Read Lengua Sur Ezequiel 11 Bible Online

Ezequiel 11 - Lengua Sur bible

Ezequiel 11

¹Eyeynchek axta ko'o sey'asa néten ma'a Dios apmopwána, éntamákxeyk axta ekweykekxoho m'a apátog nak Wesse' egegkok tegma appagkanamap apagkok, ekpayho nak teyapmakxa ekhem. Apháha axta nahan veinticinco énxet ma'a átog nak. Jaazanías axta nahan ekwet'ak apha nepyeseksa m'a, Azur apketche nak, tén han ma'a Pelatías, Benaías apketche nak, apteme axta apkelámha apmonye'e apagkok ma'a énxet'ák.

²Aptáhak axta seyáneya Wesse' egegkok se'e: “Keso apkeláneykegkokxo nak chá'a aptamhágkaxa yaqwayam elanagkok aqsok ekmaso agko' se'e tén han apkeláneykekxo nak chá'a apkelpaqmeyesma ekmaso m'a tegma apwányam.

³Etnehek chá'a elpaqmétek se'e: ‘Yehémek sa' annaqxétekhasagkokxak makham tegma. Tásek sa' eyke katnehek negheykha s'e, ektémól'a ápetek keytek ma'a kañe' weygke apwáxok.’

⁴Ellegés sa' sektáhakxa ko'o sélxeyenma m'a.”

⁵Apweywenteyk axta ko'o tekhéxet Wesse' egegkok espíritu apagkok, tén axta apkeltamho atnehek sekpeywa s'e: “Keso aptáhakxa exchek Wesse' egegkok se'e: ‘Cháxa ekxeyenma nak chá'a kélwáxok kéxegke kóltéhek xa, israelitas. Ekya'ásegkók ko'o ektémakxa élchetamso kélwáxok.

⁶Xámók agko' kéxegke kélnapma kélnámakkok se'e tegma apwányam nak, kélsawheyáseykekxók kélhapák ma'a ámay awáxok nak.

⁷Cháxa keñamak sektáha nak ko'o sekpeywa, sektáha nak Wesse': Máxa weygke sa' etnehek ma'a Jerusalén, megkólxohok sa' eyke kéxegke m'a ápetek, sa' eyke m'a kélhapák ektáha nak kélnapma kéxegke, hakte alántekkesek sa' ko'o kéxegke m'a kañe' weygke nak.

⁸¿Kélakaya kempakhakma? Wáphaksek sa' ko'o kempakhakma kélnepyeseksa kéxegke. Ekméssek ko'o sekpeywa, sektáha nak Wesse'.

⁹Alának sa' ko'o sekmakókxa nak atnéssesek kéxegke: alántekkesek sa' se'e tén sa' almések ma'a énxet'ák apkeleñama nak mók nekha.

¹⁰Sókwenaqte sa' kalnápok kéxegke. Sa' alyekpelkohok ko'o kéltémakxa kéxegke m'a ektemegwánxa nak néxa xapop ma'a Israel, keñe sa' kólya'ásegwók sektáha ko'o Wesse'.

¹¹Metnehek sa' weygke kélagkok kéxegke m'a tegma apwányam nak; megkóltéhek sa' nahan kéxegkáxa ápetek. Sa' alyekpelkohok ko'o ektémakxa aqsok ekmaso kélláneyak ma'a néxa xapop nak Israel,

¹²keñe sa' kólya'ásegwók sektáha ko'o Wesse'. Megkóltemék kéxegke ekhawo m'a séltémókxa nak chá'a kóltéhek, megkolláneykegkok nahan ma'a segánamakxa ahagkok nak, kélweheneykegkók aqsa m'a apkeláneykegko nak énxet'ák apheykencha'a nak kélnepyáwa.’”

¹³Neyseksa seklegasso axta ko'o Wesse' egegkok appeywa apyaqnena apketsapa m'a Pelatías, Benaías apketche nak. Éltekxekkek axta ko'o etapnák sekháxaha ekwokmoho sektekxeya ekpayhakxa nahát xapop, élpáxamáha axta ekyennaqte agko', axta ektáhak se'e: “¡Wesse' ahagkok! ¿Peya esawhohok emasséssók apkeleymomap nak apqántawók énxet'ák ma'a kañe' Israel?”

¹⁴Epaqhetchessek axta ko'o Wesse' egegkok, aptáhak axta seyáneya s'e:

¹⁵“Apkelxénchek énxet'ák apheykha nak Jerusalén ma'a énxet'ák israelitas, cham'a apchókxa xamo' nak xép, aptáhak se'e: ‘¡Tayépek aphamakxa Wesse' egegkok apheykegkaxa xa énxet'ák nak! Keñe negko'o segméssama apkelókxa yaqwayam antéhek egagkok.’

¹⁶Cháxa keñamak séltamho nak etnehek elának se'e: ‘Keso aptáhakxa exchek Wesse' egegkok se'e: Ko'o axta sélántekkesso tén han séxpánchesso nepyeseksa m'a pók aptémakxa nak chá'a énxet, tén han neyseksa m'a apkelókxa megkatnahakxa nak chá'a apkelókxa, yaqwatakxoho eyke. Ko'o sa' atnehek kaxwo' tegma appagkanamap apagkok ma'a apkelmahágkaxa enxoho chá'a apkelókxa.’

¹⁷Etne sa' nahan elának se'e: ‘Keso aptáhakxa exchek Wesse' egegkok se'e: Anaqlósawakxak sa' ko'o makham kéxegke m'a apkelókxa nak sélya'assamakxa axta séxpánchessama, nepyeseksa nak ma'a pók aptémakxa énxet, wánchásekxak sa', tén sa' agkeyásekxak makham ma'a apkelókxa Israel.

¹⁸Elwaták sa' makham apkelókxa m'a énxet'ák nak, emassésseták sa' ekyókxoho m'a élánamáxche nak aqsok ekmaso agko' tén han ma'a aqsok ekmanyása nak ekyetno m'a kañe'.

¹⁹Akxakkasek sa' ko'o m'a ektémakxa nak élyennaqte apkelwáxok ekho nak meteymog, agkeyásekxak sa' axnagkok apkelwáxok tén han aphaxnagkok espíritu.

²⁰Tén sa' etnahagkok ma'a ekhawo nak ektémakxa m'a segánamakxa ahagkok tén han ma'a séltémókxa nak chá'a etnahagkok, elanagkok sa' nahan. Énxet'ák ahagkok sa' ko'o atnehek ma'a, keñe sa' etnahagkok ko'o Dios apagkok ma'a.

²¹Keñe sa' meyenyeykekxa nak apkelane xa ektéma nak aqsok ekmaso élánamáxche tén han ma'a aqsok ekmanyása nak, alyetsetchásekxak sa' ko'o m'a aptémakxa ekmaso. Ekméssek ko'o sekpeywa, sektáha nak Wesse'.’”

²²Apkelchampa'ak axta m'a apho nak énxet ekha apxempenák, kelyetlókek axta nahan ma'a ekho nak yátnáxeg apyenyawasso amagkok. Keñe axta m'a élseyéxma, ekyetno axta m'a apyetseksa'ák, élseyéxma apagkok axta m'a Israel Dios apagkok,

²³meyákxeyk axta néten, yenyókek axta m'a tegma apwányam, yetnákxeyk axta m'a néten egkexe émha axta m'a ekpayho nak teyapmakxa ekhem ma'a tegma apwányam.

²⁴Tén axta sey'ásekxo néten ma'a Dios apmopwána, éntamákxeyk axta makham ma'a Babilonia, apheykegkaxa axta nahan nápakha m'a énxet'ák kélántekkesso apkelókxa. Cháxa ektáhakxa axta xama aqsok sélxekmósso apkeltémo axta ótak ma'a Dios espíritu apagkok. Tén axta ekmassa m'a aqsok sekweteyo nak,

²⁵éltennáseykha axta nahan ko'o ekyókxoho aqsok sexekmósso Wesse' egegkok ma'a énxet'ák ektáha axta kélántekkesso apkelókxa.