Read Lengua Sur Joel 2 Bible Online

Joel 2 - Lengua Sur bible

Joel 2

¹Kólpáwés kélaqkahasso m'a egkexe Sión; kólpáwés kélaqkahasso éltennasso nak énxet'ák ma'a Wesse' egegkok nak egkexe ekpagkanamaxchexa apagkok. Kólpexyennem kélaye kélyókxoho kélheykha nak Judá, hakte chágketwa'ak Wesse' egegkok ekhem apagkok:

²ekhem ekyáqtésso exma tén han ekho axta'a, yaphope ekyentaxno ekho pessesse. Apsawhawók sẽlpextétamo apkelyennaqte, tén han apxámokma m'a néten egkexe nak, máxa aptáhak ma'a ektémól'a ekyetcheyam la'a amonye' élseye. Megkótémaxchek chá'a katnehek nanók axta xa ektéma nak, megkólwetekxók sa' nahan chá'a katnekxa'.

³Máxa m'a táxa eksawhomól'a kalwatnek ekyókxoho aqsok élwatnamól'a amonye' ekyeykhe; keñe ekwatneykekxohol'a ekyeyk'a enxoho. Yókxexma ektaqmalma axta sekxók megkawánxa táxa, keñe ekyeyk'a ektamhákxo m'a ektémól'a yókxexma meykexa énxet. ¡Méko xama aqsok enxoho apcháyam!

⁴Máxa axta yátnáxeg ma'a, máxa axta han yátnáxeg apkelchántel'a enaqtégkesagkok apkelchánte m'a apkenyehéyak

⁵máxa axta han yátnáxeg apkelyenyawasso éxtegyawasso kélanchessól'a kempakhakma apkextegyawasso apkelnextega enxoho m'a néten nak egkexe, máxa axta m'a yámet áwa' apák élenmagéyak la'a kalwatnek táxa. Máxa axta m'a sẽlpextétamo apkelyennaqte apkeleyweykekxal'a apkelxega kempakhakma.

⁶Apkelpexyennegkek apkelaye apkelwet'a énxet'ák, kelmópeykxeyk nápaqta'a apyókxoho.

⁷Máxa kempakhakma yapmeyk megyeyél'a elmahagkok eyesagkexa m'a apkenyehéyak, apkelápxegál'a meteymog kélhaxta nepyáwa tegma, meltaqhegwayam la'a apkelxega meyke apkelyetnakhágwayam.

⁸Meltégwakpehek han chá'a; elxog aqsa chá'a, elápxegagkok aqsa neyseksa yágke aktek, meyke apkexpánwayam.

⁹Ektamagkok chá'a tegma apwányam, elápxog chá'a m'a néten nak meteymog kélhaxtegkesso tegma, elchántek chá'a tegma, máxa apkelmenyexma chá'a etnehek elántexek ma'a malagwa'a átog étkók nak.

¹⁰Kayawheykha chá'a xapop apmonye'e, kapexyennamok han chá'a m'a néten, kapeysemekxak chá'a ekhem, tén han pelten, kamaskok chá'a elápogwátek yaw'a.

¹¹Kaxtegyók chá'a appeywa Wesse' egegkok epaqmétek apmonye'e nak sẽlpextétamo apagkok. Apxámok apagko' ma'a sẽlpextétamo apagkok; mogwanchek ólyetsetek ma'a apkelyaheykekxoho nak chá'a appeywa. ¡Yentexók agko' Wesse' egegkok ekhem apagkok! Méko awanchek kalenmaxaxkoho'.

¹²“Aptáhak makham segáneya Wesse' egegkok se'e: hélyo'óta ko'o yetlo ekmámenyého agko' kélwáxok. ¡Nágkóltaw kéltéyak, kólwehesha, kóllekxagwaha!”

¹³¡Kólyo'ókxa makham kéxegke Dios Wesse' kélagkok, yetlo ekmámenyého kélwáxok, kólyápet kélwáxok, nágkólyápet ma'a kélántaxno! Hakte Wesse' egegkok apteme ektaqmeleykha apwáxok henlano', tén han apmopyósa henlano', mepekhésamap, awanhek han segásekhayo, elwátéssamhok chá'a yaqwánxa etnehek senlegassáseykegkoho.

¹⁴Lapmaxcheyk mellegássesagkók kéxegke, yáphássesek ektaqmalma kélheykha, elmések ma'a aqsok ekyexna kélcheneykekxa, tén han vino, yaqwayam kóltéhek kélmésso naqsa Dios Wesse' kélagkok.

¹⁵¡Kólpáwes kélaqkahasso m'a egkexe Sión! Kóláneyha énxet'ák, kóltennés peya megkóltawagkehek kéltéyak;

¹⁶kólánchásekxa Dios énxet'ák apagkok, kóllánekxés aptamhágkaxa; kólánchásekxa apkelwányam, tén han sakcha'áletkók, ekweykekxoho m'a sakcha'a keyetse megkalyamasma nak makham neme. ¡Ekweykekxoho han ma'a kaxwe élyamhápeyak nak, elántépok sa' ma'a kañe' nak apxanák!

¹⁷Kóllekxagwaha apkelmaxnéssesso énxet'ák ahagkok, apkeltamheykha nak chá'a sekhakxa ko'o sektáha nak Wesse', kólteme kólpaqmétek émha amonye' apwáxok nak tegma appagkanamap, tén han élwatnamáxchexa nak aqsok se'e: “Wesse', elásekhekxoho énxet'ák apagkok; nágyoho aqsa ey'ássók xama énxet enxoho m'a énxet'ák apagkok; nágyoho enaqtawasagkohok ma'a pók énxet'ák nak, nágyoho etnehek énxet melya'áseyak nak xép se'e: ¿Háxko aphakxa Dios apagkok?”

¹⁸Tén axta Wesse' egegkok apchásekhákxoho m'a apchókxa' nak; apyósekak axta apkelano énxet'ák apagkok,

¹⁹aptáha s'e: “Wáphássesek sa' ko'o kéxegke hótáhap apaktek, tén han vino, tén han pexmok égmenek, ekwokmoho kélyaqkanakmo; magwohók sa' kaxwók elya'ássók kéxegke m'a énxet'ák mehey'áseyak nak ko'o.

²⁰Amenxenchesek sa' kéxegke m'a sawa' apkeleñama nak nexcheyha, yókxexma meykexa énxet sa' akxakhagwók. Alweykesagkok sa' kañe' Wátsam Ekwányam Étsapma m'a apkelxegáyam nak apmonye'e, tén sa' ma'a apkelxegáyam nak axayo', alweykesagkok ma'a wátsam ekwányam Mediterráneo, kaltepelchexchek sa' apkelyókxa', kaltahápok sa' nahan. ¡Alának sa' ko'o ekyawe agko' aqsok!”

²¹Xapop, kapayhekxa agko' awáxok, nágké', hakte Wesse' egegkok peyk elának ekyawe agko' aqsok.

²²Aqsok nawha'ák, nágkóle', hakte kaltaqmelagkokxak sa' pa'at, keyxek sa' nahan yenta'a, xámok sa' katnehek higo ekyexna, tén han anmen yámet ekyexna.

²³¡Kalpayhekxa kélwáxok, kéxegke kélheykha nak Sión, kalpayhekxa kélwáxok eñama m'a Dios Wesse' kélagkok! Apméssek kéxegke ekmámeye ekweyktamxal'a chá'a, cham'a ekmámeye ekweyktámhol'a chá'a apmopsamágekxa nak, tén han ma'a élyapweykxal'a, aptémakxa axta chá'a m'a nanók axta.

²⁴Apxámok sa' etnehek apnakxamap hótáhap apaktek, awanhek sa' han katnehek ma'a vino, tén han pexmok égmenek.

²⁵“Ayaqmagkassásekxak sa' ko'o kéxegke m'a kélcheneykekxa ekmasagko axta, eñama sawa' aptókasso, cham'a sawa' apxámokma aptawáseykha nak aqsok, seyáphassama axta kélnepyeseksa kéxegke.

²⁶Kóltawagkok sa' kéltéyak kéxegke ekwokmoho kélyaqkanakmo, kólteméssesek sa' nahan apcheymákpoho Dios Wesse' kélagkok, hakte élánéssegkek ko'o kéxegke ekyawe agko' aqsok ektaqmalma nak. Kamaskok agko' sa' elmegqeyk ma'a énxet'ák ahagkok,

²⁷keñe sa' kéxegke israelitas, kólya'asagkohok sekha ko'o kélnepyeseksa kéxegke, ko'o sektáha nak Wesse', sektáha ko'o Dios kélagkok, méko pók enxoho. ¡Kamaskok agko' sa' elmegqeyk ma'a énxet'ák ahagkok!

²⁸“Almésagkok sa' ko'o apyókxoho énxet'ák espíritu ahagkok, natámen xa aqsok nak: eltennaha sa' chá'a sekpeywa m'a kélketchek apkelennay'a nak, tén han ma'a kelwán'ák nak, kaxek sa' chá'a apkelwanmagko m'a apkelwányam nak, keñe sa' chá'a apketkók nak elwetak chá'a m'a aqsok kélxekmóssamo nak.

²⁹Almésagkok sa' han espíritu ahagkok ma'a séláneykha apkelennay'a nak, tén han ma'a kelwán'ák nak, cháxa ekhem nak;

³⁰axekmósek sa' ko'o aqsok sempelakkasso nak agwetak ma'a néten, keñe sa' náxop axekmósek ma'a éma, táxa, tén han éten ekpánma.

³¹Kapeysemekxak sa' ekhem, keñe sa' pelten etnekxak apyexwase ektémól'a éma, amonye' ekwayam ma'a Wesse' egegkok ekhem apagkok, ekhem ekwányam sa' nahan, tén han ekyentaxno.”

³² Apyókxoho énxet ektáha nak sewóneykha, ko'o sektáha nak Wesse', ewagkasakpok sa' teyp ma'a nétsapmakxa nak, hakte keytek sa' nélwagkásamáxche teyp ma'a egkexe Sión, Jerusalén nak, apkeltennassamakxa axta katnehek ma'a Wesse' egegkok. Meletsepek sa' ma'a ektáha nak apkelyéseykha.