Read Lengua Sur Jeremías 17 Bible Online

Jeremías 17 - Lengua Sur bible

Jeremías 17

¹“Énxet'ák Judá, táxésamaxcheyk kéxegke megkólya'assáxma m'a táxésso élánamáxche nak sawo, kélqahassegkek meteymog ekyennaqte ekmahanta naw'a m'a meteymog ekyetnama nak kañe' kélwáxok, tén han ma'a élámha nak nekhaw'ék élmahamtakcha'a m'a kélwatnamakxa nak chá'a aqsok.

²Kelxénweykekxók chá'a apkelwáxok kélketchek ma'a kélwatnamakxa axta chá'a aqsok, tén han ma'a yámet awhók kéleykmássesso kélpeykessamo axta chá'a, ekheykegko axta m'a nekha nak yenta'a élyentaxno pessesse agkok, tén han ma'a néten egkexe nak,

³tén han ma'a néten meteymog élwenaqte élaqneykegko nak yókxexma. Wának sa' ko'o kólmenyexchesek aqsok kélagkok ekxámokma nak, tén han ma'a aqsok élmomnáwa kélagkok, eñama megkólya'assáxma, wának sa' kalmaxchek aqsok kélagkok ekhéyak nak néten egkexe kélpeykessamókxa nak chá'a kéleykmássesso, cham'a ekyókxoho kañe' nak xapop kélagkok.

⁴Kólántépok sa' ma'a xapop sekmeyáseykekxa axta ko'o kéxegke, atnéssesek sa' apkelásenneykha naqsa kélenmexma m'a apchókxa megkólya'ásegkaxa nak kéxegke, hakte eklókek ko'o, máxa táxa sa' katnehek kamasséssók kéxegke.”

⁵Aptáhak Wesse' egegkok se'e: “Etaqnaweykpok sa' chá'a m'a ekyamasma nak chá'a ko'o apwáxok, apchásenneykekxa nak chá'a m'a énxetók xamo', apye'eykekxa nak chá'a eltamhok epasmok.

⁶Máxa pegke sa' etnahagkok apkelámha nak yókxexma meykexa énxet, meyke agko' la'a chá'a éláneykha: apteyapmal'a chá'a m'a neyseksa meteymog, tén han ma'a yásek xapop nak, cham'a meykexa nak ekha.

⁷“Tásek eyke chá'a katnehek apxénamap ma'a énxet seyáyo nak chá'a ko'o, seyásenneykekxa nak chá'a.

⁸Máxa sa' etnehek ma'a yámet kélcheneykekxal'a neyáwa wátsam, élweykmohol'a kepmenák ma'a ényahamakxa nak yegmen, megkayél'a kawak ma'a ekmexanma exma, hakte megkamassegwomek chá'a ekxámokma m'a áwa', wokmek agkok han ekhem ekteme meyke yegmen, megkatneykha chá'a awáxok, megkamassegwomek han chá'a ekyexna.

⁹“Méko xama enxoho ekyeykhágweykmoho ekmowána amya'a tén han ekmaso ektémakxa ektéma nak apwáxok ma'a énxet. ¿Yaqsa awanchek kay'asagkoho'?

¹⁰Ko'o sélányo chá'a apwáxok énxet, sektáha nak Wesse', tén han sekya'áseykegkoho chá'a m'a kañók agko' nak élchetámeykegkaxa apwáxok; tén han sekméssamól'a chá'a xama m'a ekpayhawo nak chá'a atnéssesek sellegassáseykegkoho, cham'a ektémakxa nak chá'a aqsok apkeláneyak.”

¹¹Máxa sénhek apkeltahanwayam la'a aqsa megkatnahakxa appok ma'a énxet apxámasso nak aqsok apagkok eñama apmenyexeykha. Ekyennákxoho apyempehek sa' nahan kamassegwók ma'a ekxámokma aqsok apagkok, keñe sa' natámen etnehek ekyeyháxma.

¹²Nentaháno eyeymáxkoho m'a tegma appagkanamap egagkok nak, kélpekkenma axta nanók agko', eyeynamo m'a sekxók agko' axta.

¹³Wesse', xép apteme apkelhaxanma m'a Israel. Elmegqágwakxohok sa' apyókxoho m'a apyamasma nak xép. Elmassegwók sa' apyókxoho m'a apyetnakhasso nak xép, ektémól'a kélwesey kéltáxéssól'a yagkamex, eñama apyamasma exchep, apteme nak ekteyapmakxa yegmen ektaqmalma.

¹⁴Wesse' hetaqmelchessem ko'o, keñe sa' ataqmelwók; hewagkas ko'o teyp, keñe sa' awagkasaxchek teyp, hakte xeyep apwánxa apagkok chá'a sélpeykessamo.

¹⁵Aptáhak chá'a ko'o seyáneya énxet'ák se'e: “¿Háxko ektémakxa m'a Wesse' egegkok appeywa axta? ¡Tásek katnehek heykxe s'e kaxwo nak!”

¹⁶Keñe ko'o maltémo yáphássesek ma'a aqsok ekmaso, maltémók nahan yahak apkellegeykegkoho ekmaso m'a. Apya'ásegkók xép ma'a sektáhakxa axta seyáneya, hakte nápaqtók axta ekpaqmétak.

¹⁷Ná etne aqsa chá'a ko'o ségwakkasso exchep, hakte xép apteme sekyexánegweykekxexa ekwa'a enxoho chá'a ekmaso sekha.

¹⁸Yána' elmegqeyk ma'a sénmexeykha nak chá'a ko'o, ko'o eyke ná hetnésses; yána elyegweyk ma'a, ko'o eyke ná hégwakkas. Yána káhapwak ekmaso apheykha m'a, emasséssem ekmanyehe agko'.

¹⁹Aptáhak axta ko'o seyáneya Wesse' egegkok se'e: “Exeg, etnegwakxa sa' ma'a éltamhomaxchexa nak Átóg Énxet'ák, apkelántaxnegweykekxexa nak chá'a m'a kelwesse'e apkelwányam nak Judá, tén han apkelánteyapmakxa nak chá'a, keñe sa' etnéssesek han ma'a ekyókxoho atña'ák nak tegma apwányam Jerusalén.

²⁰Etne sa' elának énxet'ák se'e: ‘Kelwesse'e apkelwányam, tén han énxet'ák kélheykha nak ekyókxoho kañe' Judá, tén han kélheykha nak ekyókxoho kañe' Jerusalén kélántaxnegweyktámho nak chá'a s'e atña'ák nak, kóleyxho Wesse' egegkok appeywa.

²¹Aptáhak Wesse' egegkok se'e: Kélmeyókek sa' agkok chá'a kélyennaqte, nágkólsakxa aqsa chá'a kélseykha ekyentaxno ekhem sábado, nágkólántaxnegwakxa han chá'a m'a atña'ák nak Jerusalén.

²²Nágkólántekkes han chá'a xama enxoho kélseykha kélxanák ma'a ekhem sábado, nágkóllána han chá'a xama enxoho kéltamheykha. Hélpagkanches chá'a ko'o ekhem sábado, ekhawo séltémókxa axta chá'a ko'o etnahagkok ma'a kélyapmeyk nano' axta.

²³Axta eyke ko'o heháxenmók ma'a, axta han hélyeheykekxoho', apkelyennaqtéssegkek axta aqsa apkelwáxok, axta hélyeheykekxoho', mopmenyeyk axta kólxekmósagkok.

²⁴“Ektáhak ko'o sekpeywa s'e, sektáha nak Wesse': Hélyahakxoho sa' naqsók agko', nágkólsakxa aqsa chá'a xama enxoho kélseykha atña'ák nak tegma apwányam ma'a ekhem sábado; hélpagkanches sa' chá'a ko'o xa ekhem nak, nágkóllána nahan chá'a xama enxoho m'a kéltamheykha.

²⁵Kéltemék sa' agkok xa ektáha nak, etepagkok sa' chá'a kelwesse'e apkelwányam apyaqmagkasso m'a David, elántexek sa' chá'a s'e apatña'ák nak tegma apwányam yetlo apkelchánte yátnáxeg apkelyenyawasso, tén han yátnáxeg, tén han yetlo apkelxegexma'a m'a apkelámha apmonye'e, tén han ma'a énxet'ák Judá, tén han Jerusalén. Megkatnehek sa' chá'a mexma énxet apheykha m'a Jerusalén.

²⁶Elwak sa' chá'a énxet'ák apkeleñama nak tegma apkelyawe Judá, cham'a apheykencha'a nak nepyáwa Jerusalén, tén han ma'a apkeleñama nak Benjamín xapop apagkok, tén han ma'a ekpayhegweykenxa nak xapop, tén han ma'a yókxexma ekxámokmakxa nak meteymog élekhahéyak, tén han ma'a Négueb. Enaqlanták sa' chá'a tegma appagkanamap ma'a aqsok apnaqtósso yaqwayam etnehek apkelwatno, tén han yaqwayam etnehek apkelnapma, tén han apkelmésso naqsa nak aqsok ekyexna apkeneykekxa, tén han ma'a aqsok ánek ekmátsa nak ekpaqneyam éten agkok, tén han ma'a aqsok apkelmésso naqsa apmésso nak ekxeyenma apkelwáxok ma'a Wesse' egegkok.

²⁷Sa' agkok kéxegke kólyahákxohok ma'a séltémókxa nak kóltéhek, mehelpagkanchessesa enxoho m'a ekhem sábado, kélántaxnéssákxo enxoho chá'a kélseykha atña'ák nak Jerusalén xa ekhem nak, alwatnek sa' ko'o m'a atña'ák nak tegma apwányam, táxa sa' kamasséssók ma'a tegma apkelyawe nak ma'a Jerusalén, méko sa' nahan kawának kaspanchesek.’”