Read Lengua Sur Ezequiel 27 Bible Online

Ezequiel 27 - Lengua Sur bible

Ezequiel 27

¹Epaqhetchessek axta ko'o Wesse' egegkok. Aptáhak axta seyáneya s'e:

²“Xép, apteme nak énxet, enneykmés sa' se'e negmeneykmasso senlapwayam nak.

³Tiro sa' enneykmássesek, cham'a tegma apwányam apyetnama nak nenteyapmakxa m'a neyáwa wátsam ekwányam, apkelyánmagkásamákpexa nak chá'a m'a pók aptémakxa énxet'ák, apkelókxa ekxámokma agko' ekhéyak nak ma'a neyáwa wátsam ekwányam. Eltennés sa' aptáha appeywa Wesse' egegkok se'e: “Xép, tegma apwányam Tiro, apxéneykha nak chá'a apteme aphémo yántakpayhe ektaqmalma agko'.

⁴Weykmok néxa apkeláneykha m'a neysekso nak wátsam ekwányam, aptaqmelchessamók xép apkelane m'a ektáha nak apkelane.

⁵Apkelánessegkek ekyókxoho yántéseksa'ák apagkok ma'a yámet pino éleñama nak kélseykenta m'a egkexe Senir; keñe yámet ekwenaqte apagkok apkelánéssama m'a xama yámet cedro eñama nak ma'a Líbano;

⁶keñe yámet kélmeykha nak chá'a kólxegkesek apkelánéssama m'a yámet robles éleñama nak ma'a Basán; keñe axta apkelánéssama apwáxok ma'a yámet ciprés, éleñama axta kélseykenta m'a neyáwa yókxexma Chipre yetlo kélpáxaqteyáseyak chá'a ektáxama m'a aqsok ekmope élánamáxche nak yánnapóxeg apma'ák.

⁷Keñe axta apáwa apagkok kélpeykeseykekxa nak chá'a néten aptáha m'a apáwa apkeláxñe kéleykmassáseykha nak chá'a kélótma apkeñama nak ma'a Egipto, apáwa kélmakheyáseykha néten apagkok axta nahan apteméssessók ma'a; tén axta kélpakxenchesso nak chá'a aptáha m'a apáwa hómáyok tén han apyexwase, apkeleñama axta kélseykenta m'a nekha wátsam ekwányam Elisá.

⁸Sidón tén han Arvad énxet'ák axta nahan ma'a apkelxegkesso nak chá'a, énxet'ák ekha apkelya'áseyak aqsok axta nahan ma'a apkelpeyncháméyak nak chá'a.

⁹Axta nahan elánekxak chá'a aqsok apagkok ekmaso m'a énxet'ák apkeleñama axta m'a Guebal, nanók apmopwancha'a axta apkeltamheykha apkelánéyak ma'a yántéseksek. Apkelyánmagkásamákpek axta chá'a exchep apyókxoho m'a énxet'ák apkelchánte nak chá'a yántakpayhe apkelxega neygmen.

¹⁰Kempakhakma yapmeyk axta nahan aptemessáseykegkok xép ma'a énxet'ák apkeleñama nak Persia, Lidia tén han ma'a Libia; apwakhassegkek axta apyempehek ma'a apkeláhakkásamap nak tén han ma'a apkelatchesso apqatkok nak, tén axta ektaxnéssamo.

¹¹“Énxet'ák Arvad axta apchaqneykha m'a nekhaw'ék nak meteymog kélhaxta nepyáwa, yetlo m'a sẽlpextétamo apagkok, keñe axta énxet'ák Gamad apheykencha'a m'a tegma apkelwenaqte apagkok nak. Apkelmakheyáseykha axta apkeláhakkásamap ma'a ekyókxoho ekwegqakxa nak nekhaw'ék ma'a meteymog kélhaxta nepyáwa, apkeltémok axta etaqmelhok apagko' kóllano'.

¹²Xámok agko' axta m'a aqsok apagkok, Apkelyánmagkásamákpek axta chá'a m'a énxet'ák Tarsis, egkések axta chá'a ekyaqmageykekxa aqsok apkexeykekxa m'a sawo ekmope ekmomnáwa, tén han ma'a sawo ekyentaxno, tén han ma'a sawo ekpexpope ekmanyehél'a kapayhekxa' tén han ma'a yáma énmaga aktek ekmomhápal'a.

¹³Axta nahan apkelyánmagkásamákpok chá'a exchep ma'a énxet'ák apkeleñama nak Grecia, Tubal tén han ma'a Mésec, eltennaksek axta chá'a eyánmagkasek ma'a énxet'ák kélásenneykha naqsa nak chá'a, tén han ma'a aqsok étkók éltaqmalma élmomnáwa sawo ekyexwase.

¹⁴Keñe axta m'a énxet'ák apkeleñama nak Bet-togarmá eyánmagkasek axta chá'a m'a yátnáxeg kéltemessáseykencha'awól'a tén han ma'a kélchántamól'a, tén han ma'a élyéheykok.

¹⁵Elyánmagkasakpok axta nahan chá'a exchep ma'a énxet'ák apkeleñama nak Rodas. Apkelyánmagkásamákpek axta chá'a exchep ekxámokma agko' ma'a apkelókxa egkexe étkók ekhéyak nak ma'a neyseksa wátsam ekwányam, apyánmagkassegkek axta chá'a aqsok apkelma m'a aqsok ekmope éláxñeyo élánamáxchel'a yánnapóxeg apma'ák tén han ma'a yámet ébano.

¹⁶Apkelyánmagkásamákpek axta chá'a exchep ma'a énxet'ák Edom, eñama ekxámokma m'a aqsok apkexeykekxa: elsantagkasek axta chá'a ekyaqmageykekxa apyánmagkasso aqsok apkexeykekxa m'a meteymog élyexwase agko' la'a, tén han ma'a apáwa kélyexwásesso nak hómáyok, tén han ma'a kélótma nak, tén han ma'a apáwa apkeláxñel'a, tén han ma'a aqsok élyexwase agko' la'a ektáxama éltaqmalma, tén han ma'a meteymog yáma élyexwase élyenmal'a.

¹⁷Axta nahan apkelyánmagkasamákpok chá'a exchep ma'a énxet'ák Judá tén han ma'a Israel: eyánmagkasek axta chá'a aqsok apkelma ekyaqmageykekxa m'a hótáhap apaktek apkeñama nak ma'a yókxexma Minit yetlo m'a aqsok nentamakxa nak chá'a, tén han ma'a yányawhéna' apyegmenek, tén han ma'a pexmok égmenek tén han ma'a pánaqte néltexnémaxche ekmátsa nak ekpaqneyam.

¹⁸Damasco énxet'ák axta eyke elmok chá'a ekxámokma agko' ma'a aqsok apkexeykekxa tén han ma'a aqsok apagkok ekyetnakxa nak; eyánmagkasek axta chá'a aqsok apkelma m'a anmen yámet égmenek eñama nak ma'a yókxexma Helbón, tén han ma'a nepkések apwa' apkeñama nak ma'a Sahar.

¹⁹Yókxexma Uzal axta kañék chá'a kélseykentegkesso m'a anmen yámet égmenek ekyaqmageykekxa m'a aqsok apkexeykekxa, tén han ma'a sawo ekyentaxno kélpenchesso nak kéllane, tén han ma'a yámet émpe'ék ekmátsal'a ekpaqneyam tén han ma'a yámpa'at ekmátsal'a ekpaqneyam.

²⁰Keñe axta énxet'ák Dedán apkelméssama chá'a exchep ma'a keltahanchesso, kélmeykhal'a chá'a kóltahanchesek ma'a yátnáxeg.

²¹Axta apkelmomakxa chá'a aqsok apkexeykekxa exchep ma'a énxet'ák Arabia tén han ma'a apyókxoho kelwesse'e nak ma'a yókxexma Quedar: eyánmagkasek axta chá'a aqsok apkelma m'a nepkések apketkók tén han ma'a nepkések apkellennay'a nak tén han ma'a yát'ay apketkók nak.

²²Axta nahan aptegyágweyktamxa chá'a aqsok apkexeykekxa exchep ma'a énxet'ák ekha axta nahan aqsok apkexeykekxa m'a yókxexma Sabá tén han ma'a Raamá, eyánmagkasek axta chá'a aqsok apkelma m'a sokmátsa élmátsa agko' nak élpaqneyam, yetlo m'a meteymog éltaqmalma nak tén han ma'a sawo ekyátekto élmomnáwa nak.

²³Axta nahan elyánmagkasakpok chá'a exchep ma'a énxet'ák apheykha nak Harán, Cané, Edén, tén han ma'a énxet'ák ekha axta nahan aqsok apkexeykekxa m'a yókxexma Sabá, tén han ma'a Asiria tén han ma'a ekyókxoho nak kañe' Media;

²⁴elmések axta chá'a m'a apáwa apkelexyawáyol'a, tén han ma'a kélaqlamaxche hómáyok la'a aptáxama, tén han ma'a kélótmal'a apkeltaqmalma, tén han kélyepetcháseykhal'a pók nápakha'a apketkók mók ektémakxa chá'a aptáxama tén han ma'a táma' élyennaqtél'a kélpexyeyncháméyak kéllane.

²⁵Katekxeyenták axta chá'a mók kalchexyók yántakpayhe éleñama nak Tarsis kalsantagkasek ma'a aqsok. “Máxa axta yántakpayhe aptemék apyetnama m'a neyseksa wátsam ekwányam, ekláneyól'a aqsok ekxámokma m'a kañe'.

²⁶Apya'assegkek axta exchep éttawañexa agko' nak neygmen ma'a ektáha axta chá'a apxegkesso, kelekkexweykmek axta eyke éxchahayam, eñama nak teyapmakxa ekhem ma'a neysekso nak wátsam ekwányam.

²⁷Kaxnagwók sa' eyke kañók agko' wátsam ekwányam awáxok apweywegko sa' xép ma'a aqsok apagkok ekxámokma nak, tén han ma'a aqsok apkexeykekxa nak chá'a, tén han ma'a aqsok apagkok apkelane apagko' nak chá'a, tén han ma'a énxet'ák apagkok apkelxega nak chá'a neygmen, tén han ma'a apkelpeyncháméyak nak chá'a, tén han ma'a apkeláneykekxa nak chá'a, tén han ma'a énxet'ák apagkok ekha nak chá'a aqsok apkexeykekxa, tén han ma'a kempakhakma yapmeyk apagkok nak, tén han ma'a apyókxoho apkeltamheykha nak chá'a m'a kañe'.

²⁸Kalpexyennegkesek sa' énxet'ák apheykha nak chá'a neyáwa wátsam ekwányam élpayheykha apatña'ák ma'a énxet'ák apagkok apkelxega nak chá'a neygmen.

²⁹Elántépok sa' kañe' yántakpayhe apagkok ma'a apxegkesso nak chá'a; keñe sa' ma'a énxet'ák apkelxega nak chá'a neygmen tén han ma'a apkelpeyncháméyak nak chá'a, elnextog sa' néten xóp.

³⁰Kalpayheykha sa' apatña'ák, ellekxagwaha apagko' sa' elanok xeyep. Elexpaqheykha sa' yagkamex ma'a apqatkok, elpexyawha sa' néten táhap.

³¹Elmopaksohok sa' apkelyese eñama exchep, elántaxnekxak sa' ma'a apáwa nentaxneykekxohol'a eñama apketsapma egmók, ellekxagwaha sa' nahan yetlo ekyawe agko' élmayóseka apkelwáxok.

³²Elmeneykmássesek sa' nahan xama negmeneykmasso senlapwayam nak, Sa' etnehek apkelmeneykmasso yetlo élyentaxnamo agko' apkelwáxok se'e: ¿Yaqsa axta egwanchek aghéshok ma'a Tiro, cham'a tegma apwányam apyetnama axta m'a neyseksa wátsam ekwányam?

³³Kelwákxeyk axta agkok chá'a aqsok apkexeykekxa éleñama m'a neyseksa wátsam ekwányam nak, kalpayhekxak axta chá'a apkelwáxok apxámokma apagko' ma'a pók aptémakxa nak chá'a énxet'ák. Ekxámokma aqsok apagkok axta keñamak apxámassáseykegko aqsok apagkok ma'a kelwesse'e apkelwányam nak keso náxop.

³⁴Keñe kaxwo' apkelekkexákpo m'a neyseksa wátsam ekwányam nak, apweywegkek ma'a kañók agko' nak yegmen. Apyetlókok xép apyetnakmo kañók agko' yegmen ma'a aqsok apagkok tén han ma'a apyókxoho énxet'ák apagkok apkeltamheykha nak chá'a m'a kañe'.

³⁵Apkelyegwakkek apkelwet'a exchep ma'a apyókxoho énxet'ák apheykha nak ma'a egkexe étkók neyseksa wátsam ekwányam; apkelpexyennegkek apkelaye m'a apkelwesse'e apkelwányam apagkok, negyekpelchawók nápaqta'a apkelyegwaya.

³⁶Apkelyegwakkek nahan apkelwet'a m'a énxet'ák ekha nak han aqsok apkexeykekxa m'a mók apkelókxa. Aqsok ekmaso kéltemessásekxa'; meyke apteyapwayam kéltemessásak.’”