Read Lengua Sur Jeremías 41 Bible Online

Jeremías 41 - Lengua Sur bible

Jeremías 41

¹Apmeyákxeyk axta Mispá Ismael pelten siete apya'aweykxo m'a Guedalías, cham'a Ismael, Netanías axta apketche, Elisamá axta aptáwen, apteme axta wesse' apnámakkok. Apkelyetlókek axta nahan diez énxet. Keñe axta m'a Mispá neyseksa aptéyak

²apkempákxeyk axta néten Ismael yetlo diez énxet ektáha axta apkelxegexma'a, yetlókok axta nahan apkelhaxyawasso sawo apagkok apchaqha m'a Guedalías, apteméssessama axta apkeláneykha apchókxa Judá m'a wesse' apwányam Babilonia.

³Apkelnapchek axta han Ismael ma'a apyókxoho judíos, tén han sẽlpextétamo caldeos apheykha axta xamók Guedalías ma'a Mispá.

⁴Keñe axta mók ekhem, natámen axta apmatñà m'a Guedalías, megkanyáxchexa axta makham amya'a ektáhakxa,

⁵apkelwa'ak axta ochenta énxet, apkeleñama m'a Siquem, Siló tén han ma'a Samaria, apkelmópésawók axta apkelyésésso áwa' apatña'ák, yetlo apkelyepto apkelántaxno, tén han apkelpexyekháseykha apyempe'ék. Apkelsánteyk axta han aqsok ekyexna apkeneykekxa, tén han aqsok ánek ekmátsa nak ekpaqneyam éten agkok, yaqwayam elmések Wesse' egegkok ma'a tegma appagkanamap nak.

⁶Aptekkek axta Ismael apkeñama m'a Mispá apkelanyexágko, apkelekxagweygkek axta ámay. Xama axta apkeltahanya'a, aptáhak axta apkeláneya s'e: —Kólteyánegwatámho hana Guedalías, Ahicam axta apketche.

⁷Xama axta apkelwokmo m'a nepyeseksa nak tegma apwányam, apkelnapchek axta nahan ma'a Ismael yetlo m'a apkelxegexma'a, apxatmeyk axta kañe' yámelchet.

⁸Keñe axta diez xa énxet'ák, aptáha apcháneya Ismael se'e: —Ná hẽlnáhap aqsa negko'o, yetneyk negko'o hótáhap apaktek, apho hótáhap, pexmok égmenek, tén han yányawhéna' apyegmenek nélpósso m'a yókxexma nak. Tén axta Ismael melnapa, apteméssesakxa axta m'a apkelxegexma'a nak.

⁹Cham'a yámelchet, apxatmakxa axta apyókxoho énxet'ák aphopák apkelnapma m'a Ismael, axta m'a wesse' apwányam Asá axta apkeltémo kóllanaksek apkennápomákpo axta Baasá wesse' apwányam axta Israel. Awanhek axta m'a yámelchet nak, lanawók axta eyke énxet aphopák apkelnapma axta m'a Ismael.

¹⁰Apkelmomchek axta han Ismael apxátama kañe' m'a wesse' apwányam apketchek kelwán'ák, yetlo énxet'ák apkelheykekxa axta m'a Mispá, apkeltémo axta elanha Nebuzaradán apteme axta apkemha apmonye' sẽlpextétamo ma'a Guedalías. Apkelmomchek axta m'a Ismael, tén axta apxegeykekxo makham ekxeyenma apwáxok emhagkok ma'a Amón.

¹¹Xama axta apkelleg'a amya'a ektáhakxa ekmaso aqsok apkelane Ismael ma'a Johanán, Caréah axta apketche tén han ma'a apkelxegexma'a apkelámha apmonye'e nak sẽlpextétamo,

¹²apchánchesákxeyk axta apyókxoho énxet'ák apagkok, keñe apxega peya elnapakpok ma'a. Apkeltahanya'ak axta nahan nekha ekyetnamakxa axta yegmen ma'a Gabaón.

¹³Xama axta apkelwet'a Johanán ma'a apkelma axta Ismael, tén han ma'a apyókxoho sẽlpextétamo apkelámha apmonye'e ektáha axta apkelxegexma'a, kelpayheykxók agko' axta apkelwáxok,

¹⁴apkelya'aweykxeyk axta nahan apkelyepetchegwákxo m'a Johanán.

¹⁵Keñe axta Ismael, yetlo ocho énxet apkelxegexma'a apyexánegkesa m'a Johanán. Apkelmeyákxeyk axta m'a Amón.

¹⁶Keñe axta Johanán, tén han ma'a apkelámha apmonye'e nak sẽlpextétamo ektáha axta apkelxegexma, apkeláneyncha'a m'a sẽlpextétamo, kelán'ák, sakcha'álétkók tén han ma'a wesse' apwányam apkeláneykha ekyawe axta kéláyo, apkelmoma axta Ismael apkeleñama m'a Mispá, natámen axta apchaqhe m'a Guedalías, apnaqleykenta axta makham Johanán apkeleñeykta m'a Gabaón.

¹⁷Apkelxegeykekxeyk axta makham ekweykekxoho m'a Guerut-quimam, ekpayho nak Belén, apkellókasseykxexa axta apkelyampe. Xénchek axta eykhe apkelwáxok elwakxohok ma'a Egipto,

¹⁸yaqwayam enxoho yenyahagkok apmonye'e m'a caldeos, hakte apkeláyak axta eñama apchaqhe Ismael ma'a Guedalías, apteméssessama axta apkeláneykha apchókxa m'a wesse' apwányam Babilonia.