Read Lengua Sur Ezequiel 14 Bible Online

Ezequiel 14 - Lengua Sur bible

Ezequiel 14

¹Ey'awekteyk axta ko'o nápakha apkelámha apmonye'e Israel. Apháha axta sekhakxa apkeltamho elya'asagkohok amya'a eñama Wesse' egegkok.

²Tén axta ko'o sepaqhetchesa Wesse' egegkok, aptáhak axta seyáneya s'e:

³“Apkelméssamok apagko' apkelwáxok ektémakxa nak chá'a apkelpeykessamo aqsok kéleykmássesso apagkok xa énxet'ák nak, apnegkenmeyk ekpayhémókxa nak chá'a apkelenmexmókxa m'a aqsok éltémo nak chá'a elanagkok melya'assáxma. ¿Wohoya sa' ko'o hélpaqhetchesakpohok xa?

⁴Elpaqhetches sa' xép xa énxet'ák nak, etne sa' elának se'e: ‘Keso aptáhakxa exchek appeywa Wesse' egegkok se'e: Apyókxoho israelitas apkelméssamo apagko' nak chá'a apkelwáxok apkelpeykessamo m'a aqsok kéleykmássesso tén han apnegkenma nak chá'a ekpayhókxa apkelenmexmókxa m'a élánéssamo nak chá'a melya'assáxma, tén han apye'eykekta nak chá'a natámen elmaxnegwaták ma'a Dios appeywa aplegasso, ko'o sa' wátegmowagkokxak ekpayhawo nak atnehek seyátegmoweykegkokxa eñama ekxámokma m'a aqsok kéleykmássesso apagkok.’

⁵“Alpaknegkessamhok sa' ko'o apkelwáxok apyókxoho israelitas ektáha nak seyamasma eñama apkelpeykessamo m'a kéleykmássesso apagkok nak.

⁶Cháxa keñamak séltamho nak etnehek elának israelitas se'e: ‘Keso aptáhakxa exchek appeywa Wesse' egegkok se'e: Hélyo'óta ko'o, kólyetnakhés kéleykmássesso kélagkok, kólchexeykxa ekyókxoho xa aqsok élmasagcha'a agko' nak.’

⁷Eyenyókek agkok ko'o xama israelita essenhan ma'a metnaha nak israelita apha nak kañe' Israel tén han apméssamo apagko' nak apwáxok apkelpeykessamo m'a aqsok kéleykmássesso apagkok, tén han appekkenma nak ekpayhókxa apkenmexmókxa m'a aqsok éltémo nak elának mey'assáxma, keñe natámen ey'ókxak ma'a xama Dios appeywa aplegasso nak yaqwayam etegyaha sekpeywa, ko'o ahagko' sa' nahan wátegmowagkokxak ma'a.

⁸Magwaksek sa' ko'o alanok xa énxet nak, agkések sa' aplegeykegkoho sẽstehegkessamo nak, yaqwayam enxoho elpaqmétek chá'a exének ma'a apyókxoho énxet, amasséssók sa' nepyeseksa m'a énxet'ák ahagkok. Keñe sa' kólya'ásegwók kéxegke sektáha ko'o Wesse'.

⁹“Aplegássek agkok xama amya'a megkamámnaqsoho m'a xama aplegasso nak Dios appeywa, katnehek nahan, hakte ko'o keñamak sélyexancháseykha xa aplegasso nak sekpeywa, ko'o sektáha nak Wesse'; añássesagkohok sa' nahan ko'o m'a, amasséssók sa' nepyeseksa m'a énxet'ák ahagkok Israel.

¹⁰Kóllegássesagkohok sa' eñama mey'assáxma m'a aplegasso nak sekpeywa tén han ma'a ektáha nak chá'a apye'eykekxa aptegyeykha amya'a,

¹¹yaqwayam sa' meheyenyewekxók ko'o kaxwo' ma'a énxet'ák Israel, yaqwayam sa' megkalpeysegkásekxeyk kaxwók ma'a aqsok ekmaso nak apkelánéyak. Énxet'ák ahagkok sa' ko'o atnehek ma'a, keñe sa' hetnehek ko'o Dios apagkok. Ko'o sekxeyenma, sektáha nak Wesse'.”

¹²Epaqhetchessek axta ko'o Wesse' egegkok, aptáhak axta seyáneya s'e:

¹³“Apkelánegkek sa' agkok melya'assáxma xama apkelókxa hénmexek ko'o tén han seyensakmo enxoho sétleykha, allegássesagkohok sa' ko'o, amasséssók sa' ma'a ektémakxa nak ekha aptéyak; wáphaksek sa' meyk nepyeseksa, wának sa' eletsapok énxet tén han ma'a aqsok kélnaqtósso.

¹⁴Apheyk agkok Noé, Danel tén han Job xa apkelókxa nak, wánxa aqsa nahan elwagkasakpok teyp xa apqántánxo nak eñama apteme ekpéwomo apkeltémakxa. Ko'o sekxeyenma xa, sektáha nak Wesse'.

¹⁵“Éláphássek agkok aqsok nawha'ák éllo m'a xama apkelókxa, yaqwayam enxoho kalnápok ma'a énxet apheykha nak kañe' tén han sektemessásekxo enxoho yókxexma meykexa énxet megkeyqwayam nak epéwhok eyeykhágwók xama énxet eñama apkeye m'a aqsok nawha'ák éllo,

¹⁶apháha agkok nahan, cháxa apqántánxo énxet nak, cham'a apkelókxa nak, mopwanchek elwagkasek teyp ma'a apketchek apkelennay'a nak ekweykekxoho m'a kelwán'ák nak; wánxa aqsa elwagkasakpok teyp xa apqántánxo nak, keñe m'a apkelókxa nak katnekxak yókxexma meykexa énxet. Naqsók ko'o sektáha sekxéna xa, sektáha nak Wesse'.

¹⁷“Eyáphássek agkok nahan kempakhakma ekyókxoho xa kañe' nak apchókxa, séltamho enxoho eletsapok énxet tén han ma'a aqsok kélnaqtósso,

¹⁸apháha agkok nahan xa apqántánxo énxet nak, mopwanchek elwagkasek teyp ma'a apketchek nak ekweykekxoho m'a kelwán'ák apketchek nak; wánxa aqsa elwagkasakpok teyp xa apqántánxo nak. Naqsók ko'o sektáha sekxéna xa, sektáha nak Wesse'.

¹⁹“Eyáphássek agkok nahan negmasse xa apkelókxa nak, sektekkesa enxoho nétsapma eñama seklo m'a tén han séltamho enxoho eletsapok ma'a énxet tén han aqsok kélnaqtósso,

²⁰apháha agkok xa énxet'ák nak, cham'a Noé, Danel tén han ma'a Job, mopwanchek elwagkasek teyp ma'a apketchek nak ekweykekxoho m'a kelwán'ák apketchek nak; wánxa aqsa elwagkasakpok teyp xa apqántánxo nak eñama ekpéwomo apkeltémakxa. Naqsók ko'o sektáha sekxéna xa, sektáha nak Wesse'.

²¹“Ektáhak ko'o sekpeywa s'e sektáha nak Wesse': Kayágwomhok sa' aqsa ekmaso seyáphasa sa' ko'o cuatro nenlegeykegkoho ekmaso agko' ma'a Jerusalén, cham'a kempakhakma, meyk segaqhe, aqsok nawha'ák éllo tén han ma'a negmasse ekmaso, yaqwayam sa' kalnápok ma'a énxet tén han ma'a aqsok kélnaqtósso.

²²Apqántawók sa' aqsa eleymakpok meletsapma, yaqwayam sa' elántépok yetlo apketchek apkelennay'a m'a tén han ma'a kelwán'ák nak. Apkelya'awékteyk sa' agkok kéxegke m'a, kólwetak sa' apkeltémakxa tén han ma'a aqsok ekmaso apkelánéyak, keñe sa' kaltaqmelchessásekxak kélwáxok kéxegke m'a nenlegeykegkoho seyáphasso nak ko'o m'a Jerusalén.

²³Kaltaqmelekxak sa' kélwáxok kélwet'a sa' apkeltémakxa m'a tén han ma'a aqsok apkelánéyak. Keñe sa' kólya'ásegwók kéxegke megkatnaha eyaqhémo yaqwayam alának ekyókxoho m'a sekteméssesakxa enxoho m'a Jerusalén. Ko'o sekxeyenma xa, sektáha nak Wesse'.”