Read Lengua Sur Jeremías 42 Bible Online

Jeremías 42 - Lengua Sur bible

Jeremías 42

¹Apkelya'aweykxeyk axta apyókxoho apkelámha apmonye'e sẽlpextétamo, yetlo Johanán, Caréah axta apketche, tén han Azarías, Hosaías axta apketche, tén han apyókxoho énxet'ák, ketcheyetse nak, tén han apkelwányam

²ma'a Dios appeywa aplegasso Jeremías, axta aptáhak apcháneya s'e: —Peyk negko'o exchep ólmaxnak xama aqsok; hẽlyahakxoho sa': Hẽlmaxnésses negko'o Dios Wesse' apagkok, néleymomáxche nak egqántawo'. Nenxámók axta eykhe negko'o, egqántawók eyke kaxwók néleymomáxche', ekhawo ektémakxa nak xép apwet'a.

³Hẽlmaxnésses negko'o Dios Wesse' apagkok, henxekmósek sa' ámay eyeyméxchexa nak ólyetlók, tén han eyeyméxchexa nak anlána'.

⁴Aptáhak axta Jeremías apchátegmowágko s'e: —Hoy, almaxnéssesek sa' ko'o kéxegke Dios Wesse' kélagkok, ekhawo kéltáhakxa nak sélmaxneya ko'o kéxegke, alya'assásegwók sa' ekyókxoho m'a aptáhakxa enxoho seyátegmowéyak, meyke seyáyam xama enxoho.

⁵Tén axta aptáha apcháneya Jeremías se'e: —Dios Wesse' apagkok sa' etnehek segweteykegkoho megkólmowána nak kólya'ássók tén han ekmámnaqsoho senxeyenma, manlánegko enxoho m'a aqsok apkeltémo nak xép hẽltennaksek.

⁶Ólyahakxohok sa' apkeltamhókxa enxoho antéhek ma'a Dios Wesse' egegkok, megkalchehek sa' eykhe egwáxok, essenhan kalkohok sa' eyke nahan egwáxok, cham'a néltamho nak xép hegyo'ókxések, yaqwayam enxoho kataqmelek negheykha.

⁷Diez ekhem axta táhak ekyeykhe, appaqhetchessek axta Wesse' egegkok Jeremías,

⁸yetlókok axta apcháneyeykha m'a Johanán, Caréah axta apketche, tén han ma'a apkelámha apmonye'e nak sẽlpextétamo ektáha axta apkelxegexma'a, tén han ma'a apyókxoho énxet'ák, cham'a ketcheyetse nak ekweykekxoho m'a apkelwányam.

⁹Aptáhak axta apkeláneya s'e: “Aptáhak apkeláneya kéxegke, Wesse' egegkok, Dios apagkok nak Israel, cham'a kéltamho axta kéxegke almaxnéssesek aqsok kélmámenyého:

¹⁰‘Kélmakók sa' agkok kéxegke kólhekxak se'e xapop nak, wának sa' ko'o kataqmelek kélheykha; mamasséssemek sa', alhésha sa' aqsa, malántekkesek sa' chá'a, hakte chaqhegkek ko'o ewáxok seyhaya kéxegke m'a aqsok ekmaso nak.

¹¹Nágkóle aqsa m'a wesse' apwányam Babilonia, kéláya kélagko' nak chá'a kéxegke. Nágkóle', hakte ekheyk ko'o xamók kéxegke yaqwayam alwagkasek teyp tén han almallahanchesek neyseksa apmáheyo elmok. Ko'o sekxeyenma xa, sektáha nak Wesse'.

¹²Kélyósekak sa' ko'o alanok kéxegke, wának sa' nahan ko'o kalapyóshok elanok kéxegke m'a tén han yohok kólmeyenták ma'a xapop kélagkok axta.’

¹³“Sa' agkok kéxegke kólmakók kólhekxak se'e apchókxa nak, megkólyahákxo enxoho Dios Wesse' kélagkok,

¹⁴kéltáha enxoho kélpeywa s'e: ‘Negmakók eyke negko'o ólmeyekxak ma'a Egipto, peyakxa sa' magwetyek kempakhakma, tén han manlegyek élpáwá m'a kélaqkahasso, tén han móletsepek meyk sẽlnapma,’

¹⁵kóleyxho sa', kéxegke kéleymomáxche nak Judá, aptáhakxa nak appeywa apkeláneya m'a Wesse' ekha apyennaqte, Dios apagkok nak Israel: ‘Kéllenxanakmek sa' agkok kéxegke kélmáheyo kólmeyekxak ma'a Egipto,

¹⁶káhapwók sa' kéxegke kempakhakma, tén han meyk, kéláya kélagko' nak chá'a kéxegke, neyseksa kélheykha m'a, sa' kólmaskok ma'a.

¹⁷Apyókxoho apkelenxányam nak elmeyekxak ma'a Egipto, eletsapwakxak sa' kempakhakma m'a, meyk essenhan negmasse. Méko sa' kawagkasaxchek teyp, méko sa' kagketaxchek ma'a aqsok ekmaso peya nak ko'o waha'.’

¹⁸“Aptáhak Wesse' ekha apyennaqte, Dios apagkok nak Israel se'e: ‘Sa' atnehek nahan ko'óxa altaqnaweygkok kéxegke m'a sektémakxa axta séltaqnaweykegkoho ahagko' ma'a apheykha nak Jerusalén, kélmeyákxo sa' ma'a Egipto, altaqnaweygkohok ahagko' sa' ko'o kéxegke. Néltémo hentemégwomhok exma ekmaso sa' kóltemekxa', aqsok eyeymáxkohol'a kataxche', megkólwetekxók sa' chá'a s'e yókxexma nak.’

¹⁹Keñe kéxegke kéleymomáxche nak makham Judá, apkeltamhók megkólmahagkek Wesse' egegkok ma'a Egipto. Kólya'asagkoho sa', eyéssek ko'o kéxegke.

²⁰Awanhók agko' kéxegke megkólaqhémo kéltáhakxa peya nak kalsexnena', hakte kéxegke kélagkók axta kéltémo ay'ókxések ma'a Dios Wesse' kélagkok, axta kéltáhak séláneya s'e: ‘Hẽlmaxnésses negko'o Dios Wesse' egagkok, hegya'ássesagkoho sa' nahan ekyókxoho m'a aptáhakxa enxoho apcháneya, yaqwayam enxoho negko'o anlána'.’

²¹Elya'assásegwokmek ko'o kéxegke sakhem ma'a apkeltémo axta altennaksek ma'a Dios Wesse' kélagkok, makke kólyahákxohok kéxegke.

²²Kólya'asagkoho sa' peya kóletsapwók kempakhakma, meyk tén han negmasse m'a apchókxa kélmakókxa nak kólhók.”