Read Lengua Sur Jeremías 22 Bible Online

Jeremías 22 - Lengua Sur bible

Jeremías 22

¹Aptáhak axta ko'o seyáneya Wesse' egegkok se'e: “Emyekxa sa' ma'a wesse' apwányam apxagkok nak, exén sa' se'e amya'a nak

²nápaqtók wesse' apwányam Judá, aphama nak chá'a m'a apheykegkaxa nak chá'a David aptawán'ák neptámen nak, tén han nápaqta'awók ma'a apkeláneykha, tén han ma'a énxet'ák apheykha nak ma'a tegma apwányam: ‘Kóleyxho Wesse' egegkok appeywa.

³Kóllána chá'a ektaqmalma kéllánekxésso apheykha énxet'ák se'e yókxexma nak, tén han ekpayhawo nak chá'a kóltéhek, kólwagkas sa' chá'a teyp neyseksa apmáheyo enaqtawasagkohok ma'a apkelyennaqtésamakpoho nak chá'a, nágkólyennaqtésha chá'a kélyempe'ék kóllának ma'a apkeleñama mók nekha, tén han ma'a élyéheykha nak, tén han ma'a xentampe'e nak. Nágkólaqha chá'a énxet apkeñama mók nekha s'e yókxexma nak.

⁴Naqsók agkok chá'a kéllana kéxegke s'e séltémókxa nak chá'a kóltéhek, etepagkok sa' chá'a kelwesse'e apkelwányam apyaqmagkasso m'a David, elántaxnegwaták sa' chá'a yetlo apkelchánte yátnáxeg apkelyenyawasso tén han yátnáxeg ma'a atña'ák nak tegma apyawe, yetlo apkelxegexma'a m'a apkeláneykha, tén han énxet'ák.

⁵Keñe sa' megkólyahákxoho enxoho s'e séltennasso nak, nápakha'a apketkók sa' etnekxak se'e tegma apyawe nak. Ko'o sekxeyenma xa, sektáha nak Wesse'.’”

⁶Hakte aptáhak apxéna Wesse' egegkok ma'a wesse' apwányam Judá nak apxagkok: “Aphawók ko'o sélányo exchep ma'a egkexe Galaad, aphawók ma'a egkexe nak Líbano, naqsók eyke ko'o sekxéna exchep peya atnessásekxak meyke xama aqsok, yókxexma meyke xama énxet apha.

⁷Wának sa' ko'o exchep ey'áwak ma'a apkelempakhayo nak chá'a, yaqwayam emasséssók xép. Elyaqténchesek sa' ma'a yámet élámha éltaqmalma, élánamáxche nak yámet cedro, keñe sa' ekxák nátex.

⁸“Apxámok sa' pók aptémakxa énxet elyeykhágwak se'e tegma apwányam nak, natámen ekteme xa. Sa' etnehek chá'a elmaxneyha pók se'e: ‘¿Yaqsa ektéma apteméssessama nak Wesse' egegkok se'e tegma apwányam nak?’

⁹Keñe sa' etnehek chá'a yátegmowagkok pók se'e: Ñémékxa apkelyamasma m'a ekhémo mók nélpaqhetchásamáxkoho, apkelánesso axta m'a Dios Wesse' apagkok, apkelpeykessamók ma'a mók aqsok kéláyókxa nak.’”

¹⁰Nágkóllekxagwaha aqsa kóllanok ma'a wesse' apwányam Josías; nágkóllekxagwaha aqsa eñama apketsapma; eyke kóllekxagwaha kóllanok ma'a apketche Salum, peya nak exog meyke apweyktamho; méteyekxók sa' chá'a m'a xapop apteyeykemxa axta. Hakte aptáhak apxéna Wesse' egegkok Salum, cham'a Josías apketche nak, wesse' apwányam nak ma'a Judá, apyaqmagkassama nak apteme wesse' apwányam ma'a apyáp nano', apteyapma nak se'e yókxexma nak: “Mewatamók sa' chá'a,

¹²yetsapwók sa' ma'a apchókxa kélya'assamakxa axta, méteyekxók sa' chá'a s'e apchókxa nak.

¹³“¡Xép laye, apkelane nak chá'a apxagkok apyawe, yetlo aptémakxa ekmaso, tén han apkelane nak chá'a tegma netna'awo', yetlo megkapéwomo aptémakxa, apkeltemessáseykha nak aqsa chá'a apnámakkok, meyke apyánmagkasso apkeltamheykha!

¹⁴Apteme nak chá'a epaqmésmakha s'e: ‘Alának sa' exagkok apyawe apagko', yetlo élyawe apwáxok ma'a néten nak.’ Elanaksek chá'a atña'ák étkók, keñe chá'a ewakhaksek elyepetchesek yámet cedro m'a nápakhaw'ék nak, keñe elyexwasaksek chá'a.

¹⁵¿Apkenagkamcheya anxek aqsa segwakhe yámet cedro nenteme nak wesse' apwányam? Payheykekxeyk axta apwáxok neyseksa apha m'a apyáp nano', apkeláneyak axta eyke chá'a aqsok yetlo ekpéwomo aptémakxa, tén han ekpayhawo nak chá'a etnehek, axta keñamak ektaqmalma chá'a aqsok apkelane.

¹⁶Etaqmelchessásekxak axta chá'a apheykha m'a meyke nak aqsok apagkok, tén han ma'a kélnaqtawáseykegkoho nak, axta keñamak ektaqmalma chá'a aqsok apkelane. Cháxa magkenatchesso ektáha ko'o sey'áseyak xa. Ko'o sekxeyenma xa, sektáha nak Wesse'.

¹⁷“Wánxa eyke aqsa chá'a exchep ekxéneykencha'a apwáxok ma'a apxámáseyak nak aqsok apagkok eñama apmenyexeykha; apkelnapmeyk chá'a m'a meyke nak apkeltémakxa, apnaqtawáseykegkok chá'a énxet'ák apagkok.”

¹⁸Aptáhak apxéna Wesse' egegkok Joaquim, wesse' apwányam nak Judá, Josías nak apketche: “Méko sa' kalekxagwaha apketsapa enxoho. Méko sa' kalekxagwaha tén han katnehek ekpeywa s'e: ‘¡Asagke nak la'a ektáhakxa egmók!, ¡Asagke nak la'a ektáhakxa, wesse'!’

¹⁹Máxa yámelyeheykok sa' kólteméssesek kólátawanyek: kólyenyawaksek sa', kóltekkesek sa' yókxexma Jerusalén.”

²⁰“¡Énxet'ák Judá, kólchenát sa' néten egkexe Líbano, tén sa' kólyennaqtések kélpeywa! ¡Kólpáxamha sa' ma'a ekpayho nak élámhakxa meteymog Basán! Kólwónches sa' ma'a ekpayho nak naw'ék egkexe Abarim, hakte apmenxenákpek ma'a appasmeykekxa axta kéxegke!

²¹Élpaqhetchessegkek axta eykhe kéxegke m'a ektaqmalmakxa axta kélheykha, axta eyke hélháxenmo'. Cháxa kéltémakxa axta kéxegke xa, eyeynamo m'a kéltémakxa axta kélketkók: ¡megkólmenyeyk axta kóleyxhok sekpeywa!

²²Éxchahayam sa' kalsók ma'a apyókxoho apkelámha apmonye'e kélagkok, kólnaqlakxak sa' megkatnahakxa apkelókxa m'a appasmeykekxa axta chá'a kéxegke. Kólmegqágwakxohok kélagko' sa', eñama m'a ekyókxoho kéltémakxa ekmaso nak.

²³Tásek eyke kaxwók kéxegke kélheykha neyseksa yenta'a, neyseksa m'a yámet cedro éleñama nak kélseykenta m'a Líbano, ¡kóllegagkohok sa' eyke, ekwa'a sa' kéllegeykegkoho ekmáske, kóllegagkohok sa' ekmáske ektémól'a kelán'a katnehek naqláwa!”

²⁴Aptáhak apcháneya Wesse' egegkok Jeconías, wesse' apwányam nak Judá, Joaquim apketche nak: “Naqsók ko'o sektáha sekxéna exchep se'e, sektáha nak Dios mamassegwayam: Naqsók eykhe exchep apteme sétchesso ephék sélqahasso nak chá'a, sétchessama nak sélya'assamakxa', magweyxek sa' eyke alkok,

²⁵yaqwayam agkések ma'a apkelenmexma apkeltaqnagkamo apagko' nak chá'a, apcháyo apagko' nak chá'a exchep. Agkések sa' ko'o exchep ma'a Nabucodonosor wesse' apwányam nak Babilonia, tén han ma'a caldeos.

²⁶Ayensók sa' xép ma'a xapop megkatnahakxa axta apteyeykemxa, yetlo egken, sa' kóletsapwók kélqánet ma'a.”

²⁷Megkalwatamók sa' chá'a s'e xapop élpekheykegkaxa agko' nak chá'a kalmeyenta'.

²⁸¿Jeconías ya apteme xama yátegwáxwa appaqxo megkólmowánal'a kólmaha, enxeykel'a nahan ma'a aqsok élpaqxo megkólmámenyéhol'a? ¿Yaqsa ektéma kélyenseykmo nak yetlo apketchek ma'a xapop megkólya'áseykegkaxa nak?

²⁹¡Xapop; keyxho Wesse' egegkok appeywa!

³⁰Aptáhak Wesse' egegkok se'e: “Kólteme sa' énxet meyke apketchek xa énxet nak, kólxén sa' apteme énxet megkatyapma aqsok apkelane neyseksa apha. Metepagkek sa' aptawán'ák neptámen yaqwayam etnahagkok kelwesse'e apkelwányam apyaqmagkasso m'a David, yaqwayam enxoho etnahagkokxak kelwesse'e apkelwányam ma'a Judá.”