Read Lengua Sur Oseas 6 Bible Online

Oseas 6 - Lengua Sur bible

Oseas 6

¹Kólchexyem kélyókxoho, agyo'ókxak makham Wesse' egegkok. Ẽlekkexmeyk axta negko'o m'a, sa' eyke hẽltaqmelchessók makham ma'a; ẽlyensáseykegkek axta, sa' eyke hẽlpextehetchesek makham nélyense m'a.

²Ekmanyehe agko' sa' hẽlmeyásekxak nélyennaqte, hẽlchampásekxak sa' néten, yaqwayam sa' aghakha nápaqto'.

³¡Ólwasqápekxohok hana agya'ásegwók Wesse' egegkok! Hegyo'ótak sa' negko'o Wesse' egegkok, ektémól'a katyapok ekhem, ektémól'a kamme' kayássesek xapop, ekmáxaqxamakxal'a exma, tén han élyapweykxal'a yenta'a.

⁴Aptáhak Wesse' egegkok se'e: “¿Háxko atnéssesek xép Efraín? ¿Háxko atnéssesek xép Judá? Máxa teyáméten ekteyapmól'a axto'ók kéltemék kéxegke sélásekhayo, tén han yálye ektéyeykmohol'a amonye' élseye ekmanyehe nak chá'a kamaskok.

⁵Cháxa keñamak sekteméssesa nak kélnápakha'a kélketkók, eñama seyásenneykekxa m'a énxet'ák apkellegasso nak sekpeywa, sekpeywa keñamak sélnapma. Máxa élseyéxmal'a temék ekteyapma m'a ektémakxa nak ekpéwomo sektémakxa.

⁶Wánxa eyke aqsa seyámenyého ko'o kéxegke hélásekhoho', maltamhók hélnáhakkasek ma'a aqsok kélnaqtósso; éltamhók kólya'asagkohok sektáha ko'o Dios, maltamhók hélwatnések ma'a aqsok kélnaqtósso.

⁷“Aphawók Adán ma'a énxet'ák ahagkok, meláneykegkok ma'a ekhémo mók nélpaqhetchásamáxkoho ahagkok, eyamasmeyk nahan sélyetleykha.

⁸Énxet'ák élmasagcha'a apkeltémakxa tegma apwányam apagkok ma'a Galaad, apláneyók ma'a énxet'ák apkelnapma nak apnámakkok.

⁹Máxa apkelmenyexma aptamheykegkok apkelhaxneykencha'a chá'a énxet'ák ma'a apkelmaxnéssesso nak énxet'ák ahagkok, yaqhek chá'a énxet'ák ma'a ámay nak Siquem, elanagkok han chá'a m'a aqsok ekmaso agko' nak.

¹⁰Ekweteyak ko'o aqsok ekmaso agko' ma'a Israel: Apkeláneyak aptémakxa megkamopsexta m'a Efraín, apkenyetséssegkek apyempehek ma'a Israel.

¹¹Keñe exchep Judá, ekpekkenchessek ekhem yaqwánxa añássesagkoho'. “Ekyókxoho sekmáheyo chá'a ayaqmagkassesek ektémakxa apheykha m'a Israel,