Read Lengua Sur Levítico 17 Bible Online

Levítico 17 - Lengua Sur bible

Levítico 17

¹Aptáhak axta Wesse' egegkok apcháneya Moisés se'e:

²Eltennés sa' Aarón, yetlo apketchek, tén han apyókxoho israelitas, apkeltamhókxa chá'a etnahagkok ma'a Wesse' egegkok. Sa' etnehek elának se'e:

³“Apchaqhak sa' agkok israelitas xama weyke kennawo', essenhan xama nepkések apkennawo', essenhan xama yát'ay, cham'a kañe' nak apheykegkaxa', essenhan ma'a yókxexma,

⁴tén han mesánto enxoho m'a nentaxnamakxa nak kélpakxanma apchaqneykekxexa nak chá'a énxet'ák, yaqwayam etnéssesek aqsok apmésso naqsa Wesse' egegkok ma'a ekpayhókxa nak kélpakxanma appagkanamap apagkok, exénakpok sa' ektáha ekyetno apyógkexma, kóltekkesek sa' ma'a nepyeseksa nak énxet'ák apagkok.

⁵Cháxa keñamak israelitas eyéméxko nak chá'a etnéssesek aqsok apkelmésso naqsa Wesse' egegkok ma'a kélnaqtósso kélnapma nak chá'a yókxexma, tén han elsakxések apkelmaxnéssesso Dios énxet'ák apagkok ma'a nentaxnamakxa apchaqneykekxexa nak chá'a énxet'ák, yaqwayam enxoho etnéssesek aqsok ektekyawa segwetassamo nak sẽlásekheykekxoho.

⁶Yexpaqheykha sa' apkelmaxnéssesso Dios énxet'ák apagkok éma m'a néten nak ekwatnamáxchexa aqsok apagkok ma'a Wesse' egegkok, nentaxnamakxa nak ma'a apchaqneykekxexa nak chá'a énxet'ák, ewatnek sa' nahan pexmok yaqwayam etnéssesek ekmátsa nak ekpaqneyam etekhánek Wesse' egegkok.

⁷Melmeyásekxók sa' chá'a kaxwók aqsok apkelnapma m'a kelyekhama apkelpeykessamo axta chá'a, eknaqtawáseykencha'a axta. Sa' katnehek kélánémaxchexa kóltéhek kéxegke meyke néxa xa, kawakxohok sa' ma'a apyapmeyk tén han kélketchek nak.

⁸“Eltennasák sa' nahan israelitas essenhan ma'a énxet'ák apkeleñama nak mók apkelókxa apheykha nak kélnepyeseksa kéxegke, apkelánegko enxoho chá'a aqsok apkelwatno, essenhan mók aqsok apkelnapma,

⁹melsákxo enxoho m'a nentaxnamakxa nak kélpakxanma apchaqneykekxexa nak chá'a énxet'ák, yaqwayam elmések ma'a Wesse' egegkok, kóltekkesek sa' chá'a nepyeseksa énxet'ák apagkok.

¹⁰“Altaqnaweygkok sa' ko'o apyókxoho israelitas, essenhan ma'a apkeleñama nak mók apkelókxa, apheykha nak kélnepyeseksa kéxegke, aptéyak nak chá'a ápetek yetlo éma. Atekkesek sa' chá'a ko'o nepyeseksa m'a énxet'ák apagkok.

¹¹Hakte ekyókxoho aqsok ekha nak élyennaqte, yetneyk éma agkok, éma ekteme segmésso negyennaqte, ko'o axta sekmésso kéxegke m'a éma agkok nak aqsok kélnaqtósso yaqwayam enxoho hélsakxések chá'a kólnegkenwakxak ma'a néten nak kélwatnamakxa aqsok, yaqwayam kamasséssesek ma'a megkólya'assáxma, hakte éma ekteme ekyaqmageykekxa m'a negyennaqte.

¹²“Cháxa keñamak sektáha nak ko'o séláneya israelitas: Megkólwanchek sa' kóltók ápetek yetlo éma kélxama kéxegke, ekweykekxoho m'a énxet'ák apkeleñama nak mók nekha, apheykha nak kélnepyeseksa kéxegke.

¹³Apchaqhak sa' agkok chá'a xama aqsok nawhak israelitas, essenhan ma'a énxet'ák apkeleñama nak mók nekha, apheykha nak kélnepyeseksa kéxegke, essenhan apchaqha enxoho chá'a xama náta nentómo nak, eyegkenchesek sa' chá'a éma agkok ma'a apyógkexma, keñe sa' elápekxak chá'a xapop,

¹⁴hakte éma ekteme ekmésso élyennaqte m'a ekyókxoho aqsok ekha nak élennama. Cháxa keñamak séltamho nak megkóltewek ma'a ápetek ekyetlómo nak éma, hakte cha'a ekmésso élyennaqte m'a ekyókxoho aqsok ekha nak élennama, énxet ektáhakxa enxoho apto, kóltekkesek sa'.

¹⁵“Aptókek sa' agkok xama israelitas, essenhan apkeñama nak mók nekha, aqsok nawhak étsapma, essenhan ekteméssesso nak nekha'a étkók ma'a aqsok nawhak eklo, elyenyeksek sa' apkelnaqta, eyaqpaksek sa' han yegmen, keñe sa' exénakpok ektáha ekmanyása apyempehek ekwokmoho ekyáqtésa. Keñe sa' káxñekxak apyempehek.

¹⁶Sa' agkok elyenyeyásak apkelnaqta, tén han meyaqpasa enxoho yegmen, kaphewakxak sa' apkelane mey'assáxma.”