Read Lengua Sur Ezequiel 18 Bible Online

Ezequiel 18 - Lengua Sur bible

Ezequiel 18

¹Epaqhetchessek axta ko'o Wesse' egegkok. Aptáhak axta seyáneya s'e:

²“¿Yaqsa ektéma megkamassegweykmo nak chá'a ekteme élpaqmétamáxche Israel se'e ektéma nak amya'a: ‘Apteykegkek anmen yámet ekyexna ekmáske m'a apyapmeyk, keñe m'a apketchek nak eksawhoma chá'a m'a apma'ák?

³Ekxénchek ko'o, sektáha nak Wesse' peya megkólmaha chá'a kaxwók kéxegke Israel xa ektéma nak amya'a.

⁴Ko'o sekteme ahagkok ma'a apyókxoho énxet, cham'a apyapmeyk nak tén han ma'a apketchek nak. Apkelanak agkok mey'assáxma xa, yetsapok sa'.

⁵“Énxet appéwomo m'a apkeláneyo nak chá'a aqsok ekpéwomo tén han ektaqmalma:

⁶mepásegwayam nak kalanaxchek ektámaxche ekyawe m'a egkexe netno nak yaqwayam kólpeykeshok ma'a aqsok kéleykmássesso, tén han megyáyo nak ma'a aqsok kéláyókxa élmowancha'a amya'a nak ma'a Israel; mémenta nak ma'a pók aptáwa', tén han mepaknegweykmoho nak aptáwa' ekwákxo enxoho ekhem ekyenyaweykekxexa ekto;

⁷tén han metwáseykegkoho nak pók, apmeyáseykekxa nak aqsa chá'a pók ma'a aqsok apmésso ekyaqmageykekxa m'a apméyak; memeñexchesso nak xama aqsok apagkok pók; appasmo nak apto m'a meyk eyaqhe nak tén han apmésso nak aptaxno m'a meyke nak apáwa;

⁸memassáseykha nak chá'a pók selyaqye apagkok yetlo apma ekyawe agko' ekyánmaga tén han melmaxneyeykegkoho nak chá'a yának eyánmagkásekxohok mók néten ekyánmaga; metnéssesseykmoho nak exma ekmaso pók; tén han appékessamo nak chá'a appeywa elánekxések apkelátegmómap ma'a apqánet énxet;

⁹apyetlókasso nak ma'a ektémakxa segánamakxa ahagkok tén han apkelane nak chá'a meyke apyenseyam ma'a séltémókxa nak chá'a etnehek. Naqsók appéwomo xa énxet nak, megyetsepek sa' chá'a. Ko'o sekxeyenma xa, sektáha nak Wesse'.

¹⁰“Yetneyk agkok xama apketche apyennaqteyáseykha chá'a apyempehek xa énxet nak tén han apteme enxoho tekyawa yáp, apkelane nak chá'a xama s'e aqsok nak

¹¹meláneya nak ma'a apyáp, appásegwayam nak chá'a élánamáxche ektámaxche ekyawe m'a egkexe netno nak yaqwayam kólpeykeshok ma'a kéleykmássesso, tén han apyementa enxoho m'a pók aptáwa',

¹²aptawáseykegkoho nak chá'a m'a énxet apmopyósa nak tén han ma'a ekhakxa nak chá'a eyeyméxchexa aqsok apxagkok, tén han apmenyexchesso nak chá'a aqsok apagkok pók, tén han megkeyáseykekxa nak aqsa chá'a aqsok apmésso ekyaqmageykekxa apméyák ma'a pók, tén han apcháyo nak chá'a m'a aqsok kéláyókxa élmasagcha'a nak tén han apkelane nak chá'a m'a aqsok megkaleklamakxa nak chá'a ko'o ewáxok,

¹³tén han apmassáseykha nak chá'a selyaqye apagkok pók yetlo apkelteme ekyawe agko' ekyánmaga tén han apkeltémo nak chá'a kólyánmagkásekxohok mók néten ekyánmaga: cháxa énxet nak, meweynchamha sa' chá'a. Yetsapok sa' natámen apkelane ekyókxoho xa aqsok sektaqnagkamo nak ko'o. Apsexnánémap apagko' sa' nahan katnehek ma'a apketsapma.

¹⁴“Yetneyk agkok xama apketche apwete ektémakxa apkelane mey'assáxma xa énxet nak, métleykekxa nak chá'a m'a aptémakxa nak;

¹⁵mepásegwayam nak ektámáxche ekyawe élánamáxche m'a egkexe netno nak yaqwayam kólpeykeshok ma'a kéleykmássesso, tén han megyáyo nak ma'a aqsok kéláyókxa élmowancha'a amya'a nak ma'a Israel; tén han mémenta nak ma'a pók aptáwa'

¹⁶tén han metwáseykegkoho nak xama énxet; tén han melteme nak xama aqsok ekyánmaga kélmáncha'a enxoho m'a aqsok apagkok; tén han memeñexchesso nak aqsok apagkok ma'a xama énxet, apmésso nak aqsa chá'a nekha apto m'a énxet meyk áto', tén han apmésso nak chá'a aptaxno m'a meyke nak apáwa;

¹⁷tén han metnéssesseykmoho nak exma ekmaso xama énxet tén han memassáseykha nak pók selyaqye apagkok yetlo apkelteme ekmomnáwa ekyánmaga tén han apkeltémo kólyánmagkásekxohok mók néten; tén han apkelane nak ma'a segánamakxa ahagkok tén han apyetlókasso nak ma'a séltémókxa etnehek: cháxa énxet nak, megyetsepek sa' eñama mey'assáxma m'a apyáp. Eweynchamha sa' chá'a.

¹⁸“Yetsapok sa' kéllegassáseykegkoho eñama aptémakxa mey'assáxma apagko' ma'a apyáp nak, hakte apnaqtawáseykegkók axta chá'a apnámakkok, apkelmenyexcháseykegkek axta nahan chá'a aqsok apagkok, apkelánéyak axta chá'a aqsok ekmaso nepyeseksa m'a énxet'ák apagkok.

¹⁹Sa' kóltéhek kólmaxneyha kéxegke s'e: ‘¿Yaqsa ektáha meyaqmagkassásekxo nak han mók aptémakxa mey'assáxma apyáp ma'a apketche nak?’ Apkelánéyak eyke chá'a aqsok ekpéwomo m'a apketche nak tén han ma'a aqsok ekpayhawo nak chá'a anlána', apkelánéyak nahan chá'a ekyókxoho m'a segánamakxa ahagkok: Naqsók sa' megyetsepek xa.

²⁰Sa' eyke aqsa yetsapok ma'a ektáha nak apkelane mey'assáxma. Mopwanchek sa' eyaqmagkassásekxak mók aptémakxa mey'assáxma apyáp ma'a apketche nak, tén han ma'a apyáp nak, mopwanchek sa' eyaqmagkassásekxak mók aptémakxa mey'assáxma m'a apketche nak. Exkak sa' ekyánmaga énxet appéwomo eñama m'a aptémakxa ekpéwomo; keñe sa' ma'a ekmaso nak aptémakxa, kóllegássesagkohok sa' eñama m'a aptémakxa ekmaso.

²¹“Apyenyeykxeyk agkok ekyókxoho ektémakxa axta chá'a apkelane mey'assáxma m'a énxet ekmaso nak aptémakxa, apkelana enxoho ekyókxoho m'a segánamakxa ahagkok tén han ma'a aqsok ekpéwomo nak tén han ekpayhawo nak chá'a elána', megyetsepek sa', eweynchamha sa' chá'a.

²²Megkaxénwakxók sa' nahan chá'a ko'o ewáxok ma'a ekyókxoho aqsok ekmaso axta apkelane, eweynchamha sa' chá'a eñama apkelane m'a aqsok ekpéwomo.

²³Mómenyeyk ko'o yetsapok énxet ekmaso nak aptémakxa, émenyeyk aqsa eyaqmagkasek ma'a aptémakxa keñe eweynchamha chá'a. Ko'o sekxeyenma xa, sektáha nak Wesse'.

²⁴“Apkelwátessek agkok aptémakxa ekpéwomo m'a énxet ekpéwomo nak aptémakxa, apkelánekxo enxoho ekyókxoho m'a aqsok ekmaso ektaqnómaxkoho nak, apkeláneykegko nak ma'a énxet'ák élmasagcha'a nak apkeltémakxa, ¿xéncheya kélwáxok kéxegke megyetsepek xa? Megkaxénwakxók sa' chá'a ko'o ewáxok ma'a ekyókxoho aqsok ektaqmela axta apkelane: yetsapok sa' eñama apkelwátesseyam sétleykha tén han aptémakxa mey'assáxma.

²⁵Hélxének sa' ko'o kéxegke megkapayhawo aqsok sélane; kóleyxho, kéxegke énxet'ák Israel. ¿Xéncheya kélwáxok kéxegke megkataqmela aqsok sélane? ¿Háweya kéxegke m'a megkataqmalma nak chá'a aqsok kéllánéyak?

²⁶Apkelwátessek agkok apkelane aqsok ektaqmela m'a énxet appéwomo, apkeláneykxo enxoho m'a aqsok ekmaso, yetsapok sa' eñama apkelane aqsok ekmaso.

²⁷Apyenyeykxeyk agkok aptémakxa ekmaso m'a énxet ekmaso nak aptémakxa, apkeláneykxo enxoho m'a aqsok ekpéwomo tén han ma'a ekpayhawo nak chá'a elána', ewagkasakpok sa' teyp.

²⁸Apya'ásegwokmek sa' agkok ma'a aptémakxa, apyenyékxo enxoho ekyókxoho m'a aqsok ekmaso axta apkelane, megyetsepek sa', eweynchamha sa' chá'a.

²⁹“Hexének sa' eyke ko'o énxet'ák Israel megkapéwo m'a aqsok sélane. ¿Yagkapéwók ko'o aqsok sélane? ¿Háweya énxet'ák Israel ma'a megkapéwomo nak chá'a aqsok apkelánéyák?

³⁰Élyekpelchémók eyke chá'a ko'o kélxama kéxegke, israelitas, cham'a ektémakxa nak chá'a aqsok kéllánéyak. Ko'o sekxeyenma xa, sektáha nak Wesse'. Kólyenyekxa ekyókxoho kéltémakxa élmasagcha'a, yaqwayam sa' megkalsexnenayhek ma'a kéltémakxa kélagko' nak kélnaqtawásamáxche'.

³¹Kólyenyekxa ekyókxoho aqsok élmasagcha'a kélláneykegko nak chá'a sélenmexeykencha'a ko'o, kólmekxa axnagkok kélwáxok tén han axnagkok kéltémakxa. ¿Yaqsa eyke ektáha kéltamho nak kóletsapok, énxet'ák Israel

³²maltamho enxoho ko'o kóletsapok kélxama? Kólyenyekxa aqsok ekmaso tén sa' megkóletsepek chá'a. Ko'o sekxeyenma xa, sektáha nak Wesse'.