Read Lengua Sur Levítico 22 Bible Online

Levítico 22 - Lengua Sur bible

Levítico 22

¹Aptáhak axta Wesse' egegkok apcháneya Moisés se'e:

²“Eltennés sa' Aarón, tén han aptawán'ák neptámen, etaqmelcheshok chá'a m'a aqsok élpagkanamaxche', sélpagkanchesso nak chá'a ko'o m'a israelitas, yaqwayam enxoho megyetsagkasek ma'a sekwesey ekpagkanamaxche'. Ko'o sekteme Wesse'.

³“Eltennés sa' apyókxoho aptawán'ák neptámen apseykekxa nak chá'a aqsok élpagkanamaxche', yetlo élmanyása apyempe'ék, apkelpagkanchesso nak chá'a Wesse' egegkok ma'a israelitas, kóltekkesek sa' sekhakxa nak. Ko'o sekteme Wesse'.

⁴“Méko sa' xama enxoho Aarón aptawán'ák neptámen etwok ma'a aqsok élpagkanamaxche', ekteme nak negmasse ektepelchamaxche egyempehek, essenhan ma'a eksekkeneykha nak apyegmenek, ekwokmoho kéláxñassásekxoho apyempehek. “Énxet appaknegweykmoho enxoho aqsok ekmanyása, cham'a kélhápak, essenhan ma'a eksekkeneykha nak apyegmenek,

⁵essenhan apkenyetsésso nak apyempehek eñama appaknegweykmoho aqsok nawhak ekpexyaweykegkoho nak xapop kaxog, essenhan ma'a énxet ekmanyása nak apyempehek, apteméssesso nak ekmanyása apyempehek ma'a pók appaknegweykmoho,

⁶exénakpok sa' apteme ekmanyása apyempehek ekwokmoho ekyáqtésa, mopwanchek sa' han etwok ma'a aqsok élpagkanamaxche', meyaqpasa enxoho sekxók yegmen.

⁷Káxñekxak sa' apyempehek ma'a ektaxna enxoho ekhem, keñe sa' apwanchek etwok ma'a aqsok élpagkanamaxche' nak, hakte apto m'a.

⁸Mopwanchek sa' etwok ma'a aqsok kéltósso étsapma nak ápetek, tén han ma'a ekteméssesso nak nekha'a étkók ma'a aqsok nawhak eklo, yaqwayam enxoho megkanyetséssesek apyempehek. Ko'o sekteme Wesse'.

⁹“Yána sa' elanagkok ma'a seyánamakxa nak chá'a etnahagkok, nágyána kalpehewakxak melya'assáxma eñama melánéyak, keñe sa' meletsepe'. Ko'o sekteme Wesse', sekteméssesso apkelpagkanamap.

¹⁰“Mopwanchek sa' etwok aqsok élpagkanamaxche xama enxoho m'a metnaha nak apkelmaxnéssesso Dios énxet'ák apagkok, essenhan ma'a apnámakkok nak. “Mopwanchek sa' han etwok aqsok élpagkanamaxche m'a apkelmaxnéssesso Dios énxet'ák apagkok nak meyk'a apagkok, tén han ma'a apkeláneykha nak.

¹¹“Apmeyk sa' agkok apkelmaxnéssesso Dios énxet'ák apagkok xama m'a apchásenneykha, apyánmagkasso selyaqye, apwanchek sa' etwok aqsok élpagkanamaxche' m'a kélásenneykha nak. Apwanchek sa' nahan etawagkok appalleyam nak apxagkok apkelmaxnéssesso Dios énxet'ák apagkok ma'a apto nak.

¹²“Meyk sa' agkok xama metnaha nak apkelmaxnéssesso Dios énxet'ák apagkok, essenhan apnámakkok xama apketche kelwána m'a apkelmaxnéssesso nak Dios énxet'ák apagkok, yawanchek sa' katwok ma'a aqsok kélmésso naqsa, kélmésso nak chá'a m'a apkelmaxnéssesso Dios énxet'ák apagkok.

¹³Sa' eyke m'a tampe' enxoho, essenhan apyamasma enxoho atáwa', meyke nak makham étchek, ekmeyeykekxa nak makham ma'a yáp apxagkok, ektéma axta m'a meykexa axta atáwa', awanchek katwok ma'a yáp apto nak. Keñe sa' mopwanchek etwok xama enxoho m'a metnaha nak apkelmaxnéssesso Dios énxet'ák apagkok, tén han ma'a apnámakkok enxoho.

¹⁴“Aptókek sa' agkok xama énxet ma'a aqsok élpagkanamaxche nak neyseksa mey'áseyak, kéméxcheyk eyaqmagkásekxak mók egkeyásekxak apkelmaxnéssesso Dios énxet'ák apagkok ma'a aqsok apto ketse néten;

¹⁵tásek eyke megyohok apkelmaxnéssesso Dios énxet'ák apagkok, etwasha israelitas ma'a aqsok élpagkanamaxche', kélmésso nak chá'a Wesse' egegkok,

¹⁶tén han megyohok kalpehewakxak melya'assáxma eñama aptéyak ma'a aqsok élpagkanamaxche'. Ko'o sekteme Wesse', sekteméssesso apkelpagkanamap.”

¹⁷Aptáhak axta Wesse' egegkok apcháneya Moisés se'e:

¹⁸“Epaqhetches sa' Aarón, tén han apketchek, tén han ma'a apyókxoho israelitas, etne sa' elának se'e: Apyentamakxéssek sa' agkok xama aqsok aptósso yaqwayam ewatnek Wesse' egegkok xama m'a israelitas, essenhan ma'a apkeleñama nak mók nekha, apheykha nak nepyeseksa m'a, yaqwayam nak elának chá'a m'a aqsok apkelxeyenma nak chá'a elána', essenhan aqsok apkelmésso naqsa apmáheyo apagko' nak chá'a elmések,

¹⁹kéméxcheyk éntementák chá'a xama kennawo' meyke nak ekmaso ekyókxa', yaqwayam enxoho kamaxchek takha'. Apwanchek éntementák xama weyke kennawo', essenhan nepkések apketkok, essenhan yát'ay,

²⁰háwe eyke m'a kéltósso ekmaso nak ekyókxa', hakte megkamaxcheyk sa' takha' m'a.

²¹“Énxet apyentegkáseykenta enxoho Wesse' egegkok xama aptósso yaqwayam yaqhek segwetassamo nak sẽlásekheykekxoho, yaqwayam nak elának chá'a m'a aqsok apkelxeyenma nak chá'a elána', essenhan aqsok apkelmésso naqsa apmáheyo apagko' nak chá'a elmések, kéméxcheyk egkések weyke kennawo', essenhan nepkések apkennawo' meyke nak ekmaso apyókxa', yaqwayam enxoho kalmaxchek takha'.

²²Nágkólmes chá'a Wesse' egegkok aqsok kélnaqtósso meyke aqta'ák nak, essenhan kélyensasso nak, essenhan ekpense amnek, essenhan élyaqséyak émpehek, essenhan nélyensómaxche émpehek, essenhan élenmagéyak nak émpehek, nágkólmes han yaqwayam kawatnaxchek kólteméssesek aqsok kélmésso naqsa m'a ekwatnamáxchexa nak aqsok apagkok Wesse' egegkok.

²³Xama weyke kennawo' sa' eyke apwanchek chá'a etnéssesek apmésso naqsa apmáheyo apagko' nak chá'a egkések, essenhan nepkések apkennawo' ekyaqwate nak chá'a xama apyók. Sa' eyke megkalmaxchek takha' m'a apmésso nak chá'a apxeyenma yaqwayam elának aqsok.

²⁴Mopwanchek sa' han enaqlantagkasek Wesse' egegkok ma'a aqsok kélnaqtósso kélyensasso nak ancha'ák, kéltekpogkasso nak, essenhan ma'a kélchexakkasso nak, essenhan ma'a kélyaqténchesso nak. Nágkóllána aqsa kañe' kélheykegkaxa xa ektéma nak.

²⁵Nágkólma han aptósso enxoho énxet'ák apkeleñama nak mók nekha xa ektéma nak kélnaqtósso, yaqwayam kólteméssesek nento apagkok nak ma'a Dios kélagkok nak kéxegke, hakte aqsok kélnaqtósso élmaso ekyókxa xa, megkalmaxcheyk sa' nahan takha'.”

²⁶Aptáhak axta Wesse' egegkok apcháneya Moisés se'e:

²⁷“Teyekmek sa' agkok chá'a weyke étkok, essenhan nepkések apketkok, essenhan yát'ay apketkok, kéméxcheyk megkólyenyókasek egken ekweykmoho siete ekhem, wokmek sa' agkok ocho ekhem, kamaxchek sa' takha' yaqwayam kóltéhek kélwatno kélmésso naqsa Wesse' egegkok.

²⁸“Nágkólaqha aqsa chá'a xama weyke yetlo étkok xama ekhem, essenhan nepkések yetlo apketkok.

²⁹“Kélsánteyk sa' agkok chá'a m'a aqsok kélmésso naqsa ekxeyenma kélwáxok nak Wesse' egegkok, kólteme sa' chá'a m'a ektémakxa nak negmésso, yaqwayam enxoho chá'a kataqmelek ekmomaxche takha'.

³⁰Kóltawák sa' nahan xa ekhem nak, nágkóleym ketsék enxoho yaqwayam kólmaha mók ekhem. Ko'o sekteme Wesse'.

³¹“Kóllána sa' ma'a séltémókxa nak kóltéhek; kólyahakxoho. Ko'o sekteme Wesse'.

³²“Nágkóltawasha sekwesey ekpagkanamaxche', keñe sa' ko'o hélteméssesek sekpagkanamaxche nepyeseksa nak israelitas. Ko'o sekteme Wesse', sélpagkanma axta ko'o kéxegke,

³³tén han sélántekkesso axta Egipto, yaqwayam atnehek ko'o Dios kélagkok. Ko'o sekteme Wesse'.”