Read Lengua Sur Levítico 3 Bible Online

Levítico 3 - Lengua Sur bible

Levítico 3

¹“Yetneyk sa' agkok énxet apmésso xama aptósso weyke kelwána, essenhan xama weyke kennawo' aptósso, yaqwayam etnehek apmésso m'a Wesse' egegkok, cham'a segwetassamo nak sẽlásekheykekxoho, kéméxcheyk katnehek meyke ektemegweykmohóxma nak émpehek ma'a apmésso nak.

²Epekkenek sa' apmek néten akqátek aptósso m'a énxet ektáha nak apmésso. Keñe sa' yaqhek ma'a átog nentaxnamakxa nak kélpakxanma apchaqneykekxexa nak chá'a énxet'ák. Tén sa' apkelmaxnéssesso Dios énxet'ák apagkok yexpaqheykha éma m'a nekhaw'ék nak ekwatnamáxchexa aqsok.

³“Énxet apyentameykenta nak aptósso yaqwayam etnehek apchaqhe apmésso m'a segwetassamo nak sẽlásekheykekxoho, kéméxcheyk éntemekxak ma'a nápaqto' nak Wesse' egegkok, yaqwayam katnehek kélmésso naqsa kélwatno m'a pexmok agkok ekwakheykekxa nak kañe' awáxok kéltósso,

⁴tén han ma'a élyaqye agkok, yetlo pexmok eyapma nak, tén han ma'a ekhéyak nak néten akpok, tén han ma'a ahekhek pexmok nak, kéméxcheyk elhaxyawaksek yetlo m'a élyaqye agkok nak.

⁵Apkelmaxnéssesso Dios énxet'ák apagkok sa' eyke elwatnek ekyókxoho xa, cham'a néten nak ekwatnamáxchexa aqsok, yetlo m'a kéltósso peya nak kólwatnek néten yántápak eyáléwakxa nak táxa, yaqwayam kóltéhek kélwatno kélmésso naqsa ekmátsa nak ekpaqneyam etekhánek Wesse' egegkok.

⁶“Énxet apmésso nak Wesse' egegkok xama aptósso nepkések apkeñama nak ma'a nepyeseksa nak apnaqtósso, yaqwayam etnehek apchaqhe apmésso m'a segwetassamo nak sẽlásekheykekxoho, kéméxcheyk egkések ma'a xama apkennawo', essenhan ma'a xama apkelwána meyke nak ektemegweykmohóxma apyempehek.

⁷Xama nepkések sa' agkok apmeyásak, eyentamok sa' ma'a nápaqto' nak Wesse' egegkok,

⁸epekkenek sa' apmek néten apqátek, keytlawhok sa' apchaqhe m'a átog nak nentaxnamakxa kélpakxanma apchaqneykekxexa nak chá'a énxet'ák. Keñe sa' apkelmaxnéssesso Dios énxet'ák apagkok elexpaqheykha nepkések éma apagkok ma'a nekhaw'ék nak ekwatnamáxchexa aqsok.

⁹“Apméssek sa' agkok aptósso yaqwayam etnehek apchaqhe apmésso m'a segwetassamo nak sẽlásekheykekxoho, kéméxcheyk éntamok ma'a nápaqto' nak Wesse' egegkok, yaqwayam katnehek kélmésso naqsa kélwatno m'a pexmok apagkok, tén han ma'a ekyókxoho apyapakyek kélyaqtenchesseykmoho nak awho', tén han ma'a pexmok apagkok eyapma nak apwokmo',

¹⁰cham'a ánet élyaqye apagkok nak, yetlo pexmok eyapma nak, tén han ma'a pexmok apagkok eyapma nak apkapok, tén han ma'a aphekhek pexmok nak, elekkesek sa' xamók ma'a élyaqye apagkok.

¹¹Apkelmaxnéssesso Dios énxet'ák apagkok sa' elwatnek ekyókxoho m'a néten élwatnamáxchexa nak aqsok, yaqwayam katnehek kélmésso naqsa kélwatno ektámáxche, kélmésso m'a Wesse' egegkok.

¹²“Apméssek sa' agkok nahan xama yát'ay, éntamok sa' ma'a nápaqto' nak Wesse' egegkok,

¹³epekkenek sa' apmek néten apqátek, keytlawhok sa' apchaqhe m'a apmonye' nak nentaxnamakxa kélpakxanma apchaqneykekxexa nak chá'a énxet'ák. Tén sa' apkelmaxnéssesso Dios énxet'ák apagkok elexpaqheykha éma m'a nekhaw'ék nak ekwatnamáxchexa aqsok.

¹⁴“Énxet apmésso nak aptósso, apwanchek elmok ma'a ekyókxoho pexmok eyapma nak apwokmo', tén sa' elsók yaqwayam katnehek kélwatno kélmésso naqsa Wesse' egegkok,

¹⁵tén han ma'a ánet élyaqye apagkok, yetlo m'a pexmok eyapma nak, tén han ma'a apkapok pexmok nak, tén han ma'a aphekhek pexmok nak, kéméxcheyk elhaxyawaksek xamók ma'a ánet élyaqye apagkok nak.

¹⁶Apkelmaxnéssesso Dios énxet'ák apagkok sa' elwatnek ekyókxoho néten nak élwatnamáxchexa aqsok, yaqwayam katnehek kélmésso naqsa nento kélwatno, ekmátsa nak ekpaqneyam antekhánek. Wesse' egegkok sa' etnehek apagkok ma'a ekyókxoho pexmok nak.

¹⁷“Cháxa ektáha nak xama segánamakxa megkamassegwayam xa, kawakxohok sa' ma'a apyapmeyk nak, tén han kélketchek nak. Nágkóltaw aqsa chá'a pexmok, tén han ma'a kéltósso éma agkok, cham'a kélhámxa enxoho chá'a kéxegke.”