Read Lengua Sur Joel 1 Bible Online

Joel 1 - Lengua Sur bible

Joel 1

¹Keso appeywa apkeltennasa axta Wesse' egegkok ma'a Joel, Petuel apketche.

²Kéxegke kélámha kélmonye'e nak, kóltaqmelchesho kélháxenmo s'e, tén han kélyókxoho kélheykha nak apchókxa'. ¿Kélweteyaya axta kéxegke ekhémo xa aqsok nak? ¿Apkelweteyaya nahan ekhémo m'a kélyapmeyk nak?

³Kóltennasha sa' kélketchek, keñe sa' nahan eltennasha apketchek ma'a, tén sa' nahan eltennasha apketchek ma'a appalleyam sa' makham egmonye'.

⁴Aptókagkek sawa' m'a ekyókxoho aqsok kélcheneykekxa': keñe apkelwa'akto makham pók, apsawhawo aptawa m'a apkeláyam axta.

⁵¡Kéxegke, anmen át'ák nak, kólnaqxétekhák! ¡Kóllekxagwaha, kélyeneykegkoho nak vino, hakte kawomhok sa' apkelyamáséyak ma'a anmen yámet ekyexna égmenek!

⁶Máxa sẽlpextétamo apkelyennaqte tén han apxámokmal'a m'a sawa', appayhékxo nak seyókxa, ekhémól'a méwa am'ák, tén han méwa kelwána m'a élyawakxa nak am'ák.

⁷Aptawáseyha negkeneykekxa anmen yámet, apkelekkexchek higo negkeneykekxa'; apkeláxñásekxók apagko', apkelmópesákxók ma'a axchakkok nak.

⁸Máxa kelán'a étkok élekxagweykhal'a apketsapma ekpagkanma, ektaxneykekxal'a apáwa senlapwayam

⁹aptamhágkok apkellekxagweyncha'a m'a apkelmaxnéssesso Dios énxet'ák apagkok, hakte méko entáhak aqsok ekyexna kélcheneykekxa m'a tegma appagkanamap nak, tén han anmen yámet égmenek, yaqwayam kólmések chá'a Wesse' egegkok.

¹⁰Meyke aqsok táhak ma'a namyep; yaqhapchek exma'. Apkelepsagkek ma'a hótáhap apaktek, kelyameygkek ma'a anmen yámet, apák entáhak ma'a olivos.

¹¹Kéxegke kéltamheykha nak chá'a namyep, tén han kélcheneykekxexa nak chá'a anmen yámet, kóllekxagwaha yetlo ekyentaxnamo agko' kélwáxok, hakte kelesagkek ma'a aqsok kélcheneykekxa, tén han ma'a kélnakxo nak hótáhap apaktek, tén han ma'a apho nak hótáhap.

¹²Kelyameygkek ma'a anmen yámet kélcheneykekxa, tén han higo yámet. Kelyameygkek nahan ma'a yántakyexna, tén han áxa, tén han manzano awhók, keñe han ma'a ekyókxoho yenta'a nak yókxexma. ¡Massegwokmek élpayheykekxa apkelwáxok ma'a apyókxoho énxet'ák!

¹³Kéxegke kélmaxnéssesso nak chá'a Dios énxet'ák apagkok, kéltamheykha nak chá'a ekwatnamáxchexa aqsok, kólántaxnekxa apáwa sẽlwáxaqxo nak, kóllekxagwaha yetlo éllapwámeyak, hakte méko entáhak aqsok kélcheneykekxa ekyexna m'a Dios nak tegma appagkanamap apagkok, tén han vino yaqwayam kóltéhek kélmésso naqsa Dios.

¹⁴Kóláneyha énxet'ák, kóltennés peya megkóltawagkehek kéltéyak; kólánchásekxa apkelámha apmonye'e m'a Dios Wesse' kélagkok nak tegma appagkanamap apagkok, tén han ma'a apyókxoho énxet'ák apheykha nak kañe' negókxa, kólwónmakha sa' Wesse' egegkok.

¹⁵¡Cha'asagko nak la'a, chágketwa'ak Wesse' egegkok ekhem apagkok! ¡Ekhem ekyentaxno, eksáyam nak sẽlmassésseyam, segáphássesso nak ma'a ekha nak Apyennaqte!

¹⁶Negaqta'awók negko'o ẽlyementamágkok nentéyak, massegwokmek élpayheykekxa egwáxok ma'a Dios egagkok nak tegma appagkanamap apagkok.

¹⁷Kelyamágwokmek aqsok aktek ma'a kélmétegkáseyak nak kélcheneykekxa', apkelepsagkek ma'a hótáhap apaktek, kelesagkek nahan ma'a kélxátamakxa nak chá'a.

¹⁸¡Kelpáwaha kélnaqtósso! Chaqhók ektegyágko pa'at weyke; apkeletsekkek ma'a nepkések.

¹⁹¡Ekwóneyha ko'o exchep, Wesse', hakte kelwatneyk táxa pa'at ma'a yókxexma meykexa nak énxet, tén han yenta'a m'a yókxexma!

²⁰¡Wokmók xép ekwóneykha m'a aqsok nawha'ák, hakte kelyameygkek ma'a alwáta nak, kelwatneyk táxa m'a pa'at nak!