Read Lengua Sur Levítico 23 Bible Online

Levítico 23 - Lengua Sur bible

Levítico 23

¹Aptáhak axta Wesse' egegkok apcháneya Moisés se'e:

²“Etne sa' elának israelitas se'e: Keso ekhem kélpagkanchessamakxa nak chá'a m'a Wesse' egegkok, kóltéhek sa' kéxegke nélpeykessamókxa Wesse' egegkok.

³“Kóltemeykha sa' chá'a ekweykmoho seis ekhem, keñe sa' siete ekhem, megkóllañehek chá'a xama enxoho kéltamheykha; katnehek sa' néllókassamakxa nélyampe, kólpeykeshok sa' nahan Wesse' egegkok. Katnehek sa' ekhem kéllókassamakxa kélyampe megkólwagqayam Wesse' egegkok, kélhámxa enxoho chá'a.

⁴“Keso ekhem yaqwánxa chá'a kéxegke kólpeykeshok Wesse' egegkok, eñama megkólwagqayam, tén han yaqwánxa chá'a kólaqnekxa':

⁵“Kalanaxchek sa' chá'a ekhem Pascua megkólwagqayam Wesse' egegkok, ekhem catorce, apkemha apmonye' pelten.

⁶“Keñe sa' ekhem quince, ekhawo nak xa pelten nak, kalanaxchek kélessawássessamo kelpasmaga meyke kempáseyak, megkólwagqayam ma'a Wesse' egegkok. Siete ekhem sa' kawomhok aptámap kelpasmaga meyke kempáseyak.

⁷Kalanaxchek sa' kélpeykessamo Wesse' egegkok émha amonye' ekxega ekhem. Nágkóllána aqsa xama enxoho ekyentaxno kéltamheykha.

⁸Kólwatnések sa' chá'a kéxegke aqsok kélmésso naqsa Wesse' egegkok ekweykmoho siete ekhem, keñe sa' xa siete ekhem nak, kólpeykeshok chá'a Wesse' egegkok. Nágkóllána aqsa kéltamheykha xama enxoho.”

⁹Aptáhak axta Wesse' egegkok apcháneya Moisés se'e:

¹⁰“Etne sa' elának israelitas se'e: Kélántaxneyk sa' agkok kéxegke m'a xapop sekmako nak ko'o agkések, tén han kélyaqtenna enxoho hótáhap kélcheneykekxa, kólsakxések sa' chá'a apkelmaxnéssesso Dios énxet'ák apagkok ma'a apmonye' kélyaqténma nak kélpextete.

¹¹Keñe sa' mók ekhem ekwokmo enxoho néllókassamakxa nélyampe, elsakxések sa' Wesse' egegkok apkelmaxnéssesso Dios énxet'ák apagkok, yaqwayam etnéssesek aqsok kélmésso naqsa ektaqmela, yaqwayam enxoho emakpok takha'.

¹²Éntemekxohok sa' nahan xama nepkések apketkok xama apyeyam apagkok, meyke nak ekmaso apyókxa' yaqwayam kólwatnések ma'a Wesse' egegkok, cham'a ekhem apsákxexa enxoho m'a hótáhap kélpextéteykekxa nak.

¹³Esanták sa' nahan cuatro kilos y medio hótáhap aptaqmalma apagko' nak, kélyelaqtésso nak kélenchehe pexmok égmenek, yaqwayam enxoho kólsakxések ma'a Wesse' egegkok, kólteméssesek aqsok kélmésso naqsa kélwatno ekmátsa nak ekpaqneyam. Esantámhok sa' han un litro vino yaqwayam kólteméssesek aqsok kélmésso naqsa kélyegkenma m'a néten nak.

¹⁴Nágkóltaw aqsa chá'a kelpasmaga, tén han hótáhap apaktek kélyexnáyam, essenhan apwetek nak, amonye' kélseykentegkesso Wesse' egegkok ma'a aqsok kélmésso naqsa. Cháxa ektáha nak xama segánamakxa megkamassegwayam xa, kawakxohok sa' ma'a apyapmeyk, tén han kélketchek nak, cham'a kélhámxa enxoho chá'a kéxegke.

¹⁵“Kéméxcheyk kólleyxek siete semána, natámen enxoho kélseykekxa kéxegke m'a hótáhap kélyaqténma kéltéteykekxa kélteméssesso nak aqsok kélmésso naqsa ektaqmela, cham'a natámen nak néllókassamakxa nélyampe.

¹⁶Cincuenta ekhem sa' katnehek kélyetsáteyak ma'a, ekwákxo enxoho makham ekhem siete néllókassamakxa nélyampe. Keñe sa' kólsakxések Wesse' egegkok aqsok kélmésso naqsa, cham'a hótáhap apaktek kaxwe kélnakxo nak,

¹⁷kólsók sa' han apqánet kelpasmaga apkeleñama m'a kélxanák, kéllané nak hótáhap aptaqmalma, kélmakhetchesso nak yetlo kempáseyak, cuatro kilos sa' chá'a xama, yaqwayam enxoho kólteméssesek aqsok kélmésso naqsa éltaqmela, émha amonye' ekyexna kélcheneykekxa', kélmésso m'a Wesse' egegkok.

¹⁸Kólyepetcheshok sa' nahan siete nepkések apketkók xama apyeyam apagkok, meyke nak ekmaso apyókxa', cham'a kelpasmaga nak, tén han xama weyke étkok kennawo', tén han apqánet nepkések apkelennay'awo', yaqwayam kólwatnések ma'a Wesse' egegkok, cham'a aqsok kélmésso naqsa kélwatno ekmátsa nak ekpaqneyam etekhánek ma'a, tén han ma'a kélmésso naqsa nak aqsok aktek ekyexna, tén han vino.

¹⁹“Kólmések sa' nahan xama yát'ay, yaqwayam etnehek ekyánmaga megkólya'assáxma, tén han apqánet nepkések apketkók xama apyeyam apagkok nak chá'a, yaqwayam etekyók kólteméssesek segwetassamo nak sẽlásekheykekxoho.

²⁰Elya'asha sa' néten apkelmaxnéssesso Dios énxet'ák apagkok nápaqto' Wesse' egegkok ma'a aqsok kélmésso naqsa nak aqsok kélnaqtósso, yetlo m'a kelpasmaga apkelánamap nak amonye' ekyexna aqsok kélcheneykekxa. Kólpagkanchesek sa' Wesse' egegkok, yaqwayam etnehek apagkok ma'a apkelmaxnéssesso Dios énxet'ák apagkok.

²¹“Kéméxcheyk kólaqnekxak kólpeykeshok Wesse' egegkok xa ekhem nak, tén han megkóllanyek xama enxoho ekyentaxno kéltamheykha. Cháxa ektáha nak xama segánamakxa megkamassegwayam xa, kawakxohok sa' ma'a apyapmeyk, tén han kélketchek nak, cham'a kélhámxa enxoho chá'a kéxegke.

²²“Wokmek sa' agkok ekhem kélnakxamakxa aqsok ekyexna, nágkólsawhoho aqsa chá'a kólnakxek ekyexna aqsok namyep kélagkok, nágkólchetámekxoho han ma'a aqsok ekyexna éleymomáxche enxoho. Kólho sa' aqsa chá'a elmok ma'a énxet meyke nak aqsok apagkok, tén han ma'a apkeleñama nak mók nekha. Ko'o sekteme Wesse', Dios kélagkok nak kéxegke.”

²³Aptáhak axta Wesse' egegkok apcháneya Moisés se'e:

²⁴“Etne sa' elának israelitas se'e: Kóllának sa' kéxegke kéllókasso kélyampe tén han kélpeykessamókxa Wesse' egegkok, émha amonye' ekhem, pelten siete, ekxeyenweykekxoho kélwáxok yetlo kélpáwasso kélaqkahasso.

²⁵Kólwatnések sa' aqsok kélmésso naqsa m'a Wesse' egegkok, megkóllanyek sa' han kéltamheykha ekyentaxno xama enxoho.”

²⁶Aptáhak axta Wesse' egegkok apcháneya Moisés se'e:

²⁷“Katnehek sa' ekhem megkólyaqmagkáseykekxexa nentémakxa m'a ekhem diez, pelten siete. Kóllának sa' kélaqneykekxa kélpeykessamo Wesse' egegkok, megkóltawagkek sa' han chá'a kéltéyak xa ekhem nak, kólwatnések sa' nahan chá'a aqsok kélmésso naqsa m'a Wesse' egegkok.

²⁸Nágkóllána aqsa xama enxoho kéltamheykha xa ekhem nak, hakte ekhem megkólyaqmagkáseykekxa nentémakxa xa, yaqwánxa sa' chá'a kólwetak kéxegke megkólyaqmagkáseykekxa kéltémakxa, nápaqtók Dios Wesse' kélagkok.

²⁹Énxet apto enxoho apto xa ekhem nak, kóltekkesek sa' nepyeseksa énxet'ák apagkok.

³⁰Apkelanak sa' agkok aptamheykha xama énxet xa ekhem nak, amasséssók sa' ko'o nepyeseksa énxet'ák apagkok.

³¹“Nágkóllána xama enxoho kéltamheykha. Cháxa segánamakxa meyke néxa xa, yaqwayam sa' kawakxohok ma'a apyapmeyk, tén han kélketchek, kélhámxa enxoho chá'a kéxegke.

³²Katnehek sa' kéxegke xama ekhem kéllókassamakxa kélyampe, tén han megkólteykegkaxa chá'a kéltéyak, kóleynhok sa' kélyetsáteyak taxnám ekhem nueve, ekweykekxoho mók taxnám.”

³³Aptáhak axta Wesse' egegkok apcháneya Moisés se'e:

³⁴“Etne sa' elának israelitas se'e: Kalanaxchek sa' chá'a kélessawássessamo kélpakxeneykegkaxa yenta'a aktegák étkók, megkólwagqayam Wesse' egegkok, ekhem quince, pelten siete,

³⁵yetlo kélaqneykekxa kélpeykessamo Wesse' egegkok émha amonye' ekxega ekhem. Nágkóllána xama enxoho kéltamheykha.

³⁶Kólwatnések sa' chá'a aqsok kélmésso naqsa Wesse' egegkok ekweykmoho siete ekhem, keñe ekhem ocho, kóllának han chá'a kélaqneykekxa kélpeykessamo, tén han kólwatnések chá'a aqsok kélmésso naqsa m'a Wesse' egegkok. Hakte cháxa kélessawássessamókxa chá'a xa, megkóllanyek sa' nahan chá'a kéltamheykha ekyentaxno xama enxoho.

³⁷“Cháxa ekhem kélpagkanchessamakxa nak chá'a m'a Wesse' egegkok, eyeyméxko nak chá'a kéxegke kólteméssesek kélpeykessamókxa', tén han kólsakxések Wesse' egegkok ma'a aqsok kélmésso naqsa kélwatno, kéltósso kélwatno, tén han aqsok kélmésso naqsa aqsok aktek ekyexna, tén han aqsok ektekyawa, tén han aqsok kélmésso naqsa vino, cham'a eyaqheymókxa enxoho chá'a élánamáxche',

³⁸tén han ma'a ekhem néllókassamakxa nak chá'a nélyampe, ekxeyenweykekxexa nak chá'a egwáxok ma'a Wesse' egegkok, tén han ma'a aqsok kélmésso naqsa nak chá'a, tén han ma'a kéltennasso nak kólmések, essenhan ekxeyenma agko' nak chá'a kélwáxok kéxegke kóllána'.

³⁹“Kóllának sa' kélessawássessamo ekwayam nak siete ekhem, megkólwagqayam ma'a Wesse' egegkok, yetlo kéllókasso kélyampe m'a émha amonye' ekxega ekhem, tén han ma'a ocho, cham'a ekhem quince, pelten siete, kélpenchesa sa' kélmeykekxa m'a aqsok ekyexna kélcheneykekxa'.

⁴⁰Kólnakxek sa' éltaqmalma nak ekyexna yámet kélcheneykekxa amonye' ekxega nak ekhem, tén han áxa áwa', tén han yámet ekxámokma nak áwa', tén han ma'a yámet álamos élámha nak neyáwa wátsam, kalpayhekxak sa' kélwáxok nápaqtók Dios Wesse' kélagkok ekweykmoho siete ekhem.

⁴¹Yókxoho apyeyam sa' chá'a kóllának kéxegke kélessawassamo ekweykmoho nak siete ekhem, megkólwagqayam nak Wesse' egegkok, cham'a pelten siete nak. Cháxa segánamakxa meyke néxa xa, yaqwayam sa' kawakxohok ma'a apyapmeyk, tén han kélketchek.

⁴²Kólhakha sa' kéxegke ekweykmoho siete ekhem kóneg yámet aktegák kélpakxanma, kéxegke kélteme nak israelitas kélagko',

⁴³yaqwayam sa' elya'asagkohok apyókxoho kéltawán'ák kélnentámen nak, sélántekessama axta ko'o Egipto m'a israelitas, séltémo exmakha kóneg yámet aktegák étkók kélpakxanma. Ko'o sekteme Dios Wesse' kélagkok.”

⁴⁴Cháxa aptáhakxa axta apkeltennasa Moisés ma'a israelitas, cham'a ekhem kélpagkanchessamakxa nak chá'a Wesse' egegkok.