Read Lengua Sur Levítico 16 Bible Online

Levítico 16 - Lengua Sur bible

Levítico 16

¹Appaqhetchessek axta Wesse' egegkok Moisés, cham'a natámen axta apkeletsapma apqánet Aarón apketchek, eñama axta apkelyepetchegweykmoho apagko' ma'a aphakxa nak Wesse' egegkok.

²Aptáhak axta Wesse' egegkok apcháneya Moisés se'e: “Eltennés sa' Aarón, apepma nak xép, nágyána aqsa chá'a etaxnegwakxak kañe' ekpagkanamaxchexa agko' nak apmakókxa enxoho chá'a etaxnegwakxa', teyp nak apyexnamakxa m'a apáwa apkexyawe, essenhan ma'a ekpayho nak átog ma'a yántéseksek, yaqwayam sa' megyetsepe', hakte axekmósaxkohok sa' ko'o xama yaphope m'a néten nak átog.

³Etaxnegwakxak sa' chá'a Aarón kañe' ekpagkanamaxchexa agko' nak, yetlo xama weyke kennawo' yaqwayam yaqhek ekyánmaga megkólya'assáxma, tén han xama nepkések apkennawo', yaqwayam etnéssesek apwatnamap.

⁴Etaxnekxak sa' nahan chá'a aptaxno apwenaqte apkeláxñeyo apteme nak appagkanamap ma'a aptaxnegwákxo enxoho chá'a, yetlo apkelatcháseykekxa apkelatchesso apyay'ák apkelyaqwate apkeláxñeyo nak, tén han yetlo aptétamap, yetlo apketchesso apqátek apáwa apkeláxñeyo. Cháxa apteme apáwa apkelpagkanamap xa, kéméxcheyk eyke chá'a sekxo' eyaqpaksek yegmen amonye' apkelántaxneykekxa'.

⁵“Elmok sa' han Aarón apqánet yát'ay apkelennay'awo' yaqwayam etnehek aptekyawa ekyánmaga megkólya'assáxma, apagkok ma'a israelitas, tén han xama nepkések apkennawo' yaqwayam etnehek apwatnamap.

⁶Egkések sa' nahan weyke étkok kennawo', yaqwayam etnehek apchaqhe ekyánmaga mey'assáxma, tén han melya'assáxma m'a apnámakkok nak.

⁷Keñe sa' elmok ma'a apqánet nak yát'ay apkelennay'a, enegkenwók sa' nápaqto' Wesse' egegkok, cham'a nentaxnamakxa nak kélpakxanma apchaqneykekxexa nak chá'a énxet'ák;

⁸keñe sa' etwaksek xama aqsok m'a yát'ay apkelennay'awo' nak: xama meteymog sa' keytek apwesey m'a Wesse' egegkok, keñe sa' mók meteymog keytek apwesey m'a Azazel.

⁹Keñe sa' ma'a yát'ay apkennawo' ekpayhémo nak ekteyapma apwesey m'a Wesse' egegkok, etnéssesek sa' Aarón apmatñà ekyánmaga magya'assáxma;

¹⁰keñe sa' ma'a yát'ay eyaqhémo nak ekteyapma apwesey m'a Azazel, kólyentemekxak sa' yetlo apaqta'ák nápaqto' Wesse' egegkok, yaqwayam enxoho etaksek megkólyaqmagkáseykekxa megkólya'assáxma, tén sa' kólyenyekxak ma'a yókxexma meykexa nak énxet, cham'a aphakxa nak Azazel.

¹¹“Egkések sa' nahan Aarón weyke étkok kennawo', yaqwayam etnehek apchaqhe ekyánmaga mey'assáxma, tén han melya'assáxma m'a apnámakkok nak.

¹²Keñe sa' emok xama kélxata nak chá'a aqsok ánek ekmátsa ekpaqneyam, ekláneyo átex kélmà nak ma'a ekwatnamáxchexa aqsok, ekyetnama nak nápaqtók Wesse' egegkok. Ánet apmek sa' han elmok ma'a aqsok ekmátsa nak ekpaqneyam kéltekxekxo, keñe sa' elsakxak ma'a teyp nak apáwa apkexyawe kélapma;

¹³ekxák sa' nátex ma'a aqsok ánek ekmátsa nak ekpaqneyam nápaqto' Wesse' egegkok, keñe sa' ma'a éten agkok nak aqsok ekmátsa nak ekpaqneyam, kápok ma'a néten átog nak yántéseksek ekhémo mók nélpaqhetchásamáxkoho Dios, keñe sa' megyetsepek ma'a Aarón.

¹⁴Emok sa' nahan ketsék ma'a weyke étkok éma agkok nak, apophék sa' etnehek yexpaqheykha m'a átog nak, ekpayhókxa nak ekteyapmakxa ekhem, tén sa' etnehek nahan apophék éma yexpaqheykha ekweykmoho siete m'a ekpayho nak amonye' m'a átog nak.

¹⁵Keñe sa' yaqhek ma'a yát'ay apkennawo' nak, etnéssesek apmatñà ekyánmaga melya'assáxma m'a énxet'ák nak, keñe sa' éma esakxak ma'a teyp nak apyexnamakxa apáwa; yexpaqheykha sa' ma'a amonye' nak yántéseksek átog, tén han amonye' nak, ekhawo apteméssesakxa exchek ma'a éma agkok nak weyke kennawo'.

¹⁶Cháxa peya sa' yáxñásekxak ma'a ekpagkanamaxchexa agko' nak, eñama élmanyása apkeltémakxa m'a israelitas, tén han apkenmexeykha chá'a Dios, tén han melya'assáxma. Sa' etnéssesek han ma'a kélpakxanma apchaqneykekxexa nak chá'a énxet'ák, ekyetnama nak nepyeseksa apkeltémakxa m'a, tén han ekmanyása.

¹⁷“Méko sa' chá'a kaxek kañe' nak kélpakxanma apchaqneykekxexa énxet'ák, apha enxoho Aarón ma'a kañe' ekpagkanamaxchexa agko' nak, yaqwayam etaksek megkólyaqmagkáseykekxa mey'assáxma, ekwokmoho aptepa makham. Appenchessek sa' agkok apwetasso megkólyaqmagkáseykekxa mey'assáxma m'a, ekweykekxoho m'a apnámakkok nak, tén han ma'a apyókxoho israelitas,

¹⁸etyapok sa' yaqwayam yáxñásekxak ma'a ekwatnamáxchexa aqsok ekyetnama nak nápaqtók Wesse' egegkok. Emok sa' ketsék éma agkok ma'a weyke kennawo', tén han ma'a yát'ay apkennawo' nak éma apagkok, keñe sa' eltexnágkok ma'a élámha nak nekhaw'ék ekwatnamáxchexa aqsok, tén han ma'a nekhaw'ék nak,

¹⁹apophék sa' nahan etnehek yexpaqheykha éma m'a néten nak ekwatnamáxchexa aqsok ekweykmoho siete. Cháxa peya sa' yáxñassásekxohok apkeltémakxa ekmanyása m'a israelitas, tén sa' etnéssesek ekpagkanamaxche'.

²⁰“Appenchessek sa' agkok Aarón apcháxñáseykekxa m'a ekpagkanamaxchexa agko' nak, tén han ma'a kélpakxanma apchaqneykekxexa nak chá'a énxet'ák, tén han ma'a ekwatnamáxchexa aqsok, yának sa' kólyentegkásenták ma'a yát'ay yetlo apaqta'ák nak,

²¹apnegkenchek sa' agkok apmék néten apqátek kéltósso m'a, exénekxohok sa' ekyókxoho apkeltémakxa ekmaso nak israelitas, tén han apkelenmexeykekxa chá'a Dios, tén han melya'assáxma. Cháxa peya sa' egkeyásekxak melya'assáxma énxet'ák ma'a yát'ay apkennawo' nak, xama énxet sa' han yáneykpok éntamok, keñe sa' eyenyekxak ma'a yókxexma meykexa nak énxet.

²²Cháxa peya sa' eswok ekyókxoho apkeltémakxa ekmaso nak énxet'ák ma'a yát'ay apmahágko enxoho yókxexma meykexa énxet, cham'a meykexa nak ekha.

²³Keñe sa' Aarón etaxnegwakxak ma'a kélpakxanma apchaqneykekxexa nak chá'a énxet'ák, elhaxyawaksek sa' ma'a apkelnaqta apkeláxñe, apkelántaxneykekxa exchek yaqwayam etaxnegwakxak ma'a ekpagkanamaxchexa agko' nak, sa' enegkenekxak han ma'a.

²⁴Eyaqpaksek sa' nahan yegmen ma'a kélpakxanma appagkanamap nak, keñe sa' appenchesa enxoho apkelántaxneykekxa apkelnaqta, etyapok sa' yaqwayam ewatnek aqsok apagkok apagko', cham'a yaqwayam nak elanaksek ma'a énxet'ák, keñe sa' étak megkólyaqmagkáseykekxa mey'assáxma, tén han melya'assáxma m'a énxet'ák.

²⁵Elwatnek sa' ekwatnamáxchexa aqsok ma'a pexmok agkok nak aqsok ekmatñá, ekyánmaga megkólya'assáxma.

²⁶Keñe sa' ma'a apyentamá nak yát'ay apkennawo', yaqwayam eyenyekxések ma'a Azazel, elyenyeksek sa' apkelnaqta, eyaqpaksek sa' nahan yegmen, keñe sa' apwanchek etaxnegwakxak makham apkelpakxeneykegkaxa nak énxet'ák.

²⁷“Keñe sa' ma'a weyke kennawo', tén han yát'ay apkennawo', ektekyawa exchek ekyánmaga megkólya'assáxma, kélsákxo exchek éma agkok ma'a ekpagkanamaxchexa agko' nak, yaqwayam kataksek megkólyaqmagkáseykekxa megkólya'assáxma, kólsakxak sa' ma'a teyp nak apkelpakxeneykegkaxa énxet'ák, keñe sa' ma'a émpe'ék, ápetek, tén han ma'a ekteyáseykha nak, kólwatnekxak sa'.

²⁸Elyenyeksek sa' apkelnaqta m'a énxet ektáha enxoho apkelwatno m'a, eyaqpaksek sa' han yegmen, keñe sa' etaxnegwakxak makham ma'a apkelpakxeneykegkaxa nak énxet'ák.

²⁹“Cháxa peya sa' katnehek kélánémaxchexa kóltéhek kéxegke xa megkamassegwayam: kéméxcheyk chá'a kéxegke megkóltawagkehek kéltéyak ekwákxo enxoho chá'a ekhem diez, pelten siete, megkóllanagkehek han chá'a xama enxoho m'a kéltamheykha, megkeyxek ma'a kélteme nak israelitas, tén han ma'a apkeleñama nak mók apkelókxa, apheykha nak kélnepyeseksa kéxegke,

³⁰hakte cháxa ekhem nak, kólwetak sa' chá'a megkólyaqmagkáseykekxa megkólya'assáxma kéxegke nápaqto' Wesse' egegkok, keñe sa' káxñekxohok chá'a ekyókxoho kéltémakxa.

³¹Cháxa kélánémaxchexa nak kóltéhek kéxegke meyke néxa: kéllókassamakxa kélyampe agko' sa' kéxegke kóltéhek xa, tén han megkólteykegkaxa kéltéyak.

³²Ey'asha sa' chá'a néten yaqwayam etaksek megkólyaqmagkáseykekxa megkólya'assáxma m'a apkelmaxnéssesso Dios énxet'ák apagkok, ektáha axta kélyéseykha apxawe yaqwayam etnehek aptamheykha, apyaqmagkasso m'a apyáp apteme apkelmaxnéssesso Dios énxet'ák apagkok; elántaxnekxak sa' ma'a apáwa apkeláxñeyo kélteméssesso nak apkelpagkanamap,

³³yáxñásekxak sa' ma'a kañe' Ekpagkanamaxchexa agko' nak, tén han ma'a kélpakxanma apchaqneykekxexa nak chá'a énxet'ák, tén han ekwatnamáxchexa nak chá'a aqsok, etaksek sa' han megkólyaqmagkáseykekxa melya'assáxma m'a apkelmaxnéssesso Dios énxet'ák apagkok, tén han ma'a apyókxoho énxet'ák nak.

³⁴“Sa' katnehek kélánémaxchexa kóltéhek kéxegke meyke néxa xa: xama ekhem kéllane sa' chá'a kóltéhek xama apyeyam, yaqwayam nak kólwetaksek megkólyaqmagkáseykekxa melya'assáxma apkeláneyak ma'a israelitas.” Kelánamáxcheyk axta han, ekhawo aptémakxa axta apkenagkama Wesse' egegkok ma'a Moisés.