Read Lengua Sur Ezequiel 36 Bible Online

Ezequiel 36 - Lengua Sur bible

Ezequiel 36

¹Énxet, eltennés sa' sektáhakxa ko'o sekxeyenma m'a meteymog élekhahéyak nak Israel, yána sa' keyxhok ma'a sekpeywa.

²Ektáhak ko'o sekpeywa s'e sektáha nak Wesse': Apkeneykek kaxwók apagkok Israel apkelenmexma m'a meteymog élekhahéyak megkamassegwayam nak.

³Eltennés sa' sektáhakxa ko'o sélxeyenma m'a, etne sa' elának se'e: ‘Keso aptáhakxa exchek appeywa Wesse' egegkok se'e: Ekyókxoho yókxexma apketámeykmok kéxegke, apmassesseykmek nahan; apyókxoho énxet'ák apkeleñama nak mók apkelókxa aptemék apagkok kéxegke, keñe m'a énxet'ák apkelasméssama chá'a yetlo apkelwanyeykha.

⁴Meteymog élekhahéyak Israel, kóleyxho Wesse' egegkok appeywa apcháphássesso m'a meteymog élekhahéyak, tén han ma'a egkexe yámnáxap'awo nak, tén han ma'a wátsam nak tén han ma'a élyapwátegweykenxa nak chá'a xapop; tén han ma'a tegma aphopák appalleyam axta meyke nak énxet ma'a kañe', tén han ma'a tegma apkelyawe meyke nak xama aqsok ma'a kañe Israel, apkelmenyexchessama axta aqsok apagkok ma'a énxet'ák apheykha nak nepyáwa, tén han aptéma axta apkelasmeyáseykha chá'a.

⁵Keso aptáhakxa nak appeywa Wesse' egegkok se'e: Kalwok sa' ko'o sekpeywa alának ma'a pók énxet'ák nak, sa' ekyágwánxa agkok ma'a ekyókxoho nak kañe' Edom, hakte apmomchek axta xapop ahagkok yetlo ekyawe agko' élpayheykekxa apkelwáxok, yetlo apkelwañémo apagko' axta nahan apkelyementameykegkok ma'a yókxexma agkok nak.’

⁶“Eltennés sa' sektáhakxa sekpeywa exének ma'a xapop Israel. Etne sa' elának se'e: ‘Keso aptáhakxa nak apxéna Wesse' egegkok ma'a meteymog élekhahéyak nak, tén han ma'a egkexe yámnetna'awo nak, tén han ma'a wátsam nak, tén han ma'a élyapwátegweykenxa nak chá'a xapop: Ekpaqmetchek ko'o yetlo seklómo ahagko' eñama kéllegeykegkoho apkelxéneykha ekmaso kéxegke m'a pók aptémakxa nak chá'a énxet'ák apkeleñama mók apkelókxa.

⁷Ekeso éñamakxa sekteméssesa nak ko'o naqsók sektáha nak Wesse', peya elmegqáwhok apagko' ma'a énxet'ák apheykha nak kélnepyáwa'.

⁸Keñe sa' kéxegke, meteymog élekhahéyak nak Israel kasawhekxohok sa' yámet élyawe yetlo ekxámokma ekyexna yaqwayam sa' etawagkok ma'a énxet'ák ahagkok Israel, cham'a eyágketo nak makham yaqwayam elwata'.

⁹Alanha sa' ko'o m'a; wának sa' makham elcheygkok tén han eknagkok ma'a aqsok aktek.

¹⁰Wának sa' ko'o exámekxohok apagko' ma'a énxet'ák Israel apheykha nak ma'a. Elánhok sa' énxet apheykha m'a kañe' tegma apkelyawe nak, kólnaqxétekhasagkokxak sa' makham ma'a tegma aphopák appalleyam axta.

¹¹Wának sa' ko'o exámekxak kélnepyeseksa m'a énxet tén han ma'a aqsok kélnaqtósso, exámagkohok apagko' sa'. Exnágwakxohok sa' makham apxámokma énxet ma'a apweykenxa axta apxámokma m'a sekxók axta, keñe sa' kéxegke, tásek sa' katnehek kélheykha, megkaxók sa' ma'a ektémakxa axta m'a nentámen axta. Keñe sa' kólya'ásegwók ko'o sektáha Wesse'.

¹²Meteymog élekhahéyak Israel, wának sa' ko'o elweynchamha énxet'ák ahagkok ma'a neyseksa nak kéxegke, tén han elmagkok ma'a aqsok kélagkok nak yaqwayam etnehek apagkok, megkóltemessásekxók sa' nahan chá'a kaxwók kéxegke meyke apketchek ma'a.

¹³“Ektáhak ko'o sekpeywa s'e sektáha nak Wesse': Kéxegke meteymog élekhahéyak, kélxénamaxcheyk chá'a kéltéyak ma'a énxet tén han kélteméssesso chá'a meyke apketchek ma'a énxet'ák kélagkok.

¹⁴Megkóltewekxók sa' chá'a kaxwók kéxegke énxet, megkóltemessásekxók sa' nahan chá'a kaxwók meyke apketchek ma'a énxet'ák kélagkok. Ko'o sekxeyenma xa, sektáha nak Wesse'.

¹⁵Magwohok sa' chá'a kaxwók kóllegekxohok apkelxéneykha ekmaso m'a pók aptémakxa nak chá'a énxet'ák apkeleñama mók apkelókxa; kamaskok sa' kaxwók apkelenmexeyncha'a xa énxet'ák nak, hakte megkóltemessásekxók sa' chá'a kaxwók kéxegke meyke apketchek ma'a énxet'ák kélagkok. Ko'o sekxeyenma xa, sektáha nak Wesse'.’”

¹⁶Epaqhetchessek axta ko'o Wesse' egegkok. Aptáhak axta seyáneya s'e:

¹⁷“Apkenyetséssegkek axta eñama apkeltémakxa ekmaso israelitas ma'a apheykegkaxa axta kañe' xapop apagkok. Ekhéssamok axta ko'o ektémakxa apheykha m'a ektémól'a aqsok ekmanyása agko' la'a.

¹⁸Tén axta sekyenyento ko'o seklo nepyeseksa m'a, eñama apkelnapma apnámakkok ma'a apchókxa nak tén han ma'a ektémakxa nak aptawáseykha apkelpeykessamo m'a aqsok kéleykmássesso,

¹⁹éxpánchessegkek axta ko'o sélya'assama m'a mók apkelókxa tén han nepyeseksa nak ma'a pók aptémakxa énxet'ák, séllegassáseykegkoho eñama m'a apkeltémakxa ekmaso.

²⁰Aptawáseykha axta chá'a ko'o sekwesey ekpagkanamaxche ekyókxoho yókxexma apkelweykemxa axta chá'a m'a, hakte axta etnehek chá'a elxének énxet'ák se'e: ‘Wesse' egegkok énxet'ák apagkok xa, kélántekkessegkek eyke m'a apkelókxa nak.’

²¹Keñe axta ko'o eyaqhama ewáxok sekweteya kéltawáseykencha'a chá'a sekwesey ekpagkanamaxche, eñama énxet'ák Israel ma'a ekyókxoho apheykegkaxa nak chá'a pók aptémakxa énxet'ák, cham'a apkelweykemxa axta chá'a.

²²“Etne sa' elának énxet'ák Israel se'e: Keso aptáhakxa nak appeywa Wesse' egegkok se'e: Israelitas, háwe eñama kéxegke kéltémakxa aqsok sekmako nak ko'o alána', eyke m'a sekwesey ekpagkanamaxche, kéltawáseykencha'a nak chá'a kéxegke nepyeseksa m'a pók aptémakxa énxet'ák, kélmeheykegkaxa nak chá'a.

²³Axekmósek sa' ko'o sekwesey ektaqmalma eyeymáxkoho nápaqta'awók ma'a pók aptémakxa nak chá'a énxet'ák, cham'a kéltawáseykencha'a nak chá'a kéxegke nepyeseksa; élanak sa' agkok ko'o xa, elya'ásegwók sa' ko'o sektáha Wesse'. Ko'o sekxeyenma xa, sektáha nak Wesse'.

²⁴Alántekkesek sa' ko'o kéxegke xa ekyókxoho apkelókxa kélheykegkaxa nak chá'a nepyeseksa m'a pók aptémakxa énxet'ák; wánchásekxak sa', tén sa' wának kólmeyekxak makham ma'a xapop kélagkok axta.

²⁵Ayaqpássesagkok sa' ma'a yegmen ektaqmalma agko' nak, almópessásekxak sa' ma'a ekyókxoho élmanyása kélyempe'ék, almópessásekxak sa' ma'a élyepetche nak ekmanyása m'a aqsok kéleykmássesso kélagkok;

²⁶agkeyásekxak sa' ko'o kéxegke axnagkok kélwáxok tén han aphaxnagkok espíritu. Ayenyókasek sa' ko'o kéxegke xa élyennaqte kélwáxok ekho nak meteymog, agkeyásekxak sa' ma'a kélwáxok élmomhápa nak.

²⁷Apekkenchesek sa' ko'o kélwáxok kéxegke m'a espíritu ahagkok, tén sa' wának kóllának ma'a segánamakxa ahagkok nak tén han ma'a séltémókxa nak chá'a kóltéhek;

²⁸kólhakha sa' ma'a apkelókxa sekméssamakxa axta m'a kélyapmeyk nano', énxet'ák ahagkok sa' atnehek, keñe sa' ko'o héltéhek Dios kélagkok.

²⁹Almallahanchesek sa' ekyókxoho m'a élpeysegkessama nak chá'a kélyempe'ék. Wának sa' exámekxohok apagko' ma'a hótáhap apaktek, magwáphassásekxók sa' chá'a kaxwók ma'a meyk segaqhe.

³⁰Wának sa' nahan kaxámagkohok agko' ekyexna yenta'a élyawe tén han aqsok kélcheneykekxa m'a yókxexma, yaqwayam sa' megkólmegqayhek chá'a makham kéxegke nápaqta'awók pók aptémakxa énxet'ák, eñama meyk élnapma.

³¹Xénwákxók sa' agkok chá'a kélwáxok kéxegke m'a kéltémakxa ekmaso tén han ma'a ektémakxa nak chá'a aqsok ekmaso kélláneyak, kólmegqasaxkohok kélagkók sa' chá'a kéxegke eñama m'a kéltémakxa megkólya'assáxma tén han aqsok ekmaso kéllánéyak.

³²Ektáhak ko'o sekpeywa s'e sektáha nak Wesse': Israelitas, kólya'asagkoho sa' malana ko'o eñama kéxegke s'e; kólmegqè sa', nágkólya'asák aqsa kéltáhakxa eñama m'a kéltémakxa ekmaso.

³³“Ektáhak ko'o sekpeywa s'e, sektáha nak Wesse': Éyaxñáseykxeyk sa' agkok ko'o kéxegke ekyókxoho m'a kéltémakxa megkólya'assáxma nak, wának sa' kólhakha m'a tegma apkelyawe kélagkok nak, tén han kólnaqxétekhasagkokxak makham ma'a tegma aphopák appalleyam axta.

³⁴Kólchenekxak sa' makham aqsok aktek nápaqta'awók apyókxoho ektáha nak chá'a apkelyeykhágwayam ma'a xapop ektamheykekxa axta ekyamayéxma meyke xama aqsok.

³⁵Tén sa' etnehek chá'a elpaqmétek se'e: Keso xapop ektamheykekxa axta ekyamayéxma meyke xama aqsok se'e, keñe kaxwók ekhágweykxoho m'a yókxexma Edén; tegma apkelyennaqte nahan kaxwók aptamhágkok ma'a tegma apkelyawe kélnaqtawáseykha axta, tén han kélpalchesso axta tén han kéltemessáseykekxo axta aphopák, apháha nahan kaxwók énxet ma'a kañe'.

³⁶Keñe sa' ma'a énxet'ák apheykha nak kélnepyáwa apkeleymomap nak meletsapma, elya'ásegwók sa' ko'o sektáha nak Wesse', seknaqxétekhásegkokxo makham ma'a aqsok kélpalcheseyam axta tén han sénákxo makham ma'a aqsok kélmassésseyam axta. Ekxénchek ko'o xa sektáha nak Wesse', alának sa' nahan.

³⁷“Ektáhak ko'o sekpeywa s'e, sektáha nak Wesse': Alának sa' ko'o makham aqsok. Alanaksek sa' chá'a ko'o sélmaxneyakxa enxoho chá'a apkeltamhókxa alanaksek ma'a énxet'ák Israel; axámassásekxak sa' ma'a énxet'ák apagkok aptémól'a m'a nepkések.

³⁸Elánhok sa' apxámokma apagko' énxet ma'a tegma apkelyawe appalleykmo axta, exhok sa' ma'a aptémól'a nepkések kélnaqleykekxal'a ekyetnakxa kélessawássessamo m'a Jerusalén yaqwayam etekyók. Keñe sa' elya'ásegwók, sektáha ko'o Wesse'.’”