Read Lengua Sur Ezequiel 22 Bible Online

Ezequiel 22 - Lengua Sur bible

Ezequiel 22

¹Epaqhetchessek axta ko'o Wesse' egegkok. Aptáhak axta seyáneya s'e:

²“Xép, énxet, exén sa' ekpayhókxa kólteméssesek ma'a tegma apwányam ekyetnamakxa nak chá'a élánamáxche aqsok ekmaso agko'. Eltennés sa' ekyókxoho m'a aqsok ekmaso agko' nak élánamáxche m'a kañe'.

³Sa' etnehek yának se'e: ‘Keso aptáhakxa exchek appeywa Wesse' egegkok se'e: Tegma apwányam apkelnápeykekxa nak chá'a énxet'ák apagkok, apkelane nak chá'a m'a aqsok kéleykmássesso yaqwayam etwasakpok, ¡kawak sa' ekhem yaqwánxa kóllegássesagkoho'!

⁴Sexnenakkek xép ma'a apkelnapma énxet, tawáseykha m'a kéleykmássesso apkelane axta; chágketchessessa'ak ma'a ekhem apagkok, wagkassessek néxa apweynchámeykha. Wának sa' ko'o exénmakha ekmaso m'a énxet'ák, apyókxoho pók aptémakxa énxet'ák sa' yesmaksek xép.

⁵Yesmaksek sa' chá'a exchep énxet'ák apheykha nak keto tén han ma'a makhawo', xép tegma apwányam apxénamap nak nátegma eñama apkelpeykessamo m'a aqsok kéleykmássesso, tén han ekyawe metaqmelchásamap.

⁶Apháha kelwesse'e nak chá'a Israel ma'a, cham'a apheykencha'a nak chá'a nepyeseksa exchep, apkeláneykegko nak chá'a ekyókxoho, apmako enxoho chá'a elanagkok ma'a aqsok ekmaso agko' nak.

⁷Méko apkelyeheykekxoho apyapmeyk tén han chána m'a énxet'ák apagkok nak xép, meltaqmelchesek nahan chá'a m'a énxet'ák apkeleñama nak mók nekha, enaqtawasagkohok nahan chá'a m'a élyéheykha nak tén han ma'a xentampe'e nak.

⁸Megyáyók nahan chá'a m'a aqsok élpagkanamaxche ahagkok nak tén han ma'a ekhem ahagkok sábado.

⁹Yetneyk nahan chá'a nápakha énxet'ák apagkok apkelsexnenagko apnámakkok apkeletsapma, eñama apkelmopwancha'a amya'a; tén han appásegwayam chá'a élánamáxche ektámaxche ekyawe m'a néten egkexe, eñama kéllánésso m'a aqsok kéleykmássesso, tén han apkelánéyak chá'a m'a aqsok ekmaso agko' nak.

¹⁰Yetneyk nahan chá'a m'a appatheteykegkokxa nak chá'a apyáp aptáwa' tén han apyennaqtésso nak chá'a apyempehek emáwhok etnéssessamhok exma m'a kelán'a neyseksa ekyenyaweykekxa ekto.

¹¹Yetneyk nahan chá'a m'a apkelánesso nak chá'a pók aptáwa', tén han ma'a appatheteykegkokxa nak chá'a m'a aptánegken, tén han aptaháneykha nak chá'a emáwhok etnéssessamhok exma m'a apyáxeg apagko' kelwána nak.

¹²Yetneyk han chá'a nápakha énxet'ák apagkok apma nak chá'a kólmések ekyánmaga yánékpok yaqhek ma'a pók. Emássesha nahan chá'a selyaqye apagkok pók yetlo apma ekyawe agko' ekyánmaga tén han apkeltémo eyánmagkásekxohok chá'a mók néten, elyennaqtésha nahan chá'a apyempe'ék enaqtawasagkohok ma'a apnámakkok, keñe ko'o megkaxénhek chá'a apkelwáxok. Ko'o sekxeyenma xa, sektáha nak Wesse'.

¹³“Elókásawók ahagko' ko'o m'a ektémakxa nak apnaqtawáseykegkoho énxet'ák apagkok tén han apkelnapma chá'a.

¹⁴Nágkaxén aqsa apwáxok yepwának hénmexekxak sekyaqmagkásekxo sa' ko'o mók ma'a aptémakxa. Ekxénchek ko'o xa sektáha nak Wesse', alának sa' nahan:

¹⁵waxpánchesek sa' ekyókxoho apheykegkaxa nak chá'a pók aptémakxa énxet'ák, waxpánchesha sa' ekyókxoho apkelókxa, wáxñassásekxak sa' ekyókxoho m'a aptémakxa ekmanyása;

¹⁶hesexnenak sa' ko'o hexénmakha ekmaso m'a pók aptémakxa nak chá'a énxet'ák, elya'ásegwók sa' eyke sektáha ko'o Wesse'.’”

¹⁷Epaqhetchessek axta ko'o Wesse' egegkok. Aptáhak axta seyáneya s'e:

¹⁸“Ekheyásawók ko'o énxet'ák Israel ma'a aqsok ayew'ák megkólmowánal'a kaxwók kólmaha, ekheykegkokxal'a kañe' táxa axagkok natámen kélwatno m'a sawo ekyexwase ekmomhápal'a, tén han ma'a sawo ekpexpope ekmomhápal'a, tén han ma'a sawo ekyentaxnól'a, tén han ma'a yámenmaga aktek essenhan ma'a sawo ekmope élyenmal'a.

¹⁹Cháxa keñamak sektáha nak ko'o sekpeywa s'e, sektáha nak Wesse': Wánchásekxak sa' ko'o kéxegke kañe' Jerusalén, eñama kélhágweykekxoho m'a aqsok ayew'ák megkólmowánal'a kaxwók kólmaha, ekheykegkokxal'a m'a kañe'.

²⁰Sa' atnehek ko'o wánchásekxak kéxegke yetlo seklo ekmaso agko' tén han alpeykásekxak ma'a ektémól'a kólánchásekxak kólxatmok táxa axagkok ma'a sawo ekmope ekmomnáwa, tén han ma'a sawo ekyexwase ekmomhápal'a, tén han ma'a sawo ekyentaxnól'a, tén han ma'a yámenmaga aktek la'a tén han ma'a sawo ekpexpope ekmomhápal'a, tén han ma'a ektémól'a kólwatchesagkohok táxa yaqwayam enxoho kalpayhekxa'.

²¹Ayánchesagkohok agko' sa' ko'o seklo, wánchásekxak sa' ko'o kéxegke yaqwayam alpeykásekxak ma'a nepyeseksa nak tegma apwányam.

²²Sa' kóltéhek kéxegkáxa kólpayhekxak nepyeseksa tegma apwányam ma'a ektémól'a sawo ekmope ekmomnáwa kólpeykásekxak ma'a kañe' táxa axagkok, keñe sa' kólya'ásegwók ektáha ko'o sekyenyeykenta seklo kélnepyeseksa kéxegke, ko'o sektáha nak Wesse'.”

²³Epaqhetchessek axta ko'o Wesse' egegkok. Aptáhak axta seyáneya s'e:

²⁴“Xép, aptáha nak énxet, etne yának Israel se'e: ‘Xeye' ekteme xama apchókxa kéllegassáseykegkoho meyke ekmámeye tén han meyke yegmen,

²⁵xama apkelókxa apheykegkaxa nak ma'a kelwesse'e apkelyetchesamakpoho yámakméwa, élyexwéweykhal'a tén han élyeptamól'a m'a ekyógkexma; ektómól'a kañe' yókxexma agkok ma'a énxet, tén han élmenyexchessamól'a aqsok élmomnáwa apagkok tén han ma'a aqsok apagkok ekxámokma nak, ekteméssessamól'a xentampe'e' ekxámokma agko' ma'a kelán'ák.

²⁶Apkelyetnakhásseykmek ektémakxa nak nélxekmowásamáxche ahagkok énxet'ák appasmo nak apkelmaxnéssesso Dios énxet'ák apagkok apheykencha'a nak se'e apchókxa nak, apnaqtawáseykha nahan chá'a m'a aqsok sekteméssesso nak chá'a ko'o élpagkanamaxche; metnéssessók xama enxoho ekyeykhamaxche mók ma'a élpagkanamaxche nak tén han ma'a megkatnaha nak élpagkanamaxche, melxekmóssók nahan chá'a apnámakkok ektémakxa nenteméssesso ekyeykhamaxche mók ma'a aqsok éláxñeyo nak tén han ma'a élmanyása nak. Melányók nahan chá'a m'a ekhem ahagkok sábado, meheyáyók nahan chá'a.

²⁷Máxa aqsok nawha'ák éllo élyeptamól'a ekyógkexma apkelwesse'e s'e apchókxa nak, apkelpenchesso nak chá'a yaqwayam elnápok énxet yaqwayam enxoho kaxámekxak ma'a aqsok apagkok.

²⁸Apkelpóssegkek chá'a aqsok ekmámnaqsoho m'a apkellegasso nak chá'a amya'a, máxa m'a énxet apmópessól'a nápakhaw'ék tegma; elxének chá'a elwetak ma'a aqsok, keñe ellegaksek chá'a m'a aqsok ekwetamaxkoho nak chá'a megkatnaha ekmámnaqsoho. Elxének chá'a ellegaksek ma'a sekpeywa, makke ko'o alpaqhetchessók chá'a m'a.

²⁹Apkelmenyexéyak aqsa apkeláneykegkok chá'a m'a kelwesse'e ekha nak chá'a xapop apagkok ma'a apchókxa tén han apkelyennaqteyáseykha chá'a apyempe'ék; apnaqtawáseykegkok chá'a m'a énxet'ák apmopyóseka nak tén han ma'a ekha nak chá'a eyeyméxchexa aqsok ma'a apxanák, apkelyennaqteyáseykha nahan chá'a apyempe'ék apkeláneya m'a énxet'ák apkeleñama nak mók nekha, Apteméssessegkek chá'a m'a megkapayhawo nak anteméssesek.

³⁰Élyaháha axta eykhe ko'o xama énxet nepyeseksa xa énxet'ák nak apmopwána enxoho emyók apchókxa tén han apkenegwe enxoho emonye' ko'o henókasha, yaqwayam enxoho mamassésseme', axta eyke ót'ak.

³¹Cháxa keñamak sekyenyénto nak ko'o séllegassáseykegkoho nepyeseksa xa énxet'ák nak tén han sekmasséssekmo yetlo seklómo ahagko', yaqwayam enxoho ayaqmagkásekxak ma'a apkeltémakxa. Ko'o sekxeyenma xa, sektáha nak Wesse'.’”