Read Lengua Sur Jeremías 10 Bible Online

Jeremías 10 - Lengua Sur bible

Jeremías 10

¹Énxet'ák Israel, kóleyxho s'e amya'a nak, apkeltennasso nak kéxegke m'a Wesse' egegkok.

²Aptáhak Wesse' egegkok se'e: “Nágkólteme aqsa kéxegke m'a apkeltémakxa nak chá'a pók aptémakxa énxet'ák, nágkalyegwakkas aqsa m'a aqsok ekteyapma nak néten, aptamheykegkaxa nak chá'a xa pók aptémakxa nak énxet'ák.

³Aqsok mékoho agko' apkeltémakxa nak chá'a xa énxet'ák nak. Eyaqtennek chá'a yámet awhak ma'a naxma, eleykmássesha chá'a m'a énxet apmopwána nak eleykmássesha emha m'a xama aqsok apmeykencha'awól'a,

⁴keñe elnáxegkesha chá'a ewakhaksek ma'a sawo ekmope élmomnáwa, tén han ma'a sawo ekyátekto élmomnáwa, keñe etaqmelcheshok chá'a apkenegkesso elatchesek láwa etekpagagkok sawo ekyentaxno, yaqwayam enxoho megkayaqnene'.

⁵Hawók náta kéleyssól'a m'a aqsok kéleykmássesso, kélchenegkessól'a m'a namyep kélcheneykekxexa nak yánsamáne, yawanchek kalpaqmétek kólpatmekxohok nahan chá'a m'a, hakte yawanchek kalxog. Nágkóle chá'a kéxegke m'a, yawanchek katnéssessamhok exma ekmaso xama énxet, yawanchek nahan kataqmelchesek.”

⁶Wesse', méko ekhawo exchep, xép apteme apwányam apagko', ekwányam ma'a apwesey, tén han ekteme ekyennaqte.

⁷¿Yaqsa megkakyek xép, Wesse' apwányam apagkok nak pók aptémakxa énxet'ák? Payhawók xép yeykpok. Méko ekhawo exchep nepyeseksa m'a apkelya'áseykegkoho nak aqsok, tén han kelwesse'e apkelwányam nak keso nélwanmeygkaxa.

⁸Élyeyháxma m'a apyókxoho nak, méko xama enxoho apkelmopwancha'a aqsok. ¡Yawanchek kalxekmósek yántéseksek nekha!

⁹Sawo ekmope ekmomnáwa aqsa m'a kéleykmássesso apagkok nak, éleñama nak kélseykenta m'a Tarsis, tén han sawo ekyátekto ekmomnáwa, éleñama nak kélseykenta m'a Ufaz; aqsok apkelane nak chá'a m'a énxet apkeleykmassáseykha nak chá'a aqsok, tén han ma'a apkelane nak chá'a sawo ekyátekto élmomnáwa, kéltaxneyáseykekxa nak chá'a m'a apáwa hómáyok, tén han ma'a apyexwase, énxet apmopwána apkeleykmassáseykha apkelane ekyókxoho xa.

¹⁰Wesse' egegkok apteme Dios apmámnaqsoho, Dios megyetsapma, Wesse' apwányam memassegwayam. Aplókek agkok ma'a, kayawheykha chá'a xapop; mopwanchek elenmaxakpohok aplo m'a pók aptémakxa énxet'ák.

¹¹(Énxet'ák Israel, kólteme kólának énxet'ák melya'áseyak nak Dios se'e: “Aqsok kéláyókxa, megkatnaha nak élane néten, tén han xapop, kalmassegwók sa' keso náxop; megkeymaxcheyk sa' xama enxoho s'e kóneg yaphope nak.”)

¹²Yetlo apmopwána axta apkelaneyk Wesse' egegkok xapop; yetlo apya'áseykegkoho axta appekkenmak nélwanmégkaxa; yetlo apmopwána aqsok axta appeykessók ma'a néten.

¹³Appeywa ekyennaqte chá'a epáwaksek awáxok yegmen ekyetnama nak néten, etekkesek chá'a yaphope éleñama m'a néxa xapop nak; etekkesek chá'a apkelyenma neyseksa ekmámeye; etekkesek chá'a éxchahayam eñama m'a appekkenmakxa nak.

¹⁴Élyeyháxma apyókxoho énxet tén han melya'áseyak aqsok. Kelyexancháseykha chá'a aqsok kéleykmássesso m'a ektáha nak chá'a apkelane: kéleykmássesso sẽlyexancháseykha m'a, tén han meyke élennama;

¹⁵aqsok mékoho, tén han kélya'ásseykmoho, emasséssók sa' Wesse' egegkok ma'a ekwokmo sa' ekhem sẽlyekpelchássessamókxa'.

¹⁶¡Megkaxnawok agko' Jacob nak Dios apagkok xa, apkelane nak ekyókxoho aqsok élánteyapma nak! Axta apkelyéseykha énxet'ák Israel ma'a yaqwayam etnehek apagkok apagko'. Wesse' ekha apyennaqte: cháxa apwesey xa.

¹⁷—Kéxegke énxet'ák, kélwakhamáxko nak, kólmekxa' aqsok kélagkok.

¹⁸Hakte aptáhak Wesse' egegkok se'e: Makhawók sa' ko'o kaxwók akxakhagwók énxet'ák apheykencha'a nak se'e apchókxa nak. Atwássesha sa' apheykha, lapmaxcheyk sa' kexaha héteyekxak ektáha enxoho xa ektáha nak.

¹⁹—¡Ko'o laye, asagkek setnahakxa'! ¡Megkaltaqmelwomek sélyense! ¡Énagkamchek axta ko'o alenmaxaxkohok se'e ekmáske nak!

²⁰Kéletsagkassek sekpakxanma, kélyétekkessek ekyókxoho apxát'ák seknaqtete nak. Eyenyókek ma'a étchek, ¡Méko kaxwók aptáhak! Méko kaxwók hexátekhassásekxak sekpakxanma, méko kaxwók hepakxenchásekxa'.

²¹—Élyeyháxma apkelámha apmonye'e apagkok nak xa énxet'ák nak; melchetamsók ma'a Wesse' egegkok. Cháxa keñamak megkatyapma nak chá'a aqsok apmáheyo elanagkok, apkexpánmeyk apyókxoho m'a nepkések apnaqtósso.

²²¡Kóltaqmelchesho kélháxenmo! ¡Wa'ak xama amya'a! Xegakmek éxtegyawà ekyawe eñama m'a apchókxa nexcheyha, yaqwayam sa' katnessásekxak yókxexma meykexa énxet ma'a tegma apkelyawe nak Judá, wánxa sa' aqsa katnehek élleykegkaxa m'a semheg nawha'ák éllo.

²³Wesse', ekya'ásegkók ko'o énxet háwe apagkok ma'a apyennaqte nak, tén han háwe apya'áseykegkoho yaqwánxa katnehek apweynchámeykha.

²⁴Hẽllegássesagkoho sa' negko'o, yetlo ekpéwomo senteméssesakxa, háwe sa' yetlo aplo, hakte hegmasséssók katnehek.

²⁵Eyke eyenyenta aplo nepyeseksa m'a énxet'ák melya'ásegko nak xép, cham'a énxet'ák mewóneykha nak chá'a exchep, hakte apkelnapmeyk ma'a Jacob nak énxet'ák apagkok, apmassésseykmek apyókxoho, ekmaso aptemessáseykekxak ma'a apchókxa.