Read Lengua Sur Ezequiel 7 Bible Online

Ezequiel 7 - Lengua Sur bible

Ezequiel 7

¹Epaqhetchessek axta ko'o Wesse' egegkok, aptáhak axta seyáneya s'e:

²“Ektáhak ko'o seyáneya apchókxa Israel se'e, ko'o sektáha nak Wesse': Wokmek kaxwók néxa, wokmek kaxwók néxa ekyókxoho keso náxop.

³Wokmek kaxwók néxa apwetamap xép, Israel. Ayenyenták sa' ko'o seklo nepyeseksa exchep; alyetsetchásekxak sa' ko'o exchep ma'a aptémakxa, añássesagkohok sa' nahan eñama apkelane m'a ekyókxoho aptémakxa ekmaso agko'.

⁴Megkapyósek sa' ko'o alano' xép; añássesagkohok sa' eñama aptémakxa, axnéssekxohok sa' mók ma'a ekwánxa nak apkelane aptémakxa ekmaso agko'. Keñe sa' kólya'ásegwók kéxegke sektáha ko'o Wesse'.

⁵“Ektáhak ko'o seyáneya s'e, sektáha nak Wesse': Elano, chágketwokmek kaxwo' néxa, katekxeyegmohok sa' mók kaxegmak ma'a nenlegeykegkoho nak; chágketwokmek néxa ekhem apagkok xép.

⁷Wokmek kaxwók yaqwánxa kólmasséssók, kéxegke kélheykha nak apkelókxa. Wokmek kaxwo'; chágketwa'ak kaxwók ma'a ekhem yaqwánxa sa' katyapok wánxa m'a magya'áseyak nak nentáhakxa. Kamassegwók sa' ekpayheykekxa egwáxok ma'a neyseksa nak meteymog élekhahéyak.

⁸Kaxwók sa' ko'o ayenyenták seklo takhapxet xép, ekwokmoho ekpayhegwokmo ewáxok, alyetsetchásekxak sa' ko'o exchep ma'a aptémakxa, añássesagkohok sa' eñama m'a ekyókxoho aptémakxa ekmaso agko'.

⁹Megkapyósek sa' ko'o alano' xép; añássesagkohok sa' eñama aptémakxa, axnéssekxohok sa' mók ma'a ekwánxa nak apkelane aptémakxa ekmaso agko'. Keñe sa' kólya'ásegwók kéxegke, ektáha ko'o seklegassáseykegkoho, ko'o sektáha nak Wesse'.

¹⁰“¡Keso ekhem se'e! ¡Wa'ak kaxwo'! ¡Xegakmek yaqwayam kólmasséssók! Sawhekxók ekmaso m'a ekyókxoho yókxexma, xámákxeyk agko' nahan ma'a megkeyxnegwayam nak nempeywa.

¹¹Tekkek kaxwo' ma'a negyenaqteyáseykha nak egyempehek, tekkessek nahan ma'a aqsok ekmaso. Megkalwagkasek sa' eyke teyp aqsok apagkok ekxámokma nak ma'a, tén han ma'a apkelpáxameykha ekyennaqte nak. Méko xama enxoho aptaqmelakxa xa.

¹²Wokmek kaxwo', xegakmek ekhem. Megkalpayhekxeyk sa' chá'a kaxwók apkelwáxok ma'a apkexakha nak chá'a aqsok, megkatnehek sa' nahan chá'a megkalyaqhápeykha apkelwáxok ma'a apkelma nak chá'a aqsok. Allegássesagkohok sa' ko'o yetlo seklo m'a énxet'ák apkeleymákpoho nak Israel.

¹³Métekxók sa' chá'a kaxwók mók aqsok apkexeykekxa neyseksa apha m'a énxet apkexeykekxa nak chá'a aqsok, mopwanchek sa' nahan emasséssók ma'a ektémakxa nak apkelma aqsok apkexeykekxa. Mopwanchek kawegqohok apheykha m'a élmasagcha'a nak apkeltémakxa.

¹⁴“Kapáwak sa' eykhe kélaqkahasso yaqwayam kampakhaxche'; elánekxak sa' aptamhágkaxa apyókxoho énxet, méko sa' eyke xama enxoho yaqwayam exog elnapakpok. Allegássesagkohok sa' ko'o yetlo seklómo ahagko' ma'a énxet'ák apxámokma nak Israel.

¹⁵Kempakhakma sa' ma'a yókxexma, keñe sa' ma'a kañe' nak negmasse tén han meyk. Eletsapok sa' neyseksa kempakhakma m'a énxet'ák apheykha nak yókxexma, keñe sa' ma'a apheykha nak kañe' tegma apwányam eletsapok meyk élnapma tén han negmasse ekmaso.

¹⁶Elyexánegwók sa' eykhe nahan nápakha m'a neyseksa nak meteymog élekhahéyak, aptémól'a m'a wáx'ay apyegwaktól'a, apyókxoho sa' eletsapok eñama apkeltémakxa melya'assáxma.

¹⁷Apyókxoho sa' kalyelqaxchek apaktegák, kalpexyennók sa' apyay'ák eñama apkelaye.

¹⁸Elántaxnekxak sa' ma'a apáwa sẽlwáxaqxamól'a magkenatchesso éllegágkoho apkelwáxok; kalpexyennók sa' ekyókxoho apyempe'ék, elxog sa' yetlo élyexwáseykekxa nápaqta'a apkelmegqakto, tén han élmópeyo agko' apkelyese.

¹⁹Ekxeygkok sa' sawo élmope élmomnáwa apagkok ma'a ámay awáxok; máxa aqsok apák kélchexakha sa' etnéssesek ekxeygkok ma'a sawo ekyátekto élmomnáwa apagkok. Yawanchek sa' eyke kalwagkasek teyp ekwa'a sa' ekhem Wesse' egegkok aplo xa sawo ekyátekto élmomnáwa apagkok nak tén han ma'a sawo ekmope élmomnáwa apagkok nak. Mopwancha'ak sa' emasseksek meyk élnapma. Mopwanchek sa' nahan elyaqkanmok, hakte sawo ekyátekto élmomnáwa keñamak ekteméssesso élmasagcha'a apkeltémakxa m'a.

²⁰Kelméssegkek apkeleymákpoho m'a aqsok étkók apagkok éltaqmalma élmomnáwa nak, cháxa apkeláneykegkokxo nak han aqsok kéleykmássesso apkeláyókxa élmasagcha'a agko' nak xa. Ekeso éñamakxa peya sa' ko'o atnessásekxak aqsok apák kélchexakha xa aqsok étkók éltaqmalma élmomnáwa apagkok nak.

²¹Wának sa' elxegmak énxet apkeleñama nak mók apkelókxa tén sa' elmenyexchesek, wának sa' elxegmak ma'a énxet'ák élmasagcha'a agko' nak apkeltémakxa tén sa' elyementók ma'a, aqsok élmanyása sa' wának etnéssesek.

²²Atyapok sa' ko'o s'e apkelókxa nak, wohok sa' aqsa kóltawasha m'a tegma appagkanamap ahagkok, apteme nak seyásekhayo ko'o. Elxegmak sa' ma'a énxet'ák élmasagcha'a agko' nak apkeltémakxa tén sa' etwasha.

²³“Elánekxa sa' xama cadena, hakte cham'a apkelókxa nak apxámchek apagko' énxet apkelxénamap kóllegássesagkohok eñama apkelnapma apnámakkok, sawhekxók nahan negyennaqteyáseykha egyempehek ma'a tegma apwányam.

²⁴Wának sa' ko'o elxegmak ma'a énxet élmasagcha'a nak apkeltémakxa, wának sa' etnégwak apxanák ma'a tegma apheykegko nak kañe' tegma apwányam. Amasséssók sa' ektémakxa nak apkeleymákpoho m'a kelwesse'e ekha nak kéláyo; wának sa' kólnaqtawássesha m'a apkelpeykessamókxa nak chá'a aqsok apcháyókxa.

²⁵Keytek sa' nepyeseksa m'a nélmenaye ekyawe nak; elchetmok sa' eykhe m'a meyke ektáhakxa nak egwáxok, melwetekxeyk sa' eyke.

²⁶Katekxeyegmohok sa' mók kaxegmak ma'a nenlegeykegkoho ekmaso nak tén han ma'a amya'a ekmaso nak. Kaqhok sa' etegyagkok chá'a Dios appeywa aplegasso yaqwayam yának exekmósek chá'a aqsok; méko sa' xama enxoho apkelmaxnéssesso Dios énxet'ák apagkok apmopwána elxekmósek, méko sa' nahan xama enxoho apkelámha apmonye'e egkések chá'a apkelpeywa.

²⁷Kalapwomok sa' ma'a wesse' apwányam, kayaqháphok sa' apwáxok ma'a aptaqmelchesso nak chá'a apchókxa, elpexyennók sa' apkelaye m'a énxet'ák. Sa' atnéssesek ko'o ekhawo m'a aptamheykegkaxa nak chá'a. Sa' atnéssesek nahan alyekpelkohok ma'a aptamheykegkaxa nak chá'a elyekpelkohok apnámakkok. Keñe sa' elya'ásegwók sektáha ko'o Wesse'.”