Read Lengua Sur Jeremías 18 Bible Online

Jeremías 18 - Lengua Sur bible

Jeremías 18

¹Epaqhetchessek axta ko'o Wesse' egegkok, aptáhak axta seyáneya s'e:

²“Emhók sa' apxagkok énxet apkelane nak yátegwáxwa, sa' altennássók xép sekpeywa m'a.”

³Ekmahágkek axta ko'o m'a apxagkok nak apkelane yátegwáxwa, ko'o Jeremías, ekwetágwokmek axta apyeykesa yelpa' m'a apkeláneykxa nak chá'a yátegwáxwa.

⁴Xama axta chá'a eyesagko aptekkesso apkelane, apkeláneykxók axta chá'a, apmáncha'a chá'a xa yelpa' nak, ekwokmoho aptekkesa m'a ekwánxa apmopmenyého etekkesek.

⁵Keñe axta Wesse' egegkok aptáha seyáneya s'e:

⁶“Israelitas, ¿mowancheya ko'óxa atnéssesek kéxegke xa ektáha nak, ekhawo apteméssesakxa nak yelpa' xa apkelane nak yátegwáxwa? Máxa yelpa' ekteméssessók sélmeykencha'a emék kéxegke, ekhawo aptémakxa nak apkelmeykha apmék yelpa' xa énxet apkelane nak yátegwáxwa. Ko'o sekxeyenma xa, sektáha nak Wesse'.

⁷Ekmanyehe agko' ko'o ewanchek axének alántekkesek énxet'ák, tén han alnápok, tén han amasséssók xama apchókxa, essenhan aptémakxa nak chá'a wesse' apwányam xama énxet.

⁸Apkelwátesagkek agkok chá'a apkeláneyak aqsok ekmaso xa énxet'ák nak, keñe magwáphássesek chá'a m'a séllegassáseykegkoho séleyxchessama nak ko'o.

⁹Ewanchek han chá'a ko'o axének anaqxétekhasegkokxa', tén han axátekhásekxak chá'a xama apchókxa, tén han aptémakxa nak chá'a wesse' apwányam xama énxet.

¹⁰Apkelánegkek agkok chá'a aqsok ekmaso xa énxet'ák nak, melyahákxoho enxoho chá'a sélpaqhetchesso, magwaphássesek chá'a m'a aqsok éltaqmela ekxeyenma nak chá'a ewáxok wáphássesek.

¹¹“Eltennés sa' énxet'ák Judá, tén han ma'a apheykha nak Jerusalén, sektáha ko'o sélxéna, sektáha nak Wesse': ‘Éláneykxeyk ko'o sektáhakxa yaqwánxa atnéssesek kéxegke; xénchek ewáxok allegássesagkoho'. Kólwátésák kélláneyak aqsok ekmaso, kóltaqmelchásekxa kéltémakxa, tén han aqsok kéllánéyak nak chá'a.’

¹²Sa' etnehek elátegmowágkok xép se'e: ¡Kaqhok eyke exchep henlenxanmok! Egmenyeyk negko'o anlanagkok ma'a ekleklamókxa nak chá'a egwáxok, tén han ólyennaqtések egwáxok ólyetlakxak ma'a ekxeyenmakxa nak chá'a egwáxok.”

¹³Cháxa keñamak aptáha nak Wesse' egegkok se'e: “Kólmaxneyha hana m'a pók aptémakxa nak énxet'ák, aplegayak kexa xama xa ektéma nak aqsok. ¡Asagkók agko' apkeláneyak aqsok ma'a énxet'ák Israel!

¹⁴¿Emassegwomhoya chá'a yeyam appok ma'a naw'ék nak egkexe meteymog Líbano? ¿Keymawhoya chá'a yegmen ektaqmalma ekteyapma nak ma'a néten nak egkexe?

¹⁵Kelwagqámeykegkek eyke ko'o m'a énxet'ák ahagkok, apkelméssegkek chá'a aqsok ánek ekmátsa nak ekpaqneyam éten agkok ma'a aqsok kéláyókxa élmowancha'a amya'a nak. Apkelyetnakhágweykmek ma'a ámay apagkok nak, cham'a nanók ámay nak, apkelyetleykekxeyk ma'a ámay melya'áseykegkaxa nak.

¹⁶Cháxa apkeltémakxa aptemessáseykekxo yókxexma meykexa énxet ma'a apchókxa nak, tén han élyamasso apkelwáxok ma'a énxet'ák. Elyeykesha sa' chá'a apqatkok elyegweyk elwetak ma'a ektáhakxa enxoho chá'a apkelyeykhágwayam ma'a.

¹⁷Máxa sa' ko'o atnehek éxchahayam eñama nak ekteyapmakxa ekhem waxpánchesek ma'a énxet'ák Israel; wának sa' emenxenek ma'a apkelenmexma nak. Wahekxak sa' éyapok, malanók sa', cham'a ekwa'a sa' ekhem séllegassáseykegkoho.”

¹⁸Aptáhak axta apkelpaqmeta énxet'ák se'e: “Anlánekxak sa' nentáhakxa yaqwayam agmasséssók Jeremías. Megkatnehek eyke chá'a meyke apkelmaxnéssesso Dios énxet'ák apagkok yaqwayam hẽlxekmóssek, apxámok nahan ma'a apkelya'áseyak nak aqsok, yaqwayam hempékessesagkok, tén han Dios appeywa apkellegasso yaqwayam chá'a hẽltennaksek Dios appeywa. Ansexnenak sa', yaqwayam sa' emátog. Mageyxók sa' chá'a m'a aptáhakxa enxoho chá'a sẽláneya.”

¹⁹¡Wesse', heyeyxho hana! ¡Yeyxho aptáhakxa nak apkelpeywa m'a sélenmexma!

²⁰¿Kólyaqmagkásekxohoya chá'a aqsok ekmaso m'a aqsok ektaqmela nak? ¡Apmetmeyk máxek yaqwayam heyátawanyek! Kaxénwakxoho apwáxok sekpaqhetchessa'akto axta exchep, séltamho epasmok xa énxet'ák nak, séltamho axta exchep elwataksek apkeltaqnawéyak ma'a.

²¹¡Yána kaxwók eletsapok apketchek meyk élnapma, essenhan sókwenaqte kélyetxaqxo; tampe sa' katnahagkok ma'a apnaqteyegka'a nak, tén han meyke étchek! ¡Yána kalnápok negmasse m'a apkelennay'a nak énxet'ák apagkok, keñe sa' wokma'ák eletsapok kempakhakma!

²²Elpelakkasses yahak ma'a énxet'ák apkelmenyexmo nak; ¡kañexkohok sa' élpayheykha apatña'ák apkelaye! Hakte emétegkessegkek máxek apmáheyo hemok, epekkenchessegkek kelhanma sekpéwomókxa nak chá'a.

²³Wesse', apya'ásegkók eyke exchep ekyókxoho aqsok élxeyenma nak apkelwáxok elanagkok, apmáheyo ko'o heyaqhek. ¡Eyaqmagkásekxa m'a aqsok ekmaso apkeláneyak nak, nágkalwánaqma m'a melya'assáxma nak! ¡Elyaqnegkesák ma'a apmonye' nak xép, ellegássesagkoho yetlo aplo!