Read Lengua Sur Ezequiel 38 Bible Online

Ezequiel 38 - Lengua Sur bible

Ezequiel 38

¹Epaqhetchessek axta ko'o Wesse' egegkok. Aptáhak axta seyáneya s'e:

²“Xép énxet, epayhekxoho kaxwók ma'a ekpayho nak apkelókxa Magog, eltennés sa' yaqwánxa ko'o atnéssesek seklegassáseykegkoho m'a Gog, apkemha apmonye' ekyawe kéláyo nak ma'a yókxexma Mésec tén han ma'a Tubal.

³Etne sa' yának se'e: ‘Keso aptáhakxa exchek appeywa Wesse' egegkok se'e: Gog, ekxénchek ko'o exchep aptáha sénmexma, apkemha apmonye' ekyawe kéláyo nak ma'a yókxexma Mésec tén han Tubal.

⁴Apeynchágwakxak sa' ko'o exchep, watchessesek sa' apátog sawo ekhaxe, atekkesek sa' ko'o exchep yetlo apyókxoho yátnáxeg apagkok, tén han ma'a apheykha nak chá'a apkap'ák apkeltaqmalma nak apkelnaqta, cham'a sẽlpextétamo apxámokma apkelmeykha nak chá'a m'a sókwenaqte tén han ma'a mók ektémakxa nak chá'a apkeláhakkásamap.

⁵Elyetlók sa' nahan ma'a énxet'ák apkeleñama nak Persia, Etiopía tén han ma'a Libia, yetlo nahan apkeláhakkásamap apyókxoho xa tén han apkelatchesso apqatkok sawo.

⁶Tén sa' nahan ma'a apyókxoho sẽlpextétamo apkeleñama nak Gómer tén han ma'a Bet-togarmá, eyátépexa agko' nak ma'a nexcheyha, cham'a énxet'ák apxámokma appasmeykekxa nak xép.

⁷Elánekxa sa' aptáhakxa, elmekxa sa' apkelmeykha, xép, tén han ma'a apyókxoho sẽlpextétamo ektáha nak apkelxegexma'a; etnem sa' apmonye'e.

⁸Kalyeykhagkok sa' apyeyam, exkak xép yaqwayam etxek ma'a xama apchókxa ekyetnamakxa axta kempakhakma, kélxátekháseykekxeyk eyke makham ma'a; cham'a xama apchókxa apkexpánma axta énxet ekxámokma agko' ma'a apkelókxa apheykegkaxa nak chá'a pók aptémakxa énxet'ák tén han kélmassesseykmoho kélagkók axta, kéláncheseykekxeyk eyke makham ma'a egkexe élekhahéyak nak Israel. Apkelweykteyk makham apkelenyekto m'a ekyókxoho apkelókxa, tásek sa' nahan katnehek apheykha apyókxoho m'a.

⁹Máxa yaphope néten ekyentaxnól'a sa' etnehek xép emmok ma'a, yaqwayam yápok ma'a apchókxa, keñe sa' máxa éxchahayam ekyennaqtél'a etnehek énnaqtések apyempehek etxek yetlo apyókxoho sẽlpextétamo apagkok ma'a, tén han ma'a énxet'ák apxámokma nak.

¹⁰“Ektáhak ko'o sekpeywa s'e, sektáha nak Wesse': Cháxa ekhem nak, kaxének sa' apwáxok elának aqsok ekmaso.

¹¹Sa' etnehek appeywa s'e: Eynnaqtések sa' ko'o émpehek atxek ma'a xama apchókxa meyke nak éleyxcháseykha, apheykegkaxa nak ma'a énxet'ák ektaqmalma apheykha, meyke nak éltamheykha apkelwáxok, cham'a apyókxoho tegma apkelyawe meyke nak kélhaxta meteymog nepyáwa, tén han meyke nak atña'ák apagkok tén han ma'a kélyennaqteyáseykekxexa nak chá'a kólápekxa'.

¹²Alyementamagkok sa' ko'o m'a aqsok apagkok, almenyexchesagkok sa' nahan; aktamagkok sa' ko'o m'a tegma apkelyawe kélnaqxétekháseykegkokxa nak makham, apheykegkaxa nak ma'a énxet'ák kéláncháseykekxa axta makham neyseksa m'a ekyókxoho apheykegkaxa nak chá'a pók aptémakxa énxet'ák, ekha nak ma'a weyke apnaqtósso tén han ma'a mók aqsok apagkok apheykencha'a nak neyseksók keso nélwanmégkaxa.

¹³Sa' etnehek elmaxneyha énxet'ák apkeleñama nak yókxexma Sabá tén han Dedán, tén han énxet'ák ekha nak aqsok apkexeykekxa m'a Tarsis, tén han ma'a nápakha nak tegma apkelyawe: ¿Apxegakmeya yaqwayam emenyexek? ¿Apchánchesákxeya sẽlpextétamo apagkok yaqwayam énnaqtések apyempehek emenyexek tén han elmok ma'a sawo ekmope élmomnáwa nak tén han ma'a sawo ekyátekto élmomnáwa nak, tén han ma'a weyke nak tén han ma'a mók aqsok egagkok nak, tén elsakxak ekxámokma agko' ma'a aqsok?”

¹⁴“Eltennés sa' yaqwánxa ko'o atnéssesek ma'a Gog. Etne sa' yának se'e: ‘Keso aptáhakxa exchek appeywa Wesse' egegkok se'e: Taqmelákxeyk sa' agkok apheykha m'a énxet'ák ahagkok Israel, exegmak sa' xép

¹⁵yenyeyk ma'a xapop apagkok nak, eyátépexa agko' nak ma'a nexcheyha, yetlo apkelxegexma'a m'a sẽlpextétamo apkelyennaqte apxámokma nak tén han ma'a apkelchánte nak yátnáxeg,

¹⁶ektamagkok sa' ma'a énxet'ák ahagkok Israel. Gog, esawhekxohok sa' xép ma'a xapop, máxa sa' etnehek ma'a ektémól'a yaphope néten ekyentaxnól'a. Wának sa' ko'o ektámegmak xép xapop ahagkok se'e amonye' nak ektemegwánxa néxa ekhem, yaqwayam sa' hey'ásegwók ko'o m'a pók aptémakxa nak chá'a énxet'ák, eñama exchep, sekxekmósa sa' ektémakxa sektaqmalma nápaqta'awók ma'a.

¹⁷“Ektáhak ko'o sekpeywa s'e, sektáha nak Wesse': Xép axta sekxeyenma axta chá'a m'a nanók axta, sekxeyenma axta eñama m'a séláneykha apkellegasso nak sekpeywa m'a Israel; apkelxeyenmeyk axta chá'a sekxeyenma ko'o wának exegmak xép se'e ekhem nak, yaqwayam ektámegmak ma'a Israel.”

¹⁸“Ektáhak ko'o sekpeywa s'e, sektáha nak Wesse': Apyennaqtéssek sa' agkok apyempehek Gog etxek ma'a Israel, alwohok ahagkók sa' ko'o.

¹⁹Naqsók nahan ko'o sekxéna, seklawa sa' xa ekhem nak, katyapok xóp ekyawheykha ekyennaqte agko' ma'a Israel.

²⁰Kalpexyennók sa' nahaqtók ko'o m'a kelasma, náta, tén han ma'a aqsok nawha'ák éllo nak tén han ma'a élpexyaweykegkoho nak náxop kalxog, kawakxohok sa' nahan ma'a apyókxoho énxet'ák apheykha nak keso náxop. Kalyaqnenagkok sa' ma'a meteymog élekhahéyak nak, kapallegmak sa' nahan ma'a meteymog nak, kalyaqnenagkok sa' nahan náxop ma'a ekyókxoho meteymog kélhaxta nak nepyáwa tegma.

²¹Wának sa' ko'o káhapwak Gog ekyókxoho mók ektémakxa nak chá'a aqsok ekmaso, yaqwayam sa' kagkések ekyawe agko' apkeye. Añássesagkohok sa' negmasse ekmaso tén han ma'a nétsapma ekmaso nak. Wának sa' ko'o katyamok takhapxet ma'a mámeye ekyawe tén han yegmen élyennaqte, táxa tén han ma'a aqsok ánek ekyátekto eyáléwomól'a ekweykekxoho m'a sẽlpextétamo apagkok tén han ma'a énxet'ák apxámokma apkelxegexma'a nak, keñe sa' ma'a énxet'ák apagkok nak elnapakpekxak sa' aqsa chá'a pók yetlo apkelmeykha m'a sókwenaqte. Ko'o sekxeyenma sektáha nak Wesse'.

²³Keñe sa' axekmósek ko'o apxámokma apagko' énxet sekteme sekwányam tén han sektaqmalma. Altennasaxchek sa' nahan ko'o m'a, tén sa' elya'ásegwók sektáha ko'o Wesse'.