Read Lengua Sur Ezequiel 31 Bible Online

Ezequiel 31 - Lengua Sur bible

Ezequiel 31

¹Epaqhetchessek axta ko'o Wesse' egegkok eyeynókxa axta ekxega émha amonye' ekhem, aptáhakxa axta apqántánxo pelten ma'a once apyeyam. Aptáhak axta seyáneya s'e:

²“Etne sa' yának faraón se'e, wesse' apwányam nak Egipto tén han ma'a apyókxoho énxet'ák apagkok nak: “¿Yaqsa egwanchek aghéshok ektémakxa nak apteme apwányam apagko' xép’?

³Aphawók xép ma'a yámet ciprés essenhan ma'a yámet cedro émha nak yókxexma Líbano, éltaqmalmal'a áwa', ekyentaxnól'a pessesse agkok katnamok ma'a naxma, élwenaqte agko' la'a, élweykekxohol'a naw'ék ma'a yaphope.

⁴Wánegkessegkek ma'a ekmámeye tén han ma'a yegmen ekyetno nak náxop; wakhayak wátsam ma'a neyáwa ekpayhókxa nak kélcheneykekxexa; kelyásseseykegkek nahan chá'a yegmen ényé agkok ma'a ekyókxoho yenta'a nak yókxexma.

⁵Tásek nahan ekteme ekwányam neyseksa m'a mók yenta'a nak naxma, hakte awanhek yegmen ma'a émhakxa; xámeykegkek nahan ma'a aktegák kelpayhegweykmók agko'.

⁶Keláneykegkek axanák mók ektémakxa nak chá'a náta m'a aktegák nak; palcháseykegkek nahan étkók mók ektémakxa nak chá'a aqsok nawha'ák ma'a kóneg nak. Apwanchek nahan exnakha apxámokma apagko' pók aptémakxa nak chá'a énxet ma'a kóneg pessesse agkok nak.

⁷Yámet ektaqmalma émha axta m'a, ekyawe, ahóxekcha'awók agko' axta m'a aktegák, hakte kelántaxnegweykmek axta kepmenák ma'a ekyetnamakxa nak yegmen ekyawe.

⁸Méko axta xama enxoho yámet ekyawe egwanchek aghésho', élámha axta m'a Dios yókxexma ektaqmalma apagkok nak; Méko axta nahan xama enxoho pino yámet ekhémo aktegák ma'a ekwánxa nak aktegák, méko axta nahan xama enxoho yámet castaño ekxámokma nak áwa' ekhémo m'a ekweykenxa nak ekxámokma áwa', méko axta nahan xama enxoho ekhémo ektaqmalma m'a yámet élámha nak Dios yókxexma ektaqmalma apagkok.

⁹Ko'o sekteméssesso ektaqmalma m'a tén han ekxámokma agko' ma'a áwa'; yásekkessegkek nahan ma'a nekha yámet élámha nak Edén, cham'a Dios yókxexma ektaqmalma apagkok nak.

¹⁰“Keso aptáhakxa nak appeywa Wesse' egegkok se'e: Ekwenaqte agko' táhak ma'a yámet, keltekxekwokmek naw'ék ma'a yaphope nak; wánegyek agko', eyeymáxkoho nahan táhak.

¹¹Cháxa keñamak sekyetnakhasa nak ko'o xa; wohok sa' ko'o emok ma'a xama wesse' apkeñama nak mók nekha, yaqwayam sa' etnéssesek, ekhawo m'a ektémakxa nak chá'a élane m'a ektémakxa ekmaso.

¹²Eyaqtennek sa' ma'a énxet'ák megkalmayósa agko' nak elanok ma'a aqsok, apkeleñama nak mók nekha, eyenyók sa' aqsa nahan ma'a; kapallegmak sa' élekkexamaxche aktegák ma'a ekyókxoho néten meteymog élekhahéyak nak, tén han ma'a élyapwátegweykenxa nak chá'a xapop tén han ma'a élyapwáteyak nak chá'a m'a apkelókxa, keñe sa' yenyahagkok apyókxoho m'a énxet'ák apheykha nak chá'a kóneg pessesse agkok, eyenyók sa' aqsa.

¹³Kalyáqwak sa' mók ektémakxa nak chá'a náta m'a néten nak yámet ekyaqnenma, keñe sa' kaxnagwak chá'a néten élekkexamaxche aktegák ma'a mók ektémakxa nak chá'a aqsok nawha'ák élmeymentakcha'a.

¹⁴Megkawegqagkek agko' sa' chá'a kaxwók xama yámet enxoho, megkeyxek sa' chá'a émha m'a neyáwa yegmen, megkaltekxekwomók sa' chá'a kaxwók naw'ék ma'a yaphope, megkeyxek sa' ektaqmalma kélyássáseyak, megkawegqagkek agko' sa' nahan chá'a kaxwo'. Kelxénamaxcheyk kaletsapok ekyókxoho xa, kalweywagkok se'e kóneg xapop kañók agko' nak nélwanmégkaxa tén han kapáxaqwók ma'a aphagwayam nak ma'a kañe' takhaxpop.

¹⁵“Ektáhak ko'o sekpeywa s'e, sektáha nak Wesse': Teyekmek sa' agkok yámet ekyawe nak ma'a kañe' apkelmaheykegkaxa nak chá'a apkeletsapma, wának sa' ko'o keymek élapwayam ma'a wátsam ekwányam ekmattawóneg nak; amagkok sa' yegmen ma'a wátsam tén han ma'a élpexyaweykentamxa nak chá'a yegmen ényé; wának sa' ko'o kalapwagkashok agko' yókxexma Líbano xa yámet nak, keñe sa' kalyameygkok ma'a ekyókxoho yenta'a nak yókxexma.

¹⁶Ekyeñenteyk sa' agkok ko'o kañe' apkelmaheykegkaxa nak chá'a apkeletsapma m'a, yaqwayam enxoho kapáxaqwók ma'a apkeletsapma nak chá'a, kalpexyennegkesek sa' ekyókxoho apheykegkaxa nak chá'a pók aptémakxa énxet'ák ma'a éxtegyawasso ekyennaqte nak ektéyam. Keñe sa' se'e kóneg xapop nélwanmégkaxa nak, kaltaqmelchessásekxak sa' awáxok ma'a yenta'a éleñama nak Edén, cham'a yenta'a éltaqmalma agko' nak, ektaqmalma nak éktegkesso yegmen ma'a Líbano.

¹⁷Kalántexek sa' eyke nahan apkelmaheykegkaxa nak chá'a apkeletsapma xa, kapáxaqwók ma'a apkeletsapma axta neyseksa kempakhakma, ekhawo nak xa yámet nak. Keñe sa' ma'a apheykha axta chá'a kóneg pessesse agkok, yexpaqnek sa', elmahagkok sa' chá'a nepyeseksa m'a pók aptémakxa nak chá'a énxet'ák.

¹⁸Méko axta xama yámet enxoho Edén egwanchek aghéshok ma'a, eyeymáxkoho tén han ekwenaqte; kapallamhok sa' eyke xamók ekpallakmo sa' kañók agko' xapop ma'a nekha yámet nak Edén, yaqwayam sa' kalhók nepyeseksa m'a énxet'ák melya'áseyak nak Dios, tén han ma'a énxet'ák apkeletsapma axta neyseksa kempakhakma. “Faraón xa yámet nak tén han ma'a apyókxoho énxet'ák apagkok. Ko'o sekxeyenma xa, sektáha nak Wesse'.’”