Read Lengua Sur Amós 2 Bible Online

Amós 2 - Lengua Sur bible

Amós 2

¹Aptáhak Wesse' egegkok se'e: “Xámók agko' apkeláneyak apkeltémakxa ekmaso m'a énxet'ák Moab, megkatnehek sa' mallegassáseykegkoho; hakte apkelwatneykekxeyk apexchakkok ma'a wesse' apwányam Edom, ekwokmoho ektamhákxo táhap.

²Cháxa keñamak peya nak ko'o awatnek ma'a yókxexma Moab, kamasséssók sa' tegma apkelyawe nak Queriot xa táxa nak, eletsapok sa' moabitas neyseksa élpayheykha apatña'ák énxet'ák kempakhakma, tén han neyseksa kélpáwasso m'a kélaqkahasso.

³¡Amasséssók sa' ko'o wesse' apwányam nepyeseksa énxet'ák apagkok; waqhek sa' yetlo énxet'ák apagkok ekha nak kéláyo!” Wesse' egegkok apxeyenma xa.

⁴Aptáhak Wesse' egegkok se'e: “Xámók agko' apkeláneyak apkeltémakxa ekmaso m'a énxet'ák Judá, megkatnehek sa' mallegassáseykegkoho; hakte aptaqnagkamchek ma'a nélxekmowásamáxche ahagkok, ko'o sektáha nak Wesse' apagkok, melyaheykekxak ma'a segánamakxa ahagkok nak, apkelpeykessamók aqsa chá'a m'a kéleykmássesso apkelpeykessamo axta chá'a m'a apyapmeyk nano'.

⁵Cháxa keñamak peya nak ko'o awatnek ma'a Judá, kamasséssók sa' tegma apkelyawe nak Jerusalén xa táxa nak.”

⁶Aptáhak Wesse' egegkok se'e: “Xámók agko' apkeláneyak apkeltémakxa ekmaso m'a énxet'ák Israel, megkatnehek sa' mallegassáseykegkoho; hakte apkexeykekxeyk chá'a apyaqmagkáseykekxo selyaqye m'a énxet'ák meyke nak apkeltémakxa, keñe m'a énxet'ák apkelmopyóseka nak apkelyaqmagkáseykekxo chá'a kéltéto kélmagkok.

⁷Máxa xapop nélteyammeykha apteméssessók apnaqtawáseykegkoho m'a énxet'ák apkelmopyóseka nak, mepékessessók chá'a apkelánekxésso amya'a m'a meyke nak ekpasmo. Apkelyaqmagkásamákpek chá'a appathetéyak xama kelán'a m'a apyáp tén han apketche, aptawáseykha chá'a sekwesey ekpagkanamaxche aptamhéyak xa ektáha nak.

⁸Exnagkok chá'a néten apáwa kélmésso nak chá'a sekxók ekyaqmageykekxa aqsok apagkok kélmassáseykha, epasmok etawagkok ma'a nento kéllánesso nak aqsok kéleykmássesso; etegyagkok chá'a anmen yámet égmenek ma'a selyaqye apkelhaxyawassáseyak nak chá'a apnámakkok meykexho aptamhágkaxa, énagkok chá'a m'a apkelpeykessamókxa nak aqsok apcháyókxa.

⁹Ekmassesseykmek axta eyke ko'o kélmonye'e kéxegke m'a amorreos; ekmassesseykmek axta apyókxoho, aphawók axta eykhe apkelwenaqte yámet cedros ma'a, aphawók axta eykhe apkelyennaqte m'a yámet robles.

¹⁰Élántekkessegkek axta eyke ko'o kéxegke m'a Egipto, eknaqleykha axta ekweykmoho cuarenta apyeyam ma'a yókxexma meykexa nak énxet, yaqwayam enxoho agkések kéxegke xapop apagkok nak ma'a énxet'ák nak.

¹¹Israelitas, élyéseykha axta nahan ko'o kélnepyeseksa kéxegke kélketchek sektemessáseykegko apkellegasso sekpeywa, keñe nahan nápakha nazareos.” Wesse' egegkok apxeyenma xa.

¹²“Kéleykegkek axta eyke kéxegke anmen yámet égmenek ma'a nazareos, keñe axta megkólhayo ellegaksek sekwesey m'a apkellegasso axta sekpeywa.

¹³Allegássesagkohok sa' kaxwók ko'óxa kéxegke ekyentaxno agko', kólesñaha sa', ektémól'a kalesñaha yátnáxeg apyenyawasso awhak eywok ekláneyo hótáhap apaktek.

¹⁴Megyegketakpek sa' ma'a apyennaqte nak apkenye; kamaskok sa' apyennaqte m'a ekha nak apyennaqte, mewagkasakpek sa' teyp ma'a megyeye nak emhagkok eyesagkexa.

¹⁵Melenmaxakpek sa' ma'a apmeykha nak yágke, melwagkasakpek sa' teyp ma'a apkelyennaqte nak apkenyahéyak, tén han ma'a apchánte nak yátnáxeg yenyehek.

¹⁶Kawomhok sa' kempakhakma yapmeyk megyeye nak elmahagkok eyesagkexa ekxeygkok apkelmeykha xa ekhem nak, yaqwayam enxoho yenyahagkok.” Wesse' egegkok apxeyenma xa.