Read Lengua Sur Jeremías 1 Bible Online

Jeremías 1 - Lengua Sur bible

Jeremías 1

¹Keso Jeremías axta appeywa s'e tén han aqsok apkelane, cham'a Hilquías axta apketche. Jeremías axta apteme apkeñama xama nepyeseksa m'a apkelmaxnéssesso Dios énxet'ák apagkok apnámakkok, apheykencha'a axta m'a Anatot, yókxexma apagkok nak ma'a Benjamín énxet'ák apagkok.

²Appaqhetchessek axta Wesse' egegkok Jeremías, ekweykmo axta trece apyeyam apteme wesse' apwányam Josías ma'a yókxexma Judá, cham'a Josías, Amón axta apketche.

³Appaqhetchessegkek axta han neyseksa apteme axta wesse' apwányam Joaquim ma'a Judá, Josías axta apketche, ekweykmoho aptéma axta once apyeyam apteme wesse' apwányam Sedequías ma'a yókxexma Judá, cham'a pók apketche axta nahan ma'a Josías; ekweykmo axta cinco pelten, cháxa apyeyam nak, kélnaqleykekxa megkatnahakxa apkelókxa m'a énxet'ák Jerusalén.

⁴Epaqhetchessek axta ko'o Wesse' egegkok. Aptáhak axta seyáneya s'e:

⁵“Élyéseykha axta ko'o exchep sekxók séláneya axta kañe' egken awáxok; ekpagkanmeyk axta sekxók axta apmáheyo etyamok; ekpagkanchessegkek axta yaqwayam etnehek aplegasso sekpeywa, apagkok ma'a apyókxoho énxet'ák nak keso náxop.”

⁶Axta ektáhak ko'o seyátegmowágkokxo s'e: “¡Wesse' ahagkok, étkok ahagko' ko'o, mowanchek han sekpeywa!”

⁷Aptáhak axta eyke ko'o seyáneya Wesse' egegkok se'e: “Ná exén aqsa apteme apketkok apagko'. Emhagkok sa' chá'a exchep ma'a seyáphasakxa enxoho chá'a emhagkok, exének sa' nahan chá'a m'a séltamhókxa enxoho chá'a exének.

⁸Nágye' aqsa xama énxet enxoho, hakte sekxegexma sa' ko'o atnehek xép yaqwayam amyók chá'a. Ekméssek ko'o sekpeywa, sektáha nak Wesse' apagkok.”

⁹Tén axta Wesse' egegkok sepaknegkessa'awo ahátog. Aptáhak axta seyáneya s'e:

¹⁰“Ekpekkenchessek ko'o exchep apátog sekpeywa. Sakhem sekmésa ko'o exchep apmopwána nepyeseksa m'a apyókxoho énxet'ák nak keso náxop tén han ma'a apkelókxa, yaqwayam sa' esawhohok aqsok ma'a kañe' tén han elyaqnegkesagkok, yaqwayam sa' emasséssók tén han etnéssásekxak nápakha'a apketkók, tén han yaqwayam enaqxétekhasagkokxak makham, tén han eknekxak makham aqsok aktek.”

¹¹Epaqhetchessek axta ko'o Wesse' egegkok. Aptáhak axta seyáneya s'e: “Jeremías, ¿Yaqsa apwet'a?” “Xama almendro yámet aktog” —axta ektáhak ko'o seyátegmowágkokxo.

¹²“Payhawók aptáhakxa —axta aptáhak seyáneya Wesse' egegkok—. Aleyxek sa' ko'o katnehek ma'a sektémakxa axta sekpeywa.”

¹³Epaqhetchásekxeyk axta ko'o makham ma'a Wesse' egegkok. Aptáhak axta sélmaxneyeyncha'a s'e: “¿Yaqsa apwet'a?” “Xama weygke étcheyam kélhanma, ketók ekyegkenamaxchexa m'a ekpayho nak nexcheyha” —axta ektáhak ko'o seyátegmowágkokxo.

¹⁴Keñe axta aptáha seyáneya Wesse' egegkok se'e: “Nexcheyha sa' kañék katyapok nenlegeykegkoho ekmaso káhapwak nepyeseksa apyókxoho énxet'ák apheykha nak se'e apchókxa nak.

¹⁵Naqsók ko'o peya alwónmakha apyókxoho énxet'ák apheykha nak apchókxa nexcheyha, ko'o sektáha nak Wesse' kélagkok. Elxegmak sa' ma'a apkelwesse'e apkelwányam apagkok, enegkenwak sa' apkeltaháno éltaqmalma m'a nentaxnamakxa agko' nak ma'a Jerusalén, ekpayho nak ekyókxoho m'a kélhaxtegkesso nak nepyáwa ekwakhaya nak, tén han ekpayho nak apyókxoho m'a tegma apkelyawe nak Judá.

¹⁶Keso apkellegeykegkoho peya nak ko'o allegássesagkohok ma'a énxet'ák melya'assáxma, seyamasma nak ko'o; apkelwatnéssama nak chá'a aqsok ekmátsa nak ekpaqneyam éten agkok ma'a aqsok kéláyókxa éleñama nak mók nekha', apkeláneyak apagko' nak chá'a tén han apkelpeykessamo.

¹⁷Xép akke, énnaqteyásekxoho sa' apwáxok; exeg sa' eltennássók ekyókxoho m'a séltamhókxa enxoho eltennaksek. Nágye' aqsa, hakte sa' agkok etnahak xa, alpexyennegkesek sa' ko'óxa exchep apmonye'e xa énxet'ák nak.

¹⁸Sakhem ko'o sekteméssesa exchep apho tegma apwányam apyennaqte, apho sawo émhal'a, apho tegma kélhaxtegkesso nepyáwa sawo ekyexwase, yaqwayam sa' elenmexek ma'a apyókxoho énxet'ák apheykha nak yókxexma Judá: cham'a kelwesse'e apkelwányam apagkok nak, apkelámha apmonye'e tén han ma'a apkelmaxnéssesso nak énxet'ák ahagkok, tén han ma'a énxet'ák apheykha nak apkelókxa.

¹⁹Yenmexekxak sa' xép xa énxet'ák nak, mexók sa' eyke, hakte sekxegexma sa' ko'o atnehek xép, yaqwayam amyók chá'a. Ekméssek ko'o sekpeywa, sektáha nak Wesse' apagkok.”