Read Lengua Sur Jeremías 52 Bible Online

Jeremías 52 - Lengua Sur bible

Jeremías 52

¹Veintiún apyeyam apagkok axta weykmok Sedequías apkeynamo apteme wesse' apwányam, once apyeyam axta weykmok apteme wesse' apwányam ma'a Jerusalén. Hamutal axta ekwesey egken, Jeremías axta apketche, eñama axta m'a Libná.

²Asagkek axta eyke ektémakxa aqsok apkelane nápaqtók Wesse' egegkok, hawók axta m'a ektémakxa axta aqsok apkelane m'a Joaquim.

³Axta keñamak apkeltaqnagkama Wesse' egegkok ma'a énxet'ák nak Jerusalén tén han ma'a Judá, keñe axta apkelántekkessama m'a aphakxa nak yaqwayam melwetekxók chá'a. Apkenmexeykekxeyk axta Sedequías ma'a wesse' apwányam nak Babilonia.

⁴Apxegkek axta wesse' apwányam Nabucodonosor yetlo apyókxoho sẽlpextétamo apagkok peya yempakhak ma'a Jerusalén, ekhem diez pelten diez, ekweykmo axta nueve apyeyam apteme wesse' apwányam ma'a Sedequías, apwakhegwokmek axta. Apkelpakxenweykmek axta m'a keto nak, apkeláneykegkek axta nahan kélchántéyak néten ma'a nepyáwa nak, yaqwayam ektamagkok.

⁵Apwakhamakpek axta tegma apwányam, ekwokmoho aptéma once apyeyam apteme wesse' apwányam Sedequías.

⁶Yágwokmók axta meyk ma'a tegma apwányam, cham'a ekhem nueve aptáhakxa nak cuatro pelten ma'a apyeyam nak, méko axta entáhak aptéyak ma'a énxet'ák.

⁷Kélyagkaxqatchek axta m'a nápakha tegma apyawe kélhaxtegkesso nak, apwakhayak axta eykhe caldeos ma'a, axta eyke kahaxnak aptepa wesse' apwányam yetlo apyókxoho sẽlpextétamo apagkok tegma apwányam nak, axta'a axta apkenyahágkok, apkelántekkek axta m'a átog ekpayho nak élámhakxa ánet meteymog tegma kélhaxtegkesso, cham'a ámay ekpayho nak kélchencháseykekxexa axta pánaqte exnók ma'a wesse', keñe apkelyetlawa m'a ámay ekmahéyak nak ekyapwátegweykenxa m'a Jordán.

⁸Apkemhágkek axta eyke sẽlpextétamo caldeos ma'a wesse' apwányam Sedequías. Axta aptahanyekxohok ma'a ekpayhegweykenxa nak xapop ma'a Jericó. Apkexpaqneyk axta apyókxoho sẽlpextétamo apagkok apyenyawa aqsa apxakko'.

⁹Apmeyk axta caldeos ma'a wesse' apwányam keñe kélyentamákxo m'a aphakxa nak wesse' apwányam Babilonia, ekpayho nak Riblá, yókxexma Hamat. Yetlókok axta han apxeyenma Nabucodonosor yaqwánxa kólteméssesek ma'a Sedequías.

¹⁰Nápaqtók axta apkeltamhók kólyaqténchesagkok apyespa'ák ma'a apketchek, tén han ma'a apyókxoho kelwesse'e nak Judá.

¹¹Keñe m'a Sedequías, apkeltamho kólhexyawássesek apaqta'ák tén han kólpextétek cadena sawo élyexwase yaqwayam kólyentemekxak ma'a Babilonia, apheykenxa axta apmomakpo, ekweykmoho apketsapa.

¹²Apwokmek axta Jerusalén ma'a Nebuzaradán, apteme axta wesse' apwányam apkeláneykha tén han apkemha apmonye' sẽlpextétamo apagkok, ekhem diez pelten cinco, cham'a ekweykmo axta diecinueve apyeyam apteme wesse' apwányam ma'a Nabucodonosor, wesse' apwányam axta m'a Babilonia,

¹³apwatneykxeyk axta tegma appagkanamap, keñe han ma'a wesse' apwányam apxagkok apyawe, tén han ma'a apyókxoho tegma nak tegma apwányam, ekweykekxoho m'a apyókxoho kelwesse'e apxanák nak,

¹⁴keñe axta m'a sẽlpextétamo caldeos apkelxegexma'a axta, apkelyaqnegkesa m'a kélhaxtegkesso axta m'a Jerusalén.

¹⁵Tén axta Nebuzaradán apnaqlákxo Babilonia m'a apkeleymomap axta makham apheykha m'a tegma apwányam nak, ekweykekxoho m'a appasmeykekxa axta wesse' apwányam Babilonia, tén han ma'a apkeleymomap axta apkeláneyak chá'a aqsok.

¹⁶Wánxa axta aqsa apkeleykmo apqántawók ma'a énxet'ák meyke agko' nak aqsok apagkok, yaqwayam enxoho elanha m'a anmen yámet kélcheneykekxa', tén han eknekxak aqsok ma'a namyep.

¹⁷Nekha'a étkók axta aptemessásekxak caldeos ma'a sawo élyexwase ekheykegko axta m'a tegma appagkanamap nak: meteymog élámha, ekyennaqtéssamakxa tén han ma'a kélyátamakxa yegmen ekyawe agko' nak, keñe axta apkelsákxo ekyókxoho sawo élyexwase m'a Babilonia.

¹⁸Apkelsákxeyk axta han ma'a táhap kélxata, pála, tén han nensapanchessamól'a cháléwasso, egheykok élyawe, yekweykto élyawe keñe han ma'a ekyókxoho aqsok kélmeykegkaxa élánamáxche axta sawo ekyexwase, kélmeykha axta chá'a m'a tegma appagkanamap.

¹⁹Apkelmeyk axta han apkelsákxo ekyókxoho aqsok élánamáxche axta sawo élyátekto élmomnáwa m'a sẽlpextétamo apkemha apmonye', tén han ma'a sawo ekmope ekmomnáwa: cham'a sokpayhe élyawe, kélnegkenmakxa nak átex, egheykok élyawe, tén han ma'a kélxatal'a chá'a táhap, cháléwasso élyawe, yekweykto élyawe, tén han ma'a egheykok kélyátamól'a chá'a vino kélmésso naqsa Dios.

²⁰Keñe m'a ánet élámha axta meteymog, tén han ma'a kélyátamakxa axta yegmen ekyawe, yetlo m'a doce weyke kelennay'awo kéllane nak sawo ekyexwase ekmeykegkaxa axta chá'a, tén han ma'a ekyennaqtéssamakxa axta chá'a, apkeltémo axta kóllanaksek wesse' apwányam Salomón ma'a tegma appagkanamap, megkólwanchek axta kólyetsetagkok ekwánxa ekyentaxno.

²¹Ketsék axta han yeykhágweykmohok chá'a ocho metros ekmahéyak néten ma'a xama nak meteymog élámha, keñe axta cinco metros náxet mók ma'a ekpayhakxa; ekyagqaxe awáxok axta nahan chá'a, siete centímetros axta nahan chá'a ekyawe nekhaw'ék ma'a sawo ekyexwase nak.

²²Sawo ekyexwase axta han xama étseksa'ák ma'a élámha nak, ánet metros axta han ekmahéyak néten, wakheykekxeyk axta han nekhaw'ék ma'a sawo ekyexwase ekho axta yám'én aqta'ák, kélnáxegkáseykha axta han chá'a ekho yántakyexna. Hawók axta mók xa ánet nak meteymog élámha.

²³Cien yántakyexna kéleykmassáseykha axta nahan chá'a xama étseksa'ák ma'a ekho nak yám'én aqta'ák, noventa y seis axta eyke negwetayo.

²⁴Apmeyk axta sẽlpextétamo apkemha apmonye' m'a Seraías, apkemha apmonye' nak apkelmaxnéssesso Dios énxet'ák apagkok, yetlo m'a Sofonías, apteme axta aptétéyak apkelmaxnéssesso Dios énxet'ák apagkok ekha kéláyo, keñe han ma'a apqántánxo apkeláneykha axta chá'a tegma appagkanamap.

²⁵Keñe axta m'a tegma apwányam nak, apma m'a apkemha apmonye' nak sẽlpextétamo, tén han ma'a siete énxet apméssamo axta chá'a appeywa m'a wesse' apwányam apheykha axta chá'a m'a tegma apwányam nak, tén han ma'a sẽlpextétamo apkelyéseykha axta chá'a énxet yaqwayam etnahagkok sẽlpextétamo, keñe han sesenta apkelwesse'e apheykha axta m'a tegma apwányam.

²⁶Apnaqlákxeyk axta apyókxoho Nebuzaradán aphakxa wesse' apwányam Babilonia xa énxet'ák nak, ekpayho nak Riblá, yókxexma Hamat. Cháxa yókxexma nak, apkeltamhókxa axta wesse' apwányam Babilonia kólnápekxa'. Cháxa ektáhakxa axta kélántekkesa kélya'asa megkatnahakxa apkelókxa m'a énxet'ák nak Judá.

²⁸Keso apwánxa axta apyókxoho énxet apnaqleykekxa megkatnahakxa apkelókxa Nabucodonosor se'e: tres mil veintitrés énxet'ák Judá axta apnaqleykekxak ekweykmo axta siete apyeyam apteme wesse' apwányam;

²⁹keñe ekweykmo dieciocho apyeyam apnaqleykekxo, ochocientos treinta y dos énxet'ák Jerusalén;

³⁰keñe axta Nebuzaradán apkeltémo kólnaqlakxak setecientos cuarenta y cinco énxet'ák Judá, cham'a ekweykmo axta veintitrés apyeyam. Cuatro mil seiscientos énxet'ák axta apweykmok apyókxoho kélántekkesso kélnaqleykekxa megkatnahakxa apkelókxa.

³¹Apcheynamók axta apteme wesse' apwányam Babilonia m'a Evil-merodac, ekhem veintisiete, aptáhakxa axta doce pelten, ekwokmo axta treinta y siete apyeyam kéltekkesso kélya'asso megkatnahakxa apchókxa m'a wesse' apwányam Joaquín, apkeñama axta Judá, apyósek axta apkelano Evil-merodac ma'a Joaquín, keñe aptekkesa kañe' negmomaxchexa',

³²apyánchessamók axta han apchápeykha nepyeseksa m'a apkelwesse'e apkelwányam apkelmomap apheykha axta xamo' ma'a Babilonia.

³³Massegkek axta han apkelmeykha Joaquín ma'a apkelnaqta apkelmeykencha'awo axta chá'a neyseksa apmomap, etwohok axta chá'a apto xamo' wesse' apwányam ekwokmoho apketsapa.

³⁴Egkéshok axta chá'a wesse' apwányam Babilonia aqsok eyeyméxchexa m'a Joaquín, ekyókxoho ekhem, neyseksa apha ekwokmoho apketsapma.