Read Lengua Sur Ezequiel 34 Bible Online

Ezequiel 34 - Lengua Sur bible

Ezequiel 34

¹Epaqhetchessek axta ko'o Wesse' egegkok. Aptáhak axta seyáneya s'e:

²“Xép énxet, eltennés sa' sektáhakxa ko'o sélxeyenma m'a keláneykha nepkések nak Israel, etne sa' elának se'e: ‘Keso aptáhakxa exchek appeywa Wesse' egegkok se'e: ¡Keláneykha nepkések Israel laye, apkeltaqmelchásamákpekxoho apagko' nak chá'a! Nepkések akke payhawok eykhe eltaqmelchesek ma'a keláneykha nepkések.

³Kélyeneykegkek chá'a kéxegke m'a neme apyegmenek apagkok, kélláneykegkek nahan chá'a kélántaxno m'a apwa', kélnapmeyk nahan chá'a m'a nepkések apnaqmele apagko' nak, makke kólláneykha chá'a m'a nepkések kélnaqtósso.

⁴Megkólpasmók chá'a kéxegke m'a nepkések apkelyelqamákpoho nak, megkóltaqmelcháseykekxak chá'a m'a apkelháxamap nak, megkólpextehetcháseykegkok nahan chá'a m'a ekhakxa nak chá'a énté apyók, megkólnaqlósaweykekxak chá'a m'a apkelyetnakhágwayam nak chá'a, megkólchetamsók chá'a m'a apkelxegányam nak chá'a, kélnápeykha aqsa chá'a yetlo meyke apkelmopyósa kéllányo.

⁵Meyke éláneykha aptáhak ma'a nepkések ahagkok keñe apkexpaqna, tókagkek ma'a aqsok nawha'ák éllo.

⁶Apkelmahágkek apkexpaqna m'a ekyókxoho neyseksa meteymog élekhahéyak nak tén han ma'a néten egkexe élwenaqte nak, apkelxeganakmek ekyókxoho keso náxop, méko nahan xama énxet enxoho ekyetnakhassamo apwáxok ma'a tén han apxega enxoho elchetmok.

⁷“Keláneykha nepkések, kóltaqmelchesho sa' kélháxenmo sekpeywa.

⁸Naqsók ko'o sektáha sekxéna s'e, sektáha nak Wesse' mamassegwayam: Kelmeñexchek nepkések seknaqtósso m'a ekyókxoho mók ektémakxa nak chá'a aqsok nawha'ák éllo, tókagkek nahan, hakte méko m'a éláneykha. Melxegák elchetmok nepkések ma'a keláneykha nepkések ahagkok. Apkeltaqmelchásamákpekxoho apancha'awók aqsa aptamheykegkok ma'a keláneykha nepkések nak, meláneykha m'a nepkések seknaqtósso.

⁹Keláneykha nepkések, kóleyxho sekpeywa

¹⁰sektáhakxa nak ko'o séláneya kéxegke, sektáha nak Wesse': Keláneykha nepkések, ekxénchek ko'o kéxegke kéltáha sélenmexma, anaqlósawakxak sa' ko'o m'a nepkések ahagkok; alwátessesagkok sa' kélteme kélláneykha, yaqwayam sa' megkóllenxamagkók kéltaqmelchásamáxchekxoho kélagkok kélagko'; alwagkasek sa' ko'o teyp ma'a nepkések ahagkok, yaqwayam sa' megkóllenxanmagkók chá'a kéltéyak kéxegke.’

¹¹“Ektáhak ko'o sekpeywa s'e, sektáha nak Wesse': Ko'o ahagko' sa' atnehek séláneykha m'a nepkések seknaqtósso.

¹²Sa' atnehek ko'o keytnakhaksohok ewáxok nepkések seknaqtósso m'a aptémól'a keláneykha nepkések keytnakhaksohok apwáxok yexpaqnek ma'a nepkések apnaqtósso; anaqlósawakxak sa' ma'a yókxexma apkelmaheykegkaxa axta apkexpánma ekwa'a axta ekhem ekmaso tén han éxchahayam ekyennaqte.

¹³Alántekkessekxak sa' ma'a apkelókxa nak pók énxet'ák, wánchásekxak sa', keñe sa' anaqlakxak ma'a ektáhakxa nak xapop apagkok apagko'. Anaqlakxak sa' wágwakxak aptéyak ma'a egkexe élekhahéyak nak ma'a Israel, tén han ma'a élyapwáteyak ényahamakxa nak chá'a yegmen tén han ma'a ekyókxoho yókxexma apheykegkaxa nak chá'a énxet'ák ma'a apkelókxa.

¹⁴Anaqlakxak sa' yaqwayam etawagkok ma'a pa'at ektaqmalma agko' nak, cham'a ekxámokmakxa nak pa'at éltaqmalma m'a egkexe élwenaqte nak ma'a Israel. Sa' ellókasagkok apkelyampe m'a tén han etawagkok ma'a pa'at ekmátsa agko' nak.

¹⁵Ko'o ahagko' sa' nahan atnehek séláneykha m'a nepkések seknaqtósso, ko'o ahagko' sa' nahan anaqlakxak allókassesagkok apkelyampe. Ko'o sekxeyenma xa, sektáha nak Wesse'.

¹⁶Alchetmok sa' ma'a nepkések apkelxegányam nak, anaqlanták sa' ma'a apkelyetnakhágwayam nak chá'a apkelxega, alpextehetchesagkok sa' nahan ma'a ekhakxa nak chá'a énté xama apyók, apasmok sa' nahan ma'a apkelyelqamákpoho nak, keñe sa' amasséssók chá'a m'a apnaqmele nak tén han ma'a apkelyennaqte nak. Alanha sa' chá'a ko'o m'a, yetlo sekteméssesso m'a ekpayhawo nak chá'a anteméssesek nenláneykha.

¹⁷“Ektáhak ko'o sekpeywa s'e, sektáha nak Wesse': Kóleyxho, nepkések seknaqtósso: Alyekpelkohok sa' chá'a ko'o nepyeseksa m'a nepkések apketkók xamo' nak tén han ma'a yát'ay apketkók xamo' nak.

¹⁸¿Yagkalleklámeykegkok kéltéyak ma'a pa'at éltaqmalma nak? ¿Peyk enxeykel'a kólteyammekxak ma'a éleymomáxche nak? Kélyeneykegkek chá'a m'a yegmen ektaqmalma ekyagqáxamo nak, keñe m'a nekha nak kélmópéssama chá'a kélteyammeykha.

¹⁹Etawagkok chá'a nepkések seknaqtósso m'a pa'at kélteyammeykha nak chá'a kéxegke. Énagkok chá'a m'a yegmen kélmópésso nak chá'a kéxegke.

²⁰Ekeso éñamakxa sektáha nak ko'o séláneya kéxegke s'e, sektáha nak Wesse': Alyekpelkohok sa' chá'a ko'o nepyeseksa m'a nepkések apnaqmele nak tén han ma'a apkelyamhagko nak.

²¹Kélyetnakhassegkek chá'a kéxegke kélyégeykha m'a apkelyelqamákpoho nak, kélchetámeykegkek chá'a kéltegweykmo, tén kélántekkessama chá'a.

²²Alwagkasek sa' eyke ko'o teyp ma'a nepkések seknaqtósso. Magwohok sa' kóllenxanmagkohok apkelmeñexamap. Alyekpelkohok sa' ko'o nepyeseksa m'a nepkések xamo' nak chá'a.

²³Wának sa' ko'o éxyamok makham ma'a séláneykha David, atnéssesek sa' ko'o wánxa xama keláneykha nepkések ma'a, sa' elánha m'a. Sa' etnehek apkeláneykha m'a.

²⁴Keñe sa' ko'o, sektáha nak Wesse', etnehek Dios apagkok, keñe sa' ma'a séláneykha David etnehek apkemha apmonye' apagkok. Ekxénchek ko'o xa, sektáha nak Wesse'.

²⁵Alának sa' ko'o ekhémo mók sélpaqhetchásamáxkoho m'a, yaqwayam sa' kataqmelek apkelweynchámeykha. Wának sa' kamassegwók aqsok nawha'ák éllo m'a apkelókxa, yaqwayam sa' kataqmelek apkelleykha nepkések seknaqtósso m'a yókxexma eyáxñe nak tén han kataqmelek apnaqteyenma m'a naxma.

²⁶“Alyáqkasek sa' ko'o nepkések seknaqtósso m'a neyáwa' egkexe ekpagkanamaxchexa ahagkok nak, ataqmelchessesek sa' apkelleykha; wáphássesek sa' ekmámeye ekweyktámhol'a chá'a kammok ekhem agkok ma'a ekmámeyeykxa.

²⁷Keyxek sa' ma'a yenta'a élaqnéyak nak yókxexma, katekkesek sa' aqsok ekyexna eknakxamáxche m'a xapop, tásek sa' katnehek apkelweynchámeykha xapop apagkok apagko' nak ma'a. Élyementamákxeyk sa' agkok ko'o énxet'ák ahagkok ma'a ektáha nak chá'a apkelásenneykha naqsa, elya'ásegwók sa' ko'o sektáha Wesse'.

²⁸Kamaskok sa' kaxwók etnehek apagkok ma'a énxet'ák apkeleñama nak mók apkelókxa, megkatwekxók sa' nahan chá'a kaxwók ma'a aqsok nawha'ák éllo nak. Tásek sa' katnehek apkelleykha, méko sa' kalyegwakkasha.

²⁹Agkések sa' ektaqmalma agko' ekteyapma m'a aqsok apkenéyak, kamaskok sa' ellegagkohok chá'a meyk élnapma m'a; kamaskok sa' nahan apkelasmésso chá'a m'a pók aptémakxa nak chá'a énxet'ák.

³⁰Keñe sa' elya'ásegwók sekha ko'o nepyeseksa m'a, ko'o sektáha nak Dios Wesse' apagkok, tén han aptáha énxet'ák ahagkok ma'a énxet'ák Israel. Ko'o sekxeyenma xa, sektáha nak Wesse'.

³¹Kéxegke kélteme nepkések seknaqtósso, nepkések apkelleykha nak yókxexma ahagkok ektaqmelakxa nak pa'at. Ko'o sekteme Dios kélagkok. Ko'o sekxeyenma xa, sektáha nak Wesse'.”