Read Lengua Sur Jeremías 36 Bible Online

Jeremías 36 - Lengua Sur bible

Jeremías 36

¹Appaqhetchessek axta Wesse' egegkok Jeremías, ekweykmo axta cuatro apyeyam apteme wesse' apwányam Joaquim ma'a Judá, Josías axta apketche. Axta aptáhak apcháneya s'e:

²“Ema sa' xama weykcha'áhak meyke kéltáxésso, etaxés sa' ekyókxoho séltennasa axta, sekxéna axta m'a Israel, tén han Judá, tén han ma'a mók apkelókxa nak, axta eyeynamók xép sekpaqhetchessama m'a apyennaqtamakxa axta Josías, ekwokmoho makham se'e kaxwo' nak.

³Lapmaxcheyk sa' elwátésagkok apkeltémakxa ekmaso énxet'ák Judá, apkelleg'a sa' ekyókxoho m'a apkellegeykegkoho ekmaso ekxeyenma nak ko'o ewáxok waha', keñe sa' mayaqmagkásekxeyk ko'o m'a apkeltémakxa ekmaso tén han melya'assáxma.”

⁴Apwóneyha axta Jeremías ma'a Baruc, Nerías axta apketche, apkelyetsetchessek axta nahan ekyókxoho m'a aptáhakxa axta apcháneya Wesse' egegkok, keñe axta Baruc aptáxésa chá'a weykcha'áhak.

⁵Keñe axta Jeremías apmésa apkeltamhókxa chá'a etnehek ma'a Baruc. Axta aptáhak apcháneya s'e: “Elano, mowanchek ko'o kaxwók amyekxak Wesse' egegkok tegma appagkanamap apagkok, eñama s'e setnamakxa nak.

⁶Emyekxa sa' xép ma'a, ekwákxo enxoho ekhem élánamáxchexal'a manto nento, elyetsetek sa' ma'a weykcha'áhak sélyetsetchesa exchek ko'o exchep, aptáxésa exchek, yaqwayam sa' ellegak Wesse' egegkok appeywa m'a énxet'ák, tén han ma'a apyókxoho apheykha nak tegma apkelyawe Judá, apkelwa'akto nak se'e.

⁷Lapmaxcheyk sa' ey'ásekxak apkelmaxneyéyak ma'a aphakxa nak Wesse' egegkok, keñe elwátésagkok ekyókxoho m'a apkeltémakxa ekmaso, hakte asagkók agko' ma'a Wesse' egegkok aplo apmáheyo nak yahak xa énxet'ák nak.”

⁸Aptemék axta Baruc ekyókxoho m'a apkeltamhókxa axta etnehek ma'a Dios appeywa aplegasso Jeremías: apmeyákxeyk axta m'a tegma appagkanamap, apkelyetsetchek axta weykcha'áhak Wesse' egegkok appeywa.

⁹Kéltamhók axta metawagkehek aptéyak nápaqtók Wesse' egegkok apheykha nak Jerusalén tén han ma'a apkelwe axta apkeleñama m'a pók tegma apkelyawe nak Judá, cham'a ekweykmo axta cinco apyeyam nueve pelten apteme Wesse' apwányam Joaquim ma'a Judá, Josías axta apketche.

¹⁰Apmahágkek axta Baruc ma'a apwáxok néten nak ma'a tegma appagkanamap, nentaxnamakxa nak ma'a ekwesey nak Átog Axnagkok, axta nahan apcheynawók apkelyetsetchesso weykcha'áhak apyókxoho énxet'ák aptáxésso axta Jeremías appeywa m'a Guemarías nak kañe' apxagkok, Safán axta apketche apteme axta apnaqtáxésso chá'a weykcha'áhak.

¹¹Apleg'ak axta ekyókxoho Wesse' egegkok appeywa m'a Micaías, Guemarías axta apketche, Safán axta aptáwen, apkelyetsete axta weykcha'áhak ma'a Baruc,

¹²tén axta apmeyákxo m'a wesse' apwányam apxagkok, aphamakxa axta m'a énxet apnaqtáxéseyak axta chá'a weykcha'áhak, apchaqnákxexa axta apyókxoho wesse' apwányam apkeláneykha ekyawe nak kéláyo: cham'a Elisamá apnaqtáxéseyak axta chá'a weykcha'áhak; Delaías, Semaías axta apketche; Elnatán, Acbor axta apketche; Guemarías, Safán axta apketche; Sedequías, Hananías axta apketche tén han ma'a pók wesse' apwányam apkeláneykha nak.

¹³Apkeltennáseyha axta Micaías ekyókxoho aplege apkelyetseta axta weykcha'áhak Baruc nápaqta'awók ma'a énxet'ák.

¹⁴Yetlókok axta nahan apcháphasso wesse' apwányam apkeláneykha m'a Jehudí, Netanías axta apketche, Selemías axta aptáwen, pók aptáwen axta han ma'a Cusí, apkeltamho eltennaksek Baruc esakxak weykcha'áhak apkelyetseta exchek nápaqta'awók ma'a énxet'ák. Apmákxeyk axta weykcha'áhak ma'a Baruc, tén axta apmahágko m'a aphágkaxa axta.

¹⁵Axta kéltáhak kéláneya Baruc se'e: —Exa, hẽlyetsetches negko'o xa weykcha'áhak nak. Apkelyetsetchessek axta nahan ma'a Baruc.

¹⁶Xama axta apkelleg'a, apkelanawók axta chá'a pók yetlo apkelyegwakto apagko', tén axta aptáha apkelpaqmeta s'e: —Tásek sa' óltennasha wesse' apwányam ekyókxoho xa.

¹⁷Tén axta kéltáha kéláneya Baruc se'e: —Hẽltennés hana, háxko aptáhakxa exchep aptáxésa ekyókxoho s'e.

¹⁸Aptáhak axta Baruc apchátegmowágko s'e: —Jeremías apagko' axta ko'o sélyetsetchesso ekyókxoho s'e, keñe ko'o sektáxésa weykcha'áhak táxésso.

¹⁹Tén axta kéltáha kéláneya Baruc se'e: —¡Kólxegánem sa', xép, tén han Jeremías, nágkólho aqsa ey'asagkohok kélhágkaxa xama énxet!

²⁰Appekkenákxeyk axta weykcha'áhak wesse' apwányam apkeláneykha ekyawe nak kéláyo m'a kañe' Elisamá apxagkok, apnaqtáxéséyak axta chá'a m'a weykcha'áhak, tén axta apkelmeyákxo m'a wesse' apwányam apxagkok apkeltennássekxo ekyókxoho wesse' apwányam xa amya'a nak.

²¹Apcháphássek axta wesse' apwányam ewakxak weykcha'áhak Jehudí m'a Elisamá apxagkok, apteme axta apnaqtáxéseyak chá'a weykcha'áhak. Xama axta apwa'aktegkesa weykcha'áhak ma'a Jehudí, apkelyetsetchessek axta nápaqtók wesse' apwányam, tén han ma'a apyókxoho apkeláneykha ekyawe nak kéláyo, apheyncha'a axta xamók ma'a.

²²Axta aphak wesse' apwányam ma'a kañe' aphamakxa axta chá'a yepsamágek, amonye' átex éláléwe, hakte chaqhawok axta m'a pelten nueve.

²³Xama axta appenchesa apkelyetsete Jehudí ántánxo essenhan cuatro kéltáxésso, apyaqténchek axta wesse' apwányam xama sawo m'a weykcha'áhak, tén axta apkelwatna. Cháxa apteméssesakxa axta xa, ekwokmoho eksawhéxko élmeyesma ekyókxoho m'a weykcha'áhak nak.

²⁴Axta nahan keygwakkásak wesse' apwányam tén han apkeláneykha ekyawe axta kéláyo apkelleg'a axta ekyókxoho élyetsátamáxche m'a weykcha'áhak, axta nahan kalnápak apkelwáxok.

²⁵Keñe axta Elnatán, Delaías tén han Guemarías meltamho ewatnekxak wesse' apwányam ma'a weykcha'áhak, axta eyke yahaxnawo',

²⁶apkeltamhók axta aqsa emok yaqxegkesek kañe' negmomaxchexa Jeremías yetlo Baruc aptáxéssesso axta chá'a weykcha'áhak ma'a apketche Jerahmeel, tén han Seraías, Azriel axta apketche tén han ma'a Selemías, Abdeel axta apketche. Apkelpóssek axta eyke m'a Wesse' egegkok.

²⁷Appaqhetchessek axta Wesse' egegkok Jeremías natámen axta apkelwatno wesse' apwányam ma'a weykcha'áhak apkelyetsetchesso axta Jeremías ma'a Baruc. Axta aptáhak apcháneya s'e:

²⁸“Emekxa sa' makham mók weykcha'áhak, etáxeyásekxa sa' makham ekyókxoho ekhémo m'a ektémakxa axta eknaqtáxésamaxche m'a amonye' axta, apwatneykxo axta m'a Joaquim, wesse' apwányam nak Judá.

²⁹Etne sa' yának se'e: ‘Keso aptáhakxa exchek Wesse' egegkok se'e: Apwatneyk axta exchep weykcha'áhak, appaqhetchessek axta han Jeremías eñama aptáxésso apxeyenma apmáheyo exegmak wesse' apwányam Babilonia emasséssak se'e apchókxa nak, tén han apmáheyo etnessásekxak meyke énxet, tén han aqsok kélnaqtósso.

³⁰Ektáhak ko'o seyáneya exchep se'e Joaquim wesse' apwányam nak Judá, ko'o sektáha nak Wesse', méko sa' xama enxoho aptáwen neptámen etnehek wesse' apwányam apyaqmagkasso m'a David. Kólpekkenek sa' aqsa aphápak xép neyseksa mayáhat ekhem, tén han neyseksa yeyam appok ma'a axta'a,

³¹añássesagkohok sa' ko'o exchep eñama mey'assáxma yetlo aptawán'ák neptámen ekweykekxoho m'a apkeláneykha nak. Wának sa' ko'o káhapwaták ekyókxoho m'a kéllegeykegkoho ekmaso seklegassama axta chá'a, tén han megkólháxenmo axta chá'a kéxegke, ekweykekxoho m'a apheykha nak Jerusalén, tén han ma'a Judá.’”

³²Apmeyk axta makham mók weykcha'áhak ma'a Jeremías, tén axta apmésa Baruc, aptáxéssesso axta chá'a weykcha'áhak, aptáxessek axta ekyókxoho m'a aptáhakxa axta apkelyetsetchesso m'a Jeremías, cham'a ekyókxoho ektémakxa axta kéltáxésso m'a weykcha'áhak apkelwatna axta wesse' apwányam Joaquim. Apxegkásekxók axta han ekxámokma mók aqsok apxeyenma Jeremías ekhémo m'a.