Read Lengua Sur Oseas 8 Bible Online

Oseas 8 - Lengua Sur bible

Oseas 8

¹“Epáwes apchaqkahasso, aptémól'a m'a énxet apkelhaxneykhal'a nepyeseksa Wesse' egegkok énxet'ák apagkok. Hakte meláneykegkok ekhémo mók nélpaqhetchásamáxkoho ahagkok, apkenmexeykekxeyk ma'a nélxekmowásamáxche ahagkok.

²Keñe aptáha sewóneyncha'a ekyennaqte sey'aweykto s'e: ¡Negya'ásegkók negko'o exchep apteme Israel Dios apagkok!

³Aptaqnagkamchek eyke aqsok ektaqmela m'a énxet'ák Israel, cháxa keñamak peya nak etwássesha chá'a apheykha m'a apkelenmexma nak.

⁴“Meyke séltennasso ko'o apkelyéseykha m'a kelwesse'e apkelwányam apagkok, apkelyéseykha apkelámha apmonye'e apagkok meyke sekya'áseyak ko'o. Apkelmeykha sawo élmope élmomnáwa, tén han sawo ekyátekto ekmomnáwa apagkok yaqwayam elanagkok aqsok apcháyókxa, yaqwayam sa' enaqtawasakpohok apagko'.

⁵Ektaqnagkamók ahagko' ko'o m'a weyke étkok kennawók kéleykmássesso, élpeykessamo nak xeye' Samaria, Ektaqnagkamók ahagko' ko'o m'a. ¿Háxko sa' ekwánxa ekhem kalmópekxak kélyempe'ék kéxegke

⁶israelitas? ¡Háwe Dios ma'a weyke étkok kennawók eñama nak Samaria! Apmopwána apkeleykmassáseykha apkelane xa, nekha'a étkók sa' kóltemessásekxa'.

⁷Apkeneykekxeyk éxchahayam ma'a, éxchahayam ekyennaqte agko' sa' han enakxagkok; méko sa' aqsok elyaqtennagkok ma'a namyep apagkok nak, méko sa' nahan yaqwayam elanagkok hótáhap ma'a apyexna nak; apkelánegkek sa' agkok ma'a hótáhap nak, pók énxet'ák sa' etawagkok.

⁸¡Kélsawhomakyek ma'a Israel! Máxa aqsok meyke eyásekhamaxchel'a aptemék apkelányo m'a pók énxet'ák nak,

⁹eñama apkelye'eykekxa m'a Asiria, máxa m'a yámelyeheykok ekmeymente ekyennaqtél'a ayespok. ¡Apkelméssegkek aqsok apkelmésso naqsa Efraín yaqwayam elmok ma'a apkelásekhayókxa nak!

¹⁰Elmések sa' eykhe aqsok apkelmésso naqsa nepyeseksa m'a pók énxet'ák nak, waxpánchesek sa' eyke ko'o, kanéwhok sa' han metépeykekxa apkelwesse'e apkelwányam, tén han apkelámha apmonye'e apagkok.

¹¹“Apkeláneykegkek Efraín ekxámokma agko' ekwatnamáxchexa aqsok ma'a, wánxa aqsa yaqwayam chá'a elának ma'a melya'assáxma.

¹²Ektáxéssessegkek eykhe ko'o ekxámokma m'a nélxekmowásamáxche ahagkok, máxa aqsok méteya eyke apteméssessók.

¹³Aqsok ektekyawa aqsa apmenyeyk ma'a, keñe elnápok chá'a, etawagkok chá'a ápetek ma'a aqsok ektekyawa nak; megkalchehek eyke chá'a ko'o ewáxok xa aqsok nak, ko'o sektáha nak Wesse'; kaxének sa' ewáxok ma'a apkeltémakxa ekmaso apkeláneyak nak, allegássesagkohok sa' eñama melya'assáxma wának eltaqhohok makham ma'a Egipto.

¹⁴Apkeláneykegkek apxanák apkelyawe m'a Israel, kelwagqeykmek eyke chá'a m'a ektáha nak apkelane. Apkeláneykegkek apxámokma tegma apkelyawe ekyennaqte nak kélhaxtegkáseyak nepyáwa m'a Judá, wáléwássesek sa' eyke ko'o táxa m'a, yaqwayam sa' kalwatnek ma'a apxanák apkelyawe nak.”