Read Lengua Sur Jeremías 44 Bible Online

Jeremías 44 - Lengua Sur bible

Jeremías 44

¹Keso amya'a apxawe axta Jeremías, ekxeyenma m'a apyókxoho judíos apkelhayam axta m'a Egipto, cham'a tegma apkelyawe nak Migdol, Tafnes, Menfis, tén han ma'a yókxexma ekpayho nak nepyeyam:

²“Aptáhak Wesse' ekha apyennaqte, Dios apagkok nak Israel se'e: ‘Kélweteyak axta kéxegke ekyókxoho aqsok ekmaso seyáphassama axta ko'o m'a Jerusalén, tén han ma'a pók tegma apkelyawe nak Judá. Nápakha'a apketkók kaxwók aptamheykekxak ma'a, méko han ekha m'a,

³eñama m'a aqsok ekmaso apkeláneyak, hakte elókassegkek axta ko'o apkelpeykessamo m'a mók aqsok kéláyókxa nak tén han apkelméssama chá'a m'a aqsok ánek ekmátsa nak ekpaqneyam éten agkok; aqsok kéláyókxa melya'ásegko nak ma'a, tén han megkólya'ásegko nak kéxegke, tén han melya'áseykegko axta m'a kélyapmeyk nano'.

⁴Éláphassáseykekxeyk axta eykhe chá'a ko'o kéxegke apkellegasso nak sekpeywa, yaqwayam enxoho eltennaksek megyánhek kóllának ma'a aqsok ekmaso agko', sektaqnagkamo nak chá'a ko'o.

⁵Axta eyke kéxegke hélyeheykekxoho', axta nahan hélháxenmo'. Megkólwátéseykegkok kélláneyak aqsok ekmaso, kéllenxanmeykegkók aqsa kélmésso aqsok ánek ekmátsa nak ekpaqneyam éten agkok ma'a mók aqsok kéláyókxa nak.

⁶Keñe seklómo ahagko' ko'o, máxa táxa eyáléwe axta temék élwatnama m'a tegma apkelyawe nak Judá, tén han ma'a ámay nak Jerusalén. Nápakha'a apketkók axta aptamheykekxa', tén han meyke xama aqsok, ekwokmoho makham se'e kaxwo' nak.

⁷“Ektáhak ko'o kaxwók sekpeywa s'e, sektáha nak Wesse' ekha sekyennaqte, Dios apagkok nak Israel: ¿Yaqsa ektéma kéltekkessama nak kéxegke kélagkók kélagko' kélnepyeseksa xa aqsok ekmaso agko' nak? ¿Yaqsa ektéma kélhayo nak apkeletsapma apyókxoho m'a énxet'ák Judá, cham'a apkelennay'a nak, kelán'ák, sakcha'a, ekweykekxoho m'a kaxwe ekpalleyam nak, yaqwayam enxoho megkeymaxcheyk xama enxoho'?

⁸¿Yaqsa ektéma séllókassama nak, eñama m'a ektémakxa nak aqsok kélláneyak, tén han kélméssama chá'a aqsok ánek ekmátsa nak ekpaqneyam éten agkok mók aqsok kéláyókxa s'e kañe' Egipto nak, kélmeyeykenxa nak kélhaya? Sa' kagkések kélmassésamaxkoho kélagkok kélagko' kéxegke xa, katnéssásekxak sa' kéltémo nak chá'a hentemegwomhok exma ekmaso, tén han mékoho nepyeseksa pók aptémakxa énxet'ák nak keso náxop.

⁹¿Kelwagqámeykegkeya kéxegke ekyókxoho aqsok ekmaso apkeláneyak axta m'a kélyapmeyk nano', tén han aqsok apkeláneyak axta chá'a m'a kelwesse'e apkelwányam axta Judá, yetlo apnaqteyegka'a, kéxegke nahan, yetlo kélnaqteyegka'a, kélláneykegko axta m'a yókxexma Judá, tén han ma'a ámay nak Jerusalén?

¹⁰Megkólyaqmagkasseykmok makham kéltémakxa kéxegke ekwokmoho makham se'e negwánxa nak, megkólayek han, megkólláneykegkok nahan ma'a séltémókxa nak kóltéhek, tén han segánamakxa sekmésso axta ko'o kéxegke, tén han ma'a kélyapmeyk nano' axta.

¹¹“Cháxa keñamak sektáha nak ko'o séláneya kéxegke, ko'o sektáha nak Wesse' ekha sekyennaqte, Dios apagkok nak Israel: Ekxénchek ko'o alhak kéxegke aqsok ekmaso, tén han amasséssók ekyókxoho apchókxa Judá.

¹²Wának sa' ko'o kólmasséssók apyókxoho m'a apkelheykekxa nak Judá, tén han apkelpekheykha axta elmeyekxak elhakxak ma'a Egipto. Apyókxoho sa' eletsapok kempakhakma, meyk, cham'a ketcheyetse nak ekweykekxoho m'a apkelwányam nak, etnahagkokxak sa' éñamakxa néltémo hentemegwomhok exma ekmaso, tén han mékoho, tén han aqsok eyeymáxkohol'a kataxche'.

¹³Allegássesagkohok sa' ko'o apheykha nak Egipto, ektéma axta séllegassáseykegkoho m'a énxet'ák Jerusalén, kempakhakma sa' alha', meyk, tén han negmasse.

¹⁴Melegketakpek sa' xama enxoho m'a énxet'ák Judá, apkeleymomap axta, apkelmahéyak apkelhayam ma'a Egipto, méko sa' xama enxoho yeymakpok. Emáwhok sa' eyke elmeyenták makham Judá, yaqwayam elhaták makham ma'a, melwateyk sa' eyke, melxeganakmo enxoho apqántawo.’”

¹⁵Keñe axta m'a apkelya'áseykegkoho axta chá'a élmésso apnaqteyegka'a aqsok ánek ekmátsa nak ekpaqneyam éten agkok ma'a mók aqsok kéláyókxa nak, tén han ma'a kelán'ák ekheykencha'a axta m'a, ekyókxoho eyaqneykekxo axta ekxámokma agko' ma'a, tén han judíos apheykencha'a axta m'a yókxexma ekpayho nak nepyeyam ma'a Egipto, aptáha apkelátegmowágko Jeremías se'e:

¹⁶—Mólyahakxeyk sa' negko'o xa amya'a senseykentegkesso nak xép, eñama nak Wesse' egegkok.

¹⁷Anlenxanmohok sa' aqsa nenlánéyak ma'a nenxeyenma nak anlanagkok. Anlenxanmohok sa' negmésso aqsok ánek ekmátsa nak ekpaqneyam éten agkok, tén han negmésso naqsa vino m'a negáyókxa Wesse' Ekwányam Eñama Néten, nenláneykegko nak chá'a, ekwokmoho makham se'e kaxwo nak, apkeláneykegko axta nahan chá'a nanók ma'a ẽlyapmeyk nano', tén han kelwesse'e apkelwányam egagkok, tén han ma'a apkelámha apmonye'e axta m'a tegma apkelyawe nak Judá, tén han ma'a ámay nak Jerusalén. Xámok axta nentéyak ma'a nanók axta, tásek axta han negheykha, axta hegáhapweyk xama enxoho ekmaso negheykha;

¹⁸keñe ekmassama negmésso aqsok ánek ekmátsa nak ekpaqneyam éten agkok, tén han negmésso naqsa vino m'a ‘Wesse' Ekwányam Eñama Néten,’ ekmassama ekha ekyókxoho aqsok, apkeletsepmeyk énxet'ák egagkok meyk élnapma tén han kempakhakma.

¹⁹Axta táhak han élpaqmeta kelán'ák se'e: —Anlanagkohok axta nahan chá'a negko'óxa kelpasmaga yetlo néleykmassáseykha ektémakxa ekyókxa m'a ‘Wesse' Ekwányam Eñama Néten,’ agmések axta chá'a aqsok ánek ekmátsa nak ekpaqneyam éten agkok, tén han negmésso naqsa vino, ennaqteyegka'a axta eyke chá'a keñamak segmésso yaqwayam anlanagkok ekyókxoho xa. Anlenxanmohok sa' eyke makham nenlánéyak.

²⁰Keñe axta Jeremías apchátegmowagkokxo apyókxoho énxet tén han kelán'ák ekteme axta élátegmowéyak xa ektáha nak. Axta aptáhak apkeláneya s'e:

²¹—¿Kélanagkamcheya kéxegke mey'ásegkok Wesse' egegkok tén han kalwagqeykmok kélméssama axta chá'a kéxegke aqsok ánek ekmátsa nak ekpaqneyam éten agkok mók aqsok kéláyókxa m'a tegma apkelyawe nak Judá, tén han ma'a ámay nak Jerusalén, tén han ma'a kélyapmeyk nano' axta, yetlo kelwesse'e apkelwányam kélagkok, tén han ma'a apkelámha apmonye'e kélagkok axta, ekweykekxoho m'a apyókxoho énxet'ák nak?

²²Massegkek axta eyke apkelenmáxamap Wesse' egegkok ma'a aqsok ekmaso kélláneyak, kélláneykegko axta kéxegke, cham'a aptaqnagkamo apagko' nak chá'a m'a. Cháxa keñamak ektamheykekxo nak kaxwók ekmaso kélókxa kéxegke tén han meyke xama énxet apha m'a; éñamakxa néltémo hentemegwomhok exma ekmaso tamheykekxa', aqsok eyeymáxkohol'a kataxche'.

²³Cháxa ekmaso kélheykha kélweteya nak kaxwók kéxegke eyáhapwaya, cha'a keñamak kélmésso aqsok ánek ekmátsa nak ekpaqneyam éten agkok ma'a mók aqsok kéláyókxa nak, kélláneykegkek megkólya'assáxma nápaqtók Wesse' egegkok, hakte megkólyaheykekxohok ma'a appeywa, tén han ma'a segánamakxa apagkok, megkólláneykegkok han ma'a apchánamakxa nak kóltéhek.

²⁴Aptáhak axta han Jeremías apkeláneya apyókxoho énxet'ák, tén han kelán'ák se'e: —Kóleyxho s'e Wesse' egegkok appeywa, kélyókxoho kéxegke énxet'ák Judá, kélheykha nak Egipto.

²⁵Aptáhak Wesse' ekha apyennaqte, Dios apagkok nak Israel se'e: ‘Kéxegke kelán'ák, kélteme nak chá'a kélpeywa, kélláneyak nak chá'a m'a kélxeyenma kóllána'. Kélxeyenma nak chá'a kólmések aqsok ánek ekmátsa ekpaqneyam éten agkok, tén han aqsok kélmésso naqsa vino m'a ‘Wesse' Ekwányam Eñama Néten,’ kélxeyenma nak chá'a kóllának ma'a kélxeyenma nak chá'a kóllána'. ¡Táse', kóllána' sa' ma'a aqsok kélxeyenma nak kóllána'!

²⁶Kóleyxho sa' kélyókxoho kéxegke énxet'ák Judá kélheykha nak Egipto, sektáhakxa ko'o séláneya kéxegke, ko'o sektáha nak Wesse': Naqsók ko'o sektáha sekxéna yetlo sekxeyenma sekwesey ekteme nak ekyawe agko', méko sa' xama enxoho apkeñama nak Judá exének makham sekwesey ekyókxoho kañe' Egipto, etnehek se'e: Memassegwomek sa' chá'a Wesse' egegkok.

²⁷Hakte alanha sa' ko'o, yaqwayam wahak ma'a aqsok ekmaso, háwe m'a aqsok ektaqmela nak. Apyókxoho énxet'ák Judá apheykha nak Egipto, kólmasséssók sa' apyókxoho eñama kempakhakma tén han meyk.

²⁸Apqántawók apagko' sa' eleymakpok apkelegketamap kempakhakma, elwakxak makham ma'a Judá apkelenyeykta m'a Egipto. Apyókxoho apkelheykekxa axta Judá tén han apkelmeyáyam axta apkelhe Egipto, elwetak sa' yaqsa ekpeywa ektéma, ko'o essenhan apkelpeywa nak ma'a.

²⁹Agkések sa' ko'o kéxegke s'e aqsok magkenatchesso yaqwayam kólya'asagkohok peya katnehek ma'a sekmáheyókxa axta atnéssesek, ko'o sektáha nak Wesse', tén han sekmáheyo allegássesagkohok se'e apchókxa nak:

³⁰Agkések sa' ko'o apkelenmexma apkeltaqnagkamo apagko' nak ma'a faraón Hofra wesse' apwányam nak Egipto, ekhawo sekteméssessamakxa axta Sedequías wesse' apwányam axta Judá sekméssama m'a Nabucodonosor, wesse' apwányam nak Babilonia, apkenmexma aptaqnagkamo apagko' axta chá'a.