Read Lengua Sur Ezequiel 17 Bible Online

Ezequiel 17 - Lengua Sur bible

Ezequiel 17

¹Epaqhetchessek axta ko'o Wesse' egegkok. Aptáhak axta seyáneya s'e:

²“Xép énxet, elya'assásegwom sa' énxet'ák Israel xama aqsok negyetcháseykekxoho.

³Etne sa' elának se'e: “Keso aptáhakxa exchek appeywa Wesse' egegkok se'e: Wa'ak xama náta ekyawe agko' ma'a Líbano; élwányam ma'a axempenák, ahóxekche'ék agko' nahan, sawheykekxók nahan ektáxama éltaqmalma m'a axempenák nak. Kelmeyk naw'ék ma'a yámet cedro,

⁴kelekkexchek aktegák ma'a étseksók agko' nak, kenwákxeyk nahan ma'a apkelókxa nak énxet'ák ekha nak aqsok apkexeykekxa, cham'a tegma apwányam ekxámokmakxa nak ma'a aqsok kélchexeykekxa.

⁵Tén axta ekmákxo makham aqsok aktek náxop, kenákxeyk axta m'a xapop kélcheneykekxexa nak chá'a aqsok, neyáwa nak ma'a ényahamakxa yegmen, ekyetnamakxa nak ekyawe m'a yegmen.

⁶Tekkek axta m'a aqsok aktek temék axta xama anmen yámet ektaqmalma áwa'; yaqwátawók axta eykhe nahan ma'a, kelmaheykegkek axta eyke aktegák ma'a ekyáqtamakxa axta m'a náta ekyawe, kelatchessek axta kepmenák ma'a xapop. Temék axta xama anmen yámet; keltektépegkek axta axnagcha'ák áwa', kelwegqak axta nahan aktegák.

⁷Yetneyk axta eyke nahan mók náta ekyawe, élyawe axempenák tén han ekxámokma áwa'. Ya'ágkassegkek axta nahan kepmenák xa anmen yámet nak, kélya'ássessegkek axta nahan aktegák ma'a ekpayhókxa nak ekyáqtamakxa xa náta ekyawe nak, yaqwayam enxoho kaxpaqhak makham mók yegmen, cham'a émhakxa nak makhawo kélcheneykekxexa.

⁸Kélcheneykekxeyk axta m'a ektaqmelakxa nak xapop, ekpayhókxa axta ekyetnamakxa m'a ekyawe agko' yegmen, yaqwayam enxoho kalwegqak ma'a aktegák tén han keyxek, tén han katnehek xama anmen yámet ektaqmalma.”

⁹“Etne sa' exének sektáha sekpeywa s'e: ‘Keso aptáhakxa exchek appeywa Wesse' egegkok se'e: Megkataqmelek sa' se'e anmen yámet nak. Kalpátekkesek sa' kepmenák ma'a náta ekyawe ekwe exchek amonye', kapalchessásegmak sa' ma'a ekyexna; megkólwasqápek sa' nahan kólpátekkesek ma'a awhak nak, megkólmenyeyk sa' apxámokma énxet yaqwayam epátekkesek, kalyameygkok sa' ma'a ekyókxoho áwa' kaxwe éltekteyapma nak.

¹⁰Kóllánekxohok sa' eykhe chá'a kélcheneykekxa, megkaltektépekxeyk sa' eyke chá'a; kalyameygkok sa' chá'a m'a ekwátekhapa enxoho éxchahayam eñama nak teyapmakxa ekhem; kalyameygkok sa' chá'a m'a ekpayhókxa nak chá'a élyephagweykxa m'a éltekteyapma.’”

¹¹Epaqhetchessek axta ko'o Wesse' egegkok. Aptáhak axta seyáneya s'e:

¹²“Elmaxneyha hana sa' énxet'ák élyennaqte nak apkelwáxok apkelya'ásegkók kexaha ekyetchesamaxkoho s'e aqsok kélyetcháseykekxoho nak. Etne sa' elának se'e: ‘Apmeyáyekmek axta Jerusalén ma'a wesse' apwányam Babilonia tén axta apmoma m'a wesse' apwányam nak Judá, yetlo m'a apkeláneykha, apnaqleykekxeyk axta m'a Babilonia.

¹³Tén axta apma xama wesse' apwányam apketche, apkelanak axta nahan ekhémo mók apkelpaqhetchásamákpoho m'a, apkeltamhók axta nahan etnehek ekmámnaqsoho agko' appeywa yaqwayam meyenyawha chá'a, apyentegkáseykxeyk axta m'a énxet'ák ekha kéláyo axta m'a apkelókxa

¹⁴yaqwayam enxoho katnekxak ekyelqamáxkoho m'a apchókxa Judá, megkamowána enxoho kaxátekhekxak makham, yaqwayam enxoho elanagkok chá'a ekhémo mók apkelpaqhetchásamákpoho tén han memassésseme'.

¹⁵Apkenmexákxeyk axta eyke wesse' apwányam Babilonia xa wesse' apwányam apketche nak tén axta apkeláphasa apkelásenneykha m'a Egipto yaqwayam elmaxnegwók ma'a yátnáxeg tén han apxámokma m'a énxet. ¿Kélaneykeya kéxegke emallánek natámen xa tén han exyenmok yetlo megyetsapma? ¿Apwancheya exyenmok yetlo megyetsapma m'a melane nak chá'a ekhémo mók nélpaqhetchásamáxkoho?

¹⁶Naqsók ko'o sekxéna sektáha nak Wesse' peya yetsapwók Babilonia m'a ektáha nak melane apxeyenma axta elána' tén han melane nak ekhémo mók nélpaqhetchásamáxkoho apkelánesso axta m'a wesse' apwányam, cham'a ektáha axta apma apteméssesso wesse'.

¹⁷Meláphássesek sa' faraón yaqwayam epasmok sẽlpextétamo apkelyennaqte tén han apxámokma énxet apketámegko enxoho wesse' apwányam ma'a Babilonia tén han apkelana enxoho kélyetlamakxa néten tén han meteymog aphaxta m'a nepyáwa nak tegma apwányam tén han apkelnapa enxoho apxámokma m'a énxet,

¹⁸hakte melanék ma'a apxeyenma axta elána', melaneyk nahan ma'a ekhémo mók apkelpaqhetchásamákpoho; apxeyenmeyk axta elána' keñe apteméssessama xa ektáha nak. Megkatnehek sa' megyetsapma.

¹⁹“Naqsók ko'o sektáha sekxéna sektáha nak Wesse': melaneyk séltennasso axta ko'o elának xa, melaneyk ma'a ekhémo mók sélpaqhetchásamáxkoho axta ko'o; cháxa keñamak sekmako nak ko'o alyetsetchásekxak ma'a aptémakxa.

²⁰Wáhakkasek sa' ko'o yám'én ahagkok, keñe sa' amok; eyntemekxak sa' ma'a Babilonia, sa' eykpelkohok nahan aptémakxa m'a, eñama seyenseyam sétleykha.

²¹Etekyók sa' neyseksa kempakhakma m'a sẽlpextétamo apagkok apkelyennaqte nak, keñe sa' ma'a apkeleymomap nak yexpaqnek elmahagkok chá'a m'a ekyókxoho yókxexma. Keñe sa' kólya'ásegwók kéxegke, sektáha ko'o sekxeyenma, sektáha nak Wesse'.

²²“Ektáhak ko'o sekpeywa s'e, sektáha nak Wesse': Alekkexek sa' ko'óxa naw'ék kaxwe éltekteyapma áwa' m'a yámet ekwenaqte agko' nak; ko'o ahagko' sa' nahan aknekxak ma'a xama egkexe netnók agko' nak,

²³cham'a egkexe netnók agko' nak ma'a Israel. Kaxámak sa' aktegák, keyxek sa' nahan, katnehek sa' xama yámet cedro ekyawe ektaqmalma agko'. Kallawha sa' mók ektémakxa nak chá'a aqsok nawha'ák ma'a kóneg nak, kalanagkok sa' nahan axanák mók ektémakxa nak chá'a náta m'a kañe' áwa' kóneg pessesse agkok nak ma'a aktegák.

²⁴Hey'asagkohok sa' ko'o sektáha Wesse' m'a ekyókxoho yenta'a élyawe élaqnéyak nak ma'a yókxexma. Ayaqnegkeshok chá'a ko'o m'a yámet ekwenaqte agko' nak, awánegkeshok eyke chá'a m'a yámet ekyaqwate nak. Ekyamaye chá'a ko'o atnéssásekxohok ma'a yámet ekyápaqmátamo nak áwa', ataqmelchessásekxohok eyke chá'a ko'o áwa' m'a yámet ekyamaye nak. Ekxénchek ko'o xa, sektáha nak Wesse', alának nahan.’”