Read Lengua Sur Ezequiel 48 Bible Online

Ezequiel 48 - Lengua Sur bible

Ezequiel 48

¹“Keso apkelwesey nak chá'a pók aptémakxa énxet'ák Israel se'e: “Eyeynamo nak ma'a néxa xapop ekpayho nak nexcheyha, ekmahéyak nak ekxega eyeynamo m'a Mediterráneo, ekyeykhaya nak ma'a Hetlón, nentaxnamakxa nak ma'a tegma apwányam Hamat tén han ma'a Hasar-enán, ekpayho nak nepyeyam halep ma'a yókxexma Damasco tén han ma'a Hamat, exkak sa' chá'a xapop apagkok xama m'a ektáhakxa nak chá'a aphawóxama apagko' xama énxet, eyeynamo m'a néxa xapop ekpayho nak teyapmakxa ekhem ekweykekxoho m'a taxnegwánxa ekhem nak. Sa' katnehek éxpánchesamaxche s'e: Dan Aser Neftalí Manasés Efraín Rubén Judá.

⁸“Kaxek sa' nahan mók xapop yaqwayam kóltaqmelchesek, sa' kawakxohok nahan eyeynamo m'a teyapmakxa ekhem nak ekweykekxoho m'a taxnegwánxa ekhem nak. Doce kilómetros náxet mók sa' katnehek ma'a ekpayhakxa, keñe sa' ma'a ekwegqakxa nak, kaxhok ekwenaqte m'a ekwánxa nak élwenaqte m'a nekha xapop eyeynamo nak ma'a teyapmakxa ekhem ekweykekxoho m'a taxnegwánxa ekhem nak. Sa' étek tegma appagkanamap xa neyseksa nak.

⁹“Doce kilómetros náxet mók sa' nahan katnehek ekwegqakxa xapop kélpagkanchesso nak Wesse' egegkok neyseksa s'e xapop nak, keñe sa' diez ma'a ekpayhakxa.

¹⁰Keytek sa' nahan xama xapop wánxa kéltaqmelchessesso apkelmaxnéssesso nak Dios énxet'ák apagkok xa kañe' xapop nak; doce kilómetros náxet mók sa' katnehek ma'a nexcheyha nak ekweykekxoho m'a nepyeyam nak, keñe sa' cinco Kilómetros ma'a teyapmakxa ekhem nak ekweykekxoho m'a taxnegwánxa ekhem nak. Keñe sa' ma'a neyseksa nak étek Wesse' egegkok tegma appagkanamap apagkok.

¹¹Kóltaqmelchessesek sa' apkelmaxnéssesso nak énxet'ák ahagkok apkelpagkanchásamap nak chá'a ko'o, sektáha nak Wesse' xa xapop nak, Sadoc aptawán'ák neptámen nak, apkelxegkesso axta aqsa apkeltamheykha m'a sekhakxa nak tén han melyetleykekxa axta israelitas apkelyetnakhágweykmo axta apkelyetlo m'a ámay ahagkok, aptamheykegko axta m'a levitas.

¹²Ekeso éñamakxa peya nak kaxek xama xapop apagkok apkelmaxnéssesso énxet'ák ahagkok ma'a kañe' xapop nak séltaqmelchessesso ko'o, sektáha nak Wesse', ekpayho nak nekha xapop apagkok ma'a levitas, katnehek sa' nahan xapop ekpagkanamaxche agko' ma'a.

¹³Kaxek sa' nahan xapop apagkok levitas ma'a nekha xapop apagkok nak ma'a apkelmaxnéssesso énxet'ák ahagkok, doce kilómetros náxet mók sa' nahan katnehek ma'a ekwegqakxa tén cinco m'a ekpayhakxa nak. Doce kilómetros náxet mók sa' kammok ekwenaqte ekyókxoho m'a xapop sélpagkanchesso nak ko'o, sektáha nak Wesse' keñe sa' diez ma'a ekpayhakxa.

¹⁴Sa' katnehek xapop ektaqmalma agko' neyseksa ekyókxoho nak xapop xa. Megkólyenyekxék sa' nahan chá'a ekha ekyánmaga, megkólyaqmagkásekxeyk sa' nahan chá'a mók aqsok essenhan kólmeyásekxak chá'a m'a pók énxet enxoho, hakte ko'o sélpagkanchesso xa, sektáha nak Wesse'.

¹⁵“Keñe m'a xapop eyeymomáxche nak doce kilómetros náxet mók ma'a ekwenaqte tén ánet náxet mók ma'a ekpayhakxa', háwe ekpagkanamaxche. Sa' exnakha chá'a énxet'ák ma'a. Sa' keytek nahan pa'at ekpayhe ektaqmalma m'a, yaqwayam sa' katawagkok ma'a aqsok kélnaqtósso. Keñe sa' neyseksa étek ma'a tegma apwányam,

¹⁶dos mil doscientos cincuenta metros sa' nahan chá'a katnehek xama nekha m'a yaqwánxa nak étek.

¹⁷Keñe sa' pa'at ekpayhe ektaqmalma keytek ma'a nepyáwa nak tegma apwányam, ciento veinticinco metros sa' nahan katnehek chá'a ekpayhakxa xama m'a ekyókxoho cuatro nápakhaw'ék nak.

¹⁸Keñe sa' keymaxchek nahan xama xapop ma'a nepyáwa nak tegma apwányam, ekpayho nak xapop sélpagkanchesso ko'o, sektáha nak Wesse', ekwayam nak cinco kilómetros ekwenaqte m'a ekpayho nak teyapmakxa ekhem tén han mók ma'a taxnegwánxa ekhem nak. Aqsok sa' kólchenekxak xa xapop nak, keñe sa' ma'a ekyexna nak, kólteméssesek aptéyak ma'a énxet'ák apkeltamheykha nak chá'a m'a tegma apwányam.

¹⁹Eknagkok sa' chá'a aqsok apyókxoho apkeltamheykha nak chá'a tegma apwányam xa xapop nak, meyke apkeymomap apkeñamakxa enxoho chá'a nepyeseksa m'a israelitas, ektáhakxa enxoho chá'a aphawóxama apagko'.

²⁰Doce kilómetros náxet mók sa' katnehek chá'a xama nekha m'a ekyókxoho xapop séltaqmelchessesso nak ko'o, sektáha nak Wesse' tén han ma'a yaqwayam nak etnehek apagkok ma'a tegma apwányam.

²¹“Keñe sa' wesse' apkeláneykha nak chá'a apchókxa exkak ma'a eyeymomáxche nak ekpéwéyák ma'a xapop, ekyetnama nak neyseksa m'a Judá xapop apagkok tén han ma'a Benjamín; cham'a xapop ekyetnama nak chá'a xama nekha m'a xapop séltaqmelchessesso nak ko'o, sektáha nak Wesse' tén han ma'a tegma apwányam. Doce kilómetros náxet mók sa' nahan katnehek ekpayhakxa m'a, kasawhekxohok sa' nahan ma'a teyapmakxa ekhem nak ekweykekxoho m'a néxa xapop nak teyapmakxa ekhem, keñe sa' nahan ma'a taxnegwánxa ekhem nak ekweykekxoho m'a wátsam ekwányam nak. Keñe sa' ma'a neyseksa nak keytek ma'a xapop séltaqmelchessesso nak ko'o, sektáha nak Wesse', tén han ma'a tegma appagkanamap, tén han ma'a xapop apagkok nak ma'a levitas tén han ma'a tegma apwányam nak xapop apagkok.

²³“Meheykegkek axta nahan xapop apagkok pók aptémakxa nak énxet'ák Israel ma'a ekpayho nak nepyeyam. Xama énxet sa' chá'a exkak xama xapop ektáhakxa nak chá'a aphawóxama apagko', eyeynókxa nak ma'a néxa xapop nak teyapmakxa ekhem, ekweykekxoho m'a taxnegwánxa ekhem nak, sa' katnehek ekxega kélexpánchesso s'e: Benjamín Simeón Isacar Zabulón Gad.

²⁸“Sa' kañék ekxega néxa xapop apagkok Gad ma'a tegma apwányam Tamar, ekpayho nak nepyeyam ma'a Gad, kayeykhak sa' ma'a ekyetnamakxa nak yegmen ma'a Meribá-cadés tén han ma'a yegmen ényé nak Egipto, ekweykekxoho m'a wátsam ekwányam Mediterráneo.

²⁹“Cháxa xapop yaqwayam sa' elxewekxak chá'a kéltaqmelchessesso m'a pók aptémakxa nak chá'a énxet'ák Israel, cháxa yaqwánxa sa' katnehek kélmeyáseyak kéxegke xa. Ko'o séltémo sektáha nak Wesse'.

³⁰“Kólwakheyásekxak sa' meteymog kélhaxta nepyáwa m'a tegma apwányam, dos mil doscientos cincuenta metros sa' nahan chá'a katnehek xama nekha m'a cuatro nápakhaw'ék nak. Ántánxo atña'ák sa' nahan chá'a kaxnagkok xama nekha m'a kélhaxta nak, xama átog sa' chá'a keytek apwesey m'a pók aptémakxa nak chá'a énxet'ák ma'a Israel, sa' katnehek ekxega s'e: Atña'ák élpehewayam nak nexcheyha: Kaxnagkok sa' apkelwesey m'a Rubén, Judá tén han ma'a Leví; keñe sa' ma'a élpehewayam nak teyapmakxa ekhem: kaxnagkok sa' apkelwesey m'a José, Benjamín tén han ma'a Dan; keñe sa' ma'a élpehewayam nak nepyeyam: kaxnagkok sa' apkelwesey m'a Simeón, Isacar tén han ma'a Zabulón; keñe sa' ma'a élpehewayam nak taxnegwánxa ekhem: kaxnagkok sa' apkelwesey m'a Gad, Aser tén han ma'a Neftalí.

³⁵Nueve mil metros sa' kammok ekyókxoho ekwenaqte m'a meteymog kélhaxta nak nepyáwa tegma, keñe sa' katnehek kaxwók apwesey xa tegma apwányam nak: ‘Apheyk Wesse' egegkok se'e.”