Read Lengua Sur Jeremías 13 Bible Online

Jeremías 13 - Lengua Sur bible

Jeremías 13

¹Aptáhak axta ko'o seyáneya Wesse' egegkok se'e: “Exeg, etegye sa' xama kéltétamáxche élánamáxche nak apáwa apkeláxñe, ethet sa' nepxet, eyke ná eyásses aqsa yegmen.”

²Ektegya'ak axta ko'o m'a kéltétamáxche, ekhawo apkeltamhókxa axta atnehek ma'a Wesse' egegkok, ektetchek axta néxet.

³Tén axta sepaqhetchásekxo makham ma'a Wesse' egegkok. Aptáhak axta seyáneya s'e:

⁴“Emekxa sa' kéltétamáxche' aptegye exchek, cham'a apteta exchek nepxet, emyekxa sa' ma'a wátsam Éufrates, ekpóssem sa' ma'a, cham'a meteymog ekyagqaxe nak.”

⁵Ekmahágkek axta ko'o m'a wátsam Éufrates, ekpóssekmek axta kéltétamáxche m'a, ekhawo apkeltamhókxa axta atnehek ma'a Wesse' egegkok.

⁶Wenaqtémók axta nahan natámen aptáha makham seyáneya Wesse' egegkok se'e: “Emyekxa sa' makham ma'a wátsam Éufrates, ewakxa sa' ma'a kéltétamáxche séltémo axta ekpóssók ma'a.”

⁷Ekmeyákxeyk axta makham ma'a wátsam Éufrates, ekmetmeygkek axta, keñe sekleya kéltétamáxche m'a sekpekkenweykenxa axta sekpóssama, tepelchamáxcheyk axta eyke, mogwanchek axta kaxwók agmaha.

⁸Tén axta sepaqhetchásekxoho ko'o makham ma'a Wesse' egegkok.

⁹Aptáhak axta seyáneya s'e: “Sa' atnéssesek ko'o amasséssessók ektémakxa nak éleymáxkoho apkelwáxok énxet'ák Judá xa ektáha nak tén han ma'a Jerusalén.

¹⁰Cháxa énxet'ák élmasagcha'a nak apkeltémakxa, megkalyaqwámeykegkok elyahakxohok ma'a séltémókxa nak ko'o etnahagkok, apkelyennaqtéssegkek aqsa apkelwáxok apkelyetleykekxo m'a ektémakxa nak chá'a élchetámeykha apkelwáxok. Apkelyetleykekxeyk ma'a mók aqsok kéláyókxa nak, yaqwayam etnahagkok éláneykha, tén han elpeykeshok chá'a. Aphawók xa kéltétamáxche ektepelchamáxche nak, megkólmowána nak kólmaha.

¹¹Ekteméssessók ko'o apyókxoho énxet'ák Israel ma'a aptémól'a xama énxet apyaqhakkassamól'a aptete nepxet ma'a aptétamap, tén han ma'a apyókxoho énxet'ák Judá, épetcheyók apagko' ko'o m'a, yaqwayam enxoho etnahagkok énxet'ák ahagkok, tén han ellegaksek ma'a sekwesey, tén han kañék sélteméssesso ko'o séláyo, tén han seyeymáxkoho. Makke hélyeheykekxoho'. Ko'o sekxeyenma xa, sektáha nak Wesse'.

¹²“Etne sa' nahan elának se'e: Aptáhak Wesse' egegkok, Dios apagkok nak Israel se'e: Kélwanchek kólyetmagkok vino m'a apyókxoho yátegwáxwa nak. Sa' etnehek elátegmowagkok énxet'ák Israel se'e: ‘Negya'ásegkók negko'o negmowána ólyetmagkok vino m'a apyókxoho yátegwáxwa nak.’

¹³Keñe sa' xép etnehek yátegmowagkokxak se'e: Aptáhak Wesse' egegkok se'e: Alnáhakkasek sa' ko'o vino apyókxoho énxet'ák apheykha nak se'e apchókxa nak; cham'a kelwesse'e apkelwányam apkelyaqmagkasso nak aptamhéyak kelwesse'e m'a David, tén han ma'a apkelmaxnéssesso nak énxet'ák ahagkok, tén han ma'a apkellegasso nak sekpeywa, tén han ma'a apyókxoho apheykha nak ma'a Jerusalén.

¹⁴Keñe sa' ayenhekxak chá'a pók atnéssesek nápakha'a apketkók ektémól'a yátegwáxwa kólpaxqátek, apyapmeyk tén han kélketchek. Megkalepyóshek sa' alano'; amasséssók sa' meyke seyésseykekxa, tén han meyke apkelmopyóseka sélányo. Ko'o sekxeyenma xa, sektáha nak Wesse'.”

¹⁵¡Israelitas, appaqmetchek Wesse' egegkok! Nágkóleyxkoho aqsa, kóltaqmelchesho sa' kélháxenmo.

¹⁶Kólteme chá'a kéláyo Dios Wesse' kélagkok, amonye' apcháphasso m'a ekyáqtessóxma, tén han kélpelapmeykha kéxegke m'a egkexe ekyaqtéssamakxa nak exma; amonye' aptemessáseykekxa ekyaqtessóxma ekyentaxno agko' ma'a élseyéxma, kélhaxanma nak kéxegke.

¹⁷Sa' agkok kéxegke kólyahákxa, eyxaxkohok sa' ko'o alekxagwaha eñama kéleymáxkoho kéxegke; kalpexyewenták sa' ahaqta'ák égmen'ák, hakte apkelmákpek ma'a Wesse' egegkok apnaqtósso nepkések.

¹⁸“Etne sa' yának wesse' apwányam tén han egken se'e: ‘Kólántép xa kélheykegkaxa nak néten kéltaháno éltaqmalma, kólhakha náxop, hakte pallakmek kélpátek ma'a kélatchesso kélpátek élyenma éltaqmalma nak.’

¹⁹Apwakhékpek ma'a tegma apkelyawe nak Négueb; méko kaxwók awanchek kamhagkok. Apyókxoho kélnaqlákxak megkatnahakxa apkelókxa m'a énxet'ák Judá, kélnaqlákxeyk meyke apkelweyktámho.

²⁰Kólyeheykha, kóllano ektáhakxa apkelxegáyam kélenmexma m'a ekpayho nak nexcheyha. ¿Háxko apkelmahágkaxa m'a nepkések séltémo axta ko'o héltaqmelchessesek, cham'a nepkések eyaqheykencha'a axta kéxegke kélwáxok?

²¹“Jerusalén, ¿háxko sa' katnehek, aptáha sa' wesse' agkok ma'a énxet élxekmósso agko' axta exche'? Kañegkohok sa', ektémól'a kelán'a kamáwhok katnehek naqláwa.

²²Kelmaxneyáha sa' agkok han, yaqsa ektáha, ektáha xa ektáha nak, kéméxcheyk kay'asagkohok eñama ekyawe megkay'assáxma; ¡cháxa keñamak kélhaxyawássesa nak élnaqta tén han kélyennaqtésa kélyempehek kélteméssessekmoho exma!

²³¿Apwancheya eyaqmagkasek mók ektémakxa apyempehek ma'a énxet appésyam nak? ¿Apwancheya elhaxyawaksek élpeysameykha nak aptáxama m'a neptána? Megkólwanchek kéxegkáxa kóllának aqsok ektaqmela éltámeyeykegko nak kéllánéyak ma'a aqsok ekmaso.

²⁴Cháxa keñamak peya nak ko'o waxpánchesek kéxegke, ektémól'a pa'at apák élsól'a éxchahayam eñama nak yókxexma meykexa énxet.

²⁵Cháxa yaqwánxa katnehek kéxegke xa, Israel, cháxa ekpayhawo nak ko'o atnéssesek kéxegke xa. Ko'o sekxeyenma xa, sektáha nak Wesse'. Hakte megkaxénweykmok kélwáxok ko'o, kélásenneykekxeyk aqsa m'a aqsok kéleykmássesso élmowancha'a amya'a nak.

²⁶Alhaxyawássesagkok sa' ko'óxa kéxegke apyókxoho kélnaqta, yaqwayam sa' kólmegqé' kataxchek yáxña'akxoho kélyókxa'.

²⁷Ekweteyak ko'o m'a aqsok kélyespagko nak, kélnaqtawáseykegkoho kélnaqteyegka'a kéllane chá'a mók, tén han kéltémakxa segmegqassamo kélhémo m'a kelán'a ekyaqmagkáséyak pók énxet ekpathetéyak ekma chá'a ekyánmaga; tén han kéltémakxa ekmaso agko' ma'a néten egkexe nak tén han ma'a yókxexma nak. ¡Xél'aye Jerusalén! ¿Háxko sa' ekwánxa katnégwók néxa ekteme ekmanyása émpehek?”