Read Lengua Sur Oseas 14 Bible Online

Oseas 14 - Lengua Sur bible

Oseas 14

¹¡Israel, ey'ókxa makham Dios Wesse' apagkok, mey'assáxma axta exchep keñamak aptéyékmo!

²Kólyo'ókxa makham Wesse' egegkok, sa' kóltéhek kólmaxnak se'e ektáha nak: “Ná eyaqmagkásekxa aqsa ekyókxoho nentémakxa mólya'assáxma, ema sa' aqsa yetlo ektaqmeleykha apwáxok se'e nélpeykessamo negmésa nak.

³Mopwanchek negko'o hẽlwagkasek teyp ma'a Asiria, mogwanchek nahan ólxeganmok ólchántek yátnáxeg. Kamaskok sa' kaxwók óltéhek negko'o ‘Dios egagkok’ ma'a aqsok nenlánéyak egagko' nak, hakte xép apwánxa apagkok kóteyágwók ekmayósa kóllanok ma'a élyeheykha nak, xép Wesse'.”

⁴Aptáhak Wesse' egegkok se'e: “Amasséssesek sa' ko'o m'a ektémakxa nak sénmexeykha; alásekhekxohok sa' aqsa makham, megkapayhawok eykhe alásekhekxoho', hakte massék kaxwók séltaqnaweygko.

⁵Máxa yálye apagkok sa' ko'o atnehek ma'a Israel, keñe sa' máxa etnehek ma'a ektémól'a pánaqte exnók éltaqmalmal'a exnók. Kalyeyha'ak sa' katnehek kepmenák, ektéma nak ma'a egkexe Líbano;

⁶kalwegqak sa' aktegák éltaqmalma ektémól'a olivo yámet aktegák, kaxhok sa' ekpaqneyam ma'a ektéma nak yámet cedros élámha nak ma'a Líbano.

⁷Ko'o sa' atnehek makham séltaqmelchesso m'a Israel, keñe sa' exámekxak aptémól'a hótáhap apaktek, máxa anmen yámet élyapwél'a sa' etnahagkok; kapayhekxak sa' apkelwesey, ektémól'a anmen yámet égmenek eñama nak Líbano.

⁸Keñe sa' etnehek Efraín se'e: ‘¡Mómenyeyk ko'o kaxwók ma'a kéleykmássesso!’ ¡Ko'o séláneykha m'a énxet'ák ahagkok tén han séltaqmelchesso! Ko'o sekyetchesamaxkoho m'a yámet pino megkamassegwayam la'a éltaqmalma áwa', ko'o sa' nahan kañék ektaqmalma apheykha énxet'ák ahagkok.”

⁹Kéméxcheyk elya'asagkohok apkelmopwancha'a nak aqsok, tén han ekha nak apkelya'áseyak aqsok se'e amya'a nak: Kelpéwók agko' ámay apagkok ma'a Wesse' egegkok, elyetlók chá'a m'a énxet'ák apkelpéwomo nak, keñe m'a énxet'ák élmasagcha'a nak apkeltémakxa kalpelápagkasek chá'a.