Read Lengua Sur Lamentaciones 1 Bible Online

Lamentaciones 1 - Lengua Sur bible

Lamentaciones 1

¹¡Apxakkók apagko' aptamhákxak ma'a tegma apyawe apláneyo axta chá'a énxet'ák! ¡Aphágwakxók kelán'a tampe' m'a tegma apyawe apagkok nak énxet'ák! ¡Kélméssegkek ekyentaxno ektamheykha m'a apchókxa ektaqmalma nak!

²Yókxoho axta'a élekxagweykha; kelsekkenmék aqtek égmenek ma'a amáxempenák. Méko xama enxoho yaqwayam epeykessásekxak awáxok ma'a apyókxoho éláneykxa nak chá'a. Apkenmexeykekxeyk ma'a apyókxoho námakkok; élenmexma aptamheykekxa'.

³Apkelmákpek ma'a énxet'ák Judá, kélnaqlákxeyk megkatnahakxa apkelókxa', apkellegágkók apagko', kélméssek ekyentaxno apkeltamheykha. Aphegkek nepyeseksa pók énxet'ák, méteyágweykmok kaxwók apkellókasso apyampe. Aptahañekxeyk han ma'a apyaqmasso axta, mey'assásegkok aptáhakxa'.

⁴¡Yaqhapmók exma m'a ámay nak Sión! ¡Méko xama énxet apye'eykekta kélessawássessamo! Meyke énxet aptáhak ma'a atña'ák nak tegma apyawe, apkellekxagweykha m'a apkelmaxnéssesso nak Dios énxet'ák apagkok, kelyaqhápeyha awáxok ma'a kelán'a étkók, legágkók ekmáske m'a Jerusalén.

⁵Kóneg aptemessásekxak ma'a apkelenmexma, tásek ekteyapma aqsok apkelánéyak ma'a apkelenmexeykha nak chá'a. Wesse' egegkok apyentaxnéssesso apheykha m'a, eñama ekxámokma m'a melya'assáxma. Kélnaqlákxeyk megkatnahakxa apkelókxa m'a apketchek, apnaqlákxeyk ma'a apkelenmexma nak.

⁶Massegwokmek ma'a Sión ektaqmalma nak, cham'a ektémakxa axta ekyókxoho ektaqmalma; máxa popyet aptamhágkok ma'a apkelámha apmonye'e agkok aptegyéyak la'a pa'at; apkelyenyawásegkek apmagkok apkelxega apmonye'e m'a apmenxenma nak.

⁷Xénwákxók awáxok Jerusalén ma'a ekhem ektamhákxo axta axakko', tén han ekyaqhápeykha awáxok; xénwákxók awáxok ekyókxoho m'a aqsok ekxámokma ekweteya axta m'a nentámen axta; xénwákxók awáxok ma'a apmoma axta élenmexma, megkólya'áya axta kólpasmok, apkelányo axta m'a élenmexma keñe apkesméssama m'a kéltemessásekxo mékoho.

⁸Awanhók agko' élane megkay'assáxma m'a Jerusalén cháxa keñamak ekpayhémo nak kólwanyaha. Aptaqnawágwokmek kaxwók ma'a apcháyo axta chá'a, hakte apwet'ak kaxwók meyke apáwa. Cháxa keñamak élekxagweyncha'a nak tén han ekmegqaya ekpeyncháxko ekpósa nát.

⁹Kelyepetcheyak élnaqta m'a aqsok élmanyása; megkaxeyenmak awáxok yaqweykenxa katnehek. Asagkek ektáhakxa ektéyam; méko xama enxoho yaqwayam epeykessásekxak awáxok. ¡Wesse', elano sẽltemessáseykekxa mékoho tén han ektémakxa apkeleymákpoho m'a sélenmexma!

¹⁰Apkelmágkek katnaha námakkok ma'a aqsok agkok ekxámokma axta Jerusalén. Apwet'ak tegma apwányam apkelyennaqtésa apyempe'ék apkelántaxna tegma appagkanamap ma'a énxet'ák melya'áseyak nak Dios, ¡cham'a énxet'ák meltémo axta chá'a exchep elántexek ma'a kélpeykessamókxa nak!

¹¹Apkellekxagweyha apyókxoho énxet'ák apheykha nak ma'a kañe', aptegyágkek aptéyak; apkelméssek chá'a aqsok apagkok ekyaqmageykekxa nento, yaqwayam enxoho meletsephe'. ¡Wesse', elano sẽlteméssesakxa ekmaso! ¡Kaxén apwáxok setnahakxa nak!

¹²¡Kéxegke ektáha nak kélxega ámay, kólchaqnágwom sekxo', kalchetam kélwáxok yetneyk agkok kéllegeykegkoho ekhawo nak ko'o, señassáseykegkoho agko' nak! ¡Wesse' egegkok seyhe ko'o xa ektémakxa nak ekyentaxno ewáxok eñama setaqnagko!

¹³Néten keñamak apyenyeykento Wesse' egegkok táxa ekweykmoho nak élwatno kañe' exchakkok; epekkenchessegkek kelhanma m'a emonye', keñe setaqhessamo; eyámasmeyk aqsa han, keñe seklegeykegkoho chá'a yókxoho ekhem.

¹⁴Apweteyak ko'o may'assáxma m'a Wesse' egegkok; etéteykekxeyk han ma'a, máxa yámet ekyentaxno temék sekpatmeykencha'a: ¡masséssegkek sekyennaqte! Egkéssegkek ko'o Wesse' egegkok ma'a énxet'ák mamowána nak alenmexekxa'.

¹⁵Makhawók élya'ássessók ko'o Wesse' egegkok ma'a énxet'ák apkelyennaqte semasma axta chá'a. Eyhayak sẽlpextétamo yaqwayam hesawhaksek ma'a énxet'ák ahagkok apkelyennaqte. ¡Apteméssessók Wesse' egegkok énxet'ák ahagkok Judá m'a kéltémakxal'a kólyaqhápok anmen yámet ekyexna, yaqwayam kalanaxchek vino!

¹⁶Cháxa sélekxágkassama nak chá'a ko'o xa aqsok nak. Kelpexyawáseykenteyk ahaqtek égmenek, hakte méko xama enxoho yaqwayam hetaqmelchessásekxak ewáxok, méko xama enxoho yaqwayam hewasqakkásekxoho. Heykha étchek ma'a nepyeseksa nak tegma appalleyam, hakte maghawok negko'o m'a nélenmexma, apmelyeyha'e.

¹⁷Kelya'ássek néten amék éltamho eykhe kólpasmok ma'a Sión, méko eyke xama enxoho yaqwayam kapeykessásekxak awáxok. Apkeltamhók Wesse' egegkok ewakhak apkelenmexma m'a Jacob; Aptaqnawágweykmek Jerusalén ma'a énxet'ák nak.

¹⁸Apkeláneyak Wesse' egegkok ma'a ekpayhawo nak elána', hakte énmexeykekxeyk ko'o m'a apchánamakxa nak antéhek. ¡Énxet'ák, kóleyxho sekpeywa kélyókxoho nak; kóllano ektémakxa seklegeykegkoho! ¡Apkelmomakpek ma'a wokma'ák ahagkok tén han kelán'a étkók, kélnaqleykekxo megkatnahakxa élókxa'!

¹⁹Éltamhók eykhe hepasmok ma'a sélásekhayókxa nak, élyexancháseykha eyke. Apkeletsepmeyk tegma apwányam ma'a apkelmaxnéssesso nak Dios énxet'ák apagkok, tén han ma'a apkelámha apmonye'e ahagkok nak: ¡aptegyeykegkek axta eykhe aptéyak yaqwayam enxoho meletsephe'!

²⁰¡Wesse', elano ektémakxa ekyentaxno ewáxok! ¡Eklegeykegkók ekmaso ewáxok! Añegkohok chá'a ekmáske ewáxok ekxénwákxoho enxoho chá'a ewáxok sektémakxa sénmexeykekxo. Sókwenaqte aptekyawák étchek ma'a yókxexma, keñe han se'e kañe' nak, ekyetnama apkeletsapma énxet'ák.

²¹Apkellegayak eykhe énxet'ák se'e ektémakxa nak sélekxagweykha, méko eyke xama enxoho yaqwayam epeykásekxak ewáxok. Apkelya'ásegkók ektémakxa ekmaso sekha m'a apyókxoho nak sélenmexma, kelpayheykekxók han apkelwáxok setnéssessama ko'o exchep xa. ¡Yána kawak heykxa m'a ekhem apxeyenma axta, keñe sa' kay'ammok han ma'a ektéma nak ko'o sey'áya!

²²Yána kawakxak aphakxa exchep ma'a ekyókxoho apkeltémakxa ekmaso apkeláneyak nak; etnésses eñama melya'assáxma m'a setnéssessamakxa nak ko'o, megkamassegweykmok ko'o sélekxagweykha; ¡yélaqtéssegkek ewáxok!