Read Lengua Sur Jeremías 3 Bible Online

Jeremías 3 - Lengua Sur bible

Jeremías 3

¹Aptáhak Wesse' egegkok se'e: “Yenyókek agkok aptáwa' xama énxet, keñe ektepa enxoho aphakxa xa kelán'a nak, kamekxak pók énxet, yawanchek kay'ókxak makham ma'a apmonye' atáwa' axta. ¡Ekmanyása agko' sa' katnéssesek apchókxa ektáha enxoho xa ektáha nak! Keñe exche' Israel, kelánéseykegkek nentémakxa ekmaso mansexta apxámokma apagko' ma'a élásekhayókxa nak. ¡Keñe kaxwo' ekmako makham ko'o hey'óta'! Ko'o sekxeyenma xa, sektáha nak Wesse'.

²“Kanmexekxoho hana egkexe éláxñeyo nak, kataqmelchesho sa' élányo: ¿háxko megkalánegweykenxa exche' ektémakxa megkamasexta? Kaxek chá'a exche' nekha ámay kaleyxek élásekhayókxa, aptamheykegkól'a árabe m'a yókxexma meykexa nak énxet. Kenyetséssegkek apchókxa ektémakxa megkamasexta, tén han ektémakxa ekmaso.

³Cháxa keñamak megkamámeya nak ma'a apmopsamágexal'a, tén han ma'a élyapweykxal'a. Hawók xe' megkamegqakto m'a kelán'a ekyaqmagkáseyak pók énxet ekma nak chá'a ekyánmaga ekpathetéyak; ¡kéméxcheyk kamegqágwók!

⁴Kaxwók ektáha axta makham seyáneya s'e: ‘Táta ahagkok, séntameykha axta chá'a sektémakxa étkok,

⁵¿melwátessemeya sa' aplo? ¿Megkatnégwomeya sa' néxa aplo?’ Temegkek eykhe ekpeywa xa ektáha nak, keláneykxeyk eyke aqsa ekyókxoho aqsok ekmaso ekmakókxa enxoho kalána'.”

⁶Axta aptemék ko'o seyenagkama Wesse' egegkok, aptémakxa axta wesse' apwányam Josías: “¿Apweteyaya ektémakxa m'a Israel, cham'a sénmexeykekxo nak ko'o? Xegamche keñe élánegweykmo ektémakxa megkamasexta m'a néten egkexe nak, tén han ma'a ekyókxoho kóneg yenta'a élyentaxno nak pessesse agkok.

⁷Énagkamchek axta ko'o hey'ótak makham natámen élane xa ekyókxoho aqsok nak, neyke hey'ékekta'. Wetayak axta han yáxeg Judá xa, cham'a seyenseykmo nak ko'o sétleykha;

⁸wetayak axta han ko'o ektémakxa sektaqnagkama m'a Israel, cham'a sénmexeykekxo nak ko'o, tén han sekyamasma eñama setwáseykegkoho élánegwayam chá'a pók énxet megkatnaha atáwa'. Keñe m'a Judá, yáxeg nak ma'a Israel, seyenseykmo nak ko'o sétleykha, axta kayeyk, xegamchek axta nahan ma'a, tén axta éláneya nahan ma'a ektémakxa megkamasexta.

⁹Yahamók agko' axta nahan élane, kenyetséssegkek axta m'a apchókxa. Eyenseykmek axta ko'o sétleykha élpeykessamo m'a meteymog kéleykmassáseykha, tén han ma'a yenta'a nak.

¹⁰Axta nahan ko'o hey'ékekták Judá, yetlo segkéssamo agko' awáxok, cham'a seyenseykmo nak ko'o sétleykha, natámen élane xa ekyókxoho aqsok nak, élyexancháseykha axta aqsa chá'a. Ko'o sekxeyenma xa, sektáha nak Wesse'.”

¹¹Aptáhak axta ko'o seyáneya Wesse' egegkok se'e: “Asextók ektémakxa ekmaso m'a Israel sénmexeykekxo nak ko'o, kaxnók ma'a Judá seyenseykmo nak ko'o sétleykha.

¹²Exeg sa', emhók sa' ma'a ekpayho nak nexcheyha, eñes sa' se'e amya'a nak: “Aptáhak Wesse' egegkok se'e: ¡Hey'óta' ko'o, Israel sénmexeykekxo nak! Ataqmelcheshok sa' ko'o amok takha exche', mawenaqtésók sa' nahan seklo, hakte ko'o sekteme ektaqmeleykha ewáxok. Ekméssek ko'o sekpeywa, sektáha nak Wesse' kélagkok.

¹³Eyke kay'ásegwakxoho aqsa m'a ektémakxa ekmaso, tén han énmexeykekxo m'a Dios Wesse' agkok; ekweynchámeykencha'a chá'a ektegyeykencha'a énxet apkeleñama mók nekha yaqwayam kagkések ekyókxa, m'a kóneg nak yenta'a élyentaxno pessesse agkok, tén han megkalyeheykekxo m'a séltémókxa nak katnehek. Ko'o sekxeyenma xa, sektáha nak Wesse'.”

¹⁴Aptáhak Wesse' egegkok se'e: “Kólchexyem makham, énxet'ák sénmexeykekxa nak ko'o, ko'o sekteme Wesse' kélagkok. Amok sa' chá'a ko'o kélxama xama tegma apwányam, keñe sa' apqánet chá'a m'a ektáha nak chá'a apnámakkok apagko', anaqlakxak sa' ma'a Sión.

¹⁵Atnéssesek sa' ko'o apkeltaqmelchesso kélókxa m'a ekleklamo nak ko'o ewáxok, sa' eltaqmelchesek chá'a kéxegke m'a yetlo apmopwancha'a aqsok, tén han apkelya'áseykegkoho.

¹⁶Kélxámakxeyk sa' agkok kéxegke m'a apchókxa, apxámákxo enxoho m'a kélketchek, méko sa' kaxének kaxwók ma'a yántéseksek ekhémo mók nélpaqhetchásamáxkoho nak Wesse' egegkok, méko sa' kaxének kaxwók awáxok ma'a, tén han kaxénwakxohok chá'a awáxok, megkóllánekxeyk sa' han axnagkok, hakte kamaskok sa' kólámenyého'. Ekméssek ko'o sekpeywa, sektáha nak Wesse' kélagkok.

¹⁷Wesse' egegkok aptaháno ektaqmalma sa' kólteméssesek ekwesey m'a Jerusalén; apyókxoho pók aptémakxa énxet'ák sa' yaqnekxak ma'a, yaqwayam hélpeykesho'; kamaskok sa' elyetlakxohok ma'a ektémakxa nak élmámenyého apkelwáxok elanagkok aqsok ekmaso eñama élyennaqte, yaqwayam sa' etnehek ko'o seyáyo, kamaskok sa' etnahagkok élyennaqte apkelwáxok elanagkok ma'a aqsok ekmaso nak.

¹⁸“Wokmek sa' agkok xa ekhem nak, keypetchekxak sa' Judá m'a Israel, kataqhohok sa' makham xamo' ma'a apchókxa ekpayho nak nexcheyha, cham'a xapop sekpekkencháseykekxa axta ko'o m'a kélyapmeyk nano' axta kéxegke.

¹⁹“Énxet'ák Israel, ekxeyenmeyk axta ko'o kéxegke atnehek étchek ahancha'awo', tén han agkések ma'a xapop, étsapmo nak kélnények kóllano', apchókxa ektaqmalma agko' nak, megkaxnawo nak ma'a mók apkelókxa nak keso náxop. Énagkamchek axta ko'o kéxegke héltéhek kélyáp, tén han mehélyenyewek chá'a xama enxoho.

²⁰Kéltemék kéxegke sélyenseykmo sélyetleykha m'a, ektémól'a kelán'a ektawáseykegkoho atáwa' élánegwayam la'a chá'a pók énxet megkatnahakxa atáwa'. Ko'o sekxeyenma xa, sektáha nak Wesse'.

²¹“Legáxcheyk élpayheykha kélatña'ák ma'a néten egkexe ekyamáyekxa nak exma: ¡israelitas ma'a apkellekxagweyncha'a nak, apkeltamho nak kalepyóshok kóllano'! Apkelyetnakhágweykmek apkelyetlo ámay ekpéwomo, megkalxeyenmak apkelwáxok ko'o, sektáha nak Dios Wesse' apagkok.

²²Hélyo'óta makham ko'o, énxet'ák sénmexeykekxa nak chá'a, amasséssesek sa' ko'o m'a ektémakxa nak chá'a sélenmexeykha.” “Keso negheyncha'a negko'o s'e, negya'aweykteyk xép, hakte xép apteme Dios Wesse' egagkok.

²³Kaqhok negko'o ólmeyekxak chá'a m'a néten egkexe nak, essenhan ólpáxamágwakxak chá'a m'a néten meteymog élwenaqte nak; wánxa aqsa egwanchek negko'o agwetak nélwagkásamáxche teyp, negko'o nentáha nak énxet'ák Israel ma'a Dios Wesse' egegkok nak.

²⁴Kéleykmássesso segmegqassamo nélpeykessamo ensawhessók ma'a aqsok apkelwete axta ẽlyapmeyk nano' ma'a nentémakxa axta egketkók: cham'a nepkések, weyke, tén han egketchek apkelennay'a tén han kelwán'ák.

²⁵Ólháxahagkok hana nélmegqakto, yetlo nélyeykhásamáxkoho egagko' nélmegqágweykekxa', hakte nentémakxa sakcha'a axta negko'o negeynamo nenlánéyak mólya'assáxma nenmexeykekxo m'a Dios Wesse' egagkok, tén han mólyeheykekxa, ekwokmoho s'e kaxwo nak, weykekxók axta nahan ma'a ẽlyapmeyk nanók axta.”