Read Lengua Sur Daniel 8 Bible Online

Daniel 8 - Lengua Sur bible

Daniel 8

¹“Ekwet'ak axta makham ko'o mók aqsok sélxekmósso, ko'o Daniel, ekweykmo axta apqántánxo apyeyam apteme wesse' apwányam ma'a Belsasar, natámen axta sekwete sekwanmagko m'a mók axta.

²Neyseksa sekwete axta xa aqsok nak, máxa axta entáhak sekha enxoho m'a tegma apwányam Susa, yókxexma nak Elam, neyáwa nak wátsam Ulai.

³Énmexawók axta makhawo', ekwet'ak axta xama nepkések apkennawók apyagqa m'a neyáwa nak wátsam. Ánet axta han apkepet'ák élwenaqte, axayók axta han tepeykxak xama ekwenaqte agko', kelyeykhágkek axta m'a amonye' élánteyapma.

⁴Ekwet'ak axta chá'a aptégwokmo nepkések apkennawók ma'a ekpayho nak ektaxnegwánxa ekhem, nexcheyha, tén han nepyeyam, méko axta han xama enxoho aqsok nawhak ekmowána kanmexekxa', tén han kagketaxchek aptégwokmo enxoho. Apkelanak axta chá'a m'a apmakókxa enxoho chá'a elána', yágwokmók axta aqsa han apyennaqte.

⁵“Neyseksa élchetagkasso ewáxok axta han ko'o ektáhakxa aqsok sekwete, sekwet'a apxegakmo xama yát'ay apkennawók apkeñama m'a taxnegwánxa ekhem, apkétchekmek axta ekyennaqte agko', maxta axta táhak melteyókmo enxoho xapop. Ekwányam axta apkepetek ekyetno neyseksa apaqta'ák xa yát'ay apkennawo nak,

⁶xama axta eyágketwa'a apyagqakxa m'a nepkések apkennawók ánet apkepet'ák nak, sekwet'a axta ko'o apyagqa m'a nekha wátsam, aptégwokmek axta ekyennaqte

⁷apkelekkexchásawók axta ánet apkepet'ák, axta énnák peya yenmexekxak ma'a nepkések apkennawo nak. Tén axta yát'ay apkennawók apyaqnegkesa náxop ma'a nepkések apkennawo', apkelteyammeyha axta, méko axta yaqwayam enxoho kawagkasek teyp.

⁸“Yágwokmók axta aqsa apyennaqte m'a yát'ay apkennawo', kenteyk axta aqsa han apkepetek ekyawe nak neyseksa ekyágweykmoho apyennaqte, tén axta élántepa cuatro apkepet'ák ekyaqmagkasso m'a ekyawe nak, apkelenmexchásekxók axta m'a éleñamakxa nak chá'a éxchahayam ekyókxoho yókxexma.

⁹Tekkek axta han mók ketsék apkepetek xama m'a apkepet'ák nak, wegqágkek agko' axta han ekpayhémo m'a nepyeyam, tén han ekteyapmakxa ekhem, tén han ma'a ekwesey nak Xapop Ektaqmalma Agko'.

¹⁰Wegqágkek agko' axta, ekwokmoho éltekxekwokmoho m'a ekheykegkaxa nak aqsok élápogwátéyak néten, palchessek axta nápakha yaw'a kelteyammeyha axta,

¹¹wanyeyha axta han ma'a apkemha apmonye' nak élápogwátéyak néten; mágwokmek axta élánamáxche m'a aqsok ektekyawa, élánamáxche nak chá'a yókxoho ekhem, tawáseyha axta m'a kélpeykessamókxa axta chá'a.

¹²Yetlo ekmaso élchetamso awáxok axta han éltamho elpakxenagkok sẽlpextétamo agkok ma'a ektekyómakxa axta chá'a aqsok kélnaqtósso, tegkessek axta m'a aqsok ekmámnaqsoho nak. Kelanak axta ekyókxoho m'a ekmakókxa kalána', tekkessek axta han aqsok élane.

¹³“Keñe axta sekleg'a aptáha apkelmaxneyáncha'a pók Dios apchásenneykha s'e: ‘¿Háxko sa' ekwánxa katnégwók néxa kélmassésseyam élánamáxche m'a aqsok ektekyawa élánamáxche nak chá'a yókxoho ekhem? ¿Háxko sa' ekwánxa katnégwók néxa kélmésso kélnaqtawáseykegkoho m'a Wesse' egegkok énxet'ák apagkok, apheykha nak ma'a tegma appagkanamap apagkok, cham'a ekteme nak ekmaso agko' magya'assáxma?’

¹⁴Aptáhak axta apchátegmowágkokxo s'e: ‘Sa' katnégwók néxa m'a ektáha enxoho dos mil trescientos ekhem tén han axta'a. Keñe sa' kólaxñásekxak ma'a tegma appagkanamap nak.’

¹⁵“Ko'o Daniel, neyseksa séláneykha axta ko'o xa aqsok sekwete nak, tén han séltémo ay'asagkohok ektémakxa, apyephagwa'a emonye' xama aphémo énxet,

¹⁶keñe sekleg'a han xama énxet appeywa eñama m'a ekpayho nak wátsam Ulai, ektáha s'e: ‘Gabriel, eltennásekxoho hana ektémakxa aqsok apwete xa énxet nak.’

¹⁷“Keñe axta sey'awa ko'o m'a. Égwakkassek axta, ekháxahánteyk axta ekwokmoho sektekxeya ekpayhakxa nahát xapop, aptáhak axta seyáneya s'e: ‘Énxet, ey'asagkoho sa' se'e aqsok apwete nak, ekteme m'a ektemegwánxa sa' néxa ekhem.’

¹⁸“Eyapchek axta han ko'o neyseksa sepaqhetchesso, ekyetneyk axta náxop; epaknegwokmók axta eyke sémpásekxo néten,

¹⁹aptáhak axta seyáneya s'e: “Altennaksek sa' ko'o exchep yaqwánxa katnehek ekwokmo sa' néxa aplo m'a Dios, hakte cham'a aqsok apwet'a nak ekteme ektemegwánxa néxa ekhem.

²⁰“Cham'a nepkések apkennawók ánet apkepet'ák nak, apteme m'a kelwesse'e apkelwányam Media tén Persia.

²¹Keñe m'a yát'ay apkennawo apteme m'a wesse' apwányam Grecia, tén ma'a apkepetek ekyawe ekyetnama nak neyseksa apaqta'ák, apteme m'a apkemha apmonye' wesse' apwányam.

²²Keñe m'a cuatro apkepet'ák élántepa axta, énta axta m'a amonye' ekteyapma nak apkepetek, ekteme ekyetchesamaxkoho peya kalántépok makham cuatro aptémakxa nak wesse' apwányam se'e apchókxa nak, megkaxók sa' eyke ekyennaqte m'a ektémakxa axta m'a amonye' axta.

²³“Temégwokmek sa' agkok néxa apkeláneykha xa aptémakxa nak wesse' apwányam ekxámawo agko' enxoho apkeltémakxa ekmaso énxet'ák, eyaqmagkasek sa' apteme wesse' apwányam ma'a megkamayósa nak elanok aqsok apmopwána nak appeywa elyexanchesha pók.

²⁴Apmeyhek sa' etnehek, háwe sa' eyke etnehek apyennaqte apagkok apagko'; emasséssók sa' ekmaso agko' ekyókxoho aqsok, tásek sa' katnehek ekteyapma ekyókxoho aqsok apkelanakxa enxoho. Emasséssók sa' ma'a énxet apkelyennaqte nak tén han apxámokma apagko' ma'a Dios énxet'ák apagkok.

²⁵Tásek sa' katnehek ekteyapma ekyókxoho aqsok apkelane, eñama apmopwána elyexanchesha pók, tén han apteme apmopwána amya'a. Keyxkohok sa' apwáxok, elnápekxak sa' apxámokma m'a énxet'ák ektaqmalma nak apheykha, eñama appelakkassesso chá'a. Yenmexek sa' ma'a kelwesse'e wesse' apagkok nak, emátog sa' eyke.

²⁶“Keñe m'a kélxekmósso exchek ektémakxa chá'a élánamáxche aqsok ektekyawa taxnám tén han axto'o, naqsók ma'a; eyke ná exén nápaqta'awók énxet'ák, hakte katnehek sa' ma'a ekwegqa agko' sa' ekhem.’

²⁷“Ko'o Daniel, eklegágkok axta ekmassa sekyennaqte, yáma wenaqtémók axta han sekháxamáxche'. Tén axta sekhákxo néten sekmákxo makham sektamheykha axta segkésso m'a wesse' apwányam. Temessáseyha agko' axta eyke ko'o ewáxok ma'a aqsok sekwete, hakte axta ay'ásegwokmok.