Read Lengua Sur Jeremías 49 Bible Online

Jeremías 49 - Lengua Sur bible

Jeremías 49

¹Aptáhak Wesse' egegkok apkelxéna énxet'ák Amón se'e: “¿Háxko apkelmahágkaxa énxet'ák Israel? ¿Háxko apkelmahágkaxa m'a yaqwayam nak elxewekxak xapop énxet'ák kélagkok? ¿Yaqsa ektéma apmeykekxo nak Gad ma'a énxet'ák apkelpeykessamo nak chá'a aqsok kéláyókxa Milcom? ¿Yaqsa ektéma apheykencha'a amonitas ma'a tegma apkelyawe kélagkok nak?

²“Ektáhak ko'o sekpeywa s'e, sektáha nak Wesse': Kammok sa' ekhem yaqwánxa wának ko'o kañexchek élpayheykha kélatña'ák kempakhakma m'a tegma apwányam Rabá apkelókxa nak ma'a amonitas; meteymog ektaháneykekxa mók sa' etnekxa', kamyetek sa' ma'a apheykegkaxa nak. Keñe sa' énxet'ák Israel elmekxak makham ma'a tegma apkelyawe apagkok axta. Ko'o sekxeyenma xa, sektáha nak Wesse'.

³“¡Énxet'ák Hesbón, kalpayheykha kélatña'ák kóllegagkohok ekmáske, hakte kélmasséssekmek ma'a Ai! ¡Kóllekxagwaha kelán'ák Rabá! ¡Kólántaxnekxa apáwa nentaxneykekxohol'a apketsapma egmók, kóltekpogmakha kélnénya'ák! ¡Kólenyahák, máxa élyeyháxma kólteme kólpexyekhasha kélyempe'ék! hakte megkatnahakxa apchókxa peyk kólyentamok ma'a dios Milcom, yetlo apkelmaxnéssesso nak chá'a énxet'ák apagkok, tén han ma'a ekha nak kéláyo.

⁴¿Yaqsa ektéma kélxéneykencha'a nak chá'a kélyennaqte? Massegwokmek kaxwók kéxegke kélyennaqte, énxet'ák kélenmexeykekxa nak chá'a Dios, kéláyo nak chá'a ekxámokma aqsok kélagkok kélwete nak chá'a, kélteme nak chá'a kólpaqmétek se'e: ‘Méko negko'o hegketámegma'’

⁵Wahak sa' ko'o kéxegke kélaye éleñama ekyókxoho yókxexma nak kélnepyáwa'. Ko'o sekxeyenma xa, sektáha nak Wesse' ekha sekyennaqte. Kélyókxoho sa' kéxegke kólenyahagkok kóltamhok kólwagkasaxchek teyp, méko sa' xama enxoho yaqwayam kánchásekxak makham.

⁶Atnessásekxak sa' eyke ko'o makham apheykha amonitas ma'a ektémakxa axta apheykha; ko'o sekxeyenma xa, sektáha nak Wesse'.”

⁷Aptáhak Wesse' ekha apyennaqte apkelxéna énxet'ák Edom se'e: “¿Mékoya táhak negya'áseykegkoho aqsok ma'a Temán? ¿Ya elya'ásegkok kaxwók aptamhágkaxa m'a apmopwancha'a nak aqsok? ¿Massegwokmeya m'a apkelya'áseyak nak aqsok?

⁸¡Énxet'ák Dedán, kólenyahák, kólyexánem! Hakte peyk ko'o amasséssók ma'a Esaú énxet'ák apagkok; wokmek kaxwók yaqwánxa allegássesagkoho'.

⁹Nakxéxcheyk agkok ekyexna anmen yámet, kóleymok chá'a mók xam'a ekyexna; apkelwa'ak agkok apkelmenyexma axta'a wánxa aqsa elsakxak ma'a aqsok apkelmopmenyého nak.

¹⁰Meyke agko' aqsok eyke ko'o ektemessáseykxak ma'a Esaú énxet'ák apagkok, yáxña'akxoho ekpekkenchásekxak ma'a apkelyexánegweykekxexa nak chá'a, mopwanchek kaxwók elxeganmok. Kélmasséssekmek apyókxoho m'a apketchek, apnámakkok, tén han ma'a apheykha nak ketók apheykegkaxa; megyeymékpok xama enxoho yaqwayam etnehek appeywa s'e:

¹¹‘Henegkenchásekxa ko'o xa apkelyeheykha kélagkok nak, ko'o sa' altaqmelchesek. Tásek mehey'ássemek ko'o m'a xentampe'e apagkok nak.’”

¹²Aptáhak Wesse' egegkok se'e: “Énxet'ák megkapayhémo axta eykhe énagkok ma'a kélyeta nak egheykok sẽllegassáseykegkoho, apyeneykegkek axta eyke. Megkatnehek sa' xépxa megkóllegassáseykegkoho, ének sa' xépxa m'a kélyeta nak egheykok.

¹³Naqsók ko'o sektáha sekpeywa s'e, sektáha nak Wesse': Yókxexma meykexa énxet sa' etnekxak ma'a tegma apwányam Bosrá, nápakha'a apketkók sa' etnehek, segestéhegkesso sẽltemessáseykekxa mékoho, tén han kéltémo hẽltemessessamhok exma ekmaso, nápakha'a apketkók sa' nahan etnekxak ma'a pók tegma apkelyawe nak megkatnégwayam néxa.”

¹⁴Wa'ak ko'o amya'a sekhakxa eñama Wesse' egegkok; aptáhak xama apseykha amya'a aplegasa nepyeseksa énxet'ák se'e: “¡Kólaqnekxa', kólchetamák Edom! ¡Kóllánekxa kéltáhakxa yaqwayam kólempakha'!

¹⁵Mékoho kélagko' sa' ko'o atnéssesek kéxegke nepyeseksa énxet'ák, kélwanyamáxkoho kélagko' sa' atnéssesek nepyeseksa énxet'ák.

¹⁶Eyaqhémo temégweykmok kéxegke m'a kéleymáxkoho nak, hakte kóleyxchek axta chá'a. Kélheykha kéxegke m'a neyseksa meteymog élyagqaxe, kélpathetmeyk ma'a naw'ék egkexe netno nak. Kéllánegweykmek eykhe kéxegke kélxanák ma'a netnók agko' nak, ektémól'a náta ekyawe, sa' eyke kólenyék alántekkesek ko'o kéxegke m'a. Ko'o sekxeyenma xa, sektáha nak Wesse'.

¹⁷“Asagkók agko' sa' katnehek kélmassésseyam ma'a Edom, kalyegwakkasek sa' énxet'ák. Elyegweyk sa' chá'a elwetak kéllegassáseykegkoho, apyókxoho apkelyeykhágwayam enxoho chá'a m'a,

¹⁸hakte exnágwakxohok sa' ma'a ektémakxa axta Sodoma tén han Gomorra, tén han ma'a tegma apkelyawe aphéyak axta neyáwa', cham'a kélmassésseykmo axta. Méko sa' kaxnekxak kaxwók ma'a, méko sa' ma'a yaqwatakxoho enxoho aphayam. Ko'o sekxeyenma xa, sektáha nak Wesse'.

¹⁹Katlakkasek sa' ko'o axegma', ektémól'a yámakméwa katyapok ma'a naxma ekyentaxno neyáwa Jordán, ekmahéyak la'a chá'a m'a yókxexma ekhakxa nak pa'at axnagcha'ák, sa' ko'o amenxenek énxet'ák Edom ma'a, wának sa' ko'o etnehek apkeláneykha apchókxa m'a énxet sélyéseykha nak ko'o. Hakte ¿yaqsa awanchek ko'o hexnésaxkoho'? ¿Yaqsa awanchek ko'o hélyekkónaxche'? ¿Yaqsa keláneykha nepkések apwanchek hénmexekxak ko'o?

²⁰Kóleyxho séláneykekxa nak ko'o sektáhakxa sekmakókxa atnéssesek ma'a Edom, ko'o sektáha nak Wesse', sekmakókxa nak han ko'o atnéssesek ma'a apheykha nak Temán: Kawomhok sa' kélyementaméyak ma'a apketchek ketcheyetse nak, kóltawasha sa' nahan ma'a yókxexma apagkok ektaqmalma nak.

²¹Kaxtegyók sa' ekyennaqte agko' apteyekmo sa' ma'a Edom, kayawheykha sa' xapop; kalpayheykha sa' apatña'ák etegyaha ekpasmo, kañexkohok sa' élpayheykha apatña'ák ma'a Wátsam Ekwányam Ekyexwase nak.

²²Ektamagkok sa' apkelenmexma m'a Bosrá, ektémól'a náta ekyawe élpeykessól'a axempenák kaktamagkok ekyógkexma, elpexyennók sa' kempakhakma yapmeyk Edom xa ekhem nak, máxa sa' etnahagkok ma'a kelán'a ekmáheyól'a katnehek naqláwa.”

²³Amya'a apxénamap Damasco: “Keltamháha apkelwáxok ma'a énxet'ák apheykha nak Hamat tén han ma'a Arpad, hakte wa'ak apheykegkaxa amya'a ekmaso. Apkelakawók apagko', apkelpekheke'.

²⁴Massék apkelyenna énxet'ák Damasco, xénchek apkelwáxok elxeganmok. Taxneyk apkelwáxok apkelmenaye, tén han apkelaye, tén han apkellegeykegkoho, ektémól'a kelán'a ekmáheyól'a katnehek naqláwa.

²⁵Aptaqmópegkek ma'a tegma apwányam, apxénamakpoho nak chá'a ekyókxoho yókxexma, tén han ekpayheykekxoho axta chá'a apwáxok.

²⁶Exnagkok sa' aphopák wokma'ák apagkok ámay xa ekhem nak, eletsapok sa' apyókxoho m'a kempakhakma yapmeyk apagkok, Ko'o sekxeyenma xa, sektáha nak Wesse' ekha sekyennaqte.

²⁷Awatnek sa' ko'o m'a kélhaxtegkesso nak Damasco, kamasséssók sa' kelwesse'e apxanák Ben-hadad xa táxa nak.”

²⁸Aptáhak Wesse' egegkok apkelxéna énxet'ák Quedar, tén han ma'a apkelámha apmonye'e nak Hasor, apkelmoma axta m'a Nabucodonosor, wesse' apwányam nak Babilonia: “¡Kólxeg, kólchetamák Quedar, kólmasséssem xa énxet'ák apheykha nak teyapmakxa ekhem!

²⁹Kólyementamák ma'a apkelpakxenéyak nak, tén han ma'a apnaqtósso nepkések, tén han ma'a apkelpakxanma nak chá'a, yetlo m'a ekyókxoho aqsok apagkok apkelmeykegkaxa nak chá'a. Kólyementamák ma'a yányátnáxeg apkelchánte, kólteme kólpáxegkesha ekyennaqte kólyegwakkasek se'e: ‘¡Sawheykxók élmeneymáxche ekyókxoho yókxexma!’

³⁰¡Kólenyahák kólántépok, kélheykha nak Hasor! ¡Kólyexánem! Ko'o sekxeyenma xa, sektáha nak Wesse'. Apkelánékxeyk yaqwánxa etnéssesek kéxegke yaqwayam elenmexek ma'a Nabucodonosor wesse' apwányam nak Babilonia.

³¹Ektáhak ko'o seyáneya s'e, sektáha nak Wesse': ¡Kólxeg, kólchetamák xa énxet'ák megkalyetnakhassamo nak apkelwáxok xama aqsok tén han ektaqmalma nak apheykha, apheykha nak chá'a meyke atña'ák apagkok, tén han meyke apkelápeykekxa, apyetno nak apxakko'!

³²¡Kólmenyexchesák yányátnáxeg apkelchánte, tén han ma'a ekyókxoho aqsok apnaqtósso! Waxpánchesek sa' ko'o alya'aksek ekyókxoho yókxexma xa énxet'ák apkelmópéssamo nak chá'a apkelyésesso élpayhakxa nápaqta'a; ekyókxoho yókxexma sa' wahak aqsok ekmaso. Ko'o sekxeyenma xa, sektáha nak Wesse'.

³³Yókxexma meykexa énxet meyke néxa sa' etnekxak ma'a Hasor, élleykegkaxa m'a semheg nawha'ák. Méko sa' kaxnekxak kaxwók ma'a, méko sa' ma'a yaqwatakxoho enxoho aphayam.”

³⁴Apkeltennassegkek axta Wesse' egegkok Jeremías se'e amya'a nak, ekxeyenma nak Elam, cham'a apcheynamo axta apteme wesse' apwányam Sedequías ma'a Judá:

³⁵“Ektáhak ko'o sekpeywa s'e, sektáha nak Wesse' ekha sekyennaqte: Alekkexchesek sa' ko'o yágke apagkok ma'a énxet'ák Elam, cham'a yágke ekméssamo nak chá'a apkelyennaqte.

³⁶Alhak sa' ko'o éxchahayam xa énxet'ák nak éleñama ekyókxoho yókxexma, yaqwayam sa' kaxpánchesek kalya'aksek ekyókxoho yókxexma, ekwokmoho apsawhékpoho apkelmahéyak apkelyexánegwayam ma'a ekyókxoho apkelókxa.

³⁷Wának sa' elpexyennók énxet'ák Elam apkelwet'a enxoho m'a apkelenmexma apkeltaqnagkamo apagko' nak chá'a, wahak sa' aqsok ekmaso, magwéssekxeyk sa' ko'o altaqnaweygkok ma'a, wahak sa' kempakhakma ekwokmoho apsawheykpoho apyókxoho. Ko'o sekxeyenma xa, sektáha nak Wesse'.

³⁸Apekkenwók sa' ko'o sektaháno m'a Elam yaqwayam sa' atnehek séláneykha, alnáhakkasek sa' ma'a kelwesse'e apkelwányam apagkok, tén han ma'a apkelámha apmonye'e apagkok. Ko'o sekxeyenma xa, sektáha nak Wesse'.

³⁹Atnessásekxak sa' eyke ko'o makham apheykha énxet'ák Elam ma'a ektémakxa axta apheykha, keso egmonye' nak. Ko'o sekxeyenma xa, sektáha nak Wesse'.”