Read Lengua Sur Ezequiel 28 Bible Online

Ezequiel 28 - Lengua Sur bible

Ezequiel 28

¹Epaqhetchessek axta ko'o Wesse' egegkok. Aptáhak axta seyáneya s'e:

²“Xép énxet, etne sa' yának wesse' apwányam Tiro s'e: “Keso aptáhakxa exchek appeywa Wesse' egegkok se'e: Awanhók agko' xép eyeymáxkoho apwáxok, apkenagkamchek xép etneyk xama aqsok kéláyókxa ekha ekmowána aphama chá'a m'a néten taháno ekyawe ektaqmalma ekheykegkaxa nak ma'a aqsok kéláyókxa, tén han ekwakhaya m'a wátsam ekwányam. Háwe exchep xama aqsok kéláyókxa ekha nak ekmowána, énxet xeyep apkenagkama chá'a kaxnémók apya'áseyak aqsok ma'a xama aqsok kéláyókxa.

³¿Yeykhágweykmók enxeykel'a exchep apya'áséyak aqsok ma'a Danel? ¿Apya'ásegkóya ekyókxoho m'a aqsok ekyexamaxche nak?

⁴Apya'áséyak keñamak xép apweteya ekxámokma m'a aqsok apagkok tén han apmopwána apkelane aqsok, aplánessegkek apxátamakxa nak aqsok élmomnáwa apagkok ma'a sawo ekyátekto élmomnáwa tén han ma'a sawo ekmope élmomnáwa nak.

⁵Apmopwána ekyawe nélyánmagkásamaxche keñamak apxámáseykegkoho apagko' ma'a aqsok apagkok, apcheymákpoho teméssessók ma'a aqsok apagkok ekxámokma nak.

⁶‘Cháxa keñamak aptáha nak appeywa Wesse' egegkok se'e: Apxeyenmeyk chá'a exchep ekhémo apya'áseyak aqsok ma'a xama aqsok kéláyókxa,

⁷wának sa' ko'o ey'áwak xép ma'a énxet'ák apkeleñama nak mók nekha, cham'a énxet'ák, élyeykhágweykmoho agko' nak megkamayósa elanok aqsok, elhaxyawasagkok sa' sókwenaqte apagkok ektámegmak xeyep, apteme nak aptaqmalma, tén han apya'áseyak ekyawe, etwássesha sa' ma'a ektémakxa nak apcheymákpoho.

⁸Eyenyenták sa' kañe' máxek ekmattawóneg agko', étak sa' ekmaso agko' apketsapma m'a neyseksa wátsam ekwányam nak.

⁹¿Melwátéssemeya sa' apkeltemessásamap aphémo xama aqsok kéláyókxa ekha nak ekmowána, apkenmeyncha'a sa' apmonye'e m'a apmáheyo nak yaqhek? ¡Énxet apagko' sa' etnehek ma'a yaqwayam nak yaqhek, cham'a apma nak xép!

¹⁰Yaqhek sa' xép ma'a énxet'ák apkeleñama nak mók nekha'. Sa' etnehek yetsapok ma'a ektémól'a eletsapok ma'a énxet'ák melya'áseyak nak Dios. Ekpaqmetchek ko'o sektáha nak Wesse'; ekméssek ko'o sekpeywa.’”

¹¹Epaqhetchessek axta ko'o Wesse' egegkok. Aptáhak axta seyáneya s'e:

¹²“Xép énxet, enneykmásses sa' xama negmeneykmasso senlapwayam ma'a wesse' apwányam Tiro, etne sa' yának se'e: “Keso aptáhakxa exchek appeywa Wesse' egegkok se'e: Xeyep axta apteme ektaqmalma agko' aptémakxa, ekyawe apya'áseyak tén han aptaqmalma kóllano'.

¹³Aphegkek axta m'a Edén, Dios yókxexma éltaqmalma apagkok nak, kélnáxegkáseykha axta m'a mók ektémakxa nak chá'a meteymog éltaqmalma: cham'a meteymog ekyexwasél'a, tén han ma'a yáma ekyátekto ekyepetchél'a yáma hó pa'at, tén han ma'a ekyennaqtél'a hó pa'at, tén han ma'a ekyátektól'a, tén han ma'a ekmopél'a élyenma, tén han ma'a éltaqmalmal'a ektáxama élmakteykha, tén han ma'a ekyápaqmatél'a, tén han ma'a ekyexwase agko' la'a, tén han ma'a hó pa'at la'a; sawo ekyátekto élmomnáwa axta m'a aqsok étkók éltaqmalma apagkok tén han ma'a apkelchenméhe nak, kéllánesso axta m'a sekxók axta apkelánamákpo.

¹⁴Ekméssegkek axta yaqwayam etaqmelchesek ma'a xama apho nak énxet ekha apxempenák, aphama axta chá'a m'a néten egkexe ekpagkanamaxchexa apagkok nak ma'a Dios, apweynchámeykencha'a axta chá'a m'a nepyeseksa yaw'a.

¹⁵Tásek axta exchep aptémakxa m'a sekxók axta apkelánamákpo, ekwokmoho ekwetamaxko apkelane m'a aqsok ekmaso.

¹⁶Ekxámokma aqsok apkexeykekxa axta keñamak ekyánchessesseykmoho m'a apyennaqteyáseykha apyempehek tén han mey'assáxma. Tén axta sektekkesa m'a sekhakxa nak; ektekkessek axta m'a néten egkexe ahagkok ko'o sektáha nak Dios, aptekkessek axta nahan apho nak énxet ekha apxempenák ektáha axta chá'a aptaqmelchesso m'a nepyeseksa nak yaw'a.

¹⁷Eyeymáxkoho ekwányam apwáxok axta teméssessók ma'a aptaqmalma; apcheymákpoho axta keñamak ektawassáseykencha'a m'a apya'ásegwayam ektaqmela axta. Ekyenyenteyk axta ko'o exchep náxop, ekteméssessek axta aqsok ésmésamaxkohol'a kóllano' nápaqta'awók ma'a kelwesse'e apkelwányam.

¹⁸Xámok agko' axta apkelane mey'assáxma, aptawásamákpók apagko' axta eñama m'a aqsok apkexeykekxa, weykmók axta apnaqtawáseykha m'a tegma appagkanamap apagkok. Tén axta ko'o séltamho katyapok táxa nepyeseksa exchep yaqwayam enxoho kawatnek. Apyókxoho énxet kaxwók apwanchek xép elwetak aptamheykekxa táhap ma'a néten xapop.

¹⁹Apkelyegwakkek chá'a apkelwet'a exchep ma'a apyókxoho pók aptémakxa nak chá'a énxet'ák, ektáha axta chá'a apweteykxa. Aqsok ekmaso agko' xép aptamhákxa'; ¡apmassegwokmók apagko' kaxwók xép!’”

²⁰Epaqhetchessek axta ko'o Wesse' egegkok. Aptáhak axta seyáneya s'e:

²¹“Xép énxet, yenmexekxoho sa' tegma apwányam Sidón, eltennés sa' sektáhakxa ko'o sekxeyenma m'a.

²²Etne sa' yának se'e: “Keso aptáhakxa exchek appeywa Wesse' egegkok se'e: Sidón, ekxénchek ko'o exche' sektáha sénmexma; wának sa' ko'o kólteméssesek eyeymáxkoho sekwesey neyseksa exche'. Ekteméssessek sa' agkok ma'a sekmakókxa nak atnéssesek, sekxekmósa sa' sekteme sekpagkanamaxche', kólya'ásegwók sa' ko'o sektáha Wesse'.

²³“Wáphaksek sa' ko'o negmasse neyseksa exche', kasawhekxohok sa' éma m'a ekyókxoho ámay agkok; eletsapok sa' énxet'ák agkok apheykha nak ma'a kañe', eñama kélyetxaqxo chá'a sókwenaqte ekyókxoho m'a kañe' nak. Keñe sa' hélya'ásegwók ko'o sektáha Wesse'.

²⁴“Kamaskok sa' ellegagkohok énxet'ák Israel apkelwanyeykha m'a apheykha nak nepyáwa, cham'a ekho nak am'ák élmahamtakcha'a ekmáskel'a hegaqhek. Keñe sa' kólya'ásegwók, sektáha ko'o Wesse'.’

²⁵“Ektáhak ko'o sekpeywa s'e, sektáha nak Wesse': Wánchásekxak sa' ko'o énxet'ák Israel, anaqlósawakxak ma'a apheykegkaxa nak chá'a apkexpaqneykha nepyeseksa m'a pók aptémakxa énxet'ák, axekmósek sa' nahan sekteme sekpagkanamaxche nápaqta'awók ma'a pók aptémakxa nak chá'a énxet'ák. Elának sa' apchókxa apagkok apagko' ma'a énxet'ák Israel, cham'a apchókxa sekmésso axta m'a Jacob, apteme axta séláneykha.

²⁶Méko sa' katnehek apheykha m'a, tásek sa' katnehek, elanagkok sa' ma'a tegma, eknagkok sa' nahan ma'a anmen yámet. Atnéssesek sa' eyke ko'o sekmakókxa nak atnéssesek allegássesagkohok apyókxoho m'a apheykha nak nepyáwa, cham'a apkelwañeykha nak chá'a m'a énxet'ák Israel. Keñe sa' kólya'ásegwók ko'o sektáha Wesse', Israel Dios apagkok.”