Read Lengua Sur Jeremías 30 Bible Online

Jeremías 30 - Lengua Sur bible

Jeremías 30

¹Keso amya'a apkeltennasa axta Wesse' egegkok ma'a Jeremías. Axta aptáhak apcháneya s'e:

²“Aptáhak Wesse' egegkok, Dios apagkok nak Israel se'e: Etaxés sa' xama weykcha'áhak ekyókxoho sektáhakxa axta seyáneya,

³hakte xegakmek ekhem yaqwánxa sa' ko'o ayaqmagkassesek mók ektémakxa nak apheykha m'a énxet'ák ahagkok Israel tén han ma'a Judá. Ko'o sekxeyenma xa, sektáha nak Wesse'. Wának sa' ko'o elmeyenták makham ma'a xapop sekméssamakxa axta yaqwayam etnehek apagkok ma'a apyapmeyk nano' axta.”

⁴Keso appeywa axta Wesse' egegkok apxeyenma m'a Israel tén han Judá.

⁵Aptáhak Wesse' egegkok se'e: “¡Legáxcheyk élpayheykha kélatña'ák élyegweymáxche', tén han eyeymáxche', tén han magya'áseyak nentáhakxa!

⁶Kóltegyaha hana sa' amya'a, apwanchek kexaha etnehek apnaqláwa xama énxet apkenna'. ¿Yaqsa eyke ektáha sekwet'a nak ko'o apkelyettelegweyncha'a m'a énxet'ák, máxa aptamhágkok ma'a ekmáheyól'a etnahagkok apnaqláw'ák? ¿Yaqsa ektáha élmópeykxo nak nápaqta'a m'a apyókxoho nak?

⁷¡Chágketwa'ak ekhem ekmaso, xama ekhem megkaxnémo nak ma'a mók ekhem nak! Katnehek sa' ekhem éllegeykegkaxa apkelwáxok ma'a Jacob énxet'ák apagkok, alwagkasek sa' eyke ko'o teyp.

⁸Ektáhak ko'o sekpeywa s'e, sektáha nak Wesse' ekha sekyennaqte: Almallahanchesek sa' ko'o énxet'ák ahagkok ektémakxa nak ekyentaxno kéltemessáseykha naqsa, kamaskohok agko' sa' kaxwo' aptamhéyak apkelásenneykha naqsa m'a énxet'ák apkeleñama nak mók nekha.

⁹Ko'o sa' aqsa etnahagkok séláneykha, sektáha nak Dios Wesse' apagkok, tén han ma'a David, peya nak ko'o atnéssesek wesse' apwányam apagkok.

¹⁰“Ektáhak ko'o sekpeywa s'e, sektáha nak Wesse': Jacob énxet'ák apagkok, apteme nak séláneykha, nágkóle'; Israel, ná égwe', hakte atekkesek sa' ko'o exchep se'e apchókxa makhawók agko', kélchexakhagweykenxa axta kélántekkessama yetlo aptawán'ák neptámen. Meyke ektáhakxa kélheykha sa' katnekxak makham, tén han ektaqmalma, meyke xama aqsok enxoho yaqwayam kalyegwakkasha.

¹¹Ekxénchek ko'o, sektáha sélxegexma'a kéxegke yaqwayam alwagkasek teyp, ko'o sektáha nak Wesse'. Amasséssók sa' ko'o ekyókxoho apkelókxa, cham'a sélya'assamakxa axta chá'a ko'o kéxegke séxpánchessama. Keñe sa' kéxegke mamassésseme'; allegássesagkohok sa' aqsa ekpayhawo nak atnéssesek séllegassáseykegkoho: megkatnehek sa' mallegassáseykegkoho kéxegke.”

¹²Aptáhak Wesse' egegkok se'e: “Megkaltaqmelwomek kélyense kéxegke, méko pánaqte agkok ma'a élmaso kélyempe'ék nak.

¹³Méko nahan ekyetnakhassamo awáxok kéxegke; méko nahan kataqmelchessók ma'a kélyense nak, megkóltaqmelwomek nahan.

¹⁴Massegkek nahan élxeyenma apkelwáxok kéxegke m'a apyókxoho kélásekhayókxa nak; massegkek élyetnakhassamo apkelwáxok kéxegke. Élyensassegkek axta ko'o kéxegke, máxa axta ektemék ma'a apteméssessamól'a elyensaksek ma'a kélenmexma, éllegassáseykegkok axta ekyentaxno agko' eñama ekxámokma kéltémakxa ekmaso, tén han ekxámokma agko' ma'a megkólya'assáxma.

¹⁵¿Yaqsa ektáha kélpaqméteyncha'a nak élleklámegko ektémakxa kélyense? Megkaltaqmelwomek kéllegeykegkoho. Ekxámokma kéltémakxa ekmaso, tén han ekxámokma agko' megkólya'assáxma keñamak, sekteméssessama xa ektáha nak.

¹⁶Kólmasséssók sa' eyke nahan apyókxoho m'a apmassésseyam nak chá'a kéxegke, kólnaqlakxak sa' nahan megkatnahakxa apkelókxa apyókxoho m'a kélenmexma nak; wának sa' ko'o kólyementamagkok aqsok apagkok ma'a apkelyementaméyak nak chá'a aqsok kélagkok, wának sa' nahan kólmenyexchesagkok aqsok apagkok ma'a apkelmenyexchesso nak chá'a aqsok kélagkok kéxegke.

¹⁷Alyennaqtéssók sa' makham, altaqmelchessessók sa' kélyense, sa' etnehek eykhe elpaqmétek kélenmexma s'e: ‘Taqmópegkek Sión, méko ekyetnakhássawo awáxok.’ Ko'o sekxeyenma xa, sektáha nak Wesse'.”

¹⁸Aptáhak Wesse' egegkok se'e: “Ayaqmagkassesek sa' ko'o mók ektémakxa nak apheykha m'a Jacob énxet'ák apagkok, kayóshok sa' alanok ma'a apchókxa nak; kólnaqxétekhasagkokxak sa' makham tegma apkelyawe m'a neyseksa nak meteymog nekha'a appalleykemxa axta, tén han kelwesse'e apxanák apkelyawe m'a apheykegkaxa axta.

¹⁹Sa' kañék katyapok negmeneykmasso negmésso nak ekxeyenma egwáxok Wesse' egegkok ma'a, tén han néktegmeykha ekpayheykekxa egwáxok. Metnekxeyk sa' apqántawo', hakte ko'o sa' axámasagkok. Megkólwanyaha sa' nahan, hakte ko'o sa' atnéssesek ekha kéláyo.

²⁰Etnekxak sa' makham israelitas ma'a aptamheykegkaxa axta nano'; megkóltaqhésha sa' chá'a énxet'ák apagkok ma'a sekhakxa nak ko'o, allegássesagkohok sa' ko'o m'a apnaqtawáseykegkoho nak chá'a.

²¹Nepyeseksa sa' nahan yeñék etyapok apkemha apmonye' apagkok: etyapok sa' xama nepyeseksa yaqwayam etnehek apkeltaqmelchesso. Wának sa' ko'o hépetchegwoho', hakte, ¿yaqsa megkeygwakxeyk hépetchegwohok ko'o? Énxet'ák ahagkok sa' ko'o atnehek ma'a, keñe sa' ko'o etnehek Dios apagkok. Ko'o sekxeyenma xa, sektáha nak Wesse'.”

²³Máxa éxchahayam ekyennaqte m'a Wesse' egegkok aplo, máxa m'a segyettekhane ekyennaqte ekyeyhegwayam nak chá'a takhapxet ma'a élmasagcha'a nak apkeltémakxa.

²⁴Megkamassehek sa' Wesse' egegkok aplo ekwokmoho apkelana m'a ekxeyenma nak apwáxok elána'. Kawak sa' ekhem yaqwánxa kólya'ásegwók kéxegke xa aqsok nak.