Read Lengua Sur Oseas 12 Bible Online

Oseas 12 - Lengua Sur bible

Oseas 12

¹Apteykegkek éxchahayam ma'a énxet'ák Efraín: yókxoho ekhem chá'a apkelyetleykha m'a éxchahayam eñama nak ekteyapmakxa ekhem. Apxámáseykekxeyk apkelmopwancha'a amya'a, tén han apkelyennaqteyáseykha chá'a apyempe'ék apnaqtawáseykegkoho apnámakkok, aphéssamók chá'a mók apkelpaqhetchásamákpoho m'a Asiria, apkeláphassegkek chá'a apkelmésso naqsa pexmok égmenek ma'a Egipto.”

²Apxénchásekxók aptémakxa Wesse' egegkok ma'a Israel, ellegássesagkohok sa' Jacob énxet'ák apagkok eñama apkeltémakxa; eyaqmagkásekxak sa' ma'a ektémakxa nak apkeláneyak aqsok.

³ Axayók axta aptemessáseykekxak apepma Jacob ma'a sekxók axta apmáheyo etyamok, keñe axta aptéma apwányam, apkelnápomákpo han ma'a Dios.

⁴Apkelnápomákpek axta han xama Dios apchásenneykha, apwatneyk axta han ma'a Jacob, apwóneyk axta, keñe apkeltamho kapyóshok elano'. Apwetágwokmek axta nahan Dios ma'a Betel, appaqhetchessek axta nahan ma'a.

⁵Wesse' Dios ekha apyennaqte: ¡Wesse' apwányam apwesey m'a!

⁶Israel, ey'ókxa makham Dios apagkok; elána m'a aqsok ekpéwomo nak, tén han magyenyaweykha, ná ey'ássem chá'a Dios apagkok.

⁷Aptáhak Wesse' egegkok se'e: “Apmeykha énxet'ák Canaán ma'a kelyetsáteyak ekmenyexmo nak, hakte atsek chá'a emáwhok emenyexek pók.

⁸Aptáhak Efraín se'e: ¡Naqso', wesse' ko'o ektemék, xámeykekxeyk aqsok ahagkok, méko awanchek ko'o katnehek hexének sekwete aqsok ahagkok eñama sekmenyexeykha!

⁹Wának sa' ko'o makham exek appakxanma, ko'o sektáha nak Wesse' Dios apagkok, eyeynamo m'a aphamakxa axta Egipto, ektéma axta m'a sekxók axta nélwetamaxko m'a yókxexma meykexa nak énxet.

¹⁰“Élpaqhetchessegkek axta ko'o m'a apkellegasso axta sekpeywa, ekxámássessegkek axta aqsok sekxekmósso, ekxeyenmeyk axta ko'o aqsok sekyetcháseykekxoho eñama sélásenneykekxa m'a.

¹¹Heykegkek aqsok kéláyókxa éleñama mók nekha m'a Galaad, aqsok kéláyókxa élmowancha'a amya'a eyke. Kélnapmeyk chá'a weyke kelennay'awók ma'a Guilgal; máxa meteymog ektaháneykekxal'a mók temék apkelwatnamakxa nak chá'a aqsok, neyseksa m'a kélpeyncheyam nak xapop namyep.”

¹²Apkenyegkek axta Jacob apmaheykegko m'a yókxexma Aram. Aptamheykha axta apkeláneykencha'a nepkések ma'a, yaqwayam étak aptáwa'.

¹³Apkelántekkessegkek axta Wesse' egegkok énxet'ák Israel ma'a Egipto, eñama m'a aplegasso nak appeywa; ¡xama aplegasso appeywa axta keñamak apkeláneykencha'a!

¹⁴Aplókassegkek Wesse' egegkok ma'a énxet'ák Efraín, apyentaxnéssessegkek agko' apwáxok. Cháxa keñamak peya nak eyaqmagkásekxak Wesse' egegkok ma'a apkeltémakxa ekmaso agko' nak apkeláneyak, yának sa' kápekxak ma'a apkeltémakxa élmasagcha'a.