Read Lengua Sur Jeremías 35 Bible Online

Jeremías 35 - Lengua Sur bible

Jeremías 35

¹Epaqhetchessegkek axta ko'o Wesse' egegkok aptémakxa axta wesse' apwányam Joaquim ma'a Judá, cham'a Josías axta apketche, axta aptemék seyenagkama s'e:

²“Emyekxa sa' apheykegkaxa nak recabitas, elpaqhetches sa'. Enaqlakxa sa' xama apwáxok nak ma'a tegma appagkanamap, elmésák sa' vino.”

³Ekxegkek axta ko'o sétama m'a Jaazanías, ko'o Jeremías (apketche axta m'a sélwesáyo xamo' Jeremías, Habasinías axta aptáwen), tén han apkelyáxeg'a tén han apketchek, tén han ma'a apyókxoho énxet'ák nak recabitas,

⁴eknaqlákxeyk axta m'a tegma appagkanamap, kañe' apheykegkaxa axta m'a Hanán apketchek, Igdalías axta apketche, apteme axta xama Dios énxet apagkok. Cháxa kañe' nak, axta yetnók ma'a nekha apheykegkaxa axta m'a apkelámha apmonye'e nak tegma appagkanamap, néten axta m'a kañe' aphamakxa axta m'a Maaseías, Salum axta apketche, apteme axta aptaqmelchesso m'a átog nak tegma appagkanamap.

⁵Élyátegkásegkek axta recabitas élláneykegkoho egheykok élyawe vino tén han ma'a egheykok étkók nak, keñe axta sektáha séláneya s'e: “Kólyenák ketsék vino.”

⁶Axta aptáhak seyátegmowágko s'e: “Magyeneykegkok negko'o vino, hakte apmasmeyk apagko' axta negko'o agyenagkok vino m'a egyáp nano' Jonadab, Recab axta apketche, ekweykekxoho m'a entawán'ák nentámen nak.

⁷Mopmenyeyk axta han anlanagkok enxanák, tén han agkenekxak aqsok aktek namyep, essenhan kaxek ma'a anmen yámet negkeneykekxa'. Apkeltémok axta aqsa chá'a ólpakxenagkok, yaqwayam enxoho kawegqohok negheykha s'e xapop, negheykegkaxa nak nentéma máxa néleñama mók nekha.

⁸Nélyeheykekxók negko'o ekyókxoho m'a apkeltémókxa axta chá'a antéhek ma'a egyáp nano' Jonadab, magyeneykegkok xama enxoho m'a vino, ekweykekxoho m'a ennaqteyegka'a nak, tén han egketchek,

⁹manláneykegkok han enxanák yaqwayam enxoho aghakha, méko han ma'a anmen yámet negkeneykekxa', tén han nélchekha yaqwayam enxoho agkenekxak aqsok aktek.

¹⁰Nélpakxeneykegkek eyke aqsa, nenláneykegkek nahan ekyókxoho m'a apkeltémókxa axta chá'a antéhek ma'a egyáp nano' Jonadab.

¹¹Keñe axta aptaxnama Nabucodonosor se'e negókxa nak, cham'a wesse' apwányam nak Babilonia, xeyenmeyk axta egwáxok ólmeyógmak Jerusalén, yaqwayam enxoho ónyahagkok apmonye'e m'a sẽlpextétamo nak caldeos, tén han ma'a sirios; cháxa keñamak negheykencha'a nak se'e Jerusalén.”

¹²Keñe axta Wesse' egegkok appaqhetchesa m'a Jeremías, axta aptáhak apcháneya s'e:

¹³“Éltamhók ko'o exchep ey'ókxak etnehek yának énxet'ák Judá tén han Jerusalén se'e, ko'o sektáha nak Wesse' ekha sekyennaqte, Dios apagkok nak Israel: ‘Kóleyxho sélxekmósso, kólyahakxoho m'a séltémókxa nak chá'a kóltéhek. Ekxénchek ko'o xa, sektáha nak Wesse'.

¹⁴Apkelyeheykekxók apkeltémókxa axta chá'a etnahagkok aptawán'ák neptámen ma'a Jonadab, Recab axta apketche, apkeltémo axta ménagkehek chá'a m'a vino, makhemek eyke makham ménéyak se'e negwánxa nak, hakte apkelyaheykekxók ma'a apkeltémókxa axta chá'a etnahagkok ma'a apyáp nano'. Hágkaxwe eykhe chá'a ko'óxa kéxegke agkések séltémókxa kóltéhek, makke hélyeheykekxoho'.

¹⁵Ketók pók axta eykhe ektemék séláphássesso chá'a apyókxoho m'a séláneykha apkellegasso nak chá'a sekpeywa, yaqwayam etnehek elának se'e: Kólwátésák kéltémakxa ekmaso, tén han ekmaso kéllánéyak aqsok. Nágkólyetlakxa m'a mók aqsok kéláyókxa nak, nágkólpeykesho han, keñe sa' kóllenxanmagkohok kélheykha s'e xapop sekmésso axta ko'o kéxegke, tén han ma'a kélyapmeyk nano' axta. Makke kéxegke hélháxenmo', mehelyeheykekxohok nahan.

¹⁶Apkelyeheykekxók apkeltémókxa axta chá'a etnahagkok apyáp nanók ma'a Jonadab aptawán'ák neptámen, Recab axta apketche; Keñe énxet'ák Israel mehelyeheykekxoho'.

¹⁷Cháxa keñamak sektáha nak ko'o sekpeywa, sektáha nak Wesse' ekha sekyennaqte, Dios apagkok nak Israel: Wának sa' ko'o káhapwak énxet'ák Judá, tén han apheykha nak Jerusalén ekyókxoho apkellegeykegkoho ekmaso séltennassama axta ko'o. Hakte élpaqhetchessegkek axta ko'o kéxegke, keñe mehélháxenmo, élwóneykha axta, keñe kéxegke mehelátegmoweykegko.’”

¹⁸Axta aptáhak han apkeláneya Jeremías ma'a recabitas: “Aptáhak Wesse' ekha nak apyennaqte, Dios apagkok nak Israel se'e: ‘Kélyeheykekxók kéxegke apkeltémókxa axta kóltéhek ma'a kélyáp nano' Jonadab, kéltaqmelchessegkek han ma'a apchánamakxa axta kóltéhek, kélláneykegkek han ekyókxoho m'a apkeltémókxa axta kóltéhek,

¹⁹ekxénchek ko'o, sektáha nak Wesse' ekha sekyennaqte, Dios apagkok nak Israel, megkameykkehek sa' chá'a xama Jonadab aptáwen neptámen aptamheykha sekhakxa.’”