Read Lengua Sur Jeremías 8 Bible Online

Jeremías 8 - Lengua Sur bible

Jeremías 8

¹Aptáhak Wesse' egegkok se'e: “Cháxa ekhem nak, kólhaxyawássekxak sa' takhaxpop apexchakkok axta m'a apkelwesse'e apkelwányam, tén han ma'a apkelámha apmonye'e axta m'a Judá, tén han ma'a apkelmaxnéssesso axta énxet'ák ahagkok, tén han ma'a apkellegasso axta sekpeywa, tén han ma'a apheykencha'a axta m'a Jerusalén,

²kólnegkenek sa' aqsa neyseksa mayáhat, tén han aptaqmelakxa pelten, tén han neyseksa apkelápogwátéyak ma'a apyókxoho yaw'a, apkelmopmenyého apagko' axta chá'a m'a, apkelánéssama axta chá'a aqsok, tén han apkelyetleykencha'a axta chá'a, apkelpaqhetchásamákpoho axta chá'a, tén han apkelpeykessamo axta chá'a. Méko sa' kalmekxak yaqwayam kalátawanyek. Kaxnagkokxak sa' aqsa náxop, ektémól'a weyke ekteyáseykha.

³Keñe sa' apkeleymomap nak meletsapma xa énxet'ák élmasagcha'a agko' nak apkeltémakxa, cham'a apkelhámxa enxoho chá'a ekyókxoho yókxexma natámen séxpánchesso, eltamhok sa' eletsapok, mopmenyeyk sa' elweynchamha chá'a. Ko'o sekxeyenma xa, sektáha nak Wesse' ekha sekyennaqte.

⁴“Jeremías, eltennés sa' énxet'ák se'e amya'a sektáhakxa nak ko'o sekpeywa: “Apyaqnenchek agkok chá'a xama énxet yempekxak chá'a néten; apxegánegwokmek agkok chá'a m'a ámay, etaqhegwók chá'a.

⁵Israel, ¿yaqsa eyke ektéma sénmexeykekxo nak? Jerusalén, ¿yaqsa eyke ektéma seyamasma agko' nak ko'o? ¿Yaqsa ektéma aptéma nak ekyennaqte apwáxok tén han memáheyo nak hey'óta'?

⁶Ektaqmelchessamók axta eykhe sélhaxneykha séltémo aña', maxta eyke añék kaqhek apwáxok aptémakxa ekmaso xama énxet enxoho, tén han méxamakpoho enxoho etnehek appeywa s'e: ¿Yaqsa aqsok ko'o séláneya? Apyókxoho apkelxegák ekyennaqte apkelyetlama m'a ámay apagkok nak, máxa m'a yátnáxeg élyennaqtél'a apyespa'ák neyseksa kempakhakma.

⁷Weykmók seyána' ekya'áseykegkoho ekhem yaqwánxa keyxyók makham. Apya'ásegkók nahan ekhem yaqwánxa emyekxak chá'a mók nekha m'a sapop, tén han yeptameygmen, tén han ma'a yáho. Keñe kéxegke énxet'ák ahagkok, megkólya'ásegkok ma'a segánamakxa ahagkok.

⁸Megkólwanchek kéxegke kólxének kélmowancha'a aqsok, tén han ekyetnama m'a Wesse' egegkok segánamakxa apagkok. ¡Ekmowána amya'a apnaqtáxéseyak ma'a énxet'ák apnaqtáxéssáseykegkoho nak chá'a kéxegke weykcha'áhak!

⁹Elmegqágwakxak sa' eyke xa énxet'ák apkelmopwancha'a nak aqsok, elyelqakpok sa', ektémól'a aqsok nawha'ák élmál'a kelhanma. Apkelyetnakhássek agkok sekpeywa Méko katnehek apkelmopwancha'a aqsok.

¹⁰Cháxa keñamak peya nak ko'o almések pók énxet ma'a apnaqteyegka'a nak, tén han pók énxet yaqwayam etnehek apagkok ma'a xapop apagkok nak. Apyókxoho kelxéneykha chá'a apkelwáxok ma'a aqsok élmenyexamaxche nak; cham'a ekyawe nak kéláyo, tén han ma'a meyke nak kéláyo, apyókxoho nahan aptamhéyak apkelmopwancha'a amya'a m'a apkellegasso nak sekpeywa, ekweykekxoho m'a apkelmaxnéssesso nak chá'a énxet'ák ahagkok.

¹¹Etnéssesek aqsa chá'a apkelánésso apkelyense m'a énxet'ák ahagkok; exének chá'a ektaqmela, asagkek eykhe katnehek.

¹²¡Kéméxcheyk eykhe elmegqágwók apkelánegko enxoho chá'a xa ektéma nak aqsok sektaqnagkamo nak ko'o! Melmegqágwakxeyk eyke, ¡melya'ásegkok ma'a ektémakxa negmegqakto! Éllegassásegkók sa' agkok ko'o m'a, elpelapmok sa', elyaqnenagkok sa' ektéma nak chá'a m'a nápakha nak. Ekxénchek ko'o xa, sektáha nak Wesse'.’”

¹³Aptáhak Wesse' egegkok se'e: “Alyaqtennek sa' ko'o énxet'ák ahagkok ektémól'a kólyaqtennek hótáhap apyexna. Megkeymaxcheyk sa' xama enxoho ekyexna anmen yámet ma'a kélcheneykekxexa nak, tén han xama ekyexna enxoho higo yámet ma'a kélcheneykekxexa nak. Áwa' élyamaye sa' aqsa kaleymaxche'.”

¹⁴Keñe sa' etnehek elpaqmétek énxet'ák se'e: “¿Yaqsa ektéma negheykencha'a nak aqsa s'e? ¡Ólmeyekxak negyókxoho m'a tegma apkelyawe ekyennaqte nak kélhaxtegkáseyak nepyáwa' yaqwayam sa' óletsapwakxak ma'a! Dios Wesse' egegkok peyk hẽlnápekxa'; ẽleykegkek ma'a yegmen kélenchehe nak pánaqte segaqhamo, hakte nenláneykegkek negko'o mólya'assáxma nénmexeykekxo m'a.

¹⁵Nélhaxanmeyk axta kataqmelek negheykha, makke anxaweyk xama enxoho aqsok ektaqmela. Nélhaxanmeyk axta kawak élyenneykha egyempehek, nélmeneykha axta aqsa negweteyk.

¹⁶¡Apkelxegakmek sẽlenmexma! ¡Legáxkók kaxwók Dan apkelennama m'a yátnáxeg apkelchánte nak ma'a énxet'ák! Apkelpáweyk agkok ma'a, kayawheykha ekyókxoho xapop. Apkelxegakmek yaqwayam emasséssak negókxa, tén han ekyókxoho aqsok egagkok, ekweykekxoho m'a tegma apkelyawe yetlo énxet'ák apheykha m'a kañe'.”

¹⁷Aptáhak Wesse' egegkok se'e: “Wahak sa' ko'o kéxegke yéwa ekmáske nak hentakxek, yaqwayam sa' kaltakxagkok; méko sa' xama aqsok ekha ekmowána kalwagkasek teyp.”

¹⁸Méko hemasséssesek ektémakxa élekxagweykha ewáxok, yelqamáxcheyk ewáxok.

¹⁹Legáxkók apkelápentegeykha apkellegeykegkoho ekmáske énxet'ák ahagkok ma'a ekyókxoho apheykegkaxa nak énxet: “¿Masséya apha Wesse' egegkok ma'a Sión? ¿Masséya apha wesse' apwányam apagkok ma'a?” Aptáhak axta apchátegmowágko Wesse' egegkok se'e: “¿Yaqsa ektéma séllókassama nak kélpeykessamo m'a kéleykmássesso, cham'a aqsok kéláyókxa ekteme nak mékcha'awo tén han éleñama mók nekha?”

²⁰Yeykhayak ekmexanmakxal'a exma, sawhomáxcheyk eknakxamáxche ekyexna aqsok kélcheneykekxa, keñe negko'o mólwagkásamáxchek teyp.

²¹Eklegeykegkók apkellegeykegkoho nak ma'a énxet'ák ahagkok; yetnegkek sekhakxa m'a ekyaqhápeykha ewáxok tén han seyeye.

²²¿Mékoya xama enxoho pánaqte m'a Galaad? ¿Mékoya xama enxoho apmopwána hentaqmelchessók ma'a? ¿Yaqsa ektéma meltaqmelweykmo nak énxet'ák ahagkok?