Read Lengua Sur Jonás 1 Bible Online

Jonás 1 - Lengua Sur bible

Jonás 1

¹Appaqhetchessek axta Wesse' egegkok Jonás, apketche nak Amitai. Aptáhak axta apcháneya s'e:

²“Emhók sa' tegma apwányam Nínive, eltennés sa' peya ko'o amasséssók ma'a, hakte wa'ak ko'o amya'a sekhakxa ektémakxa melya'assáxma.”

³Axta eyke elyahákxohok Jonás, xénchek axta aqsa apwáxok éxánegkesek Wesse' egegkok, tén axta apmahágko m'a ekhágweyktamxa axta chá'a yántakpayhe tegma apwányam Jope. Apwetágwokmek axta xama yántakpayhe ketók ekteyapmakxa ekmako kamhagkok ma'a Tarsis; apyánmagkassek axta apchánta apmako emhagkok ma'a.

⁴Aptekkessek axta eyke éxchahayam ekyennaqte agko' Wesse' egegkok ma'a neysekso nak wátsam ekwányam, yetlo élyaqyahayam élyawe agko' yegmen. Máxa axta entáhak peya enxoho katnéssesek nekha'a étkók yántakpayhe.

⁵Keñe m'a ektáha nak apkeltamheykha yántakpayhe, awanhek axta apkelyegwakto, apsawhékpók axta apkelmaxneyágko m'a aqsok apcháyókxa nak chá'a. Keñe axta apmako yexyawásekxak yántakpayhe, apkexénteyk axta wátsam ekwányam ma'a ekyókxoho aqsok apkelseykha axta. Apmeyánteyk axta Jonás kóneg ekheykegkaxa nak aqsok neyseksa ekteme xa; axta apteyenwokmok ekyentaxno agko' ma'a.

⁶Keñe axta apkemha apmonye' nak yántakpayhe apmahágko m'a aphakxa axta Jonás, aptáha apcháneya s'e: —¿Yaqsa apkelana exchep se'e tén áto'? ¡Exatakha', elmaxna exchep xa Dios apagkok! Lapmaxcheyk sa' hempasmok hẽlwagkasek teyp negko'o.

⁷Tén axta m'a aptáha chá'a apcháneya pók apkeltamheykha nak yántakpayhe s'e: —Antawaksek xama aqsok, yaqwayam enxoho agya'asagkohok ektáha sensexnenagko. Aptawásegkek axta xama aqsok, tén axta ekpehewokmo apkelsexnenagko m'a Jonás.

⁸Keñe axta kéltáha kéláneya s'e: —Hẽltennés hana, yaqsa kexaha ektáha sentemegwokmoho nak negko'o exma ¿Yaqsa aptamheykha apmeyókmo exchep se'e? ¿Háxko nahan apkeñamakxa? ¿Háxko nahan ekpayhókxa apchókxa? ¿Yaqsa énxet xép?

⁹Aptáhak axta Jonás apchátegmowágko s'e: —Ko'o hebreo, élpeykessamok ko'o m'a Wesse' Dios apha nak néten, apkelane nak wátsam ekwányam, tén han náxop.

¹⁰Apkeltennáseyha axta Jonás apkeltamheykha nak yántakpayhe apyexánegkesa m'a Wesse' egegkok. Xama axta apkelleg'a xa, apkelwet'ak axta ekyágwokmoho eyáhapwa'a yegmen ma'a wátsam ekwányam, apkelyegwakkók apagko' axta, tén axta aptáha apkelmaxneyeyncha'a s'e: —¿Yaqsa ektáha aptáha nak xa? ¿Háxko eyke negko'o anteméssesek xép yaqwayam enxoho kawanmeyekxak yegmen wátsam ekwányam?

¹²—Hélyenyenta wátsam ekwányam, tén sa' kawanmeyekxak yegmen —axta aptáhak Jonás apchátegmowágko—. Ko'o keñamak xa éxchahayam ekyennaqte agko' nak, eyáhapwa'a nak kéxegke.

¹³Apkelwasqápeykxók axta eykhe apkeltamheykha nak apmako ey'ásekxak neyáwa m'a yántakpayhe, mopwancha'ak axta eyke, hakte yágwokmók agko' axta eyáhapwe yegmen.

¹⁴Keñe axta aptáha apkelmaxneya Wesse' egegkok se'e: “Wesse', nágyoho aqsa negko'o agmaskok eñama s'e énxet nak. Méko sa' agkok aptémakxa, ná hempehésseta aqsa negko'o m'a apketsapa enxoho, hakte xép Wesse', elának chá'a exchep ma'a apmakókxa enxoho elána'.”

¹⁵Kélyenyenteyk axta wátsam ekwányam Jonás natámen apteme apkelpeywa xa, tén axta ekwanmeyákxo yegmen ma'a wátsam ekwányam nak.

¹⁶Xama axta apkelwet'a ektáhakxa m'a apkeltamheykha nak yántakpayhe, apkelakawók apagko' axta Wesse' egegkok, tén axta apkelmésa aqsok apnaqtósso apkelnapma, apméssek axta nahan apkelpeywa apmako chá'a etnehek apkeláyo.

¹⁷Apcháphássek axta eyke xama kelasma ekyawe Wesse' egegkok, yaqwayam kanaqsapok Jonás. Ántánxo ekhem axta apha Jonás ma'a kañe' kelasma ekyawe awáxok tén han ántánxo axta'a.