák, tén han kólwetaksek Wesse' egegkok meyaqmagkáseykekxa m'a melya'assáxma nak.

¹⁸Kóltawagkok xeykhe kéxegke aqsok ekmatñá m'a ekpagkanamaxchexa nak, hakte megkólsáwak éma m'a apwáxok nak kélpakxanma appagkanamap, ekhawo m'a sektáhakxa axta ko'o séláneya kéxegke.

¹⁹Keñe axta Aarón aptáha apchátegmowágko s'e: —Sakhem apkelsánto nápaqto' Wesse' egegkok aqsok apnaqtósso apkelnapma ekyánmaga melya'assáxma xa énxet'ák, tén han aqsok apkelwatno, etnék xeyk ko'óxa xa ektéma nak aqsok. Ektókek xeyk agkok ko'o sakhem ma'a kéltósso ekmatñá ekyánmaga nak magya'assáxma, ¿kapayhekxaya exchek apwáxok Wesse' egegkok?

²⁰Xama axta apleg'a Moisés xa, payhekxeyk axta apwáxok.